TADUMPANYOMBA 3
3
Panyomba ngkasimadago
3:1-17
1Ane sambaʼa tau da mampanyombaka sambaʼa japi ua panyomba ngkasimadago, japi setu maya anu laki bara anu tina, paikanya neʼe reʼe posarinya. 2Tau anu mampanyombaka setu da madika palenya ri wawo mboʼo mpinatuwu setu nepa da nasambale ri suara dampo ngKema i mPue. Daa mpinatuwu setu sangaya-ngaya da ndabubusika aopo nculapa sudipi lampaʼani, anu da nawianaka waʼa ntadu panyomba muli muli i Haruni. 3Ri panyomba ngkasimadago setu, i tadu mpanyomba sangaya-ngaya da mpanyombaka: lorinya anu mantonge rambu ndayanya, 4taganya sangkani pai lorinya, pai anu lese ri atenya. 5Pura-puranya sangkani-ngkani pai waʼa panyomba anu ntaninya da ndaʼombasi ri wawo lampaʼani. Wau mpasoa pangkoni anu ndaʼombasi setu mampakawongko raya i mPue.
6Ane anu ndapanyombaka tila ngkasimadago setu bimba bara mbula, pinatuwu setu maya anu laki bara anu tina, podoia bereʼe posarinya. 7Tau anu mampanyombaka sambaʼa bimba, bimba setu da nakeni ri Kema i mPue. 8Jela njairia da nadika palenya ri wawo mboʼo bimba setu nepa nasambale ri suara ngKema. Daanya da nabubusika i ntadu mpanyomba ri aopo nculapa sudipi lampaʼani. 9Tila mpanyomba ngkasimadago pai Pue, i tadu mpanyomba sangaya-ngaya da mampanyombaka ungka ri pinatuwu anu ndapanyombaka setu: lorinya, pura-pura ikunya anu mobayuya setu dan ndapole ungka ri tawu ikunya, lori anu mantonge rambu ndayanya, 10taganya pai lorinya pai anu lese ri atenya. 11Tadu mpanyomba anu motetala ri tempo setu sangaya-ngaya da maʼombasi pura-puranya setu ri wawo lampaʼani ndapampanyombaka panyomba pangkoni tila i mPue.
12Ane anu ndapanyombaka setu sambaʼa mbula, tau anu mampanyombaka setu sangaya-ngaya da mangkeni mbula setu ri Kema i mPue. 13Jela njairia da nadika palenya ri wawo mboʼo mbula setu nepa da nasambale ri suara ngKema. I tadu mpanyomba anu da mabubusika daa mpinatuwu setu ri aopo nculapa sudipi lampaʼani. 14Tila mpanyomba pangkoni gala i mPue, tadu mpanyomba sangaya-ngaya da mampanyombaka mbula anu ndasampa setu, inceʼemo lorinya anu mantonge rambu ndayanya, 15taganya pai lorinya pai anu lese ri atenya. 16Tadu mpanyomba anu motetala ri tempo setu sangaya-ngaya da maʼombasi pura-puranya setu ri wawo lampaʼani. Wau mpasoa pangkoni anu ndapanyombaka setu setu mampakawongko raya i mPue. Pura-pura lori mpinatuwu setu gala i mPue. 17To Isaraeli bareʼe kojo maya da mangkoni lori pai daa. Padika seʼi da nakekeni ntau seʼe rantani masae-sae pai da nalulu nto Isaraeli pura-pura ri mbeʼi-mbeʼi kareʼenya.
