2 Timwoti 1
1
1Bwulus, Kirisiti Yeisu tnutnuloyi dna n Shekwoyi ɓəye, n vyi ɓəgbeshi wyewyeyi nya, n kwo dna n Kirisiti Yeisu nyi.
2Kwo lo da Timwoti nu, əmi əɓyi yeyei.
Shebmyashi, snusnugye n bwugbafui n ɓa kwnu n Shekwoyi əyi Dada aba jesnu n Kirisiti Yeisui əyi Dagayi ɓa kwnusnu n hoi.
Amisaga
3Mi sa Shekwoyi ami, əwo n mi zhni əwo tnutnu, ngye she əmi azakwoyi ɓə zhni n tukwovnyi manai nyi, shi mi pa əho əɓo dna n əmi aduwazhni ciici n nyipyei ɓədo n sukwoi. 4She mi pá əho awyenyi ɓo, a wo mi əpwa ngye mi gye ho əwye, nabai n mi ɓaa nu n agbmadai. 5Mi pa əho gaiciyaganunui ɓo n kwo ɓə kpmi dna n əho nyikwowyi Loisu nyi, ɓədo n əho əyai Yunis, kwo mii kwnuawye lo nge nsaiye kwo dnalo n ho ce.
6Ntucenu mi cé ho ɓəpá nge ho bya Shekwoyi nyaga əná kwa gwo, ədo n kwo dnalo n ho ntu əmi aɓwakpe ɓo n ho nyi. 7Ntuge Zafnu n Shekwoyi ɓə ga yi nyi ta zhni ya wodna m, ama kwo ga yi kalá, yeye ɓədo n tukwownashii. 8Ntulonu vnyinkwo to wo ho ntu ɓəgbmi ɓo tu n əyi Dagayi ɓo m, kwo ntu əmi ɓo, əwo zhalu da m. N əkwoɓwi, dna əɓwado n mii dna n azhnìgye ntu nabagyi manai ɓo, dna n ikwo Shekwoyi nya. 9Wo la yi gnyi, jesnu wo la yi yì ya gyianyì fyi n gyigyi; toge əɓəho ɓo n yi kwu zhni m, ama ntu əwo ɓəmwi ɓo ń shebmyashi. A ɓə ga yi shebmyashi ye dna n Kirisiti Yeisu nu, tunyi əsapai ń anyi yayasa, 10ama nsaiye a la kwo kpeyawu yi dna n əyi Gnyiyi, Kirisiti Yeisu kpekpeyaɓe, əza n wo kwu əfyí zhniagbma jesnu wo la ɓe n wyewyeyii n anyìgyii ntna əfyí, n bwuznagna dna n nabagyi manai. 11Njesnu ntu n nabagyi manai ye ɓo, a ɓə la əmi knyi wyidnayi n tnutnuloyi ɓədo n nyawuyii. 12Cenuzhni mii gyeazhnì nlai. Dudulonu kwo to zhni əɓo vnyinkwo nya nu m, ntuge mi kpe əza əye lo n mi n gaiciyaiga n wo, jesnu kwo la mi kwnuawye nge wo ɓa myi wa wna ənya akna n mi la kwo fnyi wo əɓwa nya əwyi yi.
13Əɓo n ho ɓə wo n mi nyi, la kwo shiɓwa n zhni əfye nyawu kpokəloi nya n kwnusnu n gaiciyagai n yeyei dna n Kirisiti Yeisu. 14La əwyewna dna n ənya manai n a ɓə la kwo fnyi ho əɓwa nyi, la əwyewna kwo n Zafnu Gyigyiyi bmazhnii n wo dna n əyi nyi.
15Ho kpəlo nge zahozahoyi n wo dnalo n Asiya əknyi wo la mi ya, du ɓədo n Fyigelusii n Hamwogenei.
16Mi ye Shekwoyi wa wu Onesiforus pwuwa vnyanya snusnugye ntuge wo ɓə zhni woi fu mi bwugba ciici, jesnu wo to ɓə wo vnyinkwo ntu əmi agbma ɓo m. 17Ama she wo ɓə ɓe Roma, wa zna mi shni n əwyei bmyibmyii, nya əsa n wo ɓə gye mi əwye ncei. 18Mi ye Dagayi wa bmazhni wo ɓə ɓwa snusnugye n əwyihii! Ho kpəlo ɓwoye she wo ɓə bma mi zhni n azokwoi mwa bəgyé dna n Afyisus.
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.