Mateo 5
5
Kushishqa kawanantsipaq Jesús yachatsishqan
Lucas 6.20-23
1Tsaytsika runakuna juntakaqta rikarmi jirkanman witsarkur Jesús jamakurqan. Nawpanman discïpulunkuna juntakaptinmi 2yachatsirqan kayno nir: 3<<Kushishqami kawapäkunqa Tayta Diosta nistaqkuna. Paykunapaqmi Tayta Dios mandaykashqan kaykan.
4<<Kushishqami kawapäkunqa lakikur waqaqkuna. Paykunataqa Tayta Dios shoqanqami.#Isa. 61.2.
5<<Kushishqami kawapäkunqa ali shonquyuqkuna. Paykunaqa herencian kananpaq mushuq patsatami chaskipäkunqa.#Sal. 37.11.
6<<Kushishqami kawapäkunqa mikanaypanöraq y yakunaypanöraq Tayta Dios munashqanno kawayta munaqkuna.#Isa. 55.1-2. Paykunataqa Tayta Diosmi yanapanqa.
7<<Kushishqami kawapäkunqa runa mayinta kuyapaqkuna. Paykunataqa Tayta Diosmi kuyapanqa.
8<<Kushishqami kawapäkunqa shonquncho imaypis alilata yarpaqkuna.#Sal. 24.4. Paykunaqa Tayta Diostami rikanqa.
9<<Kushishqami kawapäkunqa runa mayinta amistatsiqkuna. Paykunataqa Tayta Diosmi <wamrämi kanki> ninqa.
10<<Kushishqami kawapäkunqa Tayta Dios munashqanno kawashqanpita runakuna nakatsiptin.#1Ped. 3.14. Paykunapaqmi Tayta Dios mandaykashqan kanqa.
11<<Kushishqami kawapäkunki noqata chaskikamashqaykipita runakuna ashlishuptiki, nakatsishuptiki y lulakur imaykatapis jitapäshuptiki.#1Ped. 4.14. 12Tsayno kaptinpis kushikäriy. Qamkunapaqqa gloriacho maynami Tayta Dios premiuta kamarishqa. Qamkunata chikishushqaykinölami unay runakunapis Tayta Diospa profëtankunata chikipäkurqan.#2Crón. 36.16; Hech. 7.52.
Kachino y atskino kashqantsita Jesús yachatsishqan
Marcos 9.50; Lucas 14.34-35
13<<Qamkunaqa kay patsacho kachinömi karkaykanki. Kachi qamyakäkurmi itsanqa imapaqpis mana välinnatsu. Tsay kachita jitariptin pïmaypis jarukunmi.
14<<Kay patsacho atskinömi karkaykanki.#Juan 8.12; 9.5. Tsaynöpis alayrinnincho kaykaq markata pïmaypis rikashqannömi imano kawashqaykitapis runakuna rikaykäshunki. 15Manami pipis atskita ratarkatsir cajón rurinman churantsu, sinöqa wayicho lapanta atsikyapänanpaqmi alayrinninman churan.#Mar. 4.21; Luc. 8.16; 11.33. 16Tsaynöla qamkunapis runakuna rikakushunaykipaq tsakaycho atsikyaqno alikunata rurapäkuy. Tsayno kawashqaykita rikakurmi jana patsacho kaykaq Taytaykita alabapäkunqa.#1Ped. 2.12.
Moisés y profëtakuna qelqashqankunata Jesús cumplishqan
17<<Ama yarpapäkuytsu Moisés qelqashqan leykunata y profëtakuna qelqashqankunata manakaqman churanäpaq shamushqäta. Manami manakaqman churanäpaqtsu shamushqä, sinöqa paykuna qelqashqankuna noqacho cumplikänanpaqmi. 18Rasunpami kayno nï: Jana patsapis ni kay patsapis manaraq ushakaptinqa manami ni juk letralapis Diospa leyninpita elqanqatsu. Tsaycho qelqaraqkuna lapanmi cumplikanqa.#Luc. 16.17.
19<<Pipis kay mandamientukunata juklaylatapis mana cäsukur y wakin runatapis mana cäsukunanpaq shimita jatiparqa Tayta Dios mandaykashqancho manami ima premiutapis chaskinqatsu. Lapan kay mandamientukunata cäsukur y wakin runatapis cäsukunanpaq yachatsirmi itsanqa premiuta chaskinqa. 20Noqa kaynömi nï: Fariseukunapitapis y ley yachatsiq runakunapitapis mas ali mana kawarqa manami Tayta Dios mandaykashqanman yaykapäkunkipaqtsu.
Runa mayintsiwan ali kawanantsipaq Jesús yachatsishqan
21<<Qamkuna musyankimi unay runakunata kayno nishqanta: <Runa mayikita ama wanutsinkitsu. Wanutsiq kaqqa juzgashqami kanqa>.#Éxo. 20.13; Deut. 5.17. 22Tsayno niptinpis noqaqa qamkunata kaynömi nï: Pipis runa mayinta rabyaparqa jutsayuqmi kanqa. Tsaynöpis runa mayinta ashlirqa juzgashqami kanqa. Runa mayinta manakaqman churarqa infiernuman qaykushqami kanqa.
23<<Tsayno kaykaptinqa altarman ofrendaykikunata churanaykipaq kaykashqaykicho runa mayikiwan jaqayätsinakushqaykita yarparqa 24altar nawpanman ofrendaykikunata kachaykur jinan höra aywapäkuy jaqayätsinakushqaykiwan amistanaykipaq. Nirkurraq kutiykur Tayta Diospaq ofrendaykita churapäkunki.
25<<Pipis quejashuptiki autoridäman manaraq chayar jukla arreglapäkuy. Mana arreglaptikiqa juezmanmi apatsishunki. Jueznami wardiakunawan carcilman wichqatsishunkipaq. 26Rasunpami kayno nï: Tsaypita manami yarqunkipaqtsu lapan jaqanta manaraq pägarqa.
Adulteriu jutsapita Jesús yachatsishqan
27<<Qamkuna musyankimi Moisés qelqashqancho kayno nishqanta: <Majaykita ama jarukunkitsu>.#Éxo. 20.14; Deut. 5.18. 28Tsayno niptinpis noqaqa kaynömi nï: Juk warmita munaparqa maynami majaykita jarukuqno karkaykanki.
29<<Tsayno kaptinqa alawqa kaq nawiki jutsata ruratsishuptikiqa tsay nawikita jorqurir jitariykuy. Infiernuman qaykushqa kanaykipa trukanqa mas alimi kanman wiskulapis kaptiki.#Mat. 18.9; Mar. 9.47. 30Alawqa kaq makiki jutsata ruratsishuptikiqa tsay makikita kutsurir jitariykuy. Infiernuman qaykushqa kanaykipa trukanqa mas alimi kanman juk makiyuqlapis kaptiki.#Mat. 18.8; Mar. 9.43.
Majanwan mana rakikänanpaq Jesús yachatsishqan
Mateo 19.9; Marcos 10.11-12; Lucas 16.18
31<<Tsaynöpis Moisés qelqashqan leykunacho kaynömi niykan: <Pipis warminwan rakikar imarqa papilta firmapätsun>.#Deut. 24.1-4; Mat. 19.7; Mar. 10.4. 32Tsayno niptinpis noqaqa qamkunata kaynömi nï: Mayqan runapis warmin mana jarukuykaptin juk warmiwan tarqa jutsayuqmi kaykan warmin juk runawan tar adulteriu jutsata rurananpaq. Tsaynölami runanpita rakikashqa warmiwan taq runapis adulteriu jutsata ruraykan.#Mat. 19.9; Mar. 10.11-12; Luc. 16.18; 1Cor. 7.10-11.
Mana juranantsipaq Jesús yachatsishqan
33<<Tsaynöpis qamkuna musyankimi unay runakunata kayno nishqanta: <Mana cumplinaykipaqqa ama jurapäkunkitsu. Jurarqa mana qonqaylapa cumplipäkunki>.#Lev. 19.12; Núm. 30.2; Deut. 23.21. 34Tsayno niptinpis noqaqa qamkunata kaynömi nï: Ima nilarpis ama jurapäkunkitsu. Tsayno kaptinqa ama jurapäkunkitsu <jana patsapaq> nirpis. Jana patsaqa Tayta Diospa trönunmi kaykan. 35Ama jurapäkunkitsu <patsapaq> nirpis. Kay patsaqa Tayta Diospa chakin jaruräkunanmi kaykan.#Isa. 66.1; Mat. 23.22; Stg. 5.12. Ama jurapäkunkitsu <Jerusalénpaq> nirpis. Jerusalénqa lapanpaq munayniyuq Rey#5.35 Tsay reyqa Tayta Diosmi kaykan. tashqan markami kaykan.#Sal. 48.2. 36Ama jurapäkunkitsu <umäpaq> nirpis.#5.36 Unay Israel runakuna umanpaq jurarqa noqantsi por mi vïda nir jurashqantsinömi karqan. Manami munayniyuqtsu kapäkunki aqtsaykita yoraqman ni yanaman tikratsinalaykipaqpis. 37Awnirqa awnipäkunki, y mana cumplinayki kaptinqa ama awninkitsu. Jurayparaq awnirqa Satanás munashqannömi parlarkaykanki.
Chikimaptintsipis mana rabyapänantsipaq Jesús yachatsishqan
Lucas 6.29-30
38<<Musyapäkunkimi Moisés qelqashqan leykunacho kayno nishqanta: <Nawinta jorquptinqa kikinpa nawintapis jorqupätsun. Kirunta jorquptinqa kikinpa kiruntapis jorqupätsun>.#Éxo. 21.24; Lev. 24.20; Deut. 19.21. 39Tsayno niptinpis noqaqa kaynömi nï: Chikishuptikipis ama nanaparaytsu. Laqyashuptikipis jukaq qaqlaykita kamapanki.#Lam. 3.30. 40Pipis demandashushpayki camisaykita qechushuptikiqa punchuykitapis kachaparinki. 41Qepinta juk lëwayaq apapänaykipaq obligashuptikiqa ishkay lëwayaqpis apaparinki. 42Imatapis <qoykalämay> nir manakushuptikiqa qoykunki. Tsaynöla imatapis <manaykalämay> nishuptikiqa manaykunki.
Chikimaqnintsita kuyanantsipaq Jesús yachatsishqan
Lucas 6.27-28, 32-36
43<<Tsaynöpis musyapäkunkimi runakuna kayno nishqanta: <Kuyanakushqaykiwanqa kuyanakunki. Chikishuqnikitaqa chikipäkunki>. 44Tsayno niptinpis noqaqa kaynömi nï: Chikishuqnikikunata kuyapäkunki. [Ashlishuptikipis ali shimilaykipa parlapanki. Contrayki sharkuqkunatapis ali rikapäkunki. Manakaqman churashuptikipis y] nakatsishuptikipis Tayta Diosta paykunapaq manakärinki. 45Tayta Diosqa ali runakunapaq y mana ali runakunapaqpis intita jeqatsimunmi. Tsaynölami ali runakunapaq y mana ali runakunapaqpis tamyatsimun. Jana patsacho kaykaq Taytayki kuyapäkuq kashqanno qamkunapis kuyapäkuq karqa paypa wamranmi karkaykanki.
46<<Kuyanakushqalaykiwan kuyanakurqa ama yarpapäkuytsu ali runa kashqaykita. Impuestu cobraq runakunapis kuyanakushqalanwanqa kuyanakärinmi. 47Kiruyki tinkushqalanwan ali kawarqa ¿ima alitataq rurarkaykanki? Jutsasapa runakunapis tsaynölaqa kawapäkunmi. 48Jana patsacho kaykaq Taytayki jutsaynaq kashqanno qamkunapis jutsaynaq kapäkuy.#Lev. 11.44-45; 19.2; Deut. 18.13.
Tans Gekies:
Mateo 5: qvmB
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2003, Wycliffe Bible Translators, Inc. All rights reserved.