Habakuk 2
2
1Kate hom tardo ap miro turmo,
oun dau garda,
te dikap, hoy yob mantsa rakrell,
oun have laba yob mange pale penell,
ap kova, hoy me leske halauter glan rikrom.
Djungeles djal o čilačeske
2O baro Devel rakras mantsa pale
oun penas:
Čin pre, hoy touke sikrau!
Čin les shoukar pre ap i tafla,
te nay draverell les hakeno, kay kote djal oun kova dikell.
3Ko tsiro hi kanna gar koy,
te vell kova yaake, hoy sikrom touke.
Kova vell čačo ap peskro tsiro.
Tou nay djineh čačepah, kay kova yaake vella.
An kal laba hi kek rhorhepen.
Ninna te vell kova gar yaake sik,
de yak, te vell kova.
Hi čačo, hoy penau: Kova vella oun ačell gar krik.
4Kava hi, hoy hounte činess pre:
Kones i pre-phourdo oun i rhorheno dji hi,
kova nashrell peskro djipen.
Koon an o čačepen tardo hi,
kova djivell dran peskro patsepen ap mande.
5O bravlepen rhorhell o menshes.
O pre-phourdo mensho ačella gar,
ninna te krell lo peskro mouy dour pre,
har ko moulengro them, hoy vell gar čalo,
ninna te lell lo yek them pal o vavar peske dren.
6O dives vell, kay givenn kolla lauter i sapaskri gili pral koleste, kay rikras len tele,
oun rakrenn laba, kolentsa yon pral leste san.
Yon penenna: Djungeles djal touke,
kay leh touke, hoy gar tiro hi!
Har rah kameh yaake doureder te krell,
oun bravelo te vell
ko koveha, hoy kolla hounte denn tout,
kolen siyaan pash toute hi?
7Sik stenn kolla pre, kay kamenn toutar love.
Yon djangrenn pre, kay touke daar krenn,
oun tout čorenn yon vin.
8Tou čoral i menshen an boud themma vin.
Tou maral boud lendar,
kral lengro them oun lengre forya paash,
oun djal zoryah ap halauterende, kay kote djivenn.
Doleske čorenn tout kanna kolla vin, kay djido ačan.
9Djungeles djal touke, kay tou rhorhepah tiro bravlepen khetne aneh!
Ap tiro kheer vell bibarht.
Pral ap i berga kral tou tiro kheer,
te nay vell kek bibarht pral toute!
10An tiro dji his, te maress i menshen an boud themma.
Kova hoy touke glan lal, anell i ladj pral tiro kheer,
oun tou veh maredo.
11Ninna i barra an o kheer denn gole,
oun i kashta, hoy hidjrenn i dacha, penenn lenge o lab pale pale.
12Djungeles djal touke, kay kral i foro o rateha,
oun čival les pre o marepah!
13O baro Devel, ko ray pral o bolepen oun i phoub, krell, te vell yaake:
Ko tselo koova, kay boudran pen i menshe dran vavar themma temerl,
kova vell i yagatar tele rhačedo.
Oun koleske kol menshe pen tele maran,
his čičeske.
14Yaake har o baro pani pherdo pani hi,
vell i tseli phoub pherde menshe,
kay djinenn, har raylo o baro Devel hi.
15Djungeles djal touke, kay moukeh i vavaren tiro khoro pherdi rholi te piyell,
oun kreh len mato, te dikess len nango!
16Tou anal ladj ap toute oun kek sharepen.
O baro Devel dell tout dran leskro khoro pherdi peskri rholi te piyell.
Kanna pi, bis te nay rikreh tout bouder gar ap tire pire!
Palle vell i ladj pral toute,
oun tiro raylepen hi gar bouder.
17Tou dal i rouka ap i berga Libanon tele.
Tou maral i firhen, kay kote djivan.
Lengri daar vell kanna tiri daar.
Tou maral boud menshen,
kral lengro them oun lengre forya paash,
oun djal zoryah ap halauterende, kay kote djivenn.
Ko čilačepen, hoy kral, vell kanna pale ap tiro shero.
18Hoy vell touke palle ap i rig?
I figura dran kasht oun saster, hoy i morsh peskre vastentsa kras?
Kova hi rhorhepen!
Har nay patsell yek ap i devel,
hoy nay rakrell gar,
oun koles yob peskre vastentsa kras?
19Djungeles djal koleske, kay penell ap i kotar kasht: “Ste pre!”,
oun penell ap ko moulo bar: “Ab djido!”
Har nay penell i moulo devel touke, hoy te kress?
Ninna te hi roup oun sonakay pral leste maklo,
hi kek dourho an leste.
20O baro Devel hi an peskro kheer, kay yob djivell.
Ma rakrenn či glan leste, t'mer menshe ap i tseli phoub!
Tans Gekies:
Habakuk 2: Sint-Man2024
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.