Маккавейёслэн 3-тӥ книгазы 1
1
1-тӥ ЛЮКЕТ
1Ас доразы вуэмъёслэсь Филопатор тодӥз, солэн киулаз возиськись интыосты Антиох талаз шуыса, соку со вань ожгарчиосызлы, пыдын но вал вылын ожмаськисьёслы, косон сётӥз но, аслэсьтыз Арсиноя сузэрзэ бордаз басьтыса, Рафия ёросэ кошкиз, отын Антиохлэн ожгарчиосызлэн лагерьзы вал. 2Соку кыӵе ке но Феодот аслэсьтыз малпанзэ быдэстыны малпаз: Птоломейлэсь солы сётэм устооссэ ожмаськыны дасям муртъёсты бордаз кутӥз, уйин Птоломейлэн балаган пушказ пыриз, кыкназы кылем бере сое отчы вийыны малпаз, – озьы ожмаськонэз дугдытыны малпаз. 3Нош Досифей, Дримиллэн пиез, иудей выжыысь мурт, бӧрысь иудей законъя улонлэсь, аслаз атыкай осконэзлэсь куштӥськем мурт, сое пӧяз: балаган пушкы со одӥгзэ туж ик тодмо луисьтэм адямиез интыяз, соиз Птоломейлы дасям кулонэз ас вылаз басьтоно луиз. 4Кужмо ожмаськон кутскем бере, Антиохлэн ужез вормыны кутскем бере Арсиноя, йырсиоссэ лэзьяса, бӧрдыса, синвузэ кисьтыса, ожгарчиос пӧлтӥ ветлӥз но соосты асьсэ понна, нылпиоссы, кышнооссы понна чик кышкатэк ожмаськыны ӝутказ, вормизы ке, котькудзылы быдэн кык мина зарни сётыны кыл сётӥз. 5Озьы пӧрмиз: ваче ки вуыса жугиськыку, тушмонъёссэс погыртӥзы, троссэ пленэ басьтӥзы. 6Аслэсьтыз малпанзэ быдэстэм бераз Филопатор, матысь городъёсы вуылыса, отын улӥсьёслэсь мылкыдзэс ӝутыны малпаз. 7Тае быдэстэм бераз, вӧсяськон куалаосазы тырмыт салам-кузьымъёс вайыса, аслэсьтыз тэрытскись муртъёссэ кышкасьтэм луыны лӧпкытылӥз.
8Со доры иудейёс кенешысьтызы, тӧрооссы пӧлысь адямиосты ӟечкыланы ыстӥзы, саламъёс-кузьымъёс нуизы, луэм учыр пумысен шумпотонзэс вераны лыктӥзы, соку со мылкыд кариз ӝоггес-ӝоггес соос доры вуттӥськыны. 9Иерусалиме вуэм бераз со быдӟым Инмарлы курбон сётӥз, тау карон курбонъёс сётӥз, священной интыын лэсьтыны ярамон мукет ужъёсты быдэстӥз. 10Отчы пырем бераз чылкак паймиз храмлэн быдӟымлыкезлы, чеберлыкезлы, ӟеч пуктэм-радъямезлы, соку со вӧсяськон интые пырыны мылкыд кариз. 11Солы шуизы: «Тазьы карыны уг яра, одӥгезлы но ас калыкед пӧлысь адямилы но отчы пырыны уг яра, священникъёслы гинэ но отчы пырыны лэземын ӧвӧл, ваньмыныз кивалтӥсь одӥг архиерейлы сяна, – солы но арлы одӥг пол гинэ пырыны яра». Нош Филопатор та веранэз чик но санэ поныны мылкыд ӧз кары. 12Солы законысь чуръёсты лыдӟизы, нош со соку но ас малпанэзлэсь ӧз куштӥськы, со шуиз, мон, пе, отчы пырыны кулэ: соосты отчы пырыны ӧз ке но лэзе, нош монэ лэзьыны кулэ, пе. Соослэсь юаз, малы со храме пырыку нокин но сое ӧз куареты? 13Кин ке но чакласькытэк шуиз, озьы, пе, умойтэм лэсьтӥзы, соку со шуиз: «Та уж лэсьтэмын ни бере, – котькыӵе муген со лэсьтэмын мед луоз, – котькыӵе но учыре мыным отчы пырыны уг яра шат, потэ-а, уг-а тӥляд лэземды». 14Соку вӧсяськон дӥськутъёсынызы дӥсяськем священникъёс ымныр вылазы выдӥзы но быдӟым Инмар азьын вӧсяськизы, та виын ортчись лек ужын соослы Со мед юрттысал, кужмысь пырыны турттӥсьлэсь мылкыдзэ мед зӥбломытысал шуыса; викышъясьёслэн куараенызы, синвуэн храм пачылмиз, нош городэ кылемъёс куалектыса бызьыса вуизы, кыӵе ке но туж йӧспӧртэм ужъюгдур ортче, дыр, шуыса малпазы. 15Бӧльмы сьӧры ворсам нылъёс анайёсынызы ӵош бызьыса потылӥзы но йыр вылазы пень, сюй пызьналлязы, ульчаосын викышъям, зар бӧрдэм куараос кылӥськизы. 16Мукетъёсыз, вылькен дӥськутэн дӥсяськем нылъёс, эмеспиен пумиськон понна чеберъям комнатазэс кельтыса, вылькенлы тупась кепыранэз вунэтыса, город кузя кызьы сюрем, озьы азьлань-берлань бызьылыса ветлӥзы. 17Нош анайёс, нуны нонтӥсьёс вож нуныоссэс отчы-татчы кельтылӥзы, кин – корка пушкы, кин – ульчае, нош асьсэос кутыны сётӥськытэк святойлэсь но святой храме бызьыса мынылӥзы. 18Сыӵе пӧртэмлыко вал храмез саптаны лэзёнтэм вылысь лыктэмъёслэн вӧсяськемзы. 19Со сяна, городын улӥсьёс пӧлын кышкасьтэм муртъёс шедӥзы, соос малпазы святой интые кужмысь пырыса ас малпанзэ быдэстыны турттӥсез отчы лэзьытэк кельтыны. Соос вазиськизы, ожмаськон тӥрлыкъёс кие кутыны кулэ шуыса, атайёслэн кутэм законзы понна кышкатэк кулыны дась луыны кулэ, шуизы, храм пушкын бадӟым бугыръяськон ӝутӥзы; 20тӧроос, священникъёс мырдэм гинэ соосты буйгатыны быгатӥзы, соос озьы ик вӧсяськыса кылизы. 21Калык азьло кадь ик вӧсяськыса улӥз. Эксэен ӵош ветлӥсь тӧроос но трос пол тыршизы солэсь вылтӥяськись визьзэ малпам ужезлэсь куштӥськытыны. 22Нош со, возьытсэ-кышканзэ ыштыса, вань куронъёсты палэнтыса, одӥг вамыш лэсьтӥз ни азьвыл верам кылъёссэ быдэстон вылысь. 23Тае адӟыса, соин ӵош ветлӥсьёс асьме калыкен ӵош Дунне Кутӥсь Инмарлы вазиськыны кутскизы, таӵе шугадӟон дыръя Со мед юрттысал, таӵе законлы пумит, возьыттэм ужез быдэстыны медаз лэзьы вал шуыса. 24Вань калык ӵош, секытэн, кужмысьтыз лулӟиськылэмысь-ӝуштэмысь, вераны луонтэм куара-ланга кылӥськыса улӥз. 25Адямиос гинэ ӧвӧл, борддоръёс но, храмлэн инъетъёсыз но вузӥзы святой интыез саптамлы чидатэк кулэмъёс музэн.
Tans Gekies:
Маккавейёслэн 3-тӥ книгазы 1: УДМБИБ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
(c) Библияез берыктонъя Институт, Хельсинки, 2013; 2016