2 Akworentiyi 7
7
1Ntucenu, shikwonyi yi n aɓəgbeshi yei lo, əmi anugwnudo ayeyei, fye fa ya əyihni pmya n nyahonyahoi nkwo tu nayi cegye n zafnui, əyi gyigyi kwaa zhni nunui, kwoi gbmi n Shekwoyi mwamwaga.
Bwulus agbmada tu n Ikilisiya abwuye
2Fye la əfye abwugba gwuya ga yi. Yi too zhni zahozahoyi ɓənukwoi m. Yi too bwi zahozahoyi m, yi too wnu zahozahoyi ya m, yi too gyi zahozahoyi fyi m. 3Mi ta da ɓəye nabai ma znu fye əknyi nu m; mi kwu ce shnida, nge fye n abai lo n fyi n əyi adu, nge yi ɓa kwnu anyìgyi jesnu ya kwnu fyí n fyei. 4Mi kwu ɓəda da n fyei fuufu ntna ceshii; mi gbma lo n fyei n mwa. Əmi bwugba kwo la kalá dna ɓwa dəidəi fyi n əyi azhnìgyei vnyanya, əmi agbmada to n aɓwayazhi abai lo m.
5Ntuge she yi ɓə loɓe Makyidoninya, yi to ɓə ɓwa snusnu m, ama səpa dəhodəhoi n ya pmyi a kwukala da yi; gwnukpeaje ń əbmyi n ədnawoi fyi n əmi. 6Ama Shekwoyi n wo zhni abwugbabmayi atnazhniyi nyi, wo ɓə kwu yi zhniatna shi Titusu ɓə ɓe, 7jesnu to ɓwasnu n əwo ɓeɓei nu m, ama n atnazhnii n fye ɓəə kwu zhni wo nyi. Wo ɓə kwu gna yi nge əmi awyekwo fye lo, əfye bwugbawnu shnishniyi, əfye ɓənubwozhni ciici ntu əmi ɓo, ntulonu əmi agbmada, ɓa du asa aje nya ya lo.
8Kwo ngye mi ɓə la bwugbawnu fye n əmi pakai ga fye, kwo to zè akpemikpe ɓo n mi aba m: Kwo shikwonyi kwo ɓə la mi zè akpemikpe ɓo, mi kwu gye nge əmi paka ɓə la fye knyibwugba, ama bwugbaknyi ɓə ɓwasnu əsa fyewyi nya nu. 9Dudulonu nsaiye, agbmada mi lo, toge ntuge kwo ɓə la fye wnubwugba m, ama ntuge əfye bwugbawnu ɓə la ɓe n fyei n abwuye. Ntuge fye ɓə kwu zhni abwugbawnui shi Shekwoyi ɓə ncei pma nu, ntulonu to fya ɓwa əcitu n zokwo dəhodəhoi ntu n əyi ɓo m. 10Bwugbawnu Shekwoyi nya, kwo ɓe n abwuyei, n kwo lo n əzai n gnyignyi, jesnu to kwa ya əza dna n akpemikpe m, ama bwugbawnu anyì nya kwo ɓe n əfyíi nu. 11Fye gye əɓo ń bwugbawnu Shekwoyi nya ye kwo kwu zhni fyi n fye: knyi ɓəhnihnizhni nu, knyi wyenyizhni nu fya kpma fyehni aɓoya, knyi kpukpurukpui nu, knyi ədnawoi nu n kwa dna fye, knyi awyekwo nu, knyi wyeznushi nu, knyi pyepye pya nu nge fya gye ai zhni owagbeznu cewo a. N abahobahoi fye kwu fyehni wu nge fye to n əɓwai dnalo n ɓəye m. 12Ntulonu, shikwonyi mi ɓə kwu paka ga fye, kwo to ɓə nyi lonu ntu əza ɓo nu n wa zhni əzado əɓo nukwoi, kwo əza n a zhni wo əɓo nukwoi nyi m, ama ntuge n Shekwoyi abye, fye ɓa gye shi fye kwu əfyehni shenugyi ga yi. 13Dna n aɓo ye vnyanya, yi kwu bwugbakaladna ɓwa n myignyii.
Gbowo n əyi bwugbakaládnai, a ɓə kwu yi da pilulu shi yi ɓə gye Titusu n dna n agbmada, ntuge əfye vnyanya fye ɓə la əwo zafnu zhishni. 14Mi ɓə kwu gbma n fyei n əwo aba, jesnu fye too dna mi vnyinkwo m. Ama n ɓwasnu shi ɓəhoɓəhoi, ń yi ɓə gna fye nyi, kwo zhni gaiciya nu, ntulonu shi ya gbma n fyei n Titusu aba, kwo kwu wu nu nge kwo je gaiciya ɓo nu zhi. 15Njesnu əwo yeye ntu n əfye ɓo kwo gna dudulo, she wo pá nge, əfye vnyanya fye zhni aɓəvyiyi nu, fyei gwo wo n ədnawoi ɓədo n vnyivnyii. 16Mi dnalo n agbmada ntuge mi n agwumyi nunui lo n fye aba.
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.