Хосталыышкын 31
31
Бурганның ус-шевер улусту шилип алганы
(Хост. 35:30-35)
1Дээрги-Чаяакчы Моисейге мынча деп чугаалаан: 2«Мени дыңна, Иуданың аймаанга хамааржыр Хурнуң оглунуң оглу, Урийниң оглу Веселиилди шилип алдым. 3# 3 Хаан. 7:14Мен ону Бодумнуң Сүлдем-биле бүргедим – билди-билигни, янзы-бүрү арга-мергежилди аңаа бердим. 4Ынчангаш ол алдын, мөңгүн болгаш хүлер-биле чогаадыкчы, шевер ажылдар кылып шыдаар кижи болур; 5ол үнелиг даштарны хоога сугары-биле кырлап тургаш кылыр; ыяшты оюп-хээлээр – кандыг-даа уран ажылды кылып билир болур. 6Данның аймаанга хамааржыр Ахисамахтың оглу Аголиавты Веселиилге дузалакчы кылдыр шилип бердим база өске-даа уран-шевер улуска билди-билигни бердим.
Олар Мээң сеңээ айтып дужааганым бүгү чүүлдү кылып кагзыннар: 7Ужуражылга майгынын, ыдыктыг аптараны болгаш ооң халывын, майгынның хамык херекселдерин; 8ширээни болгаш ооң хамык херекселдерин; арыг алдын чырыткыны болгаш ооң хамык херекселдерин; айдызаар өргүл бедигээжин; 9бүрүн өрттедир өргүлдер салыр бедигээшти болгаш ооң хамык херекселдерин; чунар саваны болгаш ооң дөжээн; 10Бурганның бараалгакчызы Аароннуң бараан болурда кедер ыдыктыг каас-коя хептерин; ооң оолдарының бараан болурда кедер хептерин; 11шилип чаар олива үзүн, ыдыктыг черге ажыглаар чаагай чыттыг чүүлдерни – бо бүгүнү олар Мээң сеңээ айтып дужааганым ёзугаар кылып кагзыннар».
Амыр-дыш хүнүнүң дугайында
(Хост. 20:8-11)
12Дээрги-Чаяакчы Моисейге мынча деп чугаалаан: 13«Израиль чонга мону дамчыдып чугаала. Мээң айытканым амыр-дыш хүннерин сагыңар. Ол хүннер дээрге силерни ыдыктап каан Дээрги-Чаяакчы – Мен дээрзин билип алзыннар дээш, Мээң биле силерниң бүгү салгалдарыңарның аразынга тургускан тускай бадыткал демдээ болур. 14# Хост. 35:2; Сан. 15:32-36Амыр-дыш хүнүн сагыңар, ол силерге ыдыктыг хүн болзун. Ону херекке албаан кижини өлүрүп каар ужурлуг; ол хүнде ажыл кылыр кандыг-даа кижини чонунуң аразынга амылыг арттырбас ужурлуг. 15Улус алды хүн дургузунда ажыл-херээн кылзын, а чедиги хүн – Дээрги-Чаяакчыга бараалгаткан онзагай амыр-дыш хүнү-дүр. Амыр-дыш хүнүнде ажыл-херээн кылыр кандыг-даа кижини өлүрүп каар ужурлуг. 16Израиль чон амыр-дыш хүнүн утпайн сагып, ону мөңге чагыг кылдыр салгалдан салгал дамчып доктаадып алзын. 17# Э. д. 2:22; Хост. 20:8-11Амыр-дыш хүнү Мээң-биле израиль чоннуң аразынга кезээ-мөңгеде тургускан бадыткал демдээ-дир, чүге дээрге Дээрги-Чаяакчы алды хүн дургузунда чер биле дээрни чаяагаш, чедиги хүнде сагыш амыр дыштанган болгай».
18 # Хост. 24:12Дээрги-Чаяакчы Синай дагга Моисей-биле чугаазын төндүрген соонда, Бодунуң холу-биле айтыышкыннарны оюп бижээни, чагыг-керээни бадыткаан ийи калбак дашты Моисейге берип каан.
Tans Gekies:
Хосталыышкын 31: Ы.Б.2025
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© Институт перевода Библии, 2025
