मूल स्यूस्स्यायूजे कामजे किताब किताबजे बारेने
किताबजे बारेने
“अम्ब मूल स्यूस्स्यायूजे काम” यब किताब लूका यब मीदे लिख्देये ख्यङ्। अम्ब किताबने लूकादे खास रूप्ने येशूजे स्यूस्स्या मेस्ये पावल “मूल स्यूस्स्यादे चेब कामजे” बारेने लिख्दीयेब दोस्रो खण्ड ख्यङ्। अम्ब किताब ई. सं. ६०-दे ती ई. सं. ६५-जे अन्द्रने लिख्दीयेब ख्य यब कूमप्र विद्धानयूजे विचार ख्यङ्। पावल रोम सहरने गीलीदेबे रङ्से मूद्दाजे फैसला रेन्न ख्य। (रोम दीनीजे यूरोप महादेशजे दक्षिण भाने ख्यब इटालिया यब देशजे राजधानी ख्यङ्।) सर् नियमजे बीलने रोम संसारजे पात्ता न-मीन चील्लेब सहर ख्य। रोमने कुम मूख्य-मूख्य मीयू “अम्ब सर् ख्रीष्टियान धर्म कर धर्म ख्यङ्, कैयादे योङ्रदे” यदेबे हन्छ्वाब लोन्न ख्य। होरेक्यूत्देबे ख्रीष्टियान धर्म केरे सूरू क्यूत्दे, येशू ख्रीष्ट सू ख्यङ्, ङूजे सूगब खबर केरे यरूशलेमदे रोम सहरसम्म फ्याइदे यब पोने लूकादे इतिहास लिख्देने पक्क चीत्दे। लिख्देमेस्ये लूकदे अम्ब इतिहास रोमजे मी अधिकृत “माननीय थियोफीलस” ने चङ्पीदे (ङीनदे ले खूइय लूका १:१-४; मूल स्यूस्स्यायूजे काम १:१)। थियोफीलसजे बारेने सूजो पोयू चै था त्वो।
पावलदे लूकाने “छेब डक्टर लूका” य ख्यङ् (कलस्सी ४:१४)। अम्ब लूका मध्यपूर्वने परदेब सीरीया देशजे एन्टिओखिया यब सहरजे मी त्या ख्य। क्यूर खूस्ये पावल एन्टिओखियाने टूङ्ब, लूका मेस्ये ङू त्व ख्य। कन्छ्वाब पावल रोम सहरने गीलीदे, हन्छ्वाब पत्ता ङ्येजे यात्राने लूकाये ङू प्रेप्रे गीलेब था प्रेखूइय (मूल स्यूस्स्यायूजे काम २७:१; २८:१६)।
ख्रीष्टियान मण्डली केरे सूरू क्यूत्दे यब पो लिख्दीयेब अम्ब किताबने “मूल स्यूस्स्यायूजे काम” यदेबे य ख्यङ्। तर चेलाबे येये यलो अम्ब किताबने “पवित्र आत्माजे कामये” य खूइय। चेनेयलो कम्ब काम मूल स्यूस्स्यायूदे चीत्दे, हम्ब काम पवित्र आत्माजे अनूग्रह मेस्ये शक्तिदेने चेब ख्य। हम्ब मीयूजे बारेने त्या दी, तर पवित्र आत्माजे बारेनेये अम्ब किताबने लिख्दीये ख्यङ्।
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Ghale New Testament © Nepal Bible Society, 2011.