Ɓəkpəkpəyawu 10
10
Maləka n əpakpmikpmii ɓyii yi
1Nlonu ma gye maləka ədo n kpaci, woi gbmi shnizhi ɓe n əshemi. Wo ɓə n ənyìi nu pwi, n shnapmanai tu n əwo tukwo əshe; əwo awyeba ɓə wu ngye nyipyei nu, jesnu əwo apita ɓə wu ngye azhigwo əná nya nu. 2Wo ɓə n əpakpmikpmii ɓyii nu shi, waa kwo loya shi n əwo akwnu. Waa əwo pita ɓwaizhe nya tu n shikwo jesnu əwo pita ɓwaipmi nya tu n əkpma, 3jesnu wa sáwyi n kalái ngye shi gaba ciɓwi nyi. She wo ɓə ɓəwyi, agbmawyije tnaaba abəgye ɓa daɓo. 4She agbmawyije tnaaba ɓə daɓo, mi ɓə ye ma ka ənya nu; ama ma wo bəgye kwoi gbmi n əshemi kwoi gna, “Kwu agbmawyije tnaaba ɓəda ye tuzè, to ha ka kwo shi m.”
5Nlonu maləka n mi ɓəə gye wo n gnyiagnyi tu n shikwo ɓədo n əknyii nyi, wa la əwo ɓwaizhe ɓwa wu n əshemi. 6Njesnu wa si nyasi n woi, n wo n wyewyeyi lo nyalonyalo nya nyi, əza n wo ɓə zhni ashemi n anyai vnyanya n ɓa fyi n ɓa nyi, əknyi ɓədo n anyai vnyanya n ɓa fyi n kwo, n shikwoi n anyai vnyanya n ɓa fyi n kwo, jesnu wa gna, “Əsa gyi to shnasnu lo m! 7Ama fyi n anyipyei yi, əsa n maləka tnaaba yi ɓə ye wa bye əwo mwayi yaakwo ncei, aɓo sosoi Shekwoyi nya ɓə kwu nu, n ɓwasnu she wo ɓə dnawyi ga sheaɓəgwognayi əwo atnutnuyi nyi.”
8Nlonu bəgye n mi ɓəə kwu wo kwoi daɓo n mii n əshemi nyi, kwa je əɓo da n mii njesnu: “Lo, ho gwo əpakpmikpmii n kwo shi n kpekpeiya n maləka akwnu n wo gnyiagnyi tu n shikwo n əknyii nyi.”
9Nlonu ma lo da maləkai ma gna wo nge wo ga mi əpakpmikpmii ɓyii. Wa gna mi, “Gwo kwo ha gyi kwo. Kwo ɓa pmyi ho nubwo dna n mamái, ama fyi n əho əgbe ho ɓa wo kwo n dadai ngye əsugbma nu.” 10Ma gwo əpakpmikpmii ɓyii n maləka akwnu ma gyi kwo. Kwo ɓə da ngye əsugbma nu fyi n əmi əgbe, ama she mi ɓə gyi kwo, əmi nubwo kwa pmyi dna n mamái. 11Nlonu a gna mi, “Ɓəshishi nu ha je sheɓəgwognada ntu aza bəgyé ɓo, n aknyii, n abyei jesnu n asui.”
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.