2 Corinto 4
4
Ya pagpadeleg ni Pablo sa pagpa-edeꞌ sa Madyaw na Ubat-ubat
1Asuntu sa kallat na Tyumanem, pig-atag nan kanami ya pagpa-edeꞌ sa Madyaw na Ubat-ubat adti manga utaw. Yanagaw walaꞌ pagkalumay ya kanami ginawa sa imo-unun yeiy. 2Pigkele͡an nami ya manga imo-unun na tagu-taguꞌ. Aw walaꞌ ya piggawayan nami na manga utaw magi sa manga kapandayan. Aw walaꞌ nami uman baluka ya tingeg na Tyumanem, yanagaw kya-ede-an na manga utaw na kasaligan ya pig-ubat-ubat nami. Aw Tyumanem saba ya magmatinaw na ya kanami pig-ubat-ubat alag matinaw. 3Manang kun awun manga utaw na diliꞌ makalabet sa pigpa-edeꞌ nami na Madyaw na Ubat-ubat, idtu saba oloꞌ na manga kyumele aw silan ya pa-emel-emelen na Tyumanem na walaꞌ ya tyamanan. 4Ya kanilan anenganeng pigbuta ni Satanas na palangad tyumanem nilan asini tas na lupaꞌ, pada diliꞌ silan ka-ilawan na kalalamdag na Madyaw na Ubat-ubat kan Kristu. Dun oloꞌ ni kan Kristu pagkita-en ya kadyaw na Tyumanem.
5Aw bekeꞌ na kanami pagka-utawun ya pig-ubat-ubat nami, manang ya kanaten Matas na Pangulu na si Jisu-Kristu. Asuntu kan Jisus, nya-imoꞌ kami kasiling na sugu-anen mayu. 6Kay dun ni pag-imoꞌ na Tyumanem sa kadég, miglong sakanan, “Ka-ilawan na kalalamdag ya mangitngit.” Maynan uman, Tyumanem ya magpaka-ilaw sa anenganeng tadun. Aw dun da tadun ka-ede-i ya kadyaw na Tyumanem na pigkitaꞌ dun ni kan Kristu.
Ya kalugan na utaw aw ya katulus na Tyumanem
7Na, ya pag-ubat-ubat na pig-atag kanami, to-o dakulaꞌ ya alagaꞌ. Manang kami na dyumawat seiy kasiling kami oloꞌ na kulun na pigseledan sa pametang na dakulaꞌ ya alagaꞌ, pada ka-ede-an na manga utaw na ya katulus na walaꞌ ya maka-unawa na asini kanami, lekat saba adti Tyumanem aw walaꞌ lekat adi kanami. 8Pangkay madég ya kalugan na kya-agiyan nami, manang walaꞌ nami patenenga ya manga imo-unun na pigtaligu kanami na kanaten Matas na Pangulu. Makaselaꞌ awun madég na pagkasagunutan na kanami anenganeng, manang walaꞌ pagkalumay ya ginawa nami. Gayed nami baling pig-iman na tabangan kami na Tyumanem. 9Aw pangkay pigpamulayaman kami, manang walaꞌ kami na Tyumanem pabaya-i. Pangkay madég ya migbalabag, manang kenneꞌ nami migpadeleg. 10-11Dun ni kanami kya-agiyan, gayed nami pigsolok ya kamatayen kasiling ni Jisus, asuntu sa pagpa-edeꞌ nami sa Madyaw na Ubat-ubat. Manang kenneꞌ na migka-utaw pa kami magi sa tabang nan, pada dun ni kanami kita-a na manga utaw ya katulus na pagkataw ni Jisus lekat adti pagkamatay. 12Yanagaw pangkay gayed nami byabang ya kutkut, manang ya syampetan na kadég yeiy, nyatagtun mayu ya ginawa na walaꞌ ya katigkasan.
13Na, awun pigsulat asini muna dun ni Salmo: “Nyangintu-u aku sa Tyumanem, yanagaw walaꞌ ku katageni ya pag-ubat-ubat ku.”#4:13 Mabasa adti Salmo 116:10. Maynan uman ya kanami pagpangintu-u. Yanagaw walaꞌ nami uman katageni ya pag-ubat-ubat sa kanami pigpangintu-uwan. 14Kay ini saba ya kya-ede-an nami: Ya migmataw sa kanaten Matas na Pangulu na si Jisus lekat adti pagkamatay, yan uman ya magmataw kanami. Aw maynan uman kamu, aw pa-agad kitadun nan adti sayid na Tyumanem. 15Ya kadég na kalugan na pigti-is nami, alag yeiy sa kadyawan mayu, pada pakitaꞌ na Tyumanem ya kanan kallat adti madég pa uman na manga utaw aw magkadég ya mangintu-uway. Aw to-o pa magkadég ya magpasalamat aw magdeyen kanan.
16Yanagaw walaꞌ pagkalumay ya kanami ginawa sa imo-unun yeiy. Pangkay ya kabagseg na kanami lawas maya-mayaꞌ nyalagak, manang kada allaw pigbagu na Tyumanem ya kanami anenganeng. 17Aw pangkay awun manga kalugan na kya-agiyan tadun, manang oloꞌ yeiy magpaka-agi, aw diliꞌ to-o mabegat kun pa-unawa sa kadyawan na pigtagilan na Tyumanem. Kay ya sampetan na kalugan yeiy pa-eya-en kitadun kagaya adti tas na langit na walaꞌ ya tyamanan. 18Yanagaw diliꞌ tadun pagbetang adti kanaten anenganeng ya asini tas na lupaꞌ. Tibullukun tadun baling ya kanaten anenganeng adti manga diliꞌ pagkita-en na awun ni tas na langit. Kay ya kadég na pagkita-en asini tas na lupaꞌ, alag saba malagak. Manang ya diliꞌ pagkita-en, walaꞌ ya tyamanan.
Tans Gekies:
2 Corinto 4: klgv
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© 2024, Wycliffe Bible Translators, Inc. All rights reserved.