Ɓəkpəkpəyawu 12
12
Nyikwoza ɓədo n tumisei
1Əznù yaakwo kwa kpeyawu dna n əshemi: nyikwoza n ajei kpe ngye nyipyei, n əpyai dna n əwo apitabwada snuta jesnu n fnunyi akpasi awoceaba nyai kwnu n əwo tukwo. 2Wo ɓə gnyi n nubwoi nu jesnu wa ci ɓyimanyasna əɓwi, əsa n wo ɓə ye wa kágna ncei. 3Nlonu əznù ədo kwa kpeyawu dna n əshemi: tumise byei yaakwo gwnugwnùi n atukwoi gyi ngwnu-tnaaba, ɓədo n amwayii ngwnu-awo jesnu n afnunyi kwnu ngwnu-tnaaba n əkwo atukwo. 4Əkwo sesi kwa kpma akpasi okwu gbmanyi ya n akwu ngwnu-ata n əshebmana, kwa sheɓaya zhi n əknyi. Tumise yi kwaa gnyiagnyi gnyi n nyikwoza yi abye n wo ɓə ye wa kágna nyi, nabai n kwo ɓə gyi əɓyi əsa n a ma wo ncei. 5Wa ma nugwnu, əɓyinugbai, n wo “ɓəi gyibe tu n aknyi vnyanya n snukna bwusii.” Njesnu a la əwo əɓyi gwnulo ncei n Shekwoyi aba jesnu lo ncei n əwo əbeshnikpegye. 6Nyikwo yi wa bwusi lo zhabwikawu, lo aba n Shekwoyi ɓə ncei zhniaba gnyi wo, aba ń a ɓə vyi wo ɓo jesnu a wna wo akna anyipyei dugwu gbmanyi cei-atagyi aba cei-shiitnanyi (1,260).
7Nlonu okwnu kwa ya n əshemi. Mikailu n əwo amaləkai ɓa snukwnú n tumisei, jesnu tumise n əkwo amaləkai ɓa snukwnú ce. 8Ama wo to ɓə n akalái fyi n kwnuce m, jesnu ɓa kwu ɓwu əɓa afyiba nuwna n əshemi. 9A she tumise yaakwo gwnugwnùi yi yazhi n əknyi, owa saapa nya, ń a yi kwo zanukwoi, kwo Shetam, n wo dna anyì vnyanya ń abaɓwi nyi. A shewoya shi n əknyi, ɓədo n əwo amaləkai.
10Nlonu ma wo bəgye kaláda dna n əshemi kwoi gna:
“Nsaiye gnyignyi kwo la ɓe ɓədo n kalái
jesnu n əyi Shekwoyi əbemii,
ɓədo n ikwoi əwo Masifu nyai.
Ntuge aɓəmayi tu n azaje n əyi amapwii,
n wo kpe ɓa aɓo gnyi n əyi Shekwoyi abye n nyipyeii ɓədo n sukwoi nyi,
a la wo sheyashi n əknyi.
11Ɓa kwu nasalagyi kpe n əwo tukwo
n Kwugyasnáyi amii
jesnu n əɓa ɓədagbma ɓəgbmi nyai;
ɓa to ɓə ye əɓa awyewyeyi dəidəi
n ɓa ɓəə ɓa wo əfyí ədna m.
12Ntucenu, fye nya agbmada, əfye ashebmana
ɓədo n fyei n fye fyi n ɓa nyi!
Ama owii n əknyii ɓədo n shikwoi,
ntuge əzanukwoyi wo la gbmi shnizhi da fye!
Wo nunui lo n minagyi nazhii,
ntuge wo kpəlo nge əsa to ye n woi celo n kwnu m.”
13She tumise ɓə gye a lá kwo sheyashi n əknyi, wa nya nyikwoyi n əsii, n wo ɓə ma əɓyinugbai nyi. 14A kwu aɓwase ngwnu-aba znukwo nya ga nyikwoza yi, nabai n wo ɓa myi wa gyeafu lo aba ń a cei zhni gnyi wo n zhabwikawu, aba ń a ɓa wna wo akna kwaa la əsa, asa ɓədo n əsa tokwnuyii, aba n owa yi taa myi kwa si m. 15Nlonu owa kwa she nuwna ya n əkwo əgbe ngye əlà, ntuge kwaa nyikwoza yi znuakpe jesnu kwa wna wo n nuwna ɓeɓeyii. 16Ama əknyi kwa bma nyikwoza yi zhni kwa là əkwo əgbe ya kwa myi əlà ń tumise ɓə sheya n əkwo əgbe nyi.
17Nlonu tumise kwa gyi minagyi nazhii n nyikwoza yii, kwa jezelo kwoo snukwnú n nyikwoyi aɓyii, aza yi n ɓa vyi Shekwoyi ɓəgbetu jesnu n ɓa shi əɓa ɓəgbmi əɓwa dəidəi ntu n Yeisu ɓo nyi.
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.