Knk 18
18
Pol aw kam þet kï Korent
1Go nyagt'n non Pol þai Atent aw Korent. 2Ngah Juip mad nõbe tøa i Akïla, oojïna kam døning Pont. De'n non þai døning Italit ðe Korent't nat kï nën Prisil. Kïtø ngar Sejar Klod ndamber kad Juipg tube teen kø kam þebot kï Rom. Pol aw ro Akïlat kï Prisil. 3Tit kan kød lod i kïðabe ye, aw ndï nat sed kad ðan kïla jo kujkubg. 4Kï ndø taakò lo Juipg kïðen, Pol a aw kam kuj kawnat lo Juipg a da sed ta sah ðob kad Juipg kï grekg taan ta lo Krist.
5Na lon Silas kï Timote þain døning Masedøant ðen ye, Pol nda ron degir kï kaglo tube, ta kïla la mber tat lo Luwah; manaj kï tïga wakïsï kï rotîn kï nõ Juipgt an: Jeju i Krist. 6Lon Juipg taana ðøø na tajïna how how ye, Pol yekï kubg lon yekïyekï na eld an: Kï mosïsï i døsït în kïþeg; mî kï kar nyang døt; na labekïnõt m'a m'aw kï ro girrdegt kïdangdang.
7Pol tee kam kuj keltat lo Luwah aw þe lo de mad kï tøa i Titus Justus, i de kï nya ðaa i kïgo lo Luwaht. Þe loa i kad kuj keltat kï Luwah. 8Na Krypus'n i kïbo dø kuj keltat kï Luwah ye, taa ta lo Bïraþe nat kï ngékïþe lon. Deg ngãibe kï þebot kï Korent't, lon oon dø ta lo Pol ye, telïn ngétaata lo Jeju ho, ad ðand baptem ho. 9Bïraþe elta Pol ndø kam nyakookamndilt an: Ot þool, na elta kï nõit, i ndï goi mbo al. 10Kïtø mî nat sei, de mad kï a ða sei majal goto, kïta m'aw kï deg ngãibe kam þet'n ðan. 11Pol ndï kam þet kï Korent ða þal kïða kï nusï. Ndoo deg ta lo Luwah.
12Na kaglot'n Galion õþe dø døningt kï Akayt, Juipg þain kï dø Polt kï ta, na awïn sia lo gangtat, 13elïn anan: De'n ðan sah kad deg øsïn død ber nõ Luwaht kïgo ðobt kï dang kï mberkïnda lo Moij.
14Na lon Pol ndig kï'n turta a ne, Galion el Juipg an: În Juipg îla i ta kï øj dø nyaða kï gootal, ke nyaða kïmajal mad a ne, þet m'a m'oo dø ta losï. 15Na îla i ta kïmaj na, kï øj dø kørr girr tag, ke tøg kï kam mberkïndat losï a ne, i ta lom al, na i ta losï, kïta m'ndig kad mî ngegangta dø nyagt'n nõ al. 16Ad Galion tuþad kø lo gangtat ad teen. 17Taa ne, Juipg høn Sosten'n i kïbo dø kuj kawnat lo Juipg, tïndana mbukïmbukï nõ Galiont lo gangtat nõ, na Galion tur go nya'n non al.
Pol tel þebot kï Antiosï kï kam døning Sirit gog
18Pol ndï kam þet kï Korent kaglo asï tat, kamla ða lapia ngankõ, na un too kïbo aw døning Sirit, nat kï Prisil kï Akïla, Pol ngïse døn kam þet kï Sãkre kïta un køn kï yokïnda ad Luwah. 19Aw tee þebot kï Epesï. Pol nya Prisil kï Akïla nõ be. Tøi aw kuj kawnat lo Juipg, majta sed ngonsî þaitø. 20Na Juipg ndïjena kad ndï sed ngonsî þaitø na Pol ndig al. 21Ðad lapia eld an: Îla i ndig lo Luwah a ne, m'a m'tel m'ðe rosït gog.
Kamla þai al kam toot aw Epesït. 22Pol aw ud ber kam þet kï Sejare, aw ða lapia ngékawna kam þebot kï Jerusalem, kamla þai nõbe aw kam þet kï Siri.
23Ða ndø asï tat kam þet kï Antiosï, kamla þai aw, a lago døning Galati kï Pyrji øj ngéndoog lo Krist kad ngangïn kokïro kam tat lo Krist.
Apolos aw kam þet kï Epesï kï Korent
24Juip mad kï kooj Alegjandrit tøa i Apolos ðe þebot kï Epesï. Apolos i de kï oo þalta maj ngãi, ger girr maktub kïkunjðang maj ngãi tø. 25De'n non i kï ndoo kam ðobt lo Bïraþe, i de kï tïngabil, ndï la mber Hoita kïmaj lo Jeju kïgo ðoba kï jeje na ger Baptem lo Jã kïðabe koon. 26Mba girr kelta deg kï kam kï misïmisï kam kuj kawnat lo Juipg. Prisil kï Akïla oon dø ta loa, taa ne unïn na kïrodt, ndoona go ðob lo Bïraþe kï jeje. 27Kamla Apolos ndig kaw døning Akayt. Ngétaata lo Jeju øsïn goa ad ndangïn maktub adïn ngéndoog'n ndïn døningt kï Akay kad høna kï rodt maj. Lon aw tee rodt ye, ða kï ngétaata lo Jeju ngãibe kïgo kamkët lo Luwah. 28Kïtø Apolos dum dø Juipg kï tïga wakïsï kam tat kï kel kï goosï kï tøg kï ngãi ad Juipg asïn turta kela al. Øjd kam maktubt lo Luwah kad gerïn maj kad Jeju i Krist.
Okuqokiwe okwamanje:
Knk 18: MB80
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
BIBLE MBAÏ © 1980 Alliance Biblique du Tchad.