Римӧ 11
11
Енмыс оз эновт Ассьыс войтырсӧ
1Юала: «Енмыс ӧмӧй эновтіс Ассьыс войтырсӧ?» Дерт, эз. Ме ачым израильса, Ӧвраам чужанвужйысь, Венямин чужанкотырысь. 2Енмыс эз эновт Ассьыс водзвыв бӧрйӧм войтырсӧ. Онӧ ӧмӧй тӧдӧй, мый висьталӧма Гижӧдас Илля йылысь? Сійӧ норасьӧ Енлы Израиль вылӧ: 3«Господьӧй, Тэнсьыд пророкъястӧ виисны, висьпуктанінъястӧ жуглісны. Ме ӧтнамӧн коли, тшӧтш менӧ кӧсйӧны вины». 4Мый сылы Енмыс воча шуӧ? «Ме коли Аслым сизим сюрс мортӧс, кодъяс эз пидзӧсчанясьны Ваал водзӧ». 5Тадзи и ӧні: Енмыс буралӧмыс кузя видзӧма коляссӧ, Ассьыс бӧрйӧмаясӧс. 6Бӧрйӧмыс – буралӧмыс кузя, абу уджъяс серти. Бӧрйӧмыс кӧ вӧлі уджъяс серти, сэки эськӧ буралӧмыс эз вӧв буралӧмӧн. 7Сідзкӧ, мый артмӧ? Израиль эз аддзы, мый корсис, сӧмын бӧрйӧмаяс аддзисны. Мукӧдыс чорзьӧдчисны, 8ӧд гижӧма:
– Енмыс сетіс налы
чорзьӧм лов.
Налӧн синныс куньса,
пельныс тупкыса,
и ӧнӧдз на тадз.
9Давид висьталӧ:
– Сёянныс мед лоӧ налы тывйӧн да налькйӧн,
налысь мед лоӧ водзӧс перйӧма.
10Налӧн синныс мед дзикӧдз пемдас,
сюрса лыныс мед кусыньтчас пыр кежлӧ.
Быдтӧм пу да вӧрса пу
11Сідзкӧ, найӧ ӧмӧй усьмӧныс крукасисны? Эз. Налӧн крукасьӧмыс вайис мездмӧм ентӧдтӧмъяслы, и та вӧсна на пытшкын кыптіс вежалӧм. 12Налӧн крукасьӧмыс кӧ вайис озырлун муюгыдыслы да Енсьыс кежӧмыс кӧ озырмӧдіс ентӧдтӧмъясӧс, сэки мыйта озырлун ваяс став Израильлӧн Ен дінӧ бергӧдчӧмыс?
13Тіянлы, кодъяс мукӧд войтыръясысь, висьтала: менӧ сувтӧдӧма апостолавны тіянлы, и ме ошйыся аслам кесъялӧмӧн. 14Гашкӧ, верма кыпӧдны ас войтыр пытшкын веж петӧмсӧ да отсавны мездмыны кодсюрӧлы. 15Найӧс ӧтдортӧмыс кӧ вайис бурасьӧм муюгыдыслы, сэки мый ваяс найӧс сибӧдӧмыс? Оз-ӧ кулӧмысь ловзьӧм? 16Медводдза пӧжасыс кӧ вежа, сідзкӧ, кӧтасыс ставнас вежа. Пулӧн вужйыс кӧ вежа, вожъясыс тшӧтш вежаӧсь.
17Быдтӧм олив пуысь кӧ ӧткымын вож чегисны, а тэнӧ, вӧрса олив пу вожӧс, йитісны чегӧминас, и тэ мукӧд вожыскӧд ӧти вужсянь кутін босьтны быдман вынсӧ, 18сэки эн ошйысь мукӧд вожыс водзын. А кӧсъян кӧ ошйысьны, тӧд: он тэ кут вужсӧ, а вужйыс – тэнӧ. 19Гашкӧ, тэ шуан: «Менӧ йитӧм могысь вожъяссӧ чегисны». 20Тайӧ тадз. Найӧс чегисны эскытӧмысла, а тэ кутчысян эскӧмнад. Асьтӧ вылӧ эн пукты, но полӧмпырысь ов. 21Енмыс кӧ эз жалит быдтӧм олив пулысь вожъяссӧ, жалитас-ӧ тэнӧ? 22Тӧд, мый Енмыс бур сьӧлӧма, но овлӧ чорыдӧн. Чорыд усьӧмаяс дінӧ, бур сьӧлӧма тэ дінӧ, сӧмын кутчысян кӧ Сылӧн бурлунӧ. Он кӧ, тэнӧ тшӧтш керыштасны. 23Иудейяс кӧ оз кольччыны эскытӧмлунас, найӧс лоӧ йитӧма. Енмыс вына бӧр йитны найӧс. 24Тэнӧ ӧд керыштӧма вӧлі вӧрса пуысь да йитӧма быдтӧм пуыс дінӧ. А быдтӧм пу вожлы ёна кокньыдджык бӧр йитчыны мам пуыс дінӧ.
Израиль мездмас
25Вокъяс, мед ті энӧ мӧвпалӧй ас мывкыдсяньныд, висьтала тіянлы тайӧ гусяторсӧ – Израиль войтырӧс суис чорзьӧдчӧм, но эз ставнысӧ. Чорзьӧдчӧмыс кыссяс сэтчӧдз, кытчӧдз мукӧд войтыръясысь оз мездмы индӧм лыдыс. 26Сэки став Израиль мездмас. Ӧд гижӧма:
– Сионсянь локтас Мездысь,
Сійӧ бырӧдас Яков чужанвужйысь Ентӧг олӧмсӧ.
27Ме босьта налысь мыжъяссӧ –
татшӧм йитӧд Ме кӧртала накӧд.
28Найӧ эз сибӧдны Бур Юӧрсӧ, Енлы паныд сувтісны. Тайӧ лои тіян вӧсна. Но найӧ бӧрйӧм войтыр, и Енмыс радейтӧ найӧс батьясныс вӧсна. 29Енмыс сетӧмторсӧ бӧр оз босьт, Сылы кесъявны корӧмсӧ оз веж. 30Коркӧ ті, мукӧд войтыр, энӧ кывзысьӧй Енмыслысь, но Израильлӧн кывзысьтӧмлун вӧсна Енмыс вӧлі бур сьӧлӧма тіян дінӧ. 31Ӧні найӧ оз кывзысьны, медым тіян дінӧ моз Сійӧ вӧлі бур сьӧлӧма тшӧтш на дінӧ. 32Енмыс ставнысӧ йӧртіс кывзысьтӧмлунӧ, медым ставныс дінӧ лоны бур сьӧлӧмаӧн.
33Енлӧн озырлуныс пыдӧстӧм,
Сылӧн мывкыдлуныс да тӧдӧмлуныс шымыртны вермытӧм.
Сылӧн мыждана кывъясыс вежӧрӧ тӧрӧдтӧмӧсь,
Сылысь туйяссӧ он вермы туявны!
34Коді вермас тӧдны Господьлысь мывкыдсӧ?
Коді вермас туйдӧдны Сійӧс?
35Кодлы Сійӧ уджйӧза,
кодлы Сійӧ мынтысьӧ?
36Ӧд ставыс Сысянь, Сы пыр да Сылы.
Ошкӧм Сылы нэмъяс чӧж! Аминь.
Tans Gekies:
Римӧ 11: КБ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
(c) Institute for Bible Translation, Finland, amp Finnish Bible Society, 2023
