Luka 2
2
Kuzhalwa kwaka Jeso
(Matayo 1:18-25)
1Mu mazuba azo Agasitasi Kaisala muleli mukando wa Loma wakabika mulawo wakuti bantu boonse bali mubulelo bwa Loma babalwe. 2Ciindi kubalwa koku kwa kutaanguna nikwakacitwa, Koneliyasi nguwakaakuli mweendelezhi mukando wa cishi ca Siliya. 3Inzho bantu boonse bakaya kulembwa kuminzhi yabo. 4Aze Jozefu wakahwa ku munzhi wa Nazanleta mucishi ca Galilaya. Wakaya ku munzhi wa Devidi uutewa ati Betelehemu, mucishi ca Judiya kaambo kali wa luhubo lwa mwami Devidi. 5Wakaya kwaamba akalembwe antoomwi u Maliya, mukaintu ngwaakaakusesele. Ciindi ceco Maliya kemishi. 6Nibakaakucili koko, mazuba aakutumbuka aka Maliya akashika. 7Wakazhala mwana wakwiiya mweembezhi. Wakamuzambaila masani wamooneka mukato kalila iŋombe muluba, kaambo bakabula busena muŋanda ya beenzu.
Beembezhi u Baanjelo
8Kubuzuba bobo ciindi ca mashiku kakuli beembezhi bakaakuwilile, kabeembela imbelele kulutanga. 9Ngoonaawo anjelo wa Mwami wakalibonya nkubabele, bulemu bwa Mwami bwakamunika kuzhinguluka ngubaakubele bwakatuba buu! Nibakabona ceci bakatiya cini cini. 10Pele anjelo wakabaambila ati, “Mutatiyi, amubone ndamuletela Makani Mabotu a kaabotela bantu boonse. 11Ubwasunu mu Betelehemu, mu munzhi wa Devidi, mufwutuli ngumwakashomezhewa wazhalwa, ngu Kilisito#2:11 Kilisito:Izhina lya Kilisito lilaamba Munanike wa Leza wakashomezhewa. Mwami wenu. 12Inzho nciceci citondezho, mulakayana mwana mutece muzambaile umasani ulilele mukato kalila iŋombe.” 13Aciindi ngoonaawo kwakabonwa ikamu lya baanjelo kwizeulu antoomwi u anjelo mukando balatembaula Leza ati,
14“Natembaulwe Leza wezeulu lyamazeulu.
Awo anshi naabe luumuno akati ka bantu babo Leza mbaabotelwa.”
15Baanjelo nibakabweela kwizeulu, beembezhi bakashimwizhanya ati, “Atufwambaane katuya ku Betelehemu tukabone cintu ceci cacitika ncaatushimwina Mwami.”
16Bakaya ca kufwambaana, bakayana Maliya u Jozefu u mwana Jeso ulilele mukato kalila iŋombe. 17Inzho beembezhi nibakamubona, bakakanana makani oonse ngaakabashimwina anjelo kukaambo ka mwana wezo. 18Bantu boonse nibakateelela shakaamba beembezhi, bakazoowa cini cini. 19Maliya wiina naakashiluba shintu shoonse sheshi, ulimwi kashitweluka cini cini. 20Beembezhi bakapiluka, kabaya butembaula Leza u kumupa bulemu, ukaambo ka shintu shoonse nshibakateelela u kubona. Kashili umbona mbwakabashimwina anjelo.
Jeso Waulikwa
21 #
Bale 12:3;
Lk 1:31
Mwana naakakwata mazuba ali lusele kuhwa ukuzhalwa kwakwe, wakapalulwa, ukuulikwa izhina lya Jeso. Leli ndiizhina ndyakapewa kwa anjelo katana ukumitwa.
Jeso Watolwa Muŋanda ya Leza
22Ciindi cakusalazha ba Jozefu u Maliya nicakashika, kwiingainya u malailile azo Leza ngaakapa Mozesi, bakatola mwana ku Jelusalemu kwaamba bakamushishe ku bushu bwa Mwami, 23#Kul 13:2, 12nkaambo mbukulembelwe mu mulawo wa Leza ati, “Mwana woonse mweembezhi mutaanzhi ulyeelele kutolwa kwa Leza” 24#Bale 12:6-8Bakatola cipaizho kwiingaina u mulawo wa Mwami mbuwamba ati balyeelele kutola inzhiba shobile naa bana bankwilimba bobile.
25Inzho mu Jelusalemu kamuli mulombwana wakaakutewa ati Simiyoni. Kali muntu uuzwile Moza Usalala ulimwi wakaakucita shizanda Leza. Wakaakulanjila lufwutuko lwa ba Izilaili. 26Ulimwi Moza Usalala wakamushomezha ati, takafwi katana kumubona Kilisito Munanike wa Leza. 27Simiyoni wakasololelwa u Moza Usalala, wakenjila muŋanda ya Leza, ciindi ushi u baina Jeso nibakamunjizha kwaamba bacite caamba mulawo. 28Simiyoni wakamubweza mwana wamufwumbatila mu matashi akwe wakakanka kutembaula Leza ati,
29“Mwami cini cini wabamba cishomezho cako,
inzho ndimuzhice wako ndakonzha kufwa muluumuno,
30nkaambo menso angu amubona mufwutuli.
31Wezo nguwatuma ku bantu boonse.
32 #
Aiz 42:6; 49:6; 52:10 Wezu ngu mumuni uuzubulula luzando lwako ku bantu bakunze, nguumunicila bantu ba Izilaili.”
33Ushi u baina Jeso bakazoowa cini cini nibakateelela nshakaamba Simiyoni ku makani aka Jeso. 34Ngoonaawo Simiyoni wakabalonjezha u kwaambila Maliya ati, “Wezu mwana wakasalwa kwiza kucina u kubusha bantu banji banji mu Izilaili. Ulakaba cizhibisho ncaakatuma Leza ceco bantu banji banji ncibakaasampaula. 35Ubobo matelaishi ali mu myonzo yabo alakazubululwa. Inzho uwe Maliya, mause alakakuyasa ku monzo ukoya iceba lilampa.”
Bushinshimi bwaka Ana
36Kakuli mukaintu mushinshimi wakaakuli mukamufwu. Izhina lyakwe kali Ana mwanakwe Faniwelo, wamushobo wa Asha. Wakatwalwa kacili nakalindu. Wakakala bulyo myaka iili ciloba umulumyaakwe, inzho kali mucembele. 37Ku ciindi ceco kakwete myaka iili makumi ali lusele iitwesha yone. Katamuhwi muŋanda ya Leza muunza u mashiku kakomba Leza ukuliimya kulya. 38Ku ciindi ncicona ceco Jeso naakaletwa muŋanda ya Leza, aze Ana wakashika, wakalumba Leza wakaamba makani a mwana kuli babo bakaakulindila kunununwa kwa Jelusalemu.
Kubweela ku Nanzaleta
39 #
Mat 2:23
Nibakamana kucita shintu shoonse kwingaina umbushakaambwa mu mulawo wa Leza, bakabweela ku munzhi wabo waku Nanzaleta uuli mucishi ca Galilaya. 40Inzho mwana wakakomena wazuma waba iinsana, kazwile busongo ulimwi kakwete shileleko sha Leza.
Mweembezhi Jeso Muŋanda ya Leza
41 #
Kul 12:1-27; Ciz 16:1-8 Ushi u baina Jeso kabaya ku Jelusalemu amwaka u mwaka kwipobwe lya kwiitilila 42Ciindi Jeso naakaakukwete myaka iili ikumi iitwesha yobile, bakaya kwipobwe umbona mbubakaakucita lyoonse. 43Nilyakamana ipobwe, bakapiluka ku Nanzaleta, pele Jeso wakashaala mu Jelusalemu. Ushi u baina Jeso kabatezhi bobo. 44Kabatelaika ati uli akati ka bantu u beenzhiina. Bakeenda mushinzo wa buzuba bomwi. Inzho bakakanka kumukapula akati kabasazhinokwabo ubeezhinokwabo. 45Nibatakamuyana, bakabweela ku Jelusalemu kuya kumukapula. 46Nibakamukapula kwa mazuba ali otatwe bakaya kumuyana muŋanda ya Leza, ulishite akati kaba maayi ba mulawo, ulateelela mbubakaakukanana ukubabuzha mibuzho. 47Bantu boonse bakateelela kwiingula kwakwe kwa busongo bakazoowa cini cini. 48Inzho nibakamuyana bakazoowa. Baina wakamwaambila ati, “Mwanangu, no ncinzhi nciwatucitila bolya? Bona ume uuso twafwa kukapula, ulimwi twaakupengele cini cini.”
49Jeso wakabaingula ati, “No mwaakunkapulilanzhi? Sa kamutezhi ati ume ndyeelele kuba muŋanda yaka Taata?” 50Pele kwiina nibakateelela ncakaakwaamba.
51Inzho Jeso wakayaabo ku munzhi wa Nanzaleta, ulimwi kabalemeka u kucita nshibamwaambila. Pele baina wakashizobola shintu shoonse sheshi mu monzo wakwe. 52#1 Sam 2:26; Tush 3:4Inzho Jeso kaya bukomena mu maanu umucimo, ulimwi wakaba mwana uufwinwi kwa Leza uku bantu.
Tans Gekies:
Luka 2: ILL
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Ila New Testament © Bible Society of Zambia, 2015.