Иаков 3
3
3-тӥ ЛЮКЕТ
1Агай-вынъёсы! Ваньды дышетӥсь эн кариське. Тодэлэ: асьмеос, дышетӥсьёс, эшшо но золгес судить каремын луомы. 2Уго ваньмы асьмеос трос сьӧлыкаськомы. Кин кылыныз уг сьӧлыка, со дун-шектэм, быдэс мугорзэ но кортнаны со быгатэ. 3Тани, асьмеос валлэн ымаз, асьмелэсь мед кылзӥськоз шуыса, кортнэт понӥськомы ке, соку солэн быдэс мугорыныз кивалтӥськомы. 4Тани, корабльёс но, макем соос бадӟымесь, макем кужмо тӧлъёс пӧлтӥ ветло, нош пичи гинэ руль пыр валтӥсько-нуисько отчы, кытчы корабль нуисьлэн нуэмез потэ. 5Озьы ик кыл но – мугорлэн пичи гинэ люкетэз, нош трос ужъёс лэсьтэ. Учкы, пичи гинэ тыл, нош макем бадӟым нюлэсэз сутэ: 6кыл – со тыл, шонертэм улонлэн чеберлыкез. Мугор люкетъёсмы пушкы интыяськыса, со быдэс мугормес сапта. Ачиз геенна тылын ӝуаса, улон азьмес ӵушка. 7Уго котькуд пӧйшурез но тылобурдоез, нюж кыстӥськыса ветлӥсьёсты но зарезьын улӥсь макеосты адями зӥбломытыны быгатэ. Зӥбломытӥз но ини. 8Нош кылэз зӥбломытыны нокин но уг быгаты: со – кутыса возьыны луонтэм урод маке. Со пачылмемын кулон вайись ядэн. 9Кылынымы Инмарез, Атаез данъяськомы, соин ик Инмарлы укшатыса кылдытэм адямиос вылэ юриськиськомы. 10Одӥг ымысь ик потэ ушъян-данъян но, юриськон но. Агай-вынъёсы, тазьы та луыны кулэ ӧвӧл. 11Одӥг ошмес синмысь ик бызе-а ческытэз но, кузьытэз но ву? 12Агай-вынъёсы, смоквапу вӧйпу мульы сётыны уг быгаты, нош виноградпуд смоква мульы уг сёты. Озьы ик, одӥг ошмес огдыре кузьыт но, ческыт но ву сётыны уг быгаты.
13Кудды тӥ пӧлысь визьмоезгес, валасезгес? Возьматы сое уж вылын: астэ ӟечен возьыса, визьмын зӥбыт улыса. 14Нош тӥляд сюлмады лек вожъяськонэз, ачимъяськонэз вань ке, соку эн ушъяське, зэмлыклы пумит эн мынэ. 15Со – вылӥысь васькись визьлык ӧвӧл, со – музъем вылысь, луллэсь, периослэсь потӥсь визьлык. 16Уго кытын вожъяськон но ачимъяськон, отын луэ тупатэк улон, вань урод ужъёс. 17Нош вылӥысь васькись визьлык, нырысь ик, со – дун-чылкыт, собере – тупаса улонэз яратӥсь, лякыт, кылзӥськись луэ, со гажан-жалянэн но ӟеч емышъёсын тырмемын, шонерлыко, оскиськымон луэ. 18Шонер улонлэсь емышсэ кизё тупаса улонэз вайисьёс.
Tans Gekies:
Иаков 3: УДМБИБ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
(c) Библияез берыктонъя Институт, Хельсинки, 2013; 2016