Roomaxituse 9
9
Wontoy xhardecho Isra'eelaxita
1Kristosana yesine zeeriya ta yese zeerey aadeko baaka zaaduwasso. Ayaana Geeshuna durkuttiya yese ta muxhuroy zaadiyaka ta baannikeko taase e adduse. 2Orje higilsaara taa maddhunxiya yese danda'uttuwa maxowarako ta muxhurowa yesa. 3Tayndo nayshitume hiyoni yeluttena ta baditume hissine tani taase aacuttesesaara Kristosa garafa shahutti dafuttesesaara maaddhakoni fetto eehako ta eehicha. 4Ta iginiti Isra'eelaxitako, Wontoy xhardi uso be nayshe e mato, be kuxa fuulani ususe e addusso. Ususe abako be hantenike e caadho, esuna u yese be woga e indo, aade ogena bemba u kuxoronike beysi usoni e gobbusso. 5Uso yellasi orje maaqe olo adiyaxhitako, Kristosani axe e maaddhosa nu beesune usukaako e yelutto. Esini uddime afana maaqe koolo makkina axiti esa kedda keddayse Wontoko. Ameen. 6Yoonase Wontoy otechoshi aade maaddho baasso yeydi hiyo maaquwasso. Ye esini Isra'eele shawey uddina aade Isra'eele maaquwasso. 7Abrahaamey uso yello gisha <<Usi uddi Wonto nayshitako>> yeydi hiyese danda'uttuwasso. Hidakoni Wontoy Abrahaameko << <Ne shaweko> hidi e xheyguttesi Yissaaqe badenako>> hidiko e hidese. 8Ye essaafa erese nu danda'esi Abrahaame shaweko yeydi taafutteesiti Wontoy gobbusecho gobbona yeluttaasitako baaka axi maxona yeluttasi Wonto nayshe u maaquwannikeko. 9Ye esini Wontoy gobbussecho gobboy <<Langute ha woggaako ta yoone, Saarani na'uko i yele>> yeydi hiyuttechashuko.
10Ye esawoni e maaddho baanne Ribqay bidzi ade garafa yeydi hiyoni numba yella nuuse ade maaqe Yissaaqe garafa mente be xhiiqusso woggaaka 11-12Wontoy be xharoy hantana e maaddho baanne xheydaasuna e maaqenike addusese wordi mentiti haga yelutto badi iitani modheni hanto badi u yesune Ribqako <<Angussi barsusuko e oomo maaddhi e aqe>> yeydi e oto. 13Ye esini <<Yayqoobe eetiko ta yese, Eesa'oma inxhadhiko ta yese>> yeydi e diizuttonikeko.
14Yoonase abaydiw ni hiye? <<Wontoy axi aafusha beediko e hante>> yeydiya ni hiye? Oo'o, Wontoy fetto yeysi hantuwasso. 15Wontoni Museko <<Maarese ta worgesa ooneni maarako ta maare, esuse higile ta worgesuse ooneseni higilako ta higile>> yeydiko e hidecha. 16Ye e gisha Wontoy axe xharesi axi gafanaara maxonaara e maaddho baanne beese be maaronako.
17Ye esini Hayla Fissharowa e diizuttonike Wontoy Faroonese#9:17 Faroone hidi hiyoy <<Gibxhe kaate>> hidi hiyoko.
<<Ne gara ta osa beysesaara ta sunxi ha saha gara uddi eruttoronike mahesaara nemba kaatesiko ta yese>> yeydiko e hidecha.
18Yoonase Wontoy maarese be wordosa e maare, woosutte e worguwannike mahese be worgesa e woosuttuwannike e mahe.
Wonto huulaara e maarowara
19Yebo <<Axi iitani modheni hantesi uddi Wontoy otonikewo e maaddho geede hine abasuna Wontoy axe <Baysiko ne yese> yeydi e hine?>> yeydi hinesi yesesuko e danda'e. 20Neno axo! Wontowara wolko hanke mati bersese aba godowa ne keenge? Sahaafa meddhutta miijhey bemba meddha hantaxe <<Ame yeysi tamba ne meddho?>> hidi hittaa hine? 21Sahaafa meddhe hantaxi ye meddhese be etto bidzi sahaafa bidzi miijhe kuxase fede miijhe assi acheysha yaha esuna go'uttorosa mati meddhese adeto keenguwaye? Yeydiwo Wontoni adeto keemako e keenge.
22Be huula beysese be osa addusese wordiko e yecha. Bayese naqutteseesita u gara be huuleesita orjenako e dandadhese. 23Yeysi e matosi burussi kuxase be naddhoosita maaroy ususe maaqeesituse be kuxa lagetey addeyoronikeko. 24Nini e xheydositukako ni yese, e xheydoositi Ayhuda badewo e maaddho baanne Ayhuda maaquwasitaaraysiko. 25Ye esini Hosa'e fissharowa
<<Ta axita maaquwadechashe <Ta axitako> hidiko ta hine, eehuttuwadecha axita <Eehutteseesita> hidiko ta hine>> yeydiko e hine.
26Assi
<<Usini <Hinuni ta axita maaquwaytako> yeydi hiyuttecha ye godowa <En'a Wonto nayshe> yeydiko u hiyutte>> yeydi hiyuttechashuko.
27Isayaseni Isra'eele gisha be kato keddaysi ohisine
<<Isra'eele nayshi taafoy hade bagade manchake laga u maaddhakoni usukaafa Wontoy maaresimay oddhewoko.
28Ye esini Wontoy sekke be yaa'uwasako ukkena ha saha axiti gara e yaa'e>> yeydiko e hido.
29Yeydiwo Isayasey
<<Osa keenge Wontoy hamuca maardoy dheeddako hade Sodome katamay baadonikiyara hade Gamora katamay baadonikiyarako nu maaqaane>>
yeydi hissine zeerdiko e yese.
Isra'eelaxiti Wonto aadexe dheeddosa
30Yoonase abaydina nu hiye? Gizetese kardutto baa Ayhuda maaquwasiti gizo u maaddho. Ye gizeteni aadexowafa bentesako. 31Isra'eelaxitimay <<Woganako gizete nu degexe>> hidi karduttisine woga kafe danda'e be dheeddosuna gizetiya aange oge degexutto baasso. 32<<Abasuwa gizetiyaka handi elle u dheeddo?>> hidi e hiyuttako gizete degexese u wordosi aadexona e maaddho baane hantana e maaqicho gishako. Ye e bishanako dhumose yese shuchuna u dhumutto. 33Ye esini Hayla Fissharowa
<<Hay, axita dhunge shuchuko Xhiyooniya ta gade,
ye shuchini axita dhundi olle shuchuko.
Esa aadexesimay ooneni borsuwasso>> yeydiko e diizuttese.
