PAIMBA 34
34
Tida ntana Kanaʼa
34:1-15
1Ndatoʼo i mPue ri Musa 2waʼa ncongka seʼi tila banca Isaraeli, “Sakodipa tempo komi da mesuamo ri tana Kanaʼa, tana anu kuwaika komi da ndipopanta. Seʼimo tidanya tanami setu. 3Ri tondo selata, tidanya montepuʼu ungka ri pada bone Sini mampamiwi tana Edomi. Ri pebetea tidanya montepuʼu ungka ri tandonya tondo selata nTasi Mate, 4ndasinggoka tondo selata ndatotoka Jaya Akirabimi nepa liu njoʼu ri Sini jela ri Kadesi-Baranea ri selata. Ungka njairia ndasinggoka tondo payompo yangi tondo tasi jela ri Hasari-Adari nepa liu ri Asimoni. 5Ungka njairia ndasinggoka njoʼu ri yombo tida ntana Masiri nepa pusa ri Tasi ri Tongo.
6Tasi ri Tongo inceʼemo tida ntanami tondo kasoyoa.
7Ri utara, tidanya montepuʼu ungka ri Tasi ri Tongo natotoka njoʼu ri Buyu Horu 8ungka njairia njoʼu ri Jaya Hamati, nepa liu njoʼu ri Seda 9nepa njoʼu ri Sipiro nepa motando ri Hasari-Enani.
10Ri pebetea, tida ntana setu montepuʼu ungka Hasari-Enani njoʼu ri Sepami. 11Ungka njairia mobalungke njoʼu ri Ribela ri tondo pebetea Ai, nepa liu ri waʼa pangku ntana ri wiwi nDano Galiela, 12nepa njoʼu ri tondo selata sangkarata ngKoro Yarade rata ri Tasi Mate.
Inceʼemo tanami malulu tidanya sape-sape.”
13 #
Pai. 26:52-56
#Yos. 14:1-5 Natoʼo i Musa ri banca Isaraeli, “Incetumo tana anu ndawaika komi da ndipotila mampoliu pantende dadu, tana anu ndasongka i mPue da ndipotila komi anu sasio santongo lemba nto Isaraeli. 14Waʼa lemba nto Rube pai to Gati pai santila lemba nto Manase roomo natarima tila ntau seʼe, pai tana setu roomo ndatilaka wungka sancombori-sancombori tau seʼe. 15Tana panta ntau seʼe setu ri tondo pebetea ngKoro Yarade, mosu ri kota Yeriko.”
Waʼa ntadulako anu ndapapolako da mantila tana
34:16-29
16Ndatoʼo i mPue ri Musa, 17“Anu sangaya-ngaya da mantilaka komi tana setu inceʼemo i Tadu mPanyomba Eleasari pai i Yosua ana i Nuu. 18Tujumo woʼu sambaʼa tadulako ri salemba-salemba seʼe anu da mantulungi i Eleasari pai i Yosua ri pantila tana setu.” 19-28Toʼo waʼa ntau setu inceʼemo:
| LEMBA | TADULAKO |
|---|---|
| Yuda | Kalebi ana i Yapune |
| Simeo | Semueli ana i Amihu |
| Benyami | Alidaa ana i Ngkisilomi |
| Daa | Buki ana i Yogili |
| Manase | Manieli ana i Epo |
| Eparai | Kemuli ana i Ncipitani |
| Sebulo | Elisopa ana i mParina |
| Isakari | Palatie ana i Asani |
| Asere | Ahihu ana i Ncelomi |
| Natali | Pedaeli ana i Amihu |
29Incetumo waʼa ntau anu ndasongka i mPue, da mantila tana panta ri banca Isaraeli ri tana Kanaa.
