Ɓəkpəkpəyawu 5
5
Əpakpmikpmii n Kwugyasnáyi yi
1Nlonu ma gye əza n wo ɓə sasetu n əbeshnikpegye nyi, n əpakpmikpmii shi n əwo ɓwaizhe n ənyai kakpe n kwo asəpa ngwnu-aba-aba jesnu n gwugwui n atuzèi ngwnu-tnaaba. 2Jesnu ma gye maləka n kpaci woi dnawyi n bəgyei latu, “Nyika nu kwnuce lo wa bma atuzè ye ya, jesnu wa lo əpakpmikpmii ye ya a?” 3Ama zahozahoyi to ɓəə nyì n əshemi, kwo n anyì, kwo n anyì snuta, n wo ɓə kwnuce wa gwu əpakpmikpmii yi ya m, kwo ge wa shi kwo awye n əmi m. 4Ma ciɓwi mii je ci ntuge a to ɓə ɓwa əzaho n wo ɓə kwnuce wa lo əpakpmikpmii yi ya m, kwo wa shi kwo awye n əmi m. 5Nlonu zaknayi n azakwoyi yi wa gna mi, “To ciɓwi m! Gye, Yahuda əbyé Gaba, Dawuda gbegye, wo kwu nasala gyi. Wo ɓa myi wa gwú əpakpmikpmii yi ya, n əkwo atuzèi ngwnu-tnaaba.”
6Nlonu ma gye Kwugyasnáyi, n wu ngye a ɓəə la kwo wu n gnyiagnyi gnyi n əbeshnikpegye atasni, n anyawyewyeyi shegwnu kwo ɓədo n azakwoi yii. Kwugyasnáyi yi ɓəə n amwayi gyi ngwnu-tnaaba, n awyekwnunui gyi ngwnu-tnaaba, n əɓa nu zhni azafnu tnaaba Shekwoyi nya, n a kwu tnu n ɓai fyi n anyì vnyanya nyi. 7Wa lo wa gwo əpakpmikpmii, n əza yi ɓwaizhe n wo ɓə sasetu n əbeshnikpegye nyi. 8She wo ɓə la əpa nyakashi kpmikpmii gwo, anyawyewyeyi ngwnu-anyi yi, n azakwoyi shiiba-ceanyii, ɓa yazhi n Kwugyasnáyi abye. Dəhodəhoi ɓə n amwuloi shi, jesnu ɓa ɓəə n ashnapa azinali nyai shi n nunui n anyasnidaí, n ɓa nu zhni aduwazhni Shekwoyi aza nya. 9Njesnu ɓa kwoanyi woiwoyi, ɓai gna:
“Ho la kwnuce ha gwo əpakpmikpmii
jesnu ha gwú əkwo atuzè ya,
ntuge a ɓə la ho wu
jesnu ǹ əho amii nu n ho ɓə si aza ga Shekwoyi,
aza ń əbyé dəhodəhoi, n nyitala dəhodəhoii, n azai n əknyii.
10Ho lá ɓa zhni əbemi n apirisitii, ɓa zhni əyi Shekwoyi tnutnu,
jesnu ɓai gyibe fyi n anyì.”
11Nlonu ma shiawye, ma wo amaləka bəgye n mwa bəgyé, adugwu bəgyé kpe n adugwu bəgyé, jesnu adugwu awo aɓwa adugwu awo. Ɓa kwu she əbeshnikpegye gwnu ɓədo n anya awyewyeyii n azakwoyii. 12Ǹ bəgye latui ɓai gna:
“Kwugyasnáyi nu kwnuce lo, ń a ɓə la wu nyi,
wa gwo ikwo n nyaɓwai n wyemwai n kalái
n mwamwai n latui ɓədo n cicii!”
13Nlonu ma wo ənya wyewyeyi dəhodəhoi n kwo dna n əshemi n anyìi n adoi n ɓa fyi n anyì snuta ɓədo n adoi n ɓa fyi n shikwo, n anyai vnyanya n ɓa fyi n ɓa mi, ɓai gna:
“Əwo n wo sasetu ń əbeshnikpegye nyi ɓədo n Kwugyasnáyii,
ga wo cici n mwamwai n latui ɓədo n ikwoi, ɓa zhni əwo nya nu,
Nyalonyalo!”
14Anya wyewyeyi ngwnu-anyi yi ɓa gna, “Aamyi,” jesnu azakwoyi ɓa yazhi n əknyi ɓa ga mwamwa.
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.