Uludi Neala olelo oboba
Neala olelo oboba
Beba gowegi sedalu dibe amoda hedabifalï dialea. Busa dolö amoli nefolalebegi, e awäla besela galai. Uludi eda Moaba udia Isilale fii sosogo afädëma fii. Neasebegi, ea segea Moaba ami salea egoa amo baagoi. Baagosebegi, ea egoame made dïgïla awäla sigi nebegi, Naomi e hïle Yuda fii segea obëgëi. Obëgësebegi eege Naomi bëgëla helegela asi. Uludia Isilaleïe Gode neebe amo hawala sulo. Hobeala e dolö elöma filahilä, gini Debidiïe yaye sulo. Debidi eda Isilale ilile gini dafidilo hedabi afädë nelo.
Sedalu gowe dia nidela, Uludia hamoi gowe hëdäi nabulömelë. Dafidida, Uludi e asigi afädë negei made sulo, gasoda, Isilaleïe Godemage ïe egoame amomage edefademalä boba hamoi sulo. Mala ea hamolo amoda, Isilaleïe Godea ilima ado säla negei ï amo, ea dofä bëgëla hamolo sulo. Amase, diliage dilile iso asigiage Gode dofä hamesa namialo. Amalahilä, dilile damelë nefolalebe amoli boba hamomalo. Beba gowea ulufala olesalea, udia dolö wagadi made nefolalebe amolia Godeïe galu neala gaulahilä, Godeïe udia dolö nefolalebe amolibalä maala baamolö dialea. Mala amala hamoseda, dolö wagadi made nefolalebe amoli afädëa Isilale fii ilia mala hamolo amo baagila moholömelë.
Tans Gekies:
Uludi Neala olelo oboba: etr
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2022 (Active), Wycliffe Bible Translators, Inc. All rights reserved.