Luk 13
13
Jamaŋo nip aññantay ankúbul jamméejenkinin imbi Díino
1Angu afúrumi na, ayikyik m'ampútor k'andék antéekin Yensa a gubaarhu h'ayikne ásibaŋo ámáráŋ. Anyéjem:
- Arafaŋ! Úpájuli ayikyik ñammi Galile índukoŋ m'andék ba búfunnhu leeyaŋaŋ. Angu f'aŋŋane bubujhu leeyaŋankánin, ñammi básedeŋ índukoŋ anlahunteeniŋ na k'ambujeeniŋ immereŋ nip. Angu immi m'ambujne, taahenkinin agígir ambabay ingi taahenku leeyaŋaŋo. Agida, úgufánááro m'aretuhne Pilat, úmár abúuñurne ñammi básedeŋo k'andek ambuj ñanfúnnhu leeyaŋaŋo.
Iyoo! Angu, nim gantifurne Yensa.
2Yensa bayennehini, ayéjeeniŋ:
- Ingah! Ninkinan, dahu úduk úyejeŋ ñammi Galile m'anniirone dam anniironiiro maro immereŋ ankankaan hójondoŋo anfaŋ índinenkinin ankanne. Hómár gireŋ! 3Ingah! Íyejoonuŋ, ninkinan nip uñantaheŋ úkubuloŋ jamméejenkinan imbi Díino. Aji nim gireŋ, ayehenkunoonuŋ maŋ ni immereŋ anyehenaane. 4Ninkinan! Karo ulentálaheŋlentála a gubaarhu agofoŋo butinkeno ingi ilallo m'anniirone Jerusalem hóbidhu Silowam fo dígo akelihinno anenunteeniŋne? Angu, ninkinan, karo ulaheŋlah maro immereŋ anfaŋundi júnuboŋ jamanku Jerusalem índukoŋo, gúmár akanne anniirohi na? 5Hómár gireŋ deh! Ingah! Guyroŋ mara immereŋ anfaŋi jamaŋo bukanku hójondoŋo! Gúmár gíyejoonuŋne ninkinan úkubuloŋ jamméejenkinan imbi Díino. Aji nim gireŋ ayehenkunoonuŋ maŋ ni immereŋ anyehenaane.
Funaareŋo a nintiku sigoyabo si gara adímehne
6Yensa balóbi nim mees, anéereeniŋ funaareŋo unfu, ayéjeeniŋ:
- Imbeŋ nuko údiigeen úduk m'ayik guraah gu reseŋo. Agida, a guraho gúmár ayikyik sigoyab#13.6 Agida sinoŋo símár 'sifigo' ganyéjehne. Bídimerenkinem aŋayŋay gúmiir ingi bi sigoyabo. s'aguy na. Angu bísiba, adék ba bufathu digoyabo. Bapúti na lahundaŋ haani bugoyab úmbonduk. 7Angu, ayéj údoolhánom: «Me, sigoyabo insi, icikinem! Díineŋ alallaŋ inooŋe gídekri dilahunar haani bugoyab. Ingah! Yikireŋ nafa a guraho mara gara adimeh. Inini sinoŋo acigaa akohumeemne.»
8Angu, na údoolo ayéjemne: «Umuyhum! Inini! Bént k'isul ikaan jambando! Túyor fanta, dahu ucig! 9Gúduko jiman adímhineh. Aji dímireŋ ukur ucig.»
Nim Yensa anéerne funaareŋo.
Fo Yensa ajébunne wúur a bísibaŋo bi guyohálaŋo
10Angu afúrumi na, abári bísiba, bísibaŋo bi guyohálaŋo, Yensa aŋay bukawandinku jamaŋo a jaameŋo. 11Angu, ayik udikaam úduk m'adéker. Angu, udikaamo úmár ayikyik banér b'alah mángákánám k'aŋoya bareŋ ki dapiren kunwonn awúuh. Agida, fáguh akanne k'amíir nim buruhu díineŋ butinken ingi alallaŋ. 12Angu Yensa, f'afégne udikaamo úmár ayéjem:
- Dókulo!
Angu, udikaamo adéker. Udikaamo badékiri, Yensa ayéjem:
- Udikaam, ingah! Kunyokon adédet angu!
13K'adooh halakánam alóbundom. Angu, f'adoohne halakánam k'alóbundom, udikaamo ayoofa k'awúuh lip. Angu, fo Yensa akanne nim, udikaamo aramunah Díino.
14Angu ulaameku jaameŋo, bafégi ni Yensa ajébunne udikaamo a bísibaŋo bi guyohálaŋo, añuumul. Úpájuleŋ, luwaŋo ayéjyej wúur ñantaaraŋ adoho a bísibaŋo bímár. Angu, ayéj barumuno b'agune na:
- Ingah! Moŋon moŋon ásiibane k'anjébinem, daha adéker bísibaŋo bi guyohálaŋo! Ingah! Ninkinan! Uraagofoŋo ayikyik ásibaŋ amikilaŋ ingi ímbenduk b'apirenne adoho. Angu, upireneŋ údekireŋ ásibaŋo nómáráŋ k'anjébunoonuŋ, kanda buku ufak údekireŋ bísibaŋo bi guyohálaŋo iniman bi gub.
15Angu ulaameku jaameŋo, babujulini balókánom na, Yensa aŋoyindem ayéj:
- Ingah! Ninkinan ñoperej! Eke ninkinan faŋo, haani a bísibaŋo bi guyohálaŋo gúhoobiheŋhoobul ahayankánan wola ñofalinkinan k'údekureeniŋ k'andék anruuh? Eke nim gukankaŋne? Inini, úyejeŋ faka bísibaŋo bi guyohálaŋo dahi wúur adéker k'ajébunaa. Ninkinan ñoperej deh!
16Abocin ayéjeeniŋ:
- Angu inini, udikaamo ummu m'ijébunne, ummu údinhintor Uyahud. Ingah! Ayikyik díineŋ butinken ingi alallaŋ a halaku Iblisa, angu f'ehoobulom a kunyokunom gub, haani aguy bísiba bi guyohála, eke nim eh?
17Angu, Yensa balóbi nim mees, jamaŋo m'anfoyemne anrohroh fanfaŋ. Kanda índukoŋo mingu asúumeeniŋsuum dáde a gubaarhu hójoonineŋo hódenneŋo ho Yensa akaanahne alaba.
Funaareŋeŋo fu Yensa afúnnáne a gubaarhu maasayahu Díino
18Angu afúrumi na, Yensa aŋay balóbo a gubaarhu maasayahu Díino. Angu, funaareŋo unfu gafúnnureeniŋne. Inini galóbne ayéj:
- Túyomuŋ baŋ k'imiihoonuŋ! Maasayahu Díino, neeraŋ gamíirne? Horaŋ gipirenkinehne imiirinahin ingi maasayahu Díino? 19Ingah! Akankaan ininkaman kódeku mutardo ko wúur adoone k'adék ba burúg a naakohánom. Inini, eke kódeku mutardo akepkep fanfaŋ? Kanda aji úrugi, awaalháneh k'adék f'adék aguy sino síde s'ópájul jatonoŋo andékekineh andék anlepun na. Maŋ nim maasayahu Díino amíirne.
20Aŋoolin ayéj:
- Ingi horaŋ faka gipirenkinehne imiirinahin maasayahu Díino? 21Ingah! Upiren umiriinahin maasayahu Díino ingi láwiiro no udikaamo adoone ba bukanku úmbuuro. Úpájuleŋ, apiren adooh kiloŋ buruhur no fariño, akaan na láwiiro hotir k'agaasahin. Kanda láwiiro, haani maŋ ni fuhuroŋne, aŋankáneh a fariño nip k'akaan ki fariño ariir, k'afuuh. Nim maasayahu Díino amíirne.
Nim Yensa afúnnáne funaareŋo.
Niŋanorunkintor a maasayahu Díino
22Angu afúrumi na, Yensa afak adooh binaalo ba hadéko ba Jerusalem. Kanda saari saari ingi bukoor bukoor gadékumne, gapúti na, anooh k'akawandin jamaŋo. Nim gakaanahne a saariyeŋo ingi akooroŋo n'agune a binaahu Jerusalem.
23Angu bísiba, ayikyik m'amiih Yensa ayéjem:
- Arafaŋ! Iyéji, hóge ñanraagofoŋo mi Díino adékehne ba bupahuno, karo danrumun?
Fo wúuro amiihemne nim, Yensa aŋoyindem, kanda alóboh ingi jamaŋo nip m'anjógne na ayéjeeniŋ:
24- Túyomuŋ baŋ k'íteekinoonuŋ! Ingah! Burukumbanku maasayahu Díino agogog deh! Angu, moŋon moŋon fo umaja guŋano a burukumbaano búmár. Ingah! Ayikhineh m'andékekinehne ba guŋano, dampiren k'aŋŋan.
Yensa abocin ayéj:
25- Ingah! Ayikhineh bísiba bi ulaameku dígo adékehne ba bukimbenku gúbángááro. Angu akimbendir gúbángááro, ayikhineh m'anguyhunehne a bílido. Kanda aji uguyeŋ a bílido k'údekeŋ ukoŋkoŋineŋ k'úyejemeŋ, ninkinan moŋon moŋon: «Umuyhum! Umuyhum! Bonkerer! Kimbiireem gúbángááro!» Dakimbiro k'uŋan deh! Ulaameku dígo ayéjhuno: «Fi hantaŋ? Fi beeraŋ gúfuruntne? Aa, Déker, me pájiiro!» Nim ulaameku dígo gadékehne ba búyejhen. 26Angu fi úyejhinem faka: «Umuyhum! Me kaari! Eke fi a saariŋo gúdekirehne ba bukawandinku jamaŋo? Eke, me ingi fi imbaboŋne guboolo k'inyaahálahoŋ!»
27Angu, úmár aŋoyindukuno ayéjo: «Ingah! Marigeno afaŋunumne n'ásuum, me pájiiro deh, haman hotir! Fi ukanku hójondoŋ. Inini déker!» Nim ulaameku dígo alóbhunone aji uguy a bílido dam.
28-29Angu a waato nómár, úfekineh maamaamankintor Ibrahiima ingi Siyaka ingi Yankuba ingi anabiyoŋoŋo nip n'annoone inini a maasayahu Díino. Úfekineh mees m'anfúruntne a tonkoŋo arenekeŋo n'annoone k'aŋŋay gufoola gúsuumi. Kanda fi mungu, gúputri antíbakuno. Angu, fi uyokuneh fanfaŋ k'angu uhooŋoh, k'útif mahar dáde.
30Yensa balóbi nim mees, abocin ayéjeeniŋ:
Ingah! A waato nómár n'adékirehne, jamaŋo m'afeerenne yikireŋeŋ búuña haani hotir a waato inno, gucum tápár immereŋ anguyhuneh jamaŋ m'ambúuñahaa. Ki nuko jamaŋo m'anik ayikne búuña a waato inno, immereŋ mingu, gucum tápár, dambúuñahaa.
Nim Yensa afak alóbne a nintiku maasayahu Díino.
Fo Yensa ajellihinne jamanku Jerusalem mara búkubirihu jamméejenkinin imbi Díino aléerumeemleerum fanfaŋ
31Angu, fo Yensa aŋane búyejo nim, ñanfarasiyaŋ índukoŋ anwaliŋirem k'anyéjem:
- Arafaŋ! Mint iyennehinmiŋyennehin mara umaasaŋo Herod asíibáásiib ba bubujhon. Inini, fút a didiiraŋo indi k'údek uŋantin!#13.31 Apirenpiren aguy ñanfarasiyaŋo immereŋ ansíibáásiib ki Yensa apah a halaku Herod, apiren afak aguy ansíibáásiib ki Yensa afúr a didiirahánin. Pájiiraa.
32Angu, fo ñanfarasiyaŋo anyéjemne nim, ayéjeeniŋ:
- Hey! Ninkinan! Yéjereŋ kocufuno kómár maro me iyikyik doho n'eñanta ídetálin. Fégeŋ baŋ, gub me ba búfunnhu fáguhoŋo ingi bújebunku ñanjébireŋo gídekehne. Gucum maŋ nim mees, ki dahan ikir ídetilin dohohum. Anaman ibollabolla.
33Ayéjeeniŋ:
Téekintemeŋ maro gub, gucum ingi dahan iñantay ilah binaalo ba hadéko ba Jerusalem. Ingah! Na giñantane ídek, mara eke bim Jerusalem gambujohne anabiyoŋoŋo? Eke nim gakankuhne biriman fam? Inini, ku k'údekeŋ úteekinemeŋ hómáráŋ nip.
34Angu Yensa, balóbi nim ñanfarasiyaŋo, ayéj:
- Jerusalem, oo Jerusalem! Ingah! Ninkinan, ninkaanoorunkánan galéerumkumleerum fanfaŋ. Ingah! Biriman fam a didiirahánan gambujobuj anabiyoŋoŋo. Oo! Anabiyoŋ moŋon moŋon mu Díino abúuñurne, úgiihemeŋgiih ingi bawaalo f'adék aniiro. Maŋ nim gukankaŋne káriman fam. Agida halabahi gihaamine bukoñhánan k'ihuburinoonuŋ maŋ ni bákáro ahuburinehne jakihinem, kanda ninkinan féguroŋ hómár. Lókiiroŋ hadéko ba a binaam! 35Angu, inini túyomuŋ baŋ k'íteekinoonuŋ h'adékehne buyiko. Ingah! Uhoobulahánaŋ, ninkinan ingi bukokánan ingi jaameŋo adénno nip. Díino dafak akooñoonuŋ. Me mungu, ba hadék gídekehne ki dúfegahaaramuŋ daman d'óyejhineŋne: «Ummu, mu Umuyhintor abúuñurne, Díin akaan ayik barake!»
Nim Yensa alóbne dam a gubaarhu jamanku Jerusalem.
Okuqokiwe okwamanje:
Luk 13: GD
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Copyright Vision Intégrale, Senegal
