2 Akworentiyi 4
4
Nyaɓwayezhi fyi n anyikwnu
1Ntucenu, shikwonyi dna n Shekwoyi snusnugye nu, n ya ɓwa ɓəvyitnutnu ye, yi ta bmabwugba lo m. 2N əkwoɓwi, yi kwu aɓo aɓwuɓwui n avnyinkwo nyai fa, yi ta zhni apma lo n kwocednai m, kwo ya pmyi Shekwoyi ɓədagbma ɓwa m. N əkwoɓwi, yii wu gaiciyanunui pəipəi jesnu yii gbmi əyihni ɓo dna n zahozahoyi tukwovnyi, n Shekwoyi abye. 3Njesnu kwo ngye əyi nabagyi manai, n tukwojei pwu lo, kwo ncei pwu n aza aba nu n ɓa zhi ɓai ɓwi nyi. 4Cala ye əkwo shekwoyi, wo kwu atnavyiyi abwugba bwawye, nabai n ɓa taa gye nabagyi manai bwuznagna Kirisiti latu nya əwye, n wo nu zhni Shekwoyi dogbe nyi m. 5Ntuge yi ta zhni əyihni waazi nu m, ama Yeisu Kirisiti n zhni Dagayi, jesnu n əyihnii n zhni əfye atnutnui ntu Yeisu ɓo. 6Ntuge Shekwoyi, n wo ɓə gna, “Fa bwuznagna kwa fnu dna n wyegbma,” nyi, wa zhni əwo bwuznagna kwa fnu fyi n əyi abwugba, nabai kwa ga yi yekpé bwuznagna Shekwoyi latu nya, n kwo wu n Kirisiti awyeba nyi.
7Ama yi n nyaɓwayezhi yei fyilo n anyikwnu əznù nya nu, nabai kwa wu nge ikwodudui ye kwnu n Shekwoyi nu, toge n əyi aba m. 8A n yii yefnya lo n mwa n səpa dəhodəhoi, ama yi too vyiya m; n jejei, ama yi too gbmi bwugba ya m; 9ai wu yi awyesnugbegye ɓo, ama a too n yii yayai lo m; a n yii zoanya zhi, ama yi too zhnagbma m. 10N əsahosahoii, yi zna laɓa n Yeisu əfyíi kpe n əyi anayi, nabai n Yeisu wyewyeyi ɓa myi kwa gbmiwu ce n əyi anayi. 11Ntuge əyi n yi n wyewyeyi lo nyi, ciici a n yii ga fyi n əfyí ntu Yeisu ɓo, nabai n əwo wyewyeyi ɓa myi kwa wu əkwohni n əyi anayi afyífyii. 12Ntulonu nsaiye, əfyí zhni tnutnu lo n əyi anayi, ama wyewyeyi zhni tnutnu lo n əfye mi.
13A ncei kafyilo: “Mi la gaiciyaga; ntucenu mi kwu ɓəda da.” Shikwonyi yi n zafnu gaiciyaganunui nyai lo gbmanyi nu, yi n gaiciyagai lo ce, ntucenu yii daɓo, 14ntuge yi kpəlo nge əza n wo ɓə lá Dagayi Yeisu kala n əfyí nyi, wo ɓə kwu yi kala cè n kwnusnu n Yeisui jesnu wo ɓə ɓe n yii n kwnusnu n fyei n əwo abye ga əwohni. 15Aɓo ye vnyanya nyilo ntu əfye apma ɓo nu, nabai nge Shekwoyi shebmyashi n kwo si da aza ɓai mwamwa n bəgyé nyi, ɓá myi ɓa zhni amisa ɓa nu ɓai gyiya ntu Shekwoyi latu ɓo.
16Ntucenu yi too gbmi bwugba ya m. Kwo shikwonyi, n əbmyi, yi zhi yii kwokwo nu, ama n əmi, a zè yi lo yii wu n woiwoyii fyegyifyegyi. 17Ntuge əyi azhnìgye anawyi əsa fyewyi nya, ɓa ɓe yi n latu nyalonyalo nyai, n ɓa du ɓa lo n mwamwa vnyanya. 18Ntulonu yi n awyei celo toge n ənya n a gyewye m, ama n ənya n a ta gyewye m, shikwonyi ənya n a gyewye, kwo zhni ənya n kwo ɓa duya nu, ama ənya n a ta gyewye m, kwo nyi nyalonyalo nu.
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.