Ansa 3
3
Kodokpotsu ko cicoꞋo
1Maku ma̱ va̱, ka̱ta̱ vu cinukpa
n kuyotsongusu ku va ba̱.
ama vu ɓa̱na̱ kadanshi ka̱ va̱ a̱ ka̱ɗu ka̱ nu,
2adama a na i ta̱ a kuzuwa wu
vu geshe n wuma n a̱ya̱ a̱ a̱bunda̱i,
ka̱ta̱ a̱ tuka̱ wu n kulyaꞋa ku kelime.
3Ka̱ta̱ vu ka̱sukpa̱ ma̱riki n ucigi u ka̱sukpa̱ wu ba,
ka̱ta̱ vu ka̱sukpa̱ le ci idolu e kuɗeku,
vu zuwa le a̱ ka̱ɗu ka̱ nu.
4Nannai ɗa va̱ kuciya̱ mapasa ma singai
n kula ku singai
u Ka̱shile n a̱ ubuta̱ u uma.
5Zuwa katsura u Vuzavaguɗu n ka̱ɗu ka̱ nu dem.
Ka̱ta̱ vu keɗeke kuyeve ku nu ma̱ka̱nga̱ ba,
6a ili i na vi a kuyaꞋan dem ciɓa n Vuzavaguɗu,
wi ta̱ tana a kuzuwa wu uye u nu u yaꞋan mejege.
7Ka̱ta̱ vu ɗika ka̱ci ka̱ nu vuza vu ugboji ɗa ba,
pana wovon u Vuzavaguɗu
vu suma ka gbani-gbani.
8Nannai va wi ta̱ o ko okpo wu an a̱guma̱ a singai,
a na o kupotsotongu untsu a̱ nu
ka̱ta̱ a̱ ɓa̱nka̱ etele nu.
9Neke Ka̱shile tsugbayin n uciyi u nu,
a̱ ubuta̱ u kuneke ili i kashina i na i gita̱i kugeꞋwe ra̱ka̱,
10ta mpon nu n kushana
n ili i kulyaꞋa ali m ɓarakpa.
Ogbodo a̱ nu i ta̱ a kushana
ɓelele m ma̱kya̱n ma savu.
11Maku ma̱ va̱, ka̱ta̱ vu goyo ugbari
u Vuzavaguɗu ba,
ka̱ta̱ kpamu vu iwan
uɓarangi u ni ba,
12adama a na Vuzavaguɗu
u tsu gbara ta̱ aza a na u cigai,
tsu na kesheku ka ci yaꞋan
m maku ma na wi a kupana uyoꞋo u ni.
13Vuza vu una̱ u singai ɗa vuza na u ciya̱i cicoꞋo,
vuza na u ciya̱i kuyeve,
14adama a na kodokpotsu ka̱ ni ka laꞋa ta̱ azurufa
ugaꞋin u ni u laꞋa ta̱ azanariya.
15UgaꞋin u cicoꞋo u laꞋa ta̱ atali a singai,
u laꞋa ta̱ ili i na vu cigai ra̱ka̱ ugaꞋin.
16E kukiye ku singai ku cicoꞋo
wuma wu ugaɗi wi ta̱ ɗe,
e kukiye ku ugula̱ ku ni kpamu
udukuyan n tsugbayin,
17uye u ni uye u singai u ɗa,
uye u ni kpamu ra̱ka̱ u ma̱ta̱na̱ u ɗa.
18Aza a una̱singai u ɗa ele na oɓongu ni,
a̱yi maɗanga ma wuma maꞋa
ma na me ci neke wuma
wa aza a na a̱ ciya̱ ni.
19N cicoꞋo tsu ɗa Vuzavaguɗu u yaꞋin aduniyan,
n kuyeve ku ɗa u yaꞋin gaɗi n ubuta̱ u ni i,
20n kuyeve ku ni ɗa u pecei mini,
eleshu kpamu o yoꞋo mini a iɗika.
21Maku ma̱ va̱ ɓa̱na̱ cicoꞋo n kuyeve mayin,
ka̱ta̱ vu ka̱sukpa̱ tsu fa̱ta̱tsa̱ wu ba,
22i ta̱ a ku okpo wu wuma,
okpo wu ci ili i tsuzogu e kuɗeku ku nu.
23Ka̱ta̱ vu yaꞋan nwalu n nu m ma̱ta̱na̱
vi tana a̱ kuta̱ɗa̱tsa̱ ba,
24ayin a na baci vu vaki,
vi a kupana wovon ba,
vu vaku baci alavu i ta̱ o ku yokpo wu.
25Ka̱ta̱ vu pana wovon u kawuya ka na ka̱ kuta̱wa̱ wu n ku te ba.
ko munuka ma na ma̱ tsu ciya̱ aza gbani-gbani,
26adama a na Vuzavaguɗu wi ta̱ o ku okpo katsura ka̱ nu,
wi ta̱ e ku ere ene a̱ nu a maza.
27Ka̱ta̱ vu kpa̱ɗa̱ kuyaꞋan kasingai
wa aza a na o yotsoi ba,
a makyan ma na vi n utsura vi yaꞋan nannai.
28Ka̱ta̱ vu dana vuza na yi ida̱shi ɗeɗevu,
<<Wala biꞋi, makpaꞋa vu bono,
mi ta̱ e neke wu,>>
avu tana lo n i ɗa.
29Ka̱ta̱ vu foɓusoko vuza na yi
a ida̱shi ɗeɗevu ka gbani-gbani ba,
vuza vu ma̱riki na wi ida̱shi ɗevu n avu ba.
30Ka̱ta̱ vu taɗaka vuza na wi n kakuna ba,
babu tana u nusaka wu.
31Ka̱ta̱ vu yaꞋan cisheꞋe
n vuza ka gbani-gbani ba,
ko vu yaꞋan mali mo kuyongo ku ni ba.
32Adama a na Vuzavaguɗu wi ta̱
e ku ene unata u vuza vu gbani-gbani,
ama u tsu neke ta̱ vuza vu usuɓi n vuza vu ma̱riki ka̱ɗu.
33Vuzavaguɗu u tsu yaꞋanka ta̱
kpaꞋa ku vuza gbani-gbani una̱wuya,
ama u tsu zuwaka ta̱ kpaꞋa
ku vuza vu usuɓi una̱singai.
34U tsu zoꞋoso ta̱ aza a ulami,
ama u ci yaꞋanka ta̱
aza a na o goyoi ka̱ci ke le kasingai.
35Vuza vu cicoꞋo u tsu ciya̱ ta̱ tsugbayin,
ama kalau ki ta̱ o ku okpo n wono.
©️2025 Language Development and Translation Initiative (LDTI)