Akwolosiyi 1
1
1Bwulus, tnutnuloyi Kirisiti Yeisu nya dna n Shekwoyi ɓəye, ɓədo n Timwotii əyido.
2Kwo lo da Shekwoyi aza agyigyiyi nu n ɓa fyi n Kwolosi nyi, əyi azaje azanugbai n anyikwozai agbenui fyi n Kirisiti.
Shebmyashi n bwugbafui n ɓa kwnu n Shekwoyi əyi Dada aba, ɓa kwu kwnusnu n fyei.
Amisagaga n aduwazhnii
3Yi sa Shekwoyi ami lo ciici, əyi Dada, Dagayi Yeisu Kirisiti nya, she yi zhniaduwa ntu əfye ɓo. 4Ntuge yi kwu əfye gaiciyaga ɓo wo dna n Kirisiti Yeisu, jesnu n yeyei n fye ncei lo ntu Shekwoyi aza ɓo vnyanya nyi. 5Gaiciyaga n yeyei n ɓa kwnu n awyetu n a cei sofyi fye n əshemi, jesnu ntu ədo ɓo n fye kwu əkwo əɓo lu wo dna n nyawu hnihnii nabagyi manai nya, 6n kwo la ɓe da fye nyi. Nabagyi manai ye kwo ga gyigyi lo jesnu kwoi mwa laɓa dna n anyìpata vnyanya; n ɓwasnu shi kwo zhni lo dna n əfye atasni, ənya n kwo ɓə laka n əwyii n fye ɓə wo kwo ncei nyi, jesnu fya ɓwa awyega Shekwoyi shebmyashi ɓəhnihnii nya. 7Fye ɓə tu kwo mwi ń Epafras nu, əyi tnutnu kwnuzhniyi yeyeyi, n wo zhni tnutnuyi gbenui nu Kirisiti nya n əyi apita; 8jesnu əza n wo nu ɓə gna yi əfye yeye ɓo dna n Zafnu.
9Ntu dəye ɓo, ənya n kwo ɓə laka n əwyii n yi ɓə wo əfye əɓo nyi, yi too fa aduwazhni ɓo ntu fye ɓo m. Yi nya Shekwoyi lo ciici nge wo nú fye n ɓəyekpe əwo ɓəye nyai, dna n wyemwa vnyanya n awyegai ń Zafnu ga nyi. 10Nabai n fye ɓa myi fya gyianyì n kwo kwnuce n Dagayi vyii, jesnu n kwo da wo agbma n zokwo dəhodəhoi: fyei ga gyigyi fyi n tnutnu manai dəhodəhoi, fyei mwa fyi n Shekwoyi yekpé, 11ai myi fye zhi n akalái vnyanya ngye shi akalá əwo latu nya nyì, nabai n fye ɓa kwu əmìfyi yaakwo ɓwa n bwugbaɓwai. 12Njesnu fyei sa Dada ami bwugbadá nya, əza n wa zhni fye n kwnuce fyei kwnu əgwú ɓwa n əwo aza agyigyiyi fyi n bwuznagna əbemi nya. 13Ntuge wo la yi gnyi n ikwo wyegbma nya, jesnu wo kwu ɓe n yii fyi n Nugwnu əbemi n wo yé wo nyi, 14dna n əwo nu n yi kwu shnashna ɓwa, abwizo aleifyi nya.
Shekwoyi Nugwnu ikwo duduyi
15Nugwnu nu zhni Shekwoyi dogbe ń a ta gye wo əwye nyi m. Əɓyi kpmisnuyi tu ń anya azhnizhniyi əshe vnyanya. 16Ntuge dna n əwo nu n a ɓə zhni anya vnyanya: anya n ɓa fyi n əshemi ɓədo n anyìi, ado n a gyewye, n adoi n a ta gyewye m. Kwo abeshnikpegye, kwo akalá, kwo abegyiyi, kwo aikwo; n əwoi nu n a ɓə zhni anya vnyanya jesnu ga əwo. 17Wo gyilo ń anya vnyanya abye, jesnu dna n əwo nu, ń anya vnyanya n wnashi n abagbmanyi. 18Njesnu əwo nu zhni ikilisiya tukwoda, əwo nayi; əwo nu zhni ayayaba jesnu n əɓyi kpmimai dna n afyífyiyi, nabai dna n ɓəhoɓəhoi n wo ɓo myi wa ɓwa ikwo duduyi.
19Ntuge kwo ɓə dá Shekwoyi nu, wa kwu əwo nunu vnyanya fa fyi n wo, 20jesnu dna n əwo aɓədowna nu, n wo ɓə wna aɓo zhi n anyai vnyanya ga əwohni, kwo anya fyi n anyì kwo anya fyi n əshemi, she wo ɓə ɓe n bwugbafui dna n əwo ami, n wo ɓə zeya tu n znudu nyi.
21N sapa, fye ɓə kwnukwnuiya n Shekwoyi, jesnu fye ɓə zhni anuwnuyi nu fyi n əfye abwugba ntu əfye alu aɓənubwozhni nya ɓo. 22Ama nsaiye wo kwu aɓəwnado zhi n fyei n Kirisiti nayii dna n əfyí, nabai wa ɓe n fyei n gyigyiyi ń əwo awyeba, n tnaɓətu, n knyiknyii n aɓəma; 23ń fya gyiabye fyi n əfye gaiciyaga n myizhi n akalái to fya pmyiya n awyetu n fye ncei tu dna n nabagyi manai nyi m. Nabagyi manai nu nyi n fye ɓə wo jesnu n a kwu əkwo əɓo da ga ənya wyewyeyi dəhodəhoi dna n əshe snuta. Ntu əkwo ɓo nu, əmi, Bwulus, mi la zè əkwo tnutnuyi.
Bwulus tnutnuzhni ntu n Ikilisiya ɓo
24Nsaiye mi nya agbmada lo dna n azhnìgye n mi gye ntu n fye ɓo nyi, nabai ma nú dna n əmi nayi ənya n kwo yee ceya lo dna n Kirisiti azhnìgye, ntu əwo nayi ɓo, n kwo nu zhni ikilisiya nyi. 25Mi la zè əkwo tnutnuyi ntu tnutnugbegyi ɓo n Shekwoyi ɓə ga mi, nge mi da fye Shekwoyi ɓədagbma n nunui, 26asigyi n ɓa ɓə ɓwushi n aye bəgyé ɓədo n acalai, ama nsaiye a la kwo kpeanyaya ga Dagayi aza. 27Shekwoyi wo la knyi wa wu dna n Abyedo atasni nyaɓwa lalatu asigyi ye nya, n əkwo nu nyi nge Kirisiti dna n ho, ho n awyetu latu nyai lo. 28Əwo nu n yi dnawyi, yii fyi aza abwugbakalá, jesnu yii wu zahozahoyi ənya n wyemwai vnyanya, nabai n yi ɓə myi ya ɓe n zahozahoyi n nunui dna n Kirisiti. 29Ntu dəye ɓo nu n mi kwnuaji vnyanya, mi zhni tnutnu n kalái n Kirisiti wo kwu ga mi, n kwo nu zhni tnutnu lo dna ń əmi nyi.
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.