Maqthaiq 3
3
Ulcuvq saol bhiq nail Yaol haq daoq cavq cavq nail ganl
1Aqn aqyanq al lavqkhoel, ulcuvq saol bhiq nail Yaol haq dai, khul nail teevq gaq dov lal khi, Yuldav milkhaoq haqtsoiq haqyal bhai daoq cavq cavq bhiq-a nail ngaol. 2Aivq ge nail: “Oeqbal noeq pov yaoq. Khul khi mail dai ngal-aq neq, Nqtavq Milkhaoq kev lee aiq nail ngaol” dai, gul nail ngaol. 3Miqyail nail haqbhoil ge dan nail Ilsaqyal-i mail ge-ai thaq nail daoq neq, Yaol haq bhai ge movq nail ngaol.
Aivq ge nail:
“Tsaol-aq teevq gaq
haqtsoiq haqyal bhai
jaol khi mail ma-ail gul nail:
‘Heeqphaq lee nail haqbhoil
gailkhaol lav daol khi,
aivq nail gailkhaol
daol coev dai, lav daol yaoq’ dai,
ge-ai thaq nail ngaol.”
4Yaol haq neq, laol thao nail aqmevq-i mail yavq-ai thaq nail aqgaq aqdoi doi khi, aq jiovq bhai jaiqyaq bavkov nail jiovqpavq pavq-nvq thaq nail ngaol. Aivq neq, noelbhoel khi mail bhaiqtsil bhaiqeel jaq nail ngaol. 5Aq-u phao, Yeiqlulsaqlaiq meenq bha jaol nail tsaol-aq juq maqkhaiq, Yuldav milkhaoq doi dai jaol nail tsaol-aq juq maqkhaiq, Yaoldaq laoljaol aqjail doi dai jaol nail tsaol-aq juq maqkhaiq, aivq jaol nail bha mao dai lal-a nail ngaol. 6Aqyu juq yovqgavq nail oeqbal yovqgavq ge dov bhiq khi, Yaoldaq laoljaol bhai Yaol haq-i mail ulcuvq bhi saol-a nail ngaol.
7Phaq liq sail juq khi mail Saq duq gail juq iqsanl, aivq-i mail ulcuvq bhi saol nail dai khi lee nail bhai, Yaol haq ya moel-u phao, aqyu juq bhai niail hai ge bhiq-a nail ngaol: “Haq eiv nail eellel khe-ai dul nail yaq juq-ol, yaqhao kev lee nail Miqyail neema phail nail phaq bhai ya jel-ail dai, nul juq bhai khaq sil gaq ge lavq-a nail-aiq. 8Nul juq oeqbal noeq pov-aoq thaq nail dai, bhaq laoq kheq dai dov lal dai, doevq yaoq jaol yaoq. 9Aqbhaqlaqhaq neq, nv juq nail aqbhu ngaol dai, ge haq neq, Miqyail neema phail nail phaq bhai ya jel-ail naol dai, nul juq thaq noeq. Ngal nul juq bhai ge lavq bhel. Lovmav niil juq iqsanl, Aqbhaqlaqhaq nail yaq pevq gil lal dai, Miqyail nl nia nail ngaol. 10Niil aq-il iqsanl, Miqyail neq, aqbhaol daoqthaoq bhai hail jaol bavq thaq-ai thaq nail ngaol. Al heel ngel-i mail, aqheeq aqmeeq maq heeq lee nail aqbhaol yaoq bhaol yaoq-ao nee bhai thul ha khi miqjaq lavqkhoel bhai bavq poiv nail ngaol.
11Nul juq oeqbal noeq pov-a nail ngel-i mail, ngal nul juq bhai ulcuvq lavqkhoel-ai ulcuvq saol bhiq thail thaiq nail ngaol. Thail hai ngaol-aoq, ngaq nail haoqnao lee thail thaiq nail gaq neq, ngaq-ai nee maq tsil bhaqaoq eeq nail ngaol. Ngal neq, aivq nail saiqnaov neeqtsaq bhai pheel nail iqsanl maq geel-nvq-ail. Aivq neq, Meeq nail Haol nail Aqhaqlal lavqkhoel nee maqkhaiq, miqjaq#3.11 Niil niai khe miqjaq nail daoq ceevq neq, ngadao nail neema lavqkhoel khe aol nail maq meeq nail phaq bhai tsiq haol nail miqjaq pevq nail ngaol. lavqkhoel nee maqkhaiq, nul juq bhai ulcuvq saol lavq nail ngaol. 12Aivq nail aqlavq bhai, gov bhoehaol nail tsalbhoe nieivq thaiq-ai thaq nail ngaol. Aivq aivq nail gov bhoi bhai bhoehaol khi, gov aqmal juq bhai neq, govjil lavqkhoel bhai phi bhoel nail ngaol. Thail hai ngaol-aoq, gov koevq juq bhai neq, teevq thal-iq maq miv lai nia nail miqjaq-i mail kheq ha nail ngaol” dai, Yaol haq ge nail ngaol.
Yeiqsul ulcuvq saol-a nail ganl
13Aq-u phao, Yeiqsul ulcuvq saol nail dai khi, Gaq liq lail milkhaoq nee mail, Yaoldaq laoljaol bhai Yaol haq jaol nail bha lee-a nail ngaol. 14Yaol haq Yeiqsul bhai lav tsoiq khi ge nail: “Ngal neq, naoq-i mail ulcuvq bhi saol heeq phaq-ail tsaq nail tsaol-aq ngaol. Ngaq-i mail ulcuvq bhi saol nail dai, khi mail naol lee-a nail laiq” dai, nal daiq bhiq-a nail ngaol.
15Thail hai ngaol-aoq, Yeiqsul aivq bhai ge bhiq-a nail: “Niil aq-il nl lavq yaoq. Khul khi mail dai ngal-aq neq, Miqyail nail nee noeq bhee lal dai, ngadao nl nail neq, tsaq nail ngaol” dai, ge bhiq-a nail ngaol. Aq-u phao, Yaol haq aivq bhai ulcuvq saol bhiq-a nail ngaol.
16Yeiqsul ulcuvq saol gaq khi, ulcuvq lavqkhoel nee dov lal-u phao, teevq pov taivq-ail, nqtavq phao lal khi, Miqyail nail Aqhaqlal khaoq khoiq khe-ai aivq nail kovtavq bhai, deivq lee-a nail bhai, ya moel-a nail ngaol. 17“Tsaol-aq niil gaq neq, ngal mail ma-ail gaiq-a nail ngaq nail Yaqyov ngaol. Ngal aivq bhai neekhaol sil dee dee naol” dai, nqtavq nee aqthel meel dov aivq leevq-a nail ngaol.
Tans Gekies:
Maqthaiq 3: aeu
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2016, Wycliffe Bible Translators, Inc. All rights reserved.