Gewilde Bybelverse vanaf Efesarya 1

Deel

Me mangau lestar, te krell lo t'mare djia pre, te dikenn t'mare djiyeskre yakentsa, har baro oun shoukar kova hi, hoy yob i patslende della ap ko tsiro, kay venn le pash leste an o bolepen khetne. Yob das t'men gole, te lenn kova lauter. Oun me mangau lestar ninna, te hayvenn t'mer, har bari leskri zoor hi, hoy an mende hi, kay patsah. Koy zoor hi i emligi bari zoor, hoy kras o Yezous Kristes i moulendar djido, oun beshas les ap i čači rig o Deblestar an o bolepen, oun das halauter an leskre vasta, te vell lo o ray pral i tsele rayende oun pralstunende, zorele oun bare. Kekeskro lab hi bareder har leskro lab an kava tsiro, oun ninna an ko tsiro, hoy vella.

Har o bolepen oun i phoub gar koy his, rodas lo men vin, te djas ap o Yezouseskro drom. Yob rodas men vin, te dell lo men i djoudjo dji, te hatsell lo kek doosh ap mende. Yaake boud kamas lo men, te penas lo glan i rah tsiro an peskro dji, te vas mer leskre čave. Oun o Yezous Kristo kras, te vam mer o Debleskre čave, yaake har o Devel kova kamas

Har o Yezous Kristo ap o troushel meras, oun peskro rat menge ratas, las lo mari doosh oun phagi mendar. Yaake baro his leskro lačepen ap mende!

Sharas maro Debles! Yob hi o Devel oun o dad maro rayestar, o Yezous Kristestar, oun das peskro tselo bolepaskro bravlepen mende, kay ham patslo ap o Yezous Kristeste.