YOSUA 7
7
I Akani mampowia salaa
7:1-26
1Roomo ndapesongkaka i mPue ri waʼa nto Isaraeli kono pura-pura bangani ngkota Yeriko sangaya-ngaya da ndaʼopisaka pai da ndapanowa bareʼe maya ndatima ndapamuru mauja sangaya. Paikanya songka setu bareʼe manimpu ndapalulu. Maka reʼe sambaʼa tuama i Akani toʼonya maewa songka setu, painaka mesongke karau ndaya i mPue ri to Isaraeli. (Papa i Akani i Karimi pai ngkainya mampotoʼo i Sabadi ungka ri tina i Sera ri lemba i Yahuda.)
2Ri tempo setu napokau i Yosua bara tesangkuja tau ungka ri Yeriko njoʼu ri Ai, kota setu reʼe ri tondo pebetea ngkota Beteli mosu ri Beta-Awe. Waʼa ntau setu ndapokau da mampadasoki daera setu. Karoonya napadasoki ntau seʼe kota setu, 3mewalili tau seʼe mampetumbuka i Yosua, natoʼo ntau seʼe, “Mau bareʼe njoʼu kita pura-pura maungku kota Ai sinjau, mauja podo radua bara tatogo ncowu tau anu njoʼu. Neʼe ndapokau pura-pura surodado njoʼu moʼiwali maka kota setu podo kodi-kodi.” 4Mewali anu njoʼu maungku kota setu podo tatogo ncowu tau, tau seʼe natumba iwali. 5Tau seʼe naduduki nto Ai montepuʼu ungka ri baa-baa ngkota Ai rantani rata ri daera mpowote-wote ri Koro Yarade, pai naleʼo ntau seʼe mampepate tatogo mpuyu pai aono surodado nto Isaraeli ri apa buyu. Teloo raya nto Isaraeli pai maeka raya ntau seʼe.
6Maʼai kasusa ndaya i Yosua pai waʼa ntadulako nto Isaraeli painaka nasiati baju ntau seʼe, ungka ri mowuro nakarataka mawengi tau seʼe janjau metutu menyomba ri suara Peti mPojanji i mPue, nadika awu ri wawo ntanoananya mewali tanda ngkapari ndaya. 7Natoʼo i Yosua ri Pue, “Boo Pue Ala pueku! Nunjaamo yowenya ndipangkeni kami rata ri sambote ngKoro Yarade seʼi? Ara japodo da ndipepombaika kami ri pale nto Amori? Da naka kami napepate? Moruana kami maroo-roo ri sambote ngKoro Yarade sinjau! 8Boo Pue! To Isaraeli natumbamo iwali. Pai seʼi-seʼi nunjaamo anu da kutoʼo? 9To Kanaʼa pai waʼa banca ntaninya ri tana seʼi da madonge anu mewali seʼi. Tau seʼe da rata maungku kami nepa napepate pura-pura! Mewali nunjaamo anu da ndiwianaka da mampakaroso katetubunaka-Mi?”
10Ndasono i mPue i Yosua ndatoʼo, “Pembangu! Bereʼe yowenya siko metutu ri tana manyomba ewancetu! 11To Isaraeli mampowiamo salaa. Roomo kusongkaka komi da naka todo mangkekeni pojanji ri oyo ntau seʼe pai Yaku, paikanya tau seʼe malewamo janji! Waʼa aga-aga anu kamonconya da ndagero, janatima ntau seʼe. Natima ntau seʼe nepa nasambunika ri oyo waʼa aga-aga ntau seʼe da naka neʼe ndaincani. 12Inceʼe painaka bareʼe nakoto ntau seʼe mancuaki iwali. Tau seʼe natumba iwali maka tau seʼe woʼu maratamo huku da ndaʼopisaka. Bareʼemo da Kuaweri komi, ane aga-aga anu ndapetangani ndatima setu bareʼepa ndagero. 13Seʼi-seʼi, pembangu Yosua! Pakagali to Isaraeli pai toʼoka tau seʼe mompatoka mancuaraki Yaku. Toʼoka tau seʼe mompatoka i raneo mowuro, Yaku Pue Ala pue nto Isaraeli da mangantoʼo inceʼi ri tau seʼe: ‘Ee waʼa nto Isaraeli! Waʼa aga-aga anu roo kusongkaka komi da ndigero, ntanoka santila reʼe ri komi. Ri kabareʼepanya nditajika waʼa aga-aga setu, bareʼe da ndikoto maewa iwali!’ 14Inceʼe painaka Yosua, toʼoka tau seʼe iraneo mowuro tau seʼe da ndaparesa teasambaʼa lemba. Anu Kutuju sambaʼa lemba, pura-pura tina ri lemba setu sangaya-ngaya da maʼi teasantina. Pai ane Kutuju tau santina, pura-pura sombori ri tau santina setu, sangaya-ngaya da maʼi tesancombori-sancombori. Pai ane Kutujumo tau sancombori, nepa da maʼi nteasambaʼa tau ri tau anu sancombori setu. 15Ane ndaratamo anu mowia setu pai tongawa mampakoroka aga-aga anu ndapetangani setu, inceʼe da ndapanowa sangkani-ngkani pai sombori setu sangkani pai aga-aga anu napotumpu; maka siʼamo anu malewa pojanji pai mawianaka jaʼa anu bangke ri tongo-tongo nto Isaraeli.”
16Bangke reme mowuro-wuro mpodago, napokau i Yosua pura-pura to Isaraeli, ndeku ri suara salemba-salemba, tongawa lemba i Yahuda anu kono. 17Nepa napokau i Yosua lemba i Yahuda ndeku ri suara teasantina, pai tina i Sera anu kono, ungka lairia tina i Sera ndapokau ndeku ri suara sancombori-sancombori, pai tongawa sombori i Sabadi anu kono. 18Roo setu napokau woʼu sombori i Sabadi ndeku ri suara teasambaʼa tau; tongawa i Akani ana i Karimi, makumpu i Sabadi anu kono. 19Natoʼo i Yosua ri Akani, “Anaku pangakumo pai toʼomo mpayoa ireʼi ri suara i mPue, mPue Ala pue nto Isaraeli, nunjaa anu roo nupowia. Toʼokamo yaku neʼe boi nusambunika.”
20Natoʼo i Akani, “Monco! Yaku anu mampowiamo salaa anu bangke ri mPue Ala pue nto Isaraeli, ewaseʼi anu roo kupowia. 21Ri oyo waʼa aga-aga anu tapamuru, kukita reʼe sambaʼa juba anu madolidi kojo, pontanu nto Babeli, pai salaka tempo-temponya radua kilo kaneenya pai santompo wuyawa yabi santongo kilo kaneenya. Masawoyo kojo rayaku aga-aga setu, painaka kutima nepa kusambunika ri raya ntana ri raya ngkemaku; salaka inceʼe kudika ri aranya mpodago.”
22Maliga-liga napokau i Yosua tau njoʼu ri kema i Akani. Tongawa kojo waʼa aga-aga anu ndapetangani setu paka njau njairia nasambunika ri raya ntana, pai salaka lau ri aranya mpodago. 23Natima ntau seʼe waʼa aga-aga setu nepa nakeni ntau seʼe ri suara i Yosua pai waʼa nto Isaraeli, nepa ndadika waʼa aga-aga setu ri suara i mPue. 24Ungka lairia, i Yosua sangkani pai waʼa nto Isaraeli mancoko i Akani sangkani pai rongonya pai waʼa ananya, pinatuwunya japi, kalide, bimba, kema pai mpengaya-ngaya anu napotumpu, salaka, juba pai wuyawa anu napelima setu nakeni ntau seʼe ri Ngayo Ngkapari. 25Nepa natoʼo i Yosua ri Akani, “Wenu painaka siko mampareʼe kapari ri kita? Seʼi-seʼi i mPue da mampareʼe kapari ri siko!” I Akani sangkani pai bangani ncomborinya ndawunu mbatu rantani mate, pura-pura to Isaraeli anu mawunu mbatu. Pura-pura aga-aganya pai waʼa anu napelima setu ndatunju rantani pura. 26Roo setu naiwunika ntau seʼe pai watu tampa setu, painaka rantani wawaseʼi reʼepa ndakita njairia. Inceʼe painaka tampa setu ndapapotoʼoka “Ngoyo Ngkapari”.
Roo setu tepodamo karau ndaya i mPue.
