Luglaa 2
2
1Too, gunnɛ Kɔraawiizi ta chiŋ ni hɛri ani kuna la maa n du a biine. 2Hɔpizaa aniidaanɛɛhiŋ n wa helle, di Kɔraawiizi tuŋ huma la maa unna hum. Awia, u faa heezi.#Lii 20:11 3Kɔraawiizi faa kissi a hɔpizaa aniidaanɛɛhiŋ la, di gil u ɛɛ hɔpizinaniinanii, dikuubɛɛwiai, a hɔl hinnɛ u heezi, uŋ wa ta kummaa tuŋ la.
Andama ni Haawa wia
4Chiŋ ni hɛri tai wiarɛ keŋ.
Kɔraawiizi n ta chiŋ ni hɛri la, 5kooree ni daazi ni kunduulaa faa haa waa liwɛɛ, dikuu Kɔraawiizi n faa haa waa gillɛ dooŋ ba hɛri, nɛr maa ge faa waa hoo ú paruu wia. 6Ka nii ɔɔ faa ra buluu, a hɛri maa sɔɔni. 7Denii Kɔraawiizi ɛɛ hɛɛhraa di ma newee, di heezi du u miibɔɔni, u ra nyiŋ.#1Kɔr 15:45
8Kɔraawiizi n wa ɛɛ guŋ, u kuari kambol wiifurii yembɛl banna yir Ɛdɛn biini, di kpa newee la un mawɛɛ la du de. 9Kɔraawiizi gil daazi maa ni a iri lii a kambol biini, anla n wesse di ra nɔŋ nɔnnanaa, bá ra di. Miibɔɔ ni nunzuma daazi la n niŋ gil nɛr zum winanaa ni wichɔgaa ge faa chi a kambol baambaaŋ.
10Muu bɛl faa pal lii Ɛdɛn, di ɔɔ gil a kambol maa sɔɔni, daazi la wer di ra hel nɛnnɛ. U faa bargɔɔrɛ naazi anaazu di lii de. 11U lugli naa banna yir Pisɔn faa ra pal Havila hɛri biini, bɔr la saliŋ n duwɛɛ. 12A hɛri saliŋ faa wessoo, tulaale nanaa ani binanaa aŋhina la yoola n kpolle faa du de. 13U naa bɛl ge banna yir Gihɔn faa ra pal Itiopia#2:13 Itiopia sɔŋ bɛllɛ Kus. hɛri. 14U naa horohiŋ ge sɔnnɛ faa Muu Tigris. U ge faa ra pal Asiiria#2:14 Asiiria kuttɔɔ Siiria ni. hɛri wiifurii paga. Anaazu hiŋ genii ba faa ra yir Muu Yufretis.
15Kɔraawiizi faa kpa newee la uŋ mawɛɛ la du Ɛdɛn kambol la biini, ú ra binni de ni, ka ra paruu. 16Kɔraawiizi faa ŋɔ u be, “A di daa maa nɔŋ n du a kambol naa biini, 17ka ra dazi i waa di daa la n na tɛɛ nfɛrɛ í wer zum winanaa ni wichɔgaa maa la waa. Di i haŋ wa diu a hɔl la maa, i daŋ siu.”
18Denii Kɔraawiizi ŋɔ, “A waa wer baal la bɛŋ n duwɛɛ. N daŋ ma hiini bɛl n dɛguu, ú nuu du.”
19Denii Kɔraawiizi kpa hɛɛhraa di ma sela ni zumbizi maa ni a dizi, di kpaa ba newee la be, ú dauri a sɔna. Gunla maa uŋ wa yir bɛl maa, u sɔnnɛ guŋ. 20Awia, a baal faa tɛɛ kundɛɛzaa maa, zumbizi ani pir sela maa sɔna.
Ka Andama waa faa waa hiini dɔɔwɛ. 21Awia, Kɔraawiizi faa gil a baal chɔɔ dɔbɛrii. Unna chɔɔ dɔɔ la, u lizi u kugdaabee bɛl, ka bir tɔ de. 22Denii Kɔraawiizi kpa a kugdaabee di ma haaŋ, di kpau wa tɛɛ a baal.
23A baal ŋɔ,
“Ahaah! Filaŋkeŋ, n himmaa hog
ni n bɔrahɔnnɛ keŋ.
U sɔnnɛ ‘haaŋ,’
dikuubɛɛwiai,
baal ninɛɛ ba lizuu.”
24Awia, baal daŋ gil u maa ni u mɛɛ ka u ni u haaŋ du, dí ɛɛ kpaŋ.#Mat 19:4-6
25Haali Andama ni u haaŋ faa kpogli chakpallɛ, ka hiihzi faa waa baa lauwɛ.
Tans Gekies:
Luglaa 2: vag
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.