रोमियां 16
16
नमस्कार
1मैं तम्चे कनु, ब़ेहण फीबे वास्ते जको किंख्रिया शहरा ची कलीसिया ची सेविका छै, सिफारिश करे पला, 2तम्हानु जिसड़े कि नरीकारा चे लौका नु करने चाही छै, यूंही विनु प्रभु मां ग्रहण करा, ते जिसी कुई बाते मां विनु तम्चे कनु सहायता ची जरुरत हो, विची सहायता करा, कांकि खौद्द विणे कईयां ची सेवा करली ते माई वी सहायक हुली।
3 #
प्रेरि 18:2
प्रिस्का ते अक्विला नु जको ईशु मसीह मां माये भईवाल हुले, वानु नमस्कार। 4वाणे माये प्राण बचावणे वास्ते आपणे जीवन वी दाह उपर लाती ङिले। ते सेर्फ मैं ही कोनी, बल्कि नेरीया जातिया ची सारीया कलीसिया वी वांचा धन्यवाद करी। 5ते वे कलीसिया नु वी नमस्कार जको वांचे घरा मां भेली हुवे। माये प्यारे इपैनितुस नु, जको मसीह चे वास्ते आसीया चा पेहला फल छै, नमस्कार। 6मरियम नु जेह्णे तम्चे वास्ते घणी मेहनत करली, नमस्कार। 7अन्द्रनीकुस ते यूनियास नु जको माये कुणम्बे चे छी, ते माये लारे कैद हुले हुते, ते प्रेरितां मां मनले आले छी, ते माये कनु पेहले मसीही हुले हुते, नमस्कार। 8अम्पलियातुस नु, जको प्रभु मां माया प्यारा छै, नमस्कार। 9उरबानुस नु, जको मसीह मां अम्चा भईवाल छै, ते माये प्यारे इस्तखुस नु नमस्कार। 10अपिल्लेस नु जको मसीह मां खरा निकड़ला, नमस्कार। अरिस्तुबुलुस चे घराणे नु नमस्कार। 11माये कुणम्बे चे हेरोदियोन नु नमस्कार। नरकिस्सुस चे घराणे चे लौक जको प्रभु मां छी, वानु नमस्कार। 12त्रूफेना ते त्रूफोसा नु जको प्रभु मां मेहनत करने आलीया नु नमस्कार। प्यारी पिरसिस प्रभु मां घणी मेहनत करने आली नु नमस्कार। 13#मरकु 15:21रूफुस नु जको प्रभु मां चुणला आला छै, ते ओची आई नु जको माई वी आई आलीकर छै, ङुंहु नु नमस्कार। 14असुंक्रितुस ते फिलगोन ते हर्मास, पत्रबास, हिर्मेस ते वांचे लारे सारे विश्वासीया नु वी नमस्कार। 15फिलुलुगुस ते यूलिया ते नेर्युस ते ओची ब़ेहण, ते उलुम्पास ते वांचे लारे चे सारे नरीकार चे लौका नु नमस्कार। 16आपस मां हाथ जोड़ती कर नमस्कार करा। तम्हानु मसीह ची सारीया कलीसिया ची ओर कनु नमस्कार।
आखरी आदेश
17हमा हे माये भऊ, मैं तम्चे कनु बिनती करे पला, कि जको लौक वे शिक्षा चे विपरीत, जको तम्ही गेहली, फूट नाखणे, ते ठोकर ङिवाणे ची वजह बणी, ते वानु भांपती गेहले करा ते वाकनु दूर रेहले करा। 18कांकि इसड़े लौक अम्चे प्रभु मसीह ची ना, पर आपणे ढिड्डा ची सेवा करी, ते चिकनिया चुपड़ीया बाता लारे भोले-भाले मना आले लौका नु भटकाती नाखी। 19तम्ची आज्ञा मनणे ची चर्चा सारा लौका मां फैलती गेली, ऐवास्ते मैं तम्चे बारे मां खुशी मनावे, पर मैं ईं चाहवे कि तम्ही भलाई चे वास्ते ब़ुध्दिमान पर बुराई चे वास्ते भोले बणले रिहा।
20शान्ति चा नरीकार शैताना नु तम्चे पग़्ग़ा तले जल्दी कुचलवाती ङी।
अम्चे प्रभु ईशु मसीह चा अनुग्रह तम्चे उपर हुता रिहो।
21 #
प्रेरि 16:1
माये भईवाल तीमुथियुस चा, ते माये यहूदी कुणम्बे चे लूकियुस ते यासोन ते सोसिपत्रुस चा तम्हानु नमस्कार।
22ये चिठ्ठी नु लिखणे आले माये तिरतियुस चे तरफु प्रभु मां तम्हानु नमस्कार।
23 #
प्रेरि 19:29; 1 कुरि 1:14;
2 तीमु 4:20
गयुस जको माई ते कलीसिया चा अतिथि-सत्कार करने आला छै ओचा तम्हानु नमस्कार। इरास्तुस जको शहरा चा भण्डारी छै, ते भऊ क्वारतुस चा तम्हानु नमस्कार। 24अम्चे प्रभु ईशु मसीह चा अनुग्रह तम्चे उपर हुता रिहो। आमीन।#16:24 कोच्छ हस्तलेखा मां हा वाक्य ना मिली
आशीर्वाद
25हमा जको तम्हानु माया सुसमाचार यानिकि ईशु मसीह चे सनेसे चे प्रचार चे अनुसार मजबूत कर सग़े, ओ भेद चे प्रकाश चे अनुसार जको सनातन कनु लुकला रेहला, 26पर हमा प्रकट हुती कर सनातन नरीकारा ची आज्ञा लारे भविष्यवक्ता चीया किताबा चे जरिये सब जातिया नु बावड़ला गेला कि वे विश्वासा लारे आज्ञा मनणे आले हुती जाओ। 27ओही अद्वैत ब़ुध्दिमान नरीकारा ची ईशु मसीह चे जरिये युगानयुग महिमा हुती रिहो। आमीन।
CC BY-NC-ND 4.0