Luk 14
14
Fo Yensa afak ajébunne wúuro a bísibaŋo bi guyohálaŋo
1Angu afúrumi na, ayikyik bísiba bi guyohálaŋo bi ulaamer úduk ayéj Yensa adéker ba guyaahálaŋo a díkinem. Agida, ulaamero úmár atohtoh imbi m'ammarahne dayraŋo no immereŋ ñanfarasiyaŋo. Angu f'aŋŋane guyaahálaŋo, jamaŋo ankorosoh Yensa hóbun. 2Agida na ayikyik údiigeen mu jébireŋ. Arinkinem nip awudwud. 3Angu Yensa, f'afégne údiigeeno újebireŋo amiih ñankeekihu Hañaañeno ingi ñanfarasiyaŋo ayéjeeniŋ:
- Ninkinan! Íyeji inini, luwaŋo neeraŋ galóbne a gubaarhu bísibaŋo bi guyohálaŋo? Hóge wúur ayikyik binaal ba bújebunku újebireŋ a bísibahu guyohálaŋo, karo luwaŋo adíigumdiigum hómár?
4Angu, fo Yensa amiiheeniŋne nim angu immereŋ nip ankota si. Angu, fam kireŋ Yensa alahne údiigeeno k'ajébinem. Bajébinem ayéjem:
- Kenger k'uŋúñ!
5Ki údiigeeno akeng k'aŋúñ ba a díkinem. Angu badoonay, amiiheeniŋ ayéjeeniŋ:
- Inini ninkinan, aji úbákánan wola ahayánan aneni a koloŋo a bísibaŋo bi guyohálaŋo, neeraŋ gukankánaŋne? Hóge úbenhinemeŋ maŋ na a koloŋo?
Ayéjeeniŋ:
- Wówo! Haani aguy bísibahu bi guyohálaŋo, eke úfunnokunom maŋ fam? Angu, újebireŋo mungu?
6Angu, fo Yensa alóbne nim, yikireŋ m'apiren aŋoyindem. Ankota si.
Fo Yensa adoyane jamaŋo m'ankuncunaane ingi mees jamaŋo m'ankucuneeniŋne
7Angu dam, fo Yensa agune na a díku ufarasiyo, úmár Yensa mees aŋay bukoroshu jamaŋo a hakaanankánin. Angu, afég ni índukoŋo m'anhuyaane gantíbetib kannooh a banoohumo b'ópájulne índenno aññantane annooh na. Na Yensa ayéjeeniŋ:
8-9- Ninkinan! Túyomuŋ baŋ k'idoyahoonuŋ. Ingah! Aji iniman uhuyaa ba bajah, dahu úduk údek unooh ka índenno aññantane annooh! Únekineh índenno k'annooh ki fi uguy a mángákánin. Kanda aji fi údek k'úduk unooh a bunoohunku índenno, ki úduk apútor m'afaŋo, na, ulaameku dígo akengunkuno k'ayéjo, «Údonkum k'ubaalam! Karo upiren údek unooh naŋan k'ujahin ummu bunoohumo!» Agida na, urokuneh fanfaŋ hadéko ba a mángááro k'úduk unooh bim.
10Abocin ayéjeeniŋ:
- Gúmár gíyejoonuŋne, dahu ukasaŋ kunooŋo a jannoho. Úbenhineh índenno ki immereŋ annooh a jannoho, ki fi úduk unooh a konoohumo a mángááro inini. Na ulaameku dígo, aji apútri k'alahunto na, ayéjhuno, «Dókulo, k'úduk unooh nanka a jannoho!» Nim ungu jamaŋo ampirenkineh anfég ni ummu dígo abúuñahenne. 11Fégeŋ baŋ, moŋon moŋon afuuhurinoorane, Díino adak atíirilinkinem, ki moŋon moŋon atíirilinoorane, Díino adak ayoofunkunom ki k'abúuñahaa.
12-13Angu na Yensa abocin ayéj ufarasiyo m'ahuyemne ba guyaahálaŋo:
- Ingah! Aji uŋay buhuyhu jamaŋo ba guyaahálaŋo a díken, karo dibáárigo, karo dibugaanigo, dahu úduk uhuy ñaññankan ingi jamankan ingi ñannoohayken mi nááfulo bareŋ. Agida, aji ukaani nim, immereŋ mees, bísiba anhuyuno k'údek ba a hadígenkinin k'aŋŋoyindo sinkindhen s'úneereeniŋne k'anyaahála. Ingah! Guŋay buhuyo, uhuy jamaŋo mi yikireŋeŋne, jamaŋo m'anlánjurne, jamaŋo m'ankajne, jamaŋo mi arinenkinin afoyne, jamaŋo m'ampímne, k'uyaahálahaŋ ingi immereŋ. 14Aji ukaani nim, ñammuyom dampiren k'aŋŋoyinduto a gubaarhu guyaahálaŋo g'uhuyeeniŋne. Nim fi ufaŋunum n'uyik básuum a hafithen. Faka, aji ukaani nim, da Díino akengunkunehne jamaŋo m'anwúuhne a biniirohánin, acaamhuno.
Nim Yensa adoyane ufarasiyo dam a gubaarhu buhuyhu jamaŋo ba guyaahálaŋo.
Funaareŋo a nintiku m'anfoyne busorhu gújuŋo
15Angu, fo Yensa alóbne nim, ayikyik úduk m'ahuyaane guyaahála dam m'ayéjem:
- Kanda wúuro m'adékehne busorhu gújunku Umuyhintor a maasayahu Díino ayikhineh barake k'asúumom deh!
16Angu na Yensa afúnn funaareŋo unfu k'ayéjem:
- Ingah! Ayikyik údiigeen úduk m'asíiba bukanku gújuŋ gúde. Angu, adék ahuyor jamaŋo jup. 17Angu babáári da gújuŋo, ahuyor ñantédaŋo k'ajellihineeniŋ h'aññantane antéda a gújuŋo. Angu, ñantédaŋo andek antéda bítedahu gújuŋo. Angu, údiigeeno úmár abúuñ údoolhunom k'adék ahuyor jamaŋo ba busorhu gújuŋo. K'angu adék ba imbi moŋon moŋon m'ahuyaane ba gújuŋo. Bapúti ayéj moŋon moŋon, «Ingah! Gub gújuŋo gu ulaamekum alóbohne, kanda bítedaŋo abollabolla!»
18Angu, moŋon moŋon adék atéekinem ni ulaamekinem ayéjne k'ahuyaa k'adéker ba a gújuŋo. Kanda beŋen beŋen bi údoolo adékne ba búteekinkinin a gubaarhu gújuŋo, wúuro úmár añopom. Ummu ayéjem, «Ah! Ku k'ubaalam mara me dipiren k'ídeker. Me ii, igilagila gurah. Angu, ba bim gídekehne k'ífeg ni guraho amíirne.» 19Ummu ayéjem: «Ah! Ku k'ubaalam ii, mara me dipiren k'ídeker. Me deh diyikina gub. Igilagila ahayaŋ haala ba jálááfulo. Inini ba burifhinin gídekehne.» 20Ummu ayéjem, «Ingah! Ku k'ubaalam mara me dipiren k'ídeker. Me deh, may gijahne udikaam. Dipiren k'ídeker.» Angu kaŋan kaŋan ka údoolo adékne, gatéekineeniŋ aññopom.
21Angu, aŋooliner ba imbi ulaamekinem. Baŋoolinti ayéjem: «Háh! Íteekineeniŋteekin nip, kanda beŋen beŋen gídekne, aññopárom.» K'atéekin ulaamekinem ho jamaŋo anlóbáremne. Angu, fo ulaamekinem ayennehinne ho jamaŋo anlóbne, añuumul k'ayéjem: «Hom? Inini déker k'udoorula saariŋo nip k'úduk uhuyutom ñanyikireŋo; m'anlánjurne, m'ankajne, ñampíminno ingi mi arinenkinin afoyne. Immereŋ nip huyoreeniŋ úyejeeniŋ andéker ba guyaahálaŋo. Inini, majaar k'úduk uhuyureeniŋ immereŋ nip!
Angu údoolo adék akaan maŋ nim. 22Baŋoolinti ayéjem, «Ingah! Ikankaan maŋ ni úlobeemne. Ídekdek kanda impiinam bareŋ gídoorne. Angu, jamaŋo hágáráŋáŋ burumunku dígo.» 23K'ayéjem: «Inini, déker faka ba a kanaŋaŋo k'údekin anaalaŋo nip ingi hádigeŋo nip k'udootom bim jamaŋo k'andéker ba gújuŋo. Ingah! Me ísiibáásiib ki díkum arumun tip a gújuŋo.
24Abocin ayéj údoolhunom: «Kanda afeero mara m'unohumne uhuy ba gújuŋo, immereŋ danyaahála a gújuŋo. Daññuma haman hotir!»
Nim Yensa anéerne funaareŋo a gubaarhu jamaŋo m'anhuyaane ba busorhu gújuŋo a maasayahu Díino.
Fo Yensa afak alóbne a nintiku buguyhu utaalibehinem
25Afúrumi na, abáári bísiba, jamaŋo aŋŋay bútifilinku Yensa a binaalo anrumun tip. Bandékiidek, Yensa awonn k'anuurula. Banuurulay, aning jamaŋo n'antifilinkemne, anrumun tip, ayéjeeniŋ:
26Ingah! Ninkinan! M'asíibane butifilinkum, m'asíibane buguyhu utaalibehum, ulakáneh me afaŋ ñamboshon, afaŋ bááhán, afaŋ nunkon, afaŋ úbákán, afaŋ udimankan, afaŋ údonkon, afaŋ moŋon moŋon, afaŋ bigokon faŋo ki nim upiren uguy utaalibehum. Aji, lókiiro hómáráŋ, dupiren k'uguy utaalibehum.#14.26 Yensa ŋayraŋ búyejo m'asíibane buguyhu utaalibehinem añantay ahóobula ñamboshunom ingi m'ambariŋayne nip.
27Yensa abocin ayéjeeniŋ:
- Ingah! Wúuro m'asíibane buguyhu utaalibehum, añantay alóki kunyoho k'ankokayehne ingi hómár. Haani ansíiba bubujhunom, ñantaaraŋ afoy hómár. Añantay aguy iniman wúur m'adoohuna dinlihano d'ankilenne k'adékeh baman k'andékehne bubujhunom. Nim utaalibehum añantane atifilineem, te aji lókiireŋ hómár, wúuro úmár dapiren k'aguy utaalibehum.
28Fi, úsiibáásiib buguyhu utaalibehum? Jantenemuŋ baŋ! Gúsiiba kalódhu etaaso, eke jandiŋ bukirum kalódo, unokuneh k'uning bakodiŋo b'oyikne k'úteb, karo abárháneh kalódhu etaas, karo dabár? 29Aji nim gireŋ, aji úkiri kalódo, détundo, jamaŋo ankilhuno. 30Anyéjhineh, «Ingah ummu! Akírkir kalódo kanda pirendeŋ k'adétun!»
31Yensa abocin ayéjeeniŋ:
- Woseneŋ baŋ! Imbeeŋ umaasa m'ayik ñammi básedeŋ wuuliyeŋ haala, (10,000 - di mil) bareŋ. Angu, aji ayennehini maro umaasa m'ayik ñammi básedeŋ wuuliyeŋ buruhur, (20,000 - van mil) ummo bim n'adékireh, ba biñaamo ingi úmár, neeraŋ gakankánehne? Eke úmár umaasaŋo m'ayikne ñammi básedeŋ wuuliyeŋ haala bareŋ anokuneh k'awosen karo apirenkineh aññaam ingi úduko m'ayikne ñammi básedeŋ wuuliyeŋ buruhur? 32Angu, gafégi mara dapiren, eke ayéjhineh, «Túyor k'íbuuñ ñannaalo. Gúduko ampirenkineh andék anjóonin bájegenenkint ki biñaam dayik.» Eke nim umaasaŋo úmár akankánehne?
33Yensa abocin ayéjeeniŋ:
Iyoo! Nim gañantane aguy imbi wúuro m'asíibane ba buguyhu utaalibehum. Uñantay uwosen gulih hóbun karo upirenkineh ukaan ho buguyhu utaalibehum amiihulne. Fég baŋ, utaalibehum añantay ahunam h'ayikne nip k'atifilineem. Ingah! Aji, lókiiro hómár, uyohála. Fi dupiren k'uguy utaalibehum.
34Ayéjeeniŋ:
- Inini, eke múmmeero ayikyik nafa? Kanda, aji apuñay, yikireŋ nafa. Hóge ayikyik ninkaan k'afak ajóon?#14.34 Mummeerhinin guyroŋ mummeer dakat. Angu, aji alúbunaa, mummeero fankánam gaboyoboy k'angu salteŋo bareŋ afallane. Yikireŋ ninkaan. 35Múmmeero múmár nafahánam adédet. Ingah! Haani ba bujambandhu naakoŋo dajóon. Dupiren k'ukaanum hogurumaareŋ. Fo buhup bareŋ. Angu, moŋon moŋon jantent hóbun h'éfurumne balóbo k'ukaan a jamméejhen.
Okuqokiwe okwamanje:
Luk 14: GD
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Copyright Vision Intégrale, Senegal
