Knk 17
17
Pol kï Silas kam þet kï Tesalonik
1Pol kï Silas ndan døning Ampipolis kï døning Apoloni gangïn, aw teen Tesalonikt kam þet, nõbe kuj kelta kï Luwah lo Juipg i tit nõ. 2Tit'n a ðan kï lo lo ye, Pol aw kam kuj kawnat lo Juipg kï ndø taakò lo Juipg, nja mïta majïn na ta sed ngãi dø tagt kï kam maktubt kïkunjðang. 3Ndï ørr girr ta ho, ndï dad nya 'nten: Kari na Krist a ngah kõ ngãi, na a þai lo koit. Jeju'n m'ndï m'lasï mbera taa, îla i Krist ye.
4Juip madg kudt telïn rod go tat'n non, ad ndulon go Pol kï Silas nat kï Grekg ngãibe kï în Juip telg kï ngéðanya kïgo lo Luwaht, kï dekïdë madg'n în ngan ngéþeg. 5Na ni tøl Juipg søkïrr ad øin deg kï papa kï ngahnd dø ðobt, kawïnd kï nat, sïlan deg kï kam þet nõ wurrwurr kad þain kï ta. Tøi awïn þe lo Jasõ sahn Pol kï Silas, kïta sahn tee sed nõ koosïdegt. 6Na lon ngahnd al taa ye, ndørïn Jasõ, kï ngétaata lo Jeju madg, awïn sed nõ ngégangtagt kï kam þet nõ. Juipg gan tad kot anan: Deg'n ðan ða burïn dunia þukt, na tajigla ðen nëbe tø.
7Na Jasõ hød kï ront. Deg tube'n ðan ðan ye, nya ðad i ngankõdang, ad ndoor mberkïnda lo Ngar Sejar, ndï elïn deg anan: Ngar mad i nõ tøa i Jeju.
8Lon koosïdeg, kï ngégangtag oon dø ta 'nten ye, kamd gang ngalang. 9Taan nar ji Jasõt kï ndeg ngétaata lo Jeju, kamla tî nyand ad awïn.
Pol kï Silas awïn kam þet kï Bere
10Tentenbe, lon lo duw ye, ngankõ adïn Pol kï Silas awïn kam þet kï Bere. Lon aw teen kam þet kï Bere ye, tøin par awïn kam kuj kawnat lo Juipg. 11Juipg kï Bere în deg kï hald maj tøi Juipg kï Tesalonikt. Taan ta lo Luwah kanangbe kï kamndig. Kamla nderrïn girr ta'n Pol eld kam maktubgt kï ndang lo Luwah kï n'oon ke i ta kï jeje a? 12Kïtø 'nten koosïdeg ngãibe telïn ngétaata lo Jeju, kudt dekïdë grekg kï ngénya, kamla în ngan ngéþeg kï dekïdïngã madg telïn ngétaata lo Jeju ho. 13Na lon Juipg kï Tesalonikt oon høi Pol kad ndï la mber ta lo Luwah kam þet kï Bere ye, þai awïn Beret kad'n sïlan deg. 14Tajigt, ngankõ ngétaata lo Krist adïn Pol aw ta bahbo kat't, na Silas kï Timote la nãin Beret ye. 15Deg'n danïn Pol ye, awïn sia mbã teen kam þet kï Aten. Kamla tel awïn Bere gog elïn Silas kï Timote anan: Pol ndïje kad aw ndødïna kanangbe.
Pol kam þet kï Aten
16Lon Pol ndï kam þet kï Aten, ndï ngoo Timote kï Silas ye, oo kad kam þet kï Aten kïtaagbe lo i kï þakot kï yokïða, ad ta õ kama ngãi.
17Ad aw kam kuj keltat kï Luwah. Pol maj ta sed Juipg kï deg kï ngétel Juipg kï nyaðad i kïgo lo Luwaht kam sukït kï ndøgbe, kï deg'n Pol ndød'd kam kuj kawnat lo Juipg nõ tø. 18Ku degt'n non, kïmadg în Epikuriag, kï stoikag ngéndoo deg goosï kï terr elïn ta sia. Kïmadg elïn anan: Ta ði ngekelta së n'ðan ndig kel a?
Kïmadg tø anan: De'n ðan j'oo tit ða la mber luwah madg kï mbahg. Kïtø Pol la mber hoita lo Jeju kï ta þai ngékoig lo koit.
19Taa ne, ørrïn Pol awïn sia dø doorlot kï tøa i Aeropaj elïna anan: J'asï kad kï ger girr nyando loi kï kij'n i ða i ndoo nõ a? 20Kïtø i ðe kï hoi nyag kï mbah la kï rojt ye, kï ndig kad i ørrj girr nyag'n non ad j'oo maj. 21Kïtø 'nten, deg kï Atent tube kï mbahg kï ndïn tit, kïlaðad kïðang goto, na kï kaglog tube, ndïn ta kør girr tagt ho, nelïn mbid kïta koo dø hoitag kï kij koon.
22Taa ne, Pol þai dõ dan door lo Aeropajt an: În deg kï Aten, m'oo kad în deg kï ngéhile yog ngãi. 23Kïtø lon m'ðe kam þet losï ye, m'ndia m'nøl nyag'n hã i ndï øsïn døsï ber nodt, na m'oo dïngïr mad'n ndangïn ta 'nten døt anan: Kï ro Luwaht'n de gera al. Kïtø 'nten m'ndig lasï mber Luwah'n hã i gerïna al, na i ndï øsïn døsï ber nõat. 24Luwah'n ða døning kï nyag kï kamt tube, i Bïraþe Ngeða dørã kï døning. Luwah a ndï kam kuj ndubt kï deg ðan kï jid al. 25Ndig kad deg ðan kïla kï jid adnïn tit gee nya mad ji degt al. Kïtø îla ndï ad deg ndï kï dø dõ, kï koo kï taa, kï nyag tube tø ho ye. 26Þai dø det kïða la Luwah ða ad girrdeg kïdangdang teent kad ndïn døningt kïtaagbe. Ndah kaglog kïdangdang ho ða ðob nin mbïna døninggt'n sumba kad deg ndïnt. 27Luwah ða nya 'nten titbe kad deg sahna ne, ke neni deg a ngahna kïgo mõm lot kaa ne, Luwah i sãi al ro det. 28Kïtø kï ndï kï døj dõ, ndï kï j'ød roj ho kï ndï kumkajir kïtakula ho. Nya 'nten la kïmadg ku gosïgt losï elïn anan: Ãã jî tø jî nganag.
29Kïtø 'nten jîn ngan Luwah taa, sumba kad kïger kad Luwah i tit yo kï tøsï kï ða kï l'ør, ke arjã, kï mbal kïgo goosït lo kød, ke kïgo lo takøjt lo de al. 30Luwah un kumïn dø kohgt kï dai kï maði'n deg ndïn ne kïkanj gera. Na tajigla taa, ndï kun deg kad tørrïn ndid. 31Kïtø øj ndø'n þet n'a ngangïn ta kïdenesew dø degt kï duniat ye, køt de mad ndaha, ad naja deg tube lon ada þai lo koit. 32Lon grekg oon dø ta þai ngékoig lokoit ye, ølïn Pol, kïmadg elïn anan: Þet j'a kï j'oo dø ta loi gog dø tat 'nten ndø kï ðangt.
33Pol nyad na tøi aw. 34Na deg madg awïn sia nat telïn ngétaata lo Jeju. Kudt nõ, Deny'n i kïkïða ku ngékøjta kï Aeropajt i tit kï dekïdë mad'n tøa i Damaris, kï dekïdë madg tø.
Okuqokiwe okwamanje:
Knk 17: MB80
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
BIBLE MBAÏ © 1980 Alliance Biblique du Tchad.