1 Corinto 2
2
Ya kakawasan na pagkalabu kan Jisu-Kristu adti krus
1Kay manga inulug ku, idtu na pagkawun ku dun ni kamayu, pig-ubat-ubat ku ya palpa na Tyumanem na pigtaguꞌ asini muna, manang walaꞌ aku kamayu paglong magi sa malalem na manga tingeg. Aw walaꞌ ku paglongan ya manga tingeg na utaw na matas ya kya-ede-an. 2Kay talana ku dun ni kamayu, gayed ku pigbetang adti kanak ginawa na yan oloꞌ ya pa-edeꞌ ku kamayu si Jisu-Kristu aw ya kakawasan na pagkalabu kanan adti krus. 3Sa dun pa aku ni sayid mayu, walaꞌ aku pakapaglong sa adi anenganeng ku kay nyallek aku pagaw diliꞌ ku mabatug imo-un ya pagkaliman ni Kristu adti kamayu. 4Aw adti pagpalna-u ku kamayu, walaꞌ aku pag-imo-imoꞌ sa manga tingeg pada madala ta kamu. Manang ya kadég na piglong ku kamayu, alag saba pigmatinaw na katulus na Ispiritu Santo, 5pada mangintu-u kamu asuntu sa katulus na Tyumanem aw bekeꞌ na katadeng na manga utaw.
Ya katadeng na lyumekat adti Tyumanem
6Na, ya manga utaw na nyakadalid da ya pagpangintu-u nilan, piglong nami kanilan ya malalem na palna-u. Manang ya palna-u yeiy walaꞌ saba lekat adti manga utaw aw walaꞌ uman lekat adti manga migdumala asini tas na lupaꞌ, kay diliꞌ madugay malagak da ya katundanan na kadég nilan. 7Manang yan ya pigpalna-u nami ya katadeng na Tyumanem na madugay da pigtaguꞌ. Sa walaꞌ pa nan imo-a ya kadakulaꞌ na banwa, dadan da nan yeiy pigpalpa pada maka-akup kitadun adti dengeg nan. 8Manang ya manga migdumala asini tas na lupaꞌ, walaꞌ nilan kalabeti ya palpa na Tyumanem. Kay kun kyalabetan pa nilan, diliꞌ nilan galu pakalabu adti krus ya Matas na Pangulu tadun na umbaꞌ deyen. 9Kasiling na pigpasulat na Tyumanem asini muna:
“Ya diliꞌ ka͡apetan na mata
aw diliꞌ dengegen na talinga
aw ya walaꞌ pakabetang adti anenganeng na utaw,
yan ya pigtagilan na Tyumanem sa kadég na gyuminawa kanan.”#2:9 Mabasa adti Isayas 64:4.
10Aw alag yeiy pigpa-edeꞌ na Tyumanem adti kanaten magi sa Ispiritu Santo. Kay ya Ispiritu, yan ya nya-edeꞌ sa kadég, dala ya pigtaguꞌ na Tyumanem asini muna. 11Kasiling na utaw, walaꞌ ya nyaka-edeꞌ sa anenganeng na sambuk na utaw, yan oloꞌ ya nyaka-edeꞌ sa kanan anenganeng. Maynan uman ya Tyumanem, walaꞌ ya utaw na nyaka-edeꞌ sa anenganeng nan. Kanan oloꞌ Ispiritu ya nyaka-edeꞌ. 12Aw walaꞌ tadun dawata ya palna-u na manga utaw na walaꞌ pangintu-u sa Tyumanem, manang yan baling ya pigdawat tadun ya Ispiritu Santo, pada ka-ede-an tadun ya kadég na pig-atag da na Tyumanem kanaten na walaꞌ ya bayad.
13Yanagaw, ya kadég na pigpalna-u nami kamayu, alag saba lyumekat adti Ispiritu Santo aw walaꞌ lekat adti katadeng na manga utaw. Aw pigpalabet nami ya matinaw na palna-u na lyumekat adti Tyumanem adti manga utaw na piggagad na Ispiritu ya anenganeng nilan. 14Manang pangkay singalan ya walaꞌ ya Ispiritu Santo dun ni kanan, diliꞌ sakanan makadawat sa pigpa-edeꞌ na Ispiritu, kay adti anenganeng nan walaꞌ ya un ma-untung dun. Aw diliꞌ nan kalabetan ya kakawasan kay magi saba oloꞌ sa Ispiritu Santo kalabetan nan. 15Ya utaw na gayed piggagad na Ispiritu Santo, mabatug da nan ya magbayaꞌ sa pangkay unu, kun awun ma-untung aw ya walaꞌ. Manang diliꞌ sakanan kalabetan na manga utaw na walaꞌ ya Ispiritu Santo. 16Pigpasulat saba na Tyumanem asini muna:
“Singalan ya nyaka-edeꞌ sa anenganeng na Tyumanem?
Aw singalan uman ya makapalna-u kanan kun unu ya un nan imo-un?”#2:16 Mabasa adti Isayas 40:13 aw Roma 11:34.
Manang kitadun na nyangintu-u la kan Kristu, asini kanaten ya anenganeng nan.
Tans Gekies:
1 Corinto 2: klgv
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© 2024, Wycliffe Bible Translators, Inc. All rights reserved.