Asmani kitab: Sulaimani misal 30
30
Iakor fua Aguror buli
1I buli Iakor fua Agure Itiyelor gese ḳoise, Itiyel ar Ukalor gese ḳoise:
2Shob manshor maze ami-u, murḳo-shurḳo be-aḳol,
amar maze na ase, Adom zatir gun-aḳol.
3Bibi Gianor talim ami, kunuta-u hiksi na,
Allai kunu pak ilim, ḳamai ami korsi na..
4Behesto hamaia hari ke, lamat lami aise?
Nizor ator muṭir bitre, batashre ḳe haraise?
Doriar fani bandise ḳe, nizor saddor dia?
Kun zone boail ḳorse, zogotor hesh shimana?
Tan ar tan fuar nam kita, zano ni forisoy?
Tarar nam zania taḳle, amare ḳo nichchoy!
5Allar forteḳ kalam hasa, forman oise nikut,
tain-u tarar asroy-mukam, zara roy tan sayat.
6Dusra kunta baṛaio na, tan kalamor loge,
baṛaile-u ḳaibae damki, misakur hishabe..
7Saiar ami duiṭa zinish, Alla tumar gese,
dilao tumi ita more, amar moutor age:
8sol-soturi ar misa mat, mor taki duroi raḳo,
hokir-doni korio na more, dorḳari kani dio;
9arnae doni oia hari, faurilimu tumare,
feṭ boria ḳani kaia, ḳoi “Mabud ḳegure?”
Mor hokiri halotor dae, ami zudi kori suri,
amar Allar namre to, ḳorilimu beijjoti..
10Malikor gese tan saḳoror, bodnam ḳorio na,
ḳorile he boddua dibo, tumi faibae shaza.
11Shomazo ila manush ase, gali dey bafre,
nizor maʼr-o sae na balai, ijjot dey na maʼre.
12Shomazo ila manush ase, nizor sokut ḳaṭi,
pak-saf to oy na tara, nafakit roy ḍubi.
13Ila aro manush ase, gorimae souḳ bora,
tarar souḳor fatar maze, ohonkar-o ola.
14Ila aro bout ase, zetar dat toluar,
galor aḍḍi sakkur laḳan, gorib tarar shikar,
gorib-dukire dunia taki, sae gililito,
obabi zonre zogot taki, sae miṭailito..
15Zukor dui muke sillaia ḳoy, “Aro deo, aro deo!”
Tin zinishor feṭ bore na, sairṭae ḳoy na “Zotesṭo!”—
16Ḳoybor ar bainjir feṭe, “Zotesṭo oise,” ḳoy na,
miṭe na zominor fias, aguin-o ḳoy na ola..
17Elamir souḳe bafor bae, dur-dur ḳore zera,
buṛa maʼr buli mante-o, ela ḳore tara,
otar souḳ faṛor ḳauae, ṭukraia bar ḳorbo,
hokunor baichchae otar souḳ, bar ḳoria ḳaibo..
18Tinṭa zinish taijjub lage, amar nizor gese,
sairṭa zinish azob befar, ami buzi na re:
19Boṛo sil asmano uṛe, kitat bor dia?
Fattoror ufredi haf zae, kun shokti faia?
Goin doriat zaz sole, tar fot sine ḳemne?
Beṭa-beṭir mila-mishat, kizator fot ase?
20Zinakur beṭir fot oilo, ḳaia muk fusia,
“Ḳaraf kunu ḳam ḳorsi na,” tai to mate ola.
21Tin zinishor bare ḳafe, hara zogot-dunia,
sairṭa zinishor uzon to, shoito fare na:
22gulamor bar shoy na zogot, he zebla oy raza,
ammok zonor bar shoy na, ḳaile feṭ boria,
23shomaze ginnae ila beṭi, tai zudi fae zamai,
aroḳ oilo ila bandi, zebla bibi bonizae..
24Sairṭa zandar ase duniat, deḳte huru tara,
oile tara giane bora, aḳole furfura:
25fifṛa oila eḳ zandar, tarar shokti tuṛa,
shomoy moto ḳani zugae, kunu obab oy na;
26shafon-undur aroḳ zandar, bol ḳom tarar-o,
oile tara boshot ḳoroin, fattoror faṭolo;
27fongofal-o eḳzat zandar, zarar raza nae,
ta-o tara dol bandia, sifair laḳan zae;
28ali oilo aroḳ zandar, atdi tare dora zae,
hokkolor goro roin tara, razar goro-o hamae..
29Tinṭa zandar aṭe-sole, deḳaia nobabi,
sairṭa zandar sole ola, doria razar bongi:
30shingho ola eḳzat zanuar, hoḳol foshur raza,
kunu foshur samon taki, he to zae na bagia;
31buk fulaia solra murga, sagolor maze faṭa,
sifai dolor samne roia, hukum dein ze raza..
32Boṛoluki ban dorle-u, ḳora oy ammoki,
forar lagi gat kuda, horao ita dil taki.
33Naḳo marle lou bar oy, dudre zal dile gi,
rag tulaile ḳaijja baṛe, lagbo maramari..
Tans Gekies:
Asmani kitab: Sulaimani misal 30: sylL
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© Ahle Kitab Society. All rights reserved.