Левит 4
4
Бурганның дээди бараалгакчызының бачыды дээш өргүл
1Дээрги-Чаяакчы Моисейге мынча деп чугаалаан: 2# Лев. 5:15; Сан. 15:22-29«Израиль чонга мону чугаала. Кандыг-бир кижи частырыг кылып бачыт үүлгедип, Дээрги-Чаяакчының айтыышкыннарынга удур бир-ле чүве кылган дижик.
3Бурганның дээди бараалгакчызы бачыт үүлгеткеш, оозу-биле чонну буруулуг кылып каан дижик. Ол үүлгеткен бачыды дээш өргүл кылдыр бода малындан четпес-дудуу эвес бугажыкты Дээрги-Чаяакчыга эккеп салзын. 4Бурганның дээди бараалгакчызы бугажыкты Ужуражылга майгынынче кирер черге, Дээрги-Чаяакчының мурнунга эккелзин, холун ооң бажынга салзын. Оон бугажыкты Дээрги-Чаяакчының мурнунга дөгерзин. 5Ооң соонда бугажыктың ханын дозуп алгаш, Ужуражылга майгынынче киирип келзин, 6оон Дээрги-Чаяакчының мурнунга, ыдыктыг черниң көжегезиниң мурнунга салаазын ханче суккаш, чеди катап бызай чашсын. 7# Хост. 30:1-2Оон ол Ужуражылга майгынының иштинде турар, Дээрги-Чаяакчының мурнунда айдызаар өргүл бедигээжиниң дөрт мыйызын хан-биле чаап кагзын, а бугажыктың арткан ханының шуптузун Ужуражылга майгынынче кирер черде турар өргүл салыр бедигээштиң дөжээнче төпсүн. 8Ооң соонда өргүлдүң бугажыындан хамык чагны: ижин-хырын чаа болгаш малдың иштинде хамык чагны уштуп каапсын. 9Оон ыңай ийи бүүректи чаа-биле катай болгаш оорга чаан база баарның эът-чаглыг кезээн – ол бүгүнү бүүректер-биле кады – аңгылап ужулзун. 10Эп-найырал өргүлүнге салган бугадан ол бүгүнү аңгылап уштуру ышкаш кылдыр кылзын. Оон Бурганның бараалгакчызы ол чагларны өргүл салыр бедигээшке өрттетсин. 11-12# Хост. 29:14; Лев. 6:11; 9:11; 16:27; Сан. 19:3, 5А бугажыктың арткан бүгү кезектерин: кежин, хамык эъдин, бажын болгаш чодаларын база ишти-хырнын чини-биле катай чоннуң турлааның даштында хүл төгер арыг черже үндүре берзин, оон ыяштарга чада салгаш, өрттетсин. Бугажыкты хүл төгер черге өрттедир болзун».
Бүгү чоннуң бачыды дээш өргүл
13 # Сан. 15:24-25«Израильдиң бүгү чону частырыг кылып, бачыт үүлгеткен, а ол херек ниитилелдиң көөр караандан чажыртына берген; улус Дээрги-Чаяакчының айтыышкыннарынга удур кылып болбас ужурлуг бир-ле чүве кылгаш, буруудай берген дижик. 14Оларның үүлгеткен бачыды билдине бээрге, бүгү ниитилел бачыт дээш өргүл кылдыр кодан малдың аразындан бугажыкты үндүргеш, Ужуражылга майгынының мурнунга эккелзин. 15Оон ниитилелдиң баштыңнары Дээрги-Чаяакчының мурнунга холдарын бугажыктың бажынга салзын база ону дөгерзин. 16Бурганның дээди бараалгакчызы бугажыктың ханын Ужуражылга майгынынга эккелгеш, 17# Сан. 19:4Дээрги-Чаяакчының мурнунга, ыдыктыг черниң көжегезиниң мурнунга салаазын ханче суккаш, чеди катап бызай чашсын. 18Оон ол Ужуражылга майгынының иштинде турар, Дээрги-Чаяакчының мурнунда өргүл бедигээжиниң дөрт мыйызын хан-биле чаап кагзын, а арткан бүгү ханны Ужуражылга майгынынче кирер черде турар өргүл салыр бедигээштиң дөжээнче төпсүн. 19Бугажыктың хамык чаан аңгылап ужулгаш, өргүл салыр бедигээшке өрттетсин 20база ооң мурнундагы бугажык-биле кылыр бүгү чүүлдү ооң-биле кылзын. Бурганның бараалгакчызы ынчалдыр кылып, чонну арыглаарга, олар Бурганның өршээлин алыр. 21Бурганның бараалгакчызы ол бугажыкты чоннуң турлааның даштынче үндүре бергеш, ооң мурнундагы бугажыкты өрттеткени дег, база ынчаар өрттетсин: ниитилелдиң салганы бачыт дээш өргүл ол-дур».
Баштың кижиниң бачыды дээш өргүл
22«Баштың кижи бачыт үүлгедип, Дээрги-Чаяакчы Бурганының айтыышкыннарынга удур болбас бир-ле чүвени частырыг бооп кылгаш, буруудай берген дижик. 23Ол ынчан бодунуң үүлгеткен бачыдын билип кааш, четпес-дудуу эвес дүктүгүр хунаны өргүлге салзын. 24Оон хунаның бажынга холун салзын база ону бүрүн өрттедир өргүлдү дөгерер черге, Дээрги-Чаяакчының мурнунга дөгерзин: бачыт дээш өргүл ол-дур. 25Бурганның бараалгакчызы өргүлдүң ханынче салаазын суккаш, өргүл салыр бедигээштиң мыйыстарын чаап кагзын, а арткан ханны өргүл бедигээжиниң дөжээнче төпсүн. 26Ооң соонда хунаның хамык чаан, эп-найырал өргүлүнүң чаа дег, өргүл салыр бедигээшке өрттетсин. Бурганның бараалгакчызы баштың кижиниң бачыдын ынчалдыр арыглаарга, ол кижи Бурганның өршээлин алыр».
Карачал кижиниң бачыды дээш өргүл
27 # Сан. 15:27«Чон аразындан кандыг-бир карачал кижи частырыг кылып, бачыт үүлгеткеш, Дээрги-Чаяакчының айтыышкыннарының бирээзинге удур кылып болбас ужурлуг бир чүве кылгаш, буруудай берген дижик. 28Ол бодунуң үүлгеткен бачыдын билип кааш, бачыды дээш өргүл кылдыр четпес-дудуу эвес дүктүгүр кыс өшкүнү эккеп салзын. 29Оон холун өшкүнүң бажынга салгаш, бүрүн өрттедир өргүлдү дөгерер черге ону бачыт дээш өргүл болу бээр кылдыр дөгерзин. 30А Бурганның бараалгакчызы өшкүнүң ханынче салаазын суккаш, бүрүн өрттедир өргүл салыр бедигээштиң мыйыстарын чаап кагзын, а арткан ханның шуптузун өргүл бедигээжиниң дөжээнче төпсүн. 31# Лев. 1:9Оон Бурганның бараалгакчызы өшкүнүң хамык чаан, эп-найырал өргүлүнүң чаа дег, аңгылап ужулзун база Дээрги-Чаяакчыга таарымчалыг чаагай чыт болзун дээш өргүл салыр бедигээшке өрттетсин; Бурганның бараалгакчызы демги кижини ынчалдыр арыглаарга, ол кижи Бурганның өршээлин алыр.
32А бир эвес ол кижи бодунуң бачыды дээш өргүл кылдыр хой малды салырын күзээр болза, четпес-дудуу эвес кыс хойну эккеп салзын. 33Ол кижи холун хойнуң бажынга салгаш, бүрүн өрттедир өргүлдү дөгерер черге ону бачыт дээш өргүл болу бээр кылдыр дөгерзин. 34Бурганның бараалгакчызы хойнуң ханынче салаазын суккаш, бүрүн өрттедир өргүл салыр бедигээштиң мыйыстарын чаап кагзын, а арткан ханның шуптузун өргүл салыр бедигээштиң дөжээнче төпсүн. 35Оон хойнуң хамык чаан, эп-найырал өргүлүнге салган хойнуң чаан дег, аңгылап ужулзун база Дээрги-Чаяакчыга салган өске өргүлдер-биле кады өрттетсин. Бурганның бараалгакчызы демги кижини үүлгеткен бачыдындан ынчалдыр арыглаарга, ол кижи Бурганның өршээлин алыр.
Tans Gekies:
Левит 4: Ы.Б.2025
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© Институт перевода Библии, 2025