Asmani kitab: Sulaimani misal 1
1
Bondona
Misalor mul bishoy
1Boni Israilor bashsha, Hozrot Daudor fua,
Bashsha Sulaimanor misal.
2Misal to ou niote: gian-shashon hikite,
buzite goin bulir hal-chal;
3bibek kaṭai solite, hok bisar ḳorite,
roite hok-halal ar forezgar.
4Aḳol dey shidare, ilim-bibeḳ zuanre,
misale ota baṛae tarar.
5Gianie-o hunouk, ilim aro baṛouk,
buddimane-o hedayot fauk.
6Misalor mul ḳota, silleḳor buli-barta,
gianir foi-buli hoḳole buzouk..
7Mabudor ḍor-boy, aḳolor shuru oy,
tan ḍor to buddir foylate.
Oile ammoke ḳoy, gian to kunta noy,
shay-shashonre-o ela ḳore..
Bafor nosiot 1
Bad manshor loge na sola
8Huno huno amar fut, bafor shashon huno,
tumar maʼr hukumre-o, elami na ḳoro.
9Ma-bafor hukum-shashon, matar taz tumar,
ota-u oilo shuna fut, tumar golar har..
10Huno re amar mayar fut, hushiar o tumi,
gunagare lub deḳaile, na oio razi.
11Ḳoile, “Aio amrar loge, lukaia kun ḳori,
emne-u ut fati roia, nirdushire dori.
12Deo-danobor laḳan tare, asta-zita gililai,
ḳoybore zela lashre ḳae, tare-o ola ḳailai.
13Dami dami don-roton, teu amra faimu,
luṭ-torazor zinish dia, nizor baṛi bormu.
14Ao tumi amrar dolo, maldar bonizai,
luṭor hoḳol mal nia, bag-baṭura ḳorilai..”
15Ore amar shuna fut, zaio na tarar loge,
tarar fot taki tumar fao, rakio nirafode.
16Tarar fao to douṛai zae, bod ḳamor lagi,
zoldi zae olan fote, ḳorte kun-ḳarafi.
17Fand fatile sokur samne, ita oy beḳama,
fakie ita dekia hari, zaibogi horia.
18Ola fondi koroin tara, nizor labor ashae,
tarar fatail fando to, tarar-u zan zae.
19Forar don luṭia ḳaito, zetae ḳoroin asha,
ou laḳan lub-lalose, goṭe moron dosha..
Bibi Gianor ḍaḳ
20Bibi Giane zure ḍake, fote fote zela,
nizor golar aoaz tule, bazaror maze ola;
21biṛor maze ubai hari, Bibie elan ḳore,
ṭaunor muko Bibi Giane, usa golae mate:
22“Haere aṛuar dol, roite be-aḳol,
ḳotoḳal ita bala faibae?
Ṭaṭṭaḳarie ṭaṭṭa, ḳodin furti korta,
ammoke ḳodin gianre ginnae?
23Mor damki mania, ḳorle sola-fira,
te ḍalia dimu amar ruh.
Amar mukor ḳota, kial ḳorle tumra,
amar monor bab zanaimu.
24Ami to ḍakilam, mor atre baṛailam,
ta-o tumra ḳano nilae na.
25Mor deoa foramish, tumra ḳorlae ḍismis,
mor damkire dam dilae na.
26Erdae tumrar bifodo, ashimu to ami-o,
mosibot dekile siṛaimu.
27Bifod aia azile, ban-tufanor beshe,
ami kushi-bashi kormu.
Binashḳari batashe, uṛai nile tumrare,
aro beshi kushi oimu.
Duḳ-bifodor maze, tumra ḍubi gele,
ami to ḍong-tamasha ḳormu.
28Bade tara ḍakile, ami huntam nae re,
tukaile-o more faito nae.
29Ḳaron gian-ilimre, tara to ginnaise,
Mabudre-o ḍoraito na sae.
30Manlo na foramish, hunlo na ufodesh,
amar hekmot tiag ḳorilo.
31One faibo tara, nizor ḳamor bodla,
fondir ku-fole feṭ boribo.
32Shorol-shidar dole, bul fotedi gele,
tarar moron ḍakia ane.
Ammokor monobol, ḳore tare durbol,
foton goṭae binashi mone.
33Oile zara hune, mor mukor bulire,
roibo nichchit nirafode.
Shay-shantie roibo, arame gumaibo,
bifodor kunu ḍor nai re..”
Tans Gekies:
Asmani kitab: Sulaimani misal 1: sylL
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© Ahle Kitab Society. All rights reserved.