Newari - 1986 Edition (Drama NT)

हेरोद जुजुया इलय् यहूदियाया बेथलेहेम धाःगु गामय् येशू बूगु खः। येशू बुइधुंकाः पुर्बपाखें ज्‍योतिषीत वय्‌कःयात यरूशलेमय् स्‍वः वल। अले इमिसं मनूतय्‌के थथे धकाः न्‍यन – “यहूदीतय् जुजु जुयाः बूम्‍ह गन दु? वय्‌कः बूगु खँ सीकेगु छगः नगु पुर्बय् खनागुलिं वय्‌कःयात दर्शन यायेत जिपिं थन वयागु खः।”
थ्‍व खँ न्‍यनाः हेरोद जुजुया तसकं नुगः भाराभारा मिन। यरूशलेमय् च्‍वंपिं फुक्‍क मनूत नं ग्‍यात। उकिं हेरोद जुजुं फुक्‍क तःधंपिं पुजाहारीतय्‌त व शास्‍त्रीतय्‌त सःताः थथे न्‍यन – “मुक्ति बीम्‍ह ख्रीष्‍ट गन बुइगु?”
अले इमिसं थथे धकाः लिसः बिल – “यहूदियायागु बेथलेहेमय् दु, छाय्‌धाःसा थ्‍व खँ छम्‍ह अगमवक्तां नं थथे च्‍वया थकूगु दु –

“‘हे यहूदियाया बेथलेहेम,
छ यहूदियाया जुजुपिनिगु न्‍ह्यःने
छुं कथं नं चिधं मजू,
छाय्‌धाःसा छंगुपाखें
छम्‍ह तःधंम्‍ह जुजु पिहां वइतिनि।
व जिमि मनू इस्राएलीतय् जवाः जुइतिनि।’”

अले हेरोदं पुर्बं वःपिं ज्‍योतिषीतय्‌त सुनानं मसीक सःताः न्‍यनेकने यानाः नगु खनेदुगु ई सीकाकाल। अले इमित थथे धकाः बेथलेहेमय् छ्वल – “छिकपिं वनाः मचायागु खँ बांलाक सीकाः जितः कं झासँ, अले जि नं वनाः दर्शनया वने।”
जुजुयागु खँ न्‍यनाः इपिं अनं वन। इमिसं पुर्बय् खंगु नगु हानं खनेदय्‌कः वल। व नगु न्‍ह्यज्‍यां ज्‍यां वनाः मचा दुगु थासय् थ्‍यंकाः दित। व नगु खनाः इपिं तसकं लय्‌ताल। अन थ्‍यंकाः इपिं छेँय् दुहां वनाः मचायात वया मां मरियमनापं खन। अले इमिसं क्‍वछुनाः वय्‌कःयात भागि यात। अले थथःगु कन्‍तुर चाय्‌काः लुँ, नस्‍वाःगु गुँगू व मूर्र लिकयाः छाल।
म्‍हगसय् इमित हेरोदयाथाय् वने मते धकाः परमेश्‍वरं उजं बियादिल। अय्‌जूगुलिं इपिं मेगु हे लँपु जुयाः थथःगु देशय् लिहां वन।

ज्‍योतिषीत वने धुंकाः योसेफयात म्‍हगसय् प्रभुया छम्‍ह स्‍वर्गदूतं थथे धाल – “दँ, मचा व वया मांयात ब्‍वनाः याकनं हे मिश्र देशय् बिस्‍युं हुँ। लिहां वयेत मधातले छिपिं अन हे च्‍वँ, छाय्‌धाःसा हेरोदं मचायात स्‍यायेत स्‍वयाच्‍वंगु दु।”
अले योसेफ मचा व मांम्‍हय्‌सित ब्‍वनाः चां चां हे मिश्र देशय् बिस्‍युं वन। हेरोद जुजु मसीतले इपिं अन हे च्‍वनाच्‍वन। “जिं थःकाय्‌यात मिश्र देशं सःता” धकाः परमप्रभुं अगमवक्तायात धाय्‌कादीगु खँ थुकथं पूवन।

ज्‍योतिषीतय्‌सं थथे झंगःलाःगु सीकाः हेरोद तमं मि जुल। अले ज्‍योतिषीतय्‌पाखें नगु खनेदुगु ई सीकातःगु दुगुलिं व हे स्‍वयाः हेरोदं बेथलेहेमय् व वया जःखः च्‍वंगु थासय् च्‍वंपिं निदँ व निदं क्‍वय्‌यापिं मिजंमस्‍तय्‌त स्‍याकेबिल। थुकथं यर्मिया अगमवक्तां धयाथकूगु खँ पूवन –

“रामाय् नुगः हे तज्‍याइ थें च्‍वंक
ख्‍वःसः ताये दत।
राहेल थः मस्‍तय्‌त लुमंकाः ख्‍वयाच्‍वन।
वयात सुनानं दिके मफुत,
छाय्‌धाःसा वया मस्‍त स्‍याये धुंकल।”

हेरोद जुजु सीधुंकाः मिश्र देशय् च्‍वनाच्‍वंम्‍ह योसेफयात म्‍हगसय् प्रभुयाम्‍ह छम्‍ह स्‍वर्गदूतं थथे धाल – “दँ, मचा व मांम्‍हय्‌सित ब्‍वनाः इस्राएल देशय् लिहां हुँ। मचायात स्‍यायेत स्‍वःपिं मनूत सी धुंकल।”
अले योसेफ मचा व मांम्‍हय्‌सित ब्‍वनाः इस्राएल देशय् तुं लिहां वन। हेरोद सिनाः वया काय् अर्खिलाउसं यहूदियाय् राज्‍य यानाच्‍वंगु दु धकाः न्‍यनाः योसेफ अन वने ग्‍यात। अय्‌जूगुलिं परमेश्‍वरं हानं म्‍हगसय् वयात अन वने मते धकाः धयादीगुलिं योसेफ गालील प्रदेशय् वन। अगमवक्तातय्‌सं वय्‌कःयात “नासरी” धाइ धाःगु खँ पूवंकेत योसेफ नासरत धाःगु शहरय् वनाः च्‍वंवन।

Luister na मत्ती 2