Roomaxituse 6
6
Cubbose haydhi Kristosana yese
1Hine waa nu hiye? Wontoy nuuse keenge e maxo modhetey nuuse lagoronike nu cubbowaka miindiya nu yesse? 2Oo'o, ye esi fetto bishuwassho. Nuni cubbose haydhi e garafa shahuttesesa maaqichine sekke cubbo hantisine yesuwanxhiko. 3Yesuusi Kristosaara bidzo maaqese xhamaquttasi uddi esaara wolko e haydhonike haydhesesa maaddhi ni xhamaquttosa eruwaytuwa? 4Xhinqatena esaara wolko ni moogutto woggaaka e haydhonike haydhiko nu yese. Ye esuna Kristosay ade maaqe Wonto kuxa fuulana haybowafa e dendonike yeydiwo nunini kille yeso degessiko nu yese.
5Haybo badena esi haydhonike esaara bidzo maaddhi nu haydho geede denxo badena esi dendonikeko esaara bidzo maaddhi nu dende. 6Cubbache maaqe nu axetoy bayoronikiyara ha e geede sekke cubbose e maala nu maaquwanikiyara cima nu oonuntey Kristosaara wolko e suxhuttonike erako ni ere. 7Ye esini haydha axi cubbo oomofa shawo kessiko e yese. 8Yoonase Kristosaara nu haydho geede yeso degessi esaara wolko nu yesenike aadexako nu aadexe. 9Kristosay haybowafa be dendo gisha sekke e hay'uwannike hayboy e gara adeto keenguwannike erako ni ere. 10Be haydhoniyaka bidzi woggaa uddi abako alsi cubboy e gara adeto keenguwannike e haydho. Hattema yesiya e yese yesoy Wontosuko. 11Ye esuke hinuni assi cubbose haydhi Yesuusi Kristosaara bidzo maaddhi yesiya hi yese yesona Wontose hi yesenike hinumba taakuwayte.
12Ha e gisha iita maxo alseeme hissine hay'e hi acho gara cubboy kaatoronike matofita. 13Hi gara e bidzi bidzina iita abakoy essaanna go'uttorosa mati cubbose uqusofita. Cubbose uqusekofa haybowafa yesuwaka gardese axituke mati hinumba Wontose uqusuwayte. Hi axeto gizetese e miijhe mati Wontose inguwayte. 14Ye esini hatte hinuni yesesi Wonto maxo modhetese e oomoko baaka Muse wogase e oomo hi maaquwa gisha cubboy be oomo hinumba ahese danda'uwasso.
Gizetese e oomo yese
15Yoonase waa nu hiye? Wogase e oomo yesey attine Wontoy axuse keenge maxo modhete oomo nu yese gisha cubbo hanta nu hanto? Oo'o, fetto hantuwanxhiko. 16Bidzi axuse <<E maalako ta maaqe>> hidi hissine hinumba maala mati hi uqusso geede ye esuse hi woosutte axuse e maala hi maaqenike hinumba erako hi ere. Yeydiwo cubbose hi woosutto'aykete haybo oone cubbose e maalako hi maaqe. Wontose woosutto'aykoma gizo maaddhiko Wonto maala hi maaqe. 17Buro cubbose e maalako hi maaqicha. Hattema hinuse ohutta erunxe etti muxhurowafa kessi Wontose hi woosutto gisha Wontoy galatuttuwaye. 18Cubbo maaketowafa shawo kessi gizetese e maala maaddhiko hi yese.
19Ta maxo hinuse shawuka ogena ta zeeresi ha esuse era hi keenguwasafa densiko. Buro hi gara e bidzi bidzina tunasaara be gara kossi kossi hange iitetesaara maala mati hi uqusichonike uddi yeydiwo hatteni hi hayloomoronike gizetena yesese Wontose hi gara e bidzi bidzina e maala mati uqusuwayte.
20Cubbose e maala maaddhi hi hantichoniya gizo hantese hinumba e worgusenike hinuse eruttuwadiko e yecha. 21Hine yenniya ye hi hanto hantaafa am hi go'utto? Hatte hinumba borsuse basume feda essaafa hi go'utto basi baasso. Ye hantase e aalliciray hayboko. 22Hattema cubbo maaketowafa shawo kessi Wonto maala maaddhiko hi yese. Ye esi e go'esi hinumba hayla mahesuko. E aallicirani koolo makkina yesoko. 23Cubbowafa degexuso woomay hayboko. Wontoy mikke inge ingomay nu Laaxi Yesuusi Kristosana bente koolo makkina yesoko.
