Matayo 21

OYesu akwingira nʼekitiinisya omu Yerusaalemu

(Mak 11:1-11; Luk 19:28-40; Yok 12:12-19)

1Awo oYesu nʼabeegesebwa baamwe nibaali baigereire ekibuga Yerusaalemu, nibaikire e Bbesifaage, oku Lusozi olwa Misaale gyebeeta Oliva, oYesu nʼatuma abeegesebwa babiri, 2nʼabakoba ati, “Mwabe omu kyalo ekibali omu maiso, era amangu ago, mukwiza okubona ondogoyi abbwerwe ngʼali nʼomwana waamwe. Muzisubule, muzindeetere. 3Omuntu yeena yeena nababuulya, mumukobe muti, ‘OMukama waiswe akuzeetaaga,’ obwo ye akwiza kuziweereza mangu.”

4Kini kyabbairewo okwikiirya omulangi kyeyabazire nti,

5“Mukobe abantu ba Sayuuni nti,

‘Bona, omukama waanywe akwiza gyemuli.

Muculeeri, era aikaire oku ndogoyi,

aikaire oku mwana wa ndogoyi.’#Zek 9:9”

6Abeegesebwa ni baaba, ni bakola nkʼoYesu niyabalagiire. 7Ni baleeta ondogoyi nʼomwana waamwe, ni bazitaaku ebizwalibwa byabwe, ni baikalisyaku oYesu. 8Abantu ni baaliira omu muwanda ebizwalibwa byabwe, abandi ni batema obutaagi oku misaale, ni babwaliira omu muwanda. 9Abantu abaingi abaali bamwebembeire, era nʼabo abaali bakumuligaku ennyuma, ni bakokooma bati,

“Omwizukulu wa Dawudi, awaisibwe!

Akwiza omwibara rya Mukama awairwe omukisa!#Zab 118:26

OMukama ali omwiguru awaisibwe!”

10Awo oYesu niyaingiire omu Yerusaalemu, ekibuga kyona kyona ni kyetawula. Abantu abamwei ni babuulya bati, “Oyo naani?” 11Ekibiina kyʼabantu ni kiiramu kiti, “Oni niye omulangi oYesu owa Nazaaleesi ekya Galiraaya.”

OYesu akupeka abakutundira omwIramyo

(Mak 11:15-19; Luk 19:45-48; Yok 2:13-22)

12OYesu nʼaingira omwiramyo, nʼapekamu abo boona boona abaali bakutundiramu, nʼabaali bakuguuramu. Nʼajuumuka emeeza zʼabaayingisya ba mpiiya, nʼentebe zʼabaali bakutundiramu enkaiba. 13Nʼabakoba ati, “Kyawandiikiibwe kiti, ‘Enyumba yange yaakubbanga nyumba ya kusabiramu.’#Isa 56:7 Baitu nywe mugifoire mbiso yʼabanyagi.”#Yer 7:11

14Awo abaigali ba maiso nʼabalema ni baiza awali oYesu omwiramyo, nʼabatamba. 15Abakabona abakulu nʼabeegesya bʼamateeka nibaaboine ebyamaano byeyakoore, era ni babona abaana nibakukokooma omwiramyo, nibakukoba bati, “Omwizukulu wa Dawudi awaisibwe,” ni bagongera. 16Ni bakoba bati, “Okuwura abo byebakukoba?” OYesu nʼabairamu ati, “Nkubiwura. Timusomangaku ekyawandiikiibwe ekikoba kiti,

‘Wayegeserye abaana abato nʼenkeremba

okuwaisya okusai?’#Zab 8:2”

17Nʼabaawukanaku, nʼawuluka ekibuga, nʼayaba e Bbesaniya, nʼaraara eyo.

OYesu akuceena omusaale omutiini

(Mak 11:12-14,20-24)

18Enceege emambya mambya, oYesu niyaali akwirayo omu kibuga, enzala nʼemuluma. 19Nʼalengera omusaale omutiini erubaju wa muwanda. Nʼagwikaku, baitu nʼatasangaku kyana gonze ekimwei, okutoolaku ebikoola byonkai. Nʼagukoba ati, “Toirangayo kwera byana emirembe gyona!” Amangu ago omutiini ni gwoma.

20Abeegesebwa nibaaboine kini, ni beewuunya! Ni bakoba bati, “Omutiini gwomere gutyai amangu?”

21OYesu nʼabairamu ati, “Kambakobere amananu; nimwakubbanga nʼokwikiriza nimutakugulucaguluca, mwakusobolanga okukola, ti kini kyenkoore oku mutiini ogwo kyonkai, baitu nʼokukoba olusozi luni nti, ‘Tiduka weenage omu nyanja,’ ni kiikiira. 22Era nimwakubbanga nʼokwikiriza, byona byona byemwakusabanga oKanca, mwakubifunanga.”

OYesu bakumubuulya oku buyinza bwamwe

(Mak 11:27-33; Luk 20:1-8)

23OYesu niyaire omwiramyo, abakabona abakulu, nʼabantu abakulu omwiyanga, ni baiza waali nakwegesya, ni bamubuulya bati, “Olina buyinza ki okukola bini? Era naani yakuwaire obuyinza buni?”

24OYesu nʼabairamu ati, “Nanje kambabuulye ekibuulyo kimwei. Nimwakinnyiramu, ale njeena nabakobera obuyinza bwendina okukola bini. 25Okubatiza kwa Yokaana kwaligire ayi? Wa Kanca oba mu bantu?”

“Awo ni baanuura bonkai na bonkai nti, nitwairamu nti, ‘Kwaligire wa Kanca,’ akwiza kutubuulya ati, ‘Ale lwaki oYokaana oni timwamwikiriize?’ 26Twakwiremu nti, ‘Kwaligire mu bantu,’ baitu tukutiina; kubba abantu boona boona baikiriza nti oYokaana yaali mulangi.”

27Awo ni bamwiramu bati, “Titumaite.”

NʼoYesu nʼabakoba ati, “Nanje tinkwiza kubakobera buyinza bwendina okukola ebintu bini.”

Olufumo lwʼabaana ababiri

28Era oYesu ni yeeyongera okubaza nabo ati, “Ati mukulowooza mutyai? Waaliwo omuntu eyaalina abaana baamwe babbiri, nʼayaba egiri omwana omukulu, nʼamukoba ati, ‘Mwana wange, ekiro kya leero yaba okole omu ndumiro ya mizabbibbu.’

29“Omwana nʼairamu ati, ‘Ngaine.’ Baitu oluzwannyuma ni yeenenya nʼayaba nʼakola. 30Oite waabwe era nʼayaba egiri omuto nʼamulagira ekintu nikyo kimwei. Ye nʼairamu ati, ‘Kannyabe, sebo.’ Baitu nʼatayaba.

31“Ale naani oku babiri eyakoore ekyo oite waamwe kyeyayendyanga?”

Ni bairamu bati, “Eyeekereire.”

OYesu nʼabakoba ati, “Kambakobere amananu; abasoroorya ba musolo nʼabamalaaya balibasooka nywe okwingira obukama bwa Kanca, 32kubba oYokaana omubatiza yaizire gyemuli, nʼabalanga omuwanda ogwa bwikiiri, ni mutamwikiriza. Baitu abasoroorya ba musolo nʼabamalaaya, bo ni bamwikiriza. Gonze nimwamaare okukibona, timwenenyeze leke mumwikirize.”

Olufumo lwʼabapangisya ba ndumiro ya mizabbibbu

(Mak 12:1-12; Luk 20:9-19)

33Era oYesu ni yeeyongera okubaza nabo ati, “Muwure olufumo olundi: Waaliwo omunyaitakali, eyasimbire endumiro ya mizabbibbu, nʼagikubbaku olukorogo, nʼasakamu ekinyuukiro, nʼayombokamu omunaala, nʼagitaamu abapangisya, nʼayaba omu nsi eyʼalai. 34Ekiseera ekya kukungula nikyaikire, nʼatuma abaweereza baamwe egiri abapangisya, bamuweerye omugabo ogwamwe. 35Baitu abapangisya ni bakwata abaweereza baamwe, omwei ni bamukubba owondi ni bamwita, nʼowondi ni bamukubba amabbaale. 36Nʼayongera okutuma abaweereza abandi baingi okukira abeekereire. Era abapangisya ni babakola ekintu nikyo kimwei. 37Oluzwannyuma nʼabatumira omwana waamwe nakukoba ati, ‘Omwana wange baamutaamu ekitiinisya.’ 38Baitu abapangisya nibaaboine omwana oyo, ni baanuura bonkai na bonkai nti, ‘Oni niye mugwete! Mwize tumwite, leke tutwale obugwete bwamwe.’ 39Ni bamukwata, ni bamunaga enzai wa ndumiro ya mizabbibbu, ni bamwita.

40“Ale omukama wa ndumiro ya mizabbibbu naliiza, abapangisya abo alibakola ki? 41Ni bamwiramu bati, ‘Ababbi abo alibawereekereerya kimwei, era endumiro ya mizabbibbu aligitaamu abapangisya abandi, abaakumuweeryanga omugabo gwamwe ogwa birume omu kiseera ekiikire.’ ”

42OYesu nʼabakoba ati, “Timusomangaku ebyawandiikiibwe kyebikoba? Bikoba biti,

‘Eibbaale abomboki ryebaagaine,

niryo ryafookere erya ku nsonda.

Ekyo oMukama niye yakikoore,

ni tukibona, ni tukyewuunya.’#Zab 118:22-23”

43“Olwʼekyo nkubakoba nti obukama bwa Kanca bulibaiyibwaku nywe, ni buweebwa eiyanga erikola ebikolwa ebisai. 44Buli aligwa okwibbaale eryo, alicwacwanuka, era oyo gweririgwaku, lirimwatyayatya.”#21:44 Ebiwandiiko ebimwei ebya irai tibirina lunyiriri luni.

45Abakabona abakulu nʼaBafarisaayo nibaawuliire enfumo za Yesu, ni beeteja nti abazire ku bo. 46Ni batoolya engeri eya kumukwata, baitu ni batiina ekibiina kyʼabantu kubba bo abantu baali bamaite nti oYesu mulangi.

Tans Gekies:

Matayo 21: RUULI-NYALA

Kleurmerk

Deel

Kopieer

Wil jy jou kleurmerke oor al jou toestelle gestoor hê? Teken in of teken aan

Vind meer uit oor Ebitabo abiri n'ebitaanu ebya mu Ndagaano Egiyaaka omu Ruruuli-Runyala