Malaquías 4
KEK
4
Li Dios naxsach ruheb li incꞌaꞌ useb xnaꞌleb
1Li Ka̱cuaꞌ Dios quixye: —Relic chi ya̱l cuulac re xkꞌehil nak la̱in tinrakok a̱tin. Chanchan li xam li cuan saꞌ li horno nak tinrakok a̱tin saꞌ xbe̱neb li tenamit. Aran teꞌosokꞌ li nequeꞌxnimobresi ribeb joꞌqueb ajcuiꞌ li nequeꞌba̱nun ma̱usilal. Chanchanakeb li qꞌuim nak teꞌcꞌatk saꞌ li cutan aꞌan. Ut ma̱ jun chic teꞌcolekꞌ. 2Abanan chokꞌ e̱re la̱ex li nequexucua cuu, lix cꞌulunic li tintakla chanchan nak yo̱ chi e̱lc chak li sakꞌe xban li ti̱quilal li tixcꞌam chak chokꞌ e̱re. Texpiscꞌok xban xsahil le̱ chꞌo̱l joꞌ nak nequeꞌpiscꞌoc li queto̱mk nak nequeꞌel saꞌ lix corraleb. 3Saꞌ li cutan aꞌan, la̱in tinqꞌueheb li incꞌaꞌ useb xnaꞌleb rubel le̱ cuanquil la̱ex. Chanchanakeb chic li poks li nequeyekꞌi saꞌ e̱rok. 4Misach saꞌ e̱chꞌo̱l li chakꞌrab li quinqꞌue re laj Moisés laj cꞌanjel chicuu saꞌ xbe̱n li tzu̱l Horeb li quinqꞌue e̱re che̱junilex la̱ex aj Israel. 5Relic chi ya̱l la̱in tintakla li profeta Elías e̱riqꞌuin nak toj ma̱jiꞌ nacuulac xkꞌehil nak tinrakok a̱tin. Li cutan aꞌan kꞌaxal lokꞌ, abanan kꞌaxal xiu xiu ajcuiꞌ. 6Aꞌan tixtenkꞌaheb li yucuaꞌbej ut li alalbej re nak teꞌxcꞌam cuiꞌchic rib saꞌ usilal. Ut cui incꞌaꞌ teꞌxcꞌam ribeb saꞌ usilal, la̱in tinsach ruheb ut tintzꞌekta̱na lix naꞌajeb, chan li Ka̱cuaꞌ li nimajcual Dios.

© Wycliffe Bible Translators, 2019

Vind meer uit oorLi Santil hu