Gewilde Bybelverse vanaf Épéso 1

Deel

Aw pigsekat ku uman adti kanan na ka-ilawan ya anenganeng mayu pada ka-ede-an mayu kun unu ya un mayu imanen asuntu na pigtawag da kamu na Tyumanem. Aw ka-ede-an mayu uman ya alagaꞌ na un nan atag na to-o madyaw, aw kamu saba na manga mangintu-uway ya un makatagtun. Kaliman ku uman na ka-ede-an mayu ya kadakulaꞌ na katulus nan na walaꞌ ya maka-unawa na asini kanaten na manga mangintu-uway. Aw pigpakitaꞌ nan ya kanan katulus dun ni pagmataw aw pagpa-ingkud nan kan Kristu adti kalintu nan na adti tas na langit. Aw ya pagdumala ni Kristu matas pa kay sa kadég na awun katulus magdumala aw sa manga awun katundanan, pangkay adun na allaw aw pangkay sa dumadateng pa.

Sa walaꞌ pa na Tyumanem imo-a ya kadakulaꞌ na banwa, dadan da kitadun nan pigpamalliꞌ aw pigtani na un makasambuk kan Kristu, pada walaꞌ ya pagsalaꞌ kanaten dun ni asdangan nan. Asuntu sa pagginawa nan kanaten, yan ya kanan dadan palpa na ma-imoꞌ kitadun kanan manga mangayseꞌ magi kan Jisu-Kristu, kay yan saba ya makatutuk sa Tyumanem aw yeiy ya kanan pagkaliman.

Pangkay piglakadan tadun ya manga suguꞌ na Tyumanem, manang dun ni pagkamatay na Iseꞌ nan adti krus, piglekat da kitadun na duguꞌ nan aw piglanas da ya manga salaꞌ tadun magi sa kadakulaꞌ na kallat na Tyumanem kanaten.

Naten deyen ya Tyumanem na yan ya Ama na kanaten Matas na Pangulu na si Jisu-Kristu. Kay dun ni pagpakasambuk tadun kan Kristu, pig-atagan kitadun na Tyumanem na madég na kadyawan magi sa Ispiritu Santo, aw alag saba yeiy lekat adti tas na langit.