Malaquías 3
3
1Jaꞌ Jehová, Naj Ey Yipalil, jaꞌ chi alon jaxca tiꞌ: Oj wakꞌ bꞌabꞌoj jun jin chejabꞌ, yet watxꞌ jaꞌ oj toj waꞌnen jun bꞌe jin sattaj jain Yaaw jin tiꞌ. Jain echbꞌanebꞌil jin je yu tuꞌ, eyman oj jin octoj bꞌey yul jin templo. Oj apnoj oc jin chejabꞌ, yu yiꞌon sbꞌa jin wa kꞌane. Abꞌwej xin, tol jain ton oj jin juloj, ẍi Dios.
2¿Mac wal oj techa yu yet jun scꞌual yet oj jin jul jain Jehová jin tiꞌ? ¿Mac oj skeꞌ stecꞌbꞌan sbꞌa jin sattaj? Yutol laan wopiso jaxca kꞌakꞌ kꞌakꞌ chi skꞌan ebꞌ waꞌnem chꞌen, ma jaxca noꞌ xawon chi skꞌan ebꞌ chi txꞌawi. 3Jain Jehová jin tiꞌ, oj jin sajbꞌane el ebꞌ yicꞌaal Leví, jaxca chi yun yiꞌle el stzꞌilal chꞌen plata, cꞌal chꞌen oro xol kꞌakꞌ. Oj lawoj tuꞌ, catuꞌ oj skeꞌ yakꞌon yofrenda ebꞌ jin sattaj, jaxca yin smooalil cꞌal yin sjichanil. 4Queyton tuꞌ oj yun jin tzala yetoj yofrenda ebꞌ a Judá, yetoj yet ebꞌ a Jerusalén, jaxca chi yun jin tzala yin ebꞌ yet tax peyxa.
5Jain Jehová jin, yaaw jin chi wal jaxca tiꞌ: Oj jin jul je xol yin jin naꞌon oc je yin. Jain caw oj wakꞌ testigoal jin bꞌa yin ebꞌ atxum, yin ebꞌ chi yun amulal, yin ebꞌ chi yakꞌ lekꞌtiꞌal, yin ebꞌ cꞌam chi stoolane smulnawom yin tzꞌajan, yin ebꞌ chi etnen ebꞌ ix ix tol camnajxa yichamil, cꞌal ebꞌ unin cꞌamxa smam cꞌal xutx, yin ebꞌ man watxꞌoj chi yun swaꞌnen yeoc ebꞌ txꞌoj conobꞌal, cꞌal yin masanil ebꞌ cꞌam weloc apnoj yul sat.
Chꞌen Diezmo Cꞌal Chꞌen Ofrenda
6Jain Jehová, yaaw jin chi walaꞌ; cꞌam bꞌakꞌin chin qꞌuexchatoj. Yu jun tuꞌ, yuxan jaex yicꞌaal jex Jacob tiꞌ, cꞌamto chex jin qꞌueyeloj. 7Jaex tiꞌ, yet tax cꞌal jix bꞌeytej ebꞌ je mam icham, jix je yintajne el jin chejbꞌanil, ma cꞌal je jije niꞌoj. Yuxan meltzaanwejtej ey jin tinaniꞌ, queyton tuꞌ oj yun jin meltzo pax ey jex. Catuꞌ che kꞌanle pax jaxca tiꞌ: ¿Tzet to wal chi kute meltzo cu bꞌa? je chi, che yaloni. 8¿Tumi smoo chi oc ebꞌ ánima elkꞌan tet sDiosal che naꞌ? Jal jex jaex tiꞌ, caw chex oc elkꞌan ey jin, catuꞌ chi to wal je kꞌanlen jaxca tiꞌ: ¿Tzet wal yinal chach kelkꞌane? Jaꞌton yin wan oj wal ey jex tiꞌ: Tol che yelkꞌane chꞌen diezmo cꞌal chꞌen ofrenda. 9Yuxan intajnebꞌil jex el wu je masanil, yutol masanil jun nación tiꞌ chi oc elkꞌan ey jin. 10Yuxan jaꞌ tinaniꞌ xin, iꞌwejtej masanil je diezmo bꞌey cꞌuanbꞌal bꞌey jin templo, yet watxꞌ ey sloꞌbꞌe ebꞌ chin akꞌon servil. Jain caw Jehová jin, yaaw jin chi walaꞌ, akꞌlewej jin porobꞌal. Queyton wal tuꞌ oj yun je yiloni tol oj jin jaj swentanail satcan, catuꞌ oj jin secon eytej syaaxilal je yibꞌan, tol manxa oj yabꞌ je cꞌuanbꞌal. 11Jain caw Jehová jin chi walaꞌ, tol man oj jin chaꞌ lawoj ey je yawo yu noꞌ noꞌ, tam wal oj jin chaꞌ etex el sat je yuva yet cꞌamto chi kꞌanbꞌi eloj. 12Jain caw chi walaꞌ, tol masanil nacionlaj oj alon oj tol watxꞌ je yet, yutol yel xacꞌal watxꞌ oj yun yeloc je conobꞌ tiꞌ, ẍi Jehová.
Ey Smimancꞌulal Dios Yin Sconobꞌ
13Chi yalon Jehová jaxca tiꞌ: Yel xacꞌal pena tzet che yal jaex tiꞌ win, catuꞌ chi to wal je kꞌanle pax jaxca tiꞌ: ¿Tzetyetal pena chi kal ja win? je chi. 14Jaꞌ wan kꞌane che yalaꞌ jaꞌton tiꞌ: Naꞌbꞌa xacꞌal chi kakꞌ servil Dios. ¿Tzet wal chi kiꞌ yin, ta chi cu jije tzet chi yalaꞌ, catuꞌ chi kaon oc an eel pichile sattaj Jehová Naj miman Yeoc Yipalil, yu cu txꞌoxon el cu cuscꞌulal yu cu penail? 15Chi kilaꞌ, tol jaꞌ ebꞌ chi smeyne sbꞌa, ey cꞌal oc ebꞌ yin tzalacꞌulal, yetoj cꞌal pax oj, watxꞌ cꞌal chi eloc masanil ebꞌ pena tzet chi el yuneni, tol tax ebꞌ chi stecꞌbꞌa sbꞌa sattaj Dios, cꞌam pax syaꞌilal chi jul yibꞌan ebꞌ, je chi, che yaloni, ẍi Dios.
16(Jal pax ebꞌ ey yeloc apnoj Jehová yul sat, chi yalon ebꞌ tet junjun, jaꞌ Dios jix abꞌen tzet lalan yalon ebꞌ tuꞌ, yuxan jix yakꞌ tzꞌibꞌelecan sbꞌi ebꞌ yul jun an libro, jaꞌton tituꞌ chi bꞌinaletej ebꞌ ey yeloc apnoj Dios yul sat, yutol eyoc snaꞌbꞌal ebꞌ yin Naj.)
17Jaꞌ Jehová, Naj Miman Yeoc Yipalil, chi alon jaxca tiꞌ: Jaꞌ yet jun cꞌual tuꞌ, oj jin naꞌoc yin ebꞌ ánima, oj jin sicꞌ can el ebꞌ ey weloc apnoj yul sat, yet chi oc can ebꞌ wetoj. Jaxca junoj mame chi scamcꞌulne yuninal chi akꞌon servil, jaxca tuꞌ oj yun jin camcꞌulnen ebꞌ. 18Jaꞌ yet tuꞌ oj naꞌcha el je yu, tol ey sqꞌuexanil spajtzebꞌal yet ebꞌ watxꞌ sbꞌeybꞌal chin akꞌon servil, txꞌoj pax spajtzebꞌal yet ebꞌ pena sbꞌeybꞌal tol cꞌam chin akꞌon servil, ẍi Dios.
Tans Gekies:
Malaquías 3: knj
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2016, Wycliffe Bible Translators, Inc. All rights reserved.