མ་ཏི། 28

ཡི་ཤུ་གཤགས་པ་གེ་ ལོག་ཉི་བཞེངས་པ།

1ཉི་ཨོམ་ དུས་བཟང་ག་ ནོང་ཆུམ་དེན་གེ་ གཟའ་ད་ཝ་ནོང་ཀ་ ཝུན་བེད་པེ་རང་ མ་རི་ཡམ་མག་ད་ལི་ནི་དང་ ཨོམ་ཐུར་མ་རི་ཡམ་ དུར་གོད་པེ་ག་ དི་ཝ༌ལ།

2ཨོ་ཉི་ཆོ་ལ་རང་ ན་ཀ་གནམ་མེད་ས་མེད་ ཆི་ལུ་ཨོ་ཕ༌ལ། ཧང་ཡ་དག་ནེ་ལ་ གཙོ་བོ་ག་ ཞིང་ཁམས་ག་འཐེན་པ་ ཞིང་ཁམས་གེ་དོང་བྱོན་ཉི་ ལུང་རིན་བུན་ཐཱན་ ཨོ་ཉ་ལུང་ཐུང་ཀ་བཞུགས་པ་གི་ཝ༌ལ། 3ཉི་ཞིང་ཁམས་ག་འཐེན་པ་ག་ཞལ་གེ་ འོད་ཆར་བ༌ལ། ཉི་རོ་ཀ་ནམ་བཟའ་ཁེ་པ་ ཕོམ་ད་བུ་རང་ བ་ལིང་མིན་ཅ་གི་ཝ༌ལ། 4ཉི་ཞིང་ཁམས་ག་འཐེན་པ་ མཇལ་བ་ཀབ་ཉི་ སྲུང་རྒྱབ་པ་བ་ གནམ་མེད་ས་མེད་ ཡོང་ཙུང་ཉི་ དྲཱན་མ་མ་ཝ་རི་ཝ༌ལ།

5དག་པ་ཀབ་ཉི་ ཞིང་ཁམས་ག་འཐེན་པ་གི་ མེ་ཝག་ཙ་བ་ཀ་ གསུངས་མ་ལ་ ཡོང་མ་ཁེ་ ཧང་ཡ་དག་ནེ་ལ་ ན་ཆིང་ཤོ་ ཁྲིམས་ཤིང་ཐུང་ཀ་ ཇཱན་ཉི་བཀྲོངས་ཁཱན་ ཡི་ཤུ་ལམ་ཅ་གི་ལ་ཨ་ཉི་ ཇི་གི་སེན༌ཅ། 6རོག་ཐ་ག་མཱན༌ཅ། ཧང་ཡ་དག་ནེ་ལ་ རོ་ཀི་གསུངས་མ་པུརུས་ཀིན་ཨ་ཉི་ རོག་གཤགས་པ་གེ་ ལོག་ཉི་བཞེངས་པ། ཨུན་ཐཱན་ རོ་ཀ་སྐུ་ཕུང་ཐ་ཁཱན་ བཱརང་གོད་ཅོ། 7ཨོ་ཉི་ཨ་དེན་གེ་ ན་ཆིང་དོ་ཟོ་ཨ་ཉི་ དིན་ཐཱན་ རོ་ཀ་སློ་མ་བ་ཀ་ རོག་བཞེངས་པ་ལ་དག་ཉི་ ཡེག་ཅོ། ཨོ་མ་ རོག་ ན་ཧ་བ་ཀེ་གུམ་གུམ་ ག་ལིལ་ག་ཏཱན་བྱོན༌ལ། ཉི་ན་ཤི་ རོག་ལེ་ལ་ག་མཇལ༌བེ། ཇི་གི་ ན་ཆིང་ག་ཡེག་ཁཱན་ ཡིད་ཀ་ཨའི་ན་དག༌ཉི།

8རོག་ཏེ་བ་ ཡོང་ཁེ་ཝ་ཅ་གི་ཝ༌ལ། ཉི་ཤོ་ནང་བུ་ཕེ་ཝ་ཅ་གི་ཝ༌ལ། རོག་ཏེ་བ་ དུར་གེ་ བཱས་པ་དི་ཉི་ སློ་མ་བ་ཀ་ཡེག་པེ་དེན་གེ་ ཇུག་ཉི་རང་དི་ཝ༌ལ། 9ཨོ་ཉ་མེ་ཝག་ཙ་བ་ དིན་ཅ་ཨ་ཉི་ ཡིད་ཀ་རྣམ་ཏོག་མ་ཝ་ ཡི་ཤུ་གི་མཇལ་ཁ་གནང་ཐཱན་ སྐུ་གཟུགས་བཟང་པོ་དག་ཉི་ གསུངས་མ༌ལ། ཉི་རོག་ཏེ་བ་ཀི་ ཇུག་ཉི་རང་དིན་ཐཱན་ རོ་ཀ་ཞབས་ག་ཙུང་ཉི་ རོ་ཀ་གསོལ་ཝ་ཏ་པ༌ལ། 10ཡི་ཤུ་གི་ རོག་ཉིག་ཙིང་ག་ གསུངས་མ་ལ་ ཡོང་མ་ཁེ་ དག་པ་ཀབ་ཉི་ དིན་ཐཱན་ ཇ་ག་ཀོ་ཏ་བ་ཀ་ རོག་ཏེ་བ་ ག་ལིལ་ག་དི་ཨ་ཉི་ ཡེག་ཅོ། ཉི་རོག་ཏེ་བ་ཀི་ ཇང་ཉ་ག་རུ་མེ་དག༌ཉི༎

སྲུང་རྒྱབ་པ་བ་ཀི་ཞུ་ཝ༌ལ།

11ཨོ་ཉ་མེ་ཝག་ཙ་བ་ ལམ་ཁོན་དང་ཉི་ཆོ་ལེ་གང་ཀ་ དུར་ཁུང་ཁཱན་ སྲུང་རྒྱབ་པ་ཚེ་བང་གི་ ཁྲོམ་ཆེན་ག་དིན་ཐཱན་ ཧང་ཇུང་མ་གི་ལ་སྨོ་ ཨོ་ཉ་ཀོར་གེ་ ཐམས་ཅན་རང་ བླ་མ་ཆི་ལུ་བ་ཀ་ ཞུ་ཝ༌ལ། 12ཉི་བླ་མ་ཆི་ལུ་བ་ཀི་ སོ་ངོ་ཆི་ལུ་བ་རཱན་ཐཱན་ ཏུན་ཆ་ཨ་ཉི་ སྲུང་རྒྱབ་པ་བ་ཀ་ ནང་སུབ་བི་ལེ་ཨ་ཉི་ ཐ་ཝ༌ལ། 13ཉི་རོག་ཏེ་བ་ཀི་ སྲུང་རྒྱབ་པ་བ་ཀ་ ཡེག་པ་ལ་ བི་ནང་ག་ ན་ཧ་བ་ ཡིབ་ཉི་ཆོ་ལ་ཀབ་ཉི་ ཡི་ཤུ་ག་ སློ་མ་བ་ཨུན་ཐཱན་ རོ་ཀ་སྐུ་ཕུང་ དྲོ་ཝཱན་ཨན་བུ་ཝ་ཨ་ཉི་ ཡེག་ཅོ་ན། 14དཔོན་སློབ་གི་ ཨོ་ཉ་ཀོར་གེ་མཁྱེན་ནེ་ལ་ ཨ་ཤི་ ན་ཧ་རྒྱབ་ཨ་ཉི་ཐིང༌མེ། ཨོ་ཉི་ཨ་དེན་གེ་ ན་ཧ་བ་ ཧང་ཀ་ལུ་རང་ མ་ཏཱད་པ་དག༌ཉི། 15ཉི་སྲུང་རྒྱབ་པ་བ་ཀི་ ནང་སུབ་དོག་ཉི་བུན་ཐཱན་ རོག་ཏེ་བ་ཀ་ ཡེག་པ་ད་བུ་རང་ ཨ་ཝ༌ལ། ཨོ་ཉི་ཨ་དེན་གེ་ ཐི་ནོང་ནམ་ནིང་སག་པུ་བུ་ ཡ་ཧུ་དི་པ་བ་ཀ་པོང་ཀ་ ཨོ་ཐ་གཏམ་ཁེ་པ་ མང་པུ་དར་ཉི་དི་ཝ༌ཅ༎

བཀའ་རྒྱ་ཆི་ལུ།

16ཉི་སློ་མ་སོང་ཐུར་ ག་ལིལ་ག་ཏཱན་ དི་ཝ༌ལ། རོག་ཏེ་བ་ ཡི་ཤུ་གི་གསུངས་ཁཱན་ ཕུ་ཐུང་ཀ་ཏཱན་ དིན་ཅ་གི་ཝ༌ལ། 17རོག་ཏེ་བ་ཀི་ ཡི་ཤུ་མཇལ་བ་ཀབ་ཉི་ རོ་ཀ་གསོལ་ཝ་ཏ་པ༌ལ། དག་པ་ཀབ་ཉི་ ཚེ་བང་གི་ རོ་ཀ་ཐུང་ཀ་དོགས་པ་སག་པ༌ལ།

18ཉི་ཡི་ཤུ་བྱོན་ཐཱན་ རོག་ཏེ་བ་ཀ་ གསུངས་མ་ལ་ ཞིང་ཁམས་དང་ འཛམ་གླིང་ག་དབང་ཚད་ ཐམས་ཅན་རང་ ཇ་ག་གནང་མ༌ཅ། 19ཨོ་ཉི་ཨ་དེན་གེ་ མི་རིགས་ཐམས་ཅན་ག་ དིན་ཐཱན་ སློ་མ་ཅོད་ཅོ། ཉི་རོག་ཏེ་བ་ཀ་ ཡབ་དང་སྲས་ ཉི་དམ་པའི་ཐུགས་ཉིད་ག་མཚན་ག་ ཁྲུས་གསོར་བི། 20ཉི་ཇི་གི་ ན་ཧ་བཀའ་བི་ཁཱན་ ཐམས་ཅན་རང་ ཆ་གནས་ཐ་ལེ་དེན་གེ་ རོག་ཏེ་བ་ཀ་ ཡེ་ཉི་བི། སེམས་ཀ་ཐའི་ འཛམ་གླིང་བརྟན་པ་མ་ལུ་ཕ་སག་པུ་རང་ ཇང་ན་ཧ་བ་ཀབ་ཉི་རང་ཅ་དག༌ཉི༎

Tans Gekies:

མ་ཏི། 28: TNTB

Kleurmerk

Kopieer

Vergelyk

Deel