Luk 12
12
Fo Yensa atéekinne ñantaalibehinem mara ñantaaraŋaŋ antifilin hójondoŋo ho ñanfarasiyaŋo ankaanahne
1Angu dam, jamaŋo andékridek anlahun Yensa k'agune k'anjóg na anrumun na tip. M'andékne imbi Yensa dam apútput ñanraagof wuliyeŋ ingi honj (1,000+, des milliers) k'anjegimayeh, anliflifeh ba búteejahu Yensa. Angu dam, ñantaalibehinem ganohumne akawandin, ayéjeeniŋ:
- Angu ninkinan! Janteneŋ baŋ! Káánunteŋ ninkaanorunku ñanfarasiyaŋo! Immereŋ ñoperej. Ingah! Immereŋ gankaanakaan ininkaman gúbuuñahu Díino dáde gaŋŋane, agida marigen gireŋ. Ŋayraŋaŋ gúbuuñahánam. Hafitenkinin arahayrahay. Ingah! Hakaanamo hámár h'ankaanahne amíimiir ingi láwiiro. Úpájuleŋ, láwiiro atitiir te fégiira a fariño, kanda apasháneh maŋ na f'adék ariirun fariño k'aguy jup. Fégeŋ baŋ, immereŋ ñanfarasiyaŋo gansuturasutura hójondoŋo h'ankaanahne k'ankaan iniman gantifetif binaahu Díino aliŋ, agida nim gireŋ. Ingah! Hakaanamo hámár apiren apas imbi jamaŋo jup maŋ ni koláwiiro kotiino k'aworaane a fariño apasháneh na f'adék akaan jup. 2Ingah! Ninkinan, dahu ulihimbineeniŋ, maro ayikhineh bísiba, hoŋon hoŋon ho wúuro akanne, haman amiñdimiñ, adék afúrokuneh. Oo! Da bísibaŋo bímár apútokunehne, hoŋon hoŋon gukanne k'úkubun, adék afékunuh. 3Hoŋon hoŋon guwooñeŋne jaketo k'usuturahaŋ, adék afúrokuneh a jiyaaŋo ki jamaŋo nip anyennehin. Ingi hoŋon hoŋon guhohayinne a bulaahu údinhen k'usutura a gufaco g'akimbenaane, amiñdiimiñ adék afúrokuneh. Akankáneh iniman wúur m'awonnáne a raafununku teraaso k'alób wolaŋ ki jamaŋo nip anyennehin.
Jandiŋ bubenuhumeŋ ñanraagofoŋo, ubenuheŋ Díino
4Yensa afak abocin ayéj ñantaalibehinem:
- Inini, ninkinan ñaññankum m'ilahne halah hanak, janteneŋ baŋ! Ingah! Ayikhineh m'ampirenne ambujo, kanda bumburunku arino bareŋ gampirenkinehne ambuj. Ninkinan, dahu ubeniheeniŋ angu. Ingah! Haani ambuj bumburunku arino, afúrumi na dampireno honj! Angu, gúmár gíyejoonuŋne, dahu ubeniheeniŋ. 5Hantaŋ guñantaheŋne ubeniheŋ kireŋ? Ingah! Umuyhintor bareŋ guñantane ubenuh maro arino ganiiro mees, úmár ayikyik binaal k'aŋano jahanama. Gúmár gíyejoonuŋne, jandiŋ bubenuhumeŋ údinhen uraagofoŋ ubenuheŋ Umuyhintor.
6Yensa abocin ayéjeeniŋ:
- Kanda ingah! Ninkinan, moŋon moŋon unafanafa imbi Díino. Eke ñotonoŋo ñómekilaŋo, hakodi hanak bareŋ gagilankuhne? Ñómár yikireŋeŋ nafa dáde a binentor. Alabalaba, kanda haman maŋ nim, Díino inno na n'aŋay butopotoku jatonoŋo koŋon koŋon. Anafanafa a binaanam. 7Angu, afeero maro ninkinan mingu, Díino ba butopotokánan gadékehne afaŋ jatonoŋo. Ingah! Ummo na butopotokánan f'adék apájul moŋon moŋon ñogend ñoliheeraŋ agune a bigokunom. Díino inno na faŋo butopotokánan. Ingah! Moŋon moŋon nafahánam imbi Díino afaŋfaŋ gusiirhu jatonoŋo! Angu, dahu ukoriyeŋ! Díino atopotokunoonuŋ deh!
8Yensa afak abocin ayéjeeniŋ:
- Túyomuŋ baŋ k'íteekinoonuŋ: Moŋon moŋon afiyumne me, Údiigeeno M'acaabenaane, ki suturaaraŋ hómár, k'ajellihin jamaŋo maro afiyumeemfiyum, inini na me mees ijellihinkineh Díino ingi maleekankánam mara úmár unaam. 9Kanda moŋon moŋon lókiireŋne balóbo imbi jamaŋo mara úmár ufiyunkum, k'akaan iniman guyroŋ ingi me, me mees dinik íloki búyejo imbi Díino ingi maleekaŋaŋo, úmár unaam.
10Ingah! Moŋon moŋon úlobne gúlob gújondoŋ a gubaarhu me Údiigeeno M'acaabenaane, na Díino apiren ayaafuŋo. Kanda moŋon moŋon úlobne hójondoŋ a gubaarhu Jamméejhu Díino Jarenninno, k'amíirinahin dohohunom ingi dohohu Iblisa, na Díino dayaafuŋo baman dagurumaareŋ.
11Yensa afak abocin ayéj ñantaalibehinem:
Ingah! Ninkinan! Anlakunoonuŋ k'ambááhinoonuŋ, ba a jaameŋeŋo ba bukitihinan wola andékukunoonuŋ imbi índenno ingi m'ammarahne bukooro ba bukitihinan. Nim gandékehne ba bukaano. Kanda, haani ankaanoonuŋ nim, dahu ukoriheŋ a gubaarhu h'ódekheŋne ba balóbo. 12Ingah! Moŋon moŋon úputudir a tilibinaalo, Jamméejhu Díino Jarenninno aguyhuneh a binankan k'ajellihino n'uñantane úlob. Angu dahu ukoriheŋ deh a gubaarhu h'ódekheŋne ba balóbo na.
Fo Yensa atengane jamaŋo a gubaarhu guhaamihu buyikhu kunyiko
13Angu dam ayikyik údiigeen úduk m'agune a jégenenku barumuno. Angu údiigeeno úmár ayéj Yensa:
- Arafaŋ! Ísiibáásiib k'úyejirem údonkum mu lókiireŋne k'ikibaymiŋ kunyikhu bááhint, akib kunyiko.
14Angu na Yensa aŋoyindem ayéjem:
- Ingah! Uñankum! Me ñantaari ikiiti kunyikhu bááhán. Hómár badokum gireŋ!
15Angu, Yensa balóbem nim mees akira ayéj índukoŋo m'aŋŋane bujanteno:
- Ingah! Ninkinan! Káánánteŋ gúdomahu kunyiko! Hómár jóndoŋ! Moŋon moŋon ulahoora dahi gúdomahu kunyiko aguy a binankan haman hotir. Moŋon moŋon, hoŋon hoŋon ho Díino anéerenne, ulah hómár. Atiiri, lahar maŋ hómár. Afuuhi, ulah maŋ hómár. Ingah! Duniyahu uraagofoŋo guyuntároŋ a kunyik.
16Yensa balóbi nim mees anéereeniŋ funaare, ayéjeeniŋ:
- Imbeeŋ nuko ayikyik údiigeen ummu kunyik. Angu díino nómár, údiigeeno úmár alááfulááful k'ayik guyaahálaŋo jup. 17Angu baningiining, apájul mara h'afacne damur a bugurhánom. Angu, awoseneh ayéj: «Me, k'ikaan neeraŋ? H'efacne damur a bugurhum!» 18Afak awosen ayéj: «Ípápájul n'iñantane ikaan. Iñantay ifili búguro k'ílod búduk b'afaŋunumne n'away b'úpájulne h'éfacne nip amurhuneh na ingi jooraŋaŋo adúkoŋo.» 19Abocin awosen ayéj: «Aji ikaani nim, bulahum awaanaháneh. Diwosen daŋan daŋan guyaahála ingi baruuh. Fégeŋ baŋ! Me guyaahálaŋo ungo na baman díineŋ jelijeli, ingi kunnoŋo mees unko na jup. Inini ipiren iyohála dohoŋo k'iyaahála f'ehay diŋ, iruuh ki bísiba bísiba ikaan h'asúumeemne bareŋ!» Nim údiigeeno alóbne a jamméejhinem.
20Kanda balóbi nim, badétuni, Díino ayéjem: «Fi! Bigokon baaru gireŋ na! Ingah! Fi uniirohuneh jaketo no gub! Angu inini, h'oninkne nip ba bigokon, hantaŋ guninkurne? Fi mungu, fi gireŋ! Danafaho deh! » Nim Díino ayéjemne.
21Yensa banéereeniŋ funaareŋo mees, ayéjeeniŋ:
- Iyoo! Angu maŋ nim gamíirhinehne imbi wúuro m'úpájulne m'afankantane ba bigokunom bareŋ, ki h'anafane imbi Díino, buruhunom gireŋ na.
Dahu ukoriyeŋ!
22Yensa aŋoolin ayéj ñantaalibehinem:
- Gúmár gíyejoonuŋne, ninkinan mungu, dahu ukoriyeŋ a gubaarhu guyaahálaŋo ingi a gubaarhu h'ógeenahánaŋne. Dahu ukoriyeŋ haajankánan fereŋ! 23Uraagofoŋo añantay atíbila guyaahála ingi bagéen, marigen, kanda ho Díino asíibane k'ukaanaŋ a duniyaŋo inno, hómár afaŋunumne n'ayik nafa fanfaŋ hódukoŋo.
24Ayéjeeniŋ:
- Féguroŋ raahoŋo? Hóge raahoŋo, gadékedek járug? Wówo! Raahoŋo gara arúgoh. Hóge gadékedek jafac? Wówo! Ingah! Raahoŋo yikireŋ búgur. Yikireŋ k'afankantahánehne gufoolahánam. Kanda maŋ nim gadékehne aŋoolinteh, maŋ nim gafoolahne, maro Díino inno bim n'amaraham k'anékem h'afoolahánehne. Agida ninkinan ufaŋeŋ raahoŋo buyikhu nafa imbi Díino! Ingah! Afeeroonuŋ mara anékunoonuŋ h'ohaajaheŋne nip a duniyaŋo. 25Ingi faka, bukoriŋo b'ukoriheŋne nafaaraŋ haman hotir! Ingah! Haani ukori, gukoriŋo g'ukorine, dapiren k'abocindo simayahan haani bísiba ímbenduk. 26Úfegeŋ, ninkinan yikuroŋ sembe ba bugohihu simayahánan haani hotir. Angu ninkinan, horaŋ akanne k'ukoriyeŋ inneŋ?
27Yensa abocin ayéjeeniŋ:
Ningeŋ baŋ fúlááráŋo n'agune a kanaŋaŋo, úfegeŋfeg n'ajónne? Inini, hóge fúlááráŋo andohodoho dáde ki nim ajóon? Wówo! Dohooroŋoŋ k'anyik bajóono bámár. Lufuroŋoŋ bayaah ki k'anjóon. Ingah! Umaasaŋo m’aretuhne Sulemaani, úmár ii, gakaanakaana bayaah bajóoni dáde. Kanda haman bayaaho bámár ajóon n'ajóon, fúlááráŋo afaŋi bayakánam bajóon. 28Agida fúlááro nómáráŋ, aji awali nanka gub, gucum ajakálinkunuh. Gara amiñeh na. Kanda haman maŋ nim, Díino ayabyab fúlááráŋo k'ajóon. Inini, woseneŋ baŋ! Aji nim Díino gatopotorohne fúlááráŋo k'ajóon, angu ninkinan em? Karo Díino datopotoroonuŋ? Ingah! Ninkinan ufaŋeŋ fúlááráŋo buyikhu nafa imbi Díino! Angu, afeerumoonuŋ mara Díino anékunoonuŋ bagéeno b'ohaajaheŋne. Ninkinan, aji fiyindoŋ maro Díino apiren akandoonuŋ haajankánan, na bufiyinkinan Díino adasadasa. Litinaaraŋ!
29-30Ayéjeeniŋ:
Ingah! Ñansooninkeŋo imme bim n'ankoriyeh guyaahálaŋo ingi buruuho daŋan daŋan. Kanda ninkinan mingu, dahu úduk ukoriyeŋ hómáráŋ! Bááhánan m'agune arjanna apápájul horoŋ h'ohaajaheŋne nip, te anékunoonuŋ guyaahálaŋo, anékunoonuŋ k'uruuhoŋ. 31Ninkinan, dahu ukokuroŋ jamméejenkinan a hómár bareŋ! Ingah! H’afaŋunumne n’ayik nafa a duniya, hómár agune, moŋon moŋon útib bukaan h'asúumhunehne imbi Umaasahintor Díino. Nim Díino asíibane. Aji ukaani ho Díino asíibane, Díino anékuno h'ohaajane nip.
32Ingah! Me Ukoñhánan. Ninkinan m'uŋayeŋne butifilinkum, ninkinan saahaŋankum, kanda ninkinan rumundoŋ. Haman maŋ nim dahu udeewuneŋ! Díino, Bááhintor acaabenoonuŋcaaben k'utohoŋ a maasayahánam. Angu a butoho b'utoheŋne a maasayahánam, hómár asúsuum Díino dáde.
33Ingah! Ninkinan! Dahu ufankantahaŋ kunyikhinan. Moŋon moŋon uñantay udooh kunyiko kúmár ujuliya, k'udooh bakodiŋo bámár úneer mi yikireŋeŋne. Buru k'ufankantahaŋ kunyiko a duniyaŋo inno, ufankantahaŋ nááfulo no arjanna akohne. Gúmár ingine, ho Díino ayéjne ayikyik nafa, inini, fi déker kant hómár. Hómár agune nááfihu arjanna. Nim ungu upiren k'uyikeŋ moŋon moŋon kalpe no arjanna n'ópájul údug dapiren k’adúgiyo, timeh dampiren k’anlah. Nááfihu arjanna dakoomahar. 34Fégeŋ baŋ, jamméejhu wúuro gakokokok bi h'afaŋunumne n'ayik nafa a binaanam. Angu, gúmár gíyejoonuŋne moŋon moŋon uñantay útib k'ukaan h'asúumhunehne Díino.
Impareehoŋ innoohoŋ na búputhu Umuyhintor
35-36Yensa aŋoolin ayéj ñantaalibehinem:
- Ninkinan! Moŋon moŋon fo uguy wúur m'apare ba bukanku hoŋon hoŋon ho Díino amiihulne! Ingah! Ku k'uguyoŋ ininkaman ñandóolo m'antúyohne búputhu ulaamekinin m'adékne a bajaho. Immereŋ ii, ampare nip k'anwonn na n'ankaana bayaku ñandóolo k'antúyom. Anjóonin lampaŋo hóbun biki ayím, k'annooh na bútuyhunom k'apútor. Ki nim, waatowaat gakoŋkoŋintne, ukimbiremeŋ. Nim guñantaheŋne útuyoŋ ulaamekinan.
37Ingah! Aji ulaamekinan apútri alahuntoonuŋ n'uŋayamaŋ bútuyhunom, afeeroonuŋ mara ninkinan asúumhunoonuŋ, te ufak uyikhineŋ barake. Ummu ulaamekinan mungu, afeeroonuŋ mara gapútri adék akaanaháneh bayaku údoolo. Gakaanay bayaku údoolo mees ayéjuhunoonuŋ unoohoŋ. Gunooheŋ mees, úmár fankánam afúturokunoonuŋ k'ufoolahaŋ. Maŋ nim ulaamekinan gadékehne ba bukaano. 38Karo apútor báhánd, wola apútor harenaam, aji alahunti ñandóolhunom n'aŋŋayam bútuyo, asúumhuneeniŋ. Anfak anyikhineh na barake.
39Balóbi nim mees anéereeniŋ funaareŋo unfu k'ayéjeeniŋ:
- Ulaameku dígo, aji apápájuler maro údugo adékekineh ba hódugo, dadúuf jaketo nómárer. Úmár agumb anooher k'atúy údugo. Dabennemer k'aŋanar a díkinem. 40Ninkinan mees uñantaheŋ upareheŋ bandór búputhu Údiigeeno M'acaabenaane k'útuyomoŋ bísiba bísiba. Ingah! Pájiiroŋ da Údiigeeno M'acaabenaane apútokunehne te apiren atereŋoonuŋ! Gúmár gíyejoonuŋne upareheŋ bandór unoohoŋ na, ki nim, aji apútri datereŋoonuŋ.
41Angu Yensa balóbi nim mees Piyer ayéjem:
- Arafaŋ! Angu, funaareŋo f'ófunnáne, karo ba mint ñantaalibehen bareŋ gúfunnáne, karo ba jamaŋo nip?
42Yensa aŋoyindem ayéjem:
- Túyoreŋ k'iŋoyindoonuŋ a gubaarhu inho: Ayikyik imbeeŋ nuko údool m'awúuh. Jamméejhinem arumunrumun. Angu ulaamekinem bafégi hómár, afiyumem ayéjem: «Inini, ísiibáásiib ki waathu guyaahálaŋo, fi úneer ñandóolo nip guyaahálahánin.» Balóbi nim mees adék mandéka. 43Amiñiimiñ aŋooliner.
Yensa abocin ayéjeeniŋ:
- Inini túyomuŋ baŋ k'íteekinoonuŋ: Aji alahunti údoolo n'aŋay bukanku maŋ ni ayéjemerne, ajóonunkuneh údoolo úmár.
44Afak abocin ayéjeeniŋ:
- Túyomuŋ baŋ k'íteekinoonuŋ marigeno; Na ulaamero ayéjhineh údoolo úmár apirenkineh atopotor h'ayikne nip. 45Kanda aji ininkaman údoolo ayéjyejer, «Ingah! Ulaamekum adoonadoona. Daŋooliner manini. Amiñekineh bim!» k'akomb buyehenku índinemeŋ ñandóolo, indikaamo ingi índiigeeno, k'aŋay mees guyaahála dáde k'adak aruuhoh f'adék akani. 46Ingah! Afeero mara ulaamekinem, aji apútri atereŋem, ayehenkineh údoolo úmár ingi sembe maŋ ni ñandóolo ñanjóndoŋo anyehenkuhne.
47Yensa abocin ayéjeeniŋ:
Fégeŋ baŋ, údoolo m'apájulne hóbun dohoŋo no ulaamekinem anéeremne, ki pareereŋ, kandaŋ dohoŋo nimbun, aji ulaamekinem apútri, ayehenkinem ingi sembe. 48Kanda údoolo mu pájiireŋne hóbun ho ulaamekinem asíibane, k'akaan h'afeerenne abábár k'ayehenaa, úmár mungu ayehunkunuh, kanda dayehenaa ingi sembe, mara pájiireŋ hóbun n'añantane akaan. Féger baŋ, aji Díino anéeren bado báde, atúyhuneh a binankan nuko hóde. Ki nuko, aji Díino anéeren k'uhat bukanku honj, ufaŋ índukoŋo, na Díino anik afaŋununkuneh n'amiiho jup a nintiku dohoŋo nómár n'uñantane ukaan.
Fo Yensa alóbne, jamaŋo ankankáneh habíd hanak a gubaarhánam
49Balóbi nim mees, Yensa afúnn funaare fúduk ayéj:
- Ingah! H'edoorne a duniyaŋo akankaan iniman kuul. Te ihekaheka ki kuulo kúmár ajakálinaa. 50Ingah! Me, ba a kunyoh gídekehne. Kunyoho kúmár añantañanta ayikeem. Jamaŋo anyehenkunum deh! Angu, k'egune inini, hafithum bebendeŋ te dabeben fo da kunyokum afúrhunehne.
51Ingah! Dahu úyejeŋ karo n’ídekirne a duniyaŋo inno, hadékum hámár adootokunoonuŋ básuum. Hómár dadootoonuŋ básuum. Ingah! Búputhum a duniyaŋo inno adoohokuneh sinficilay imbi jamaŋo. 52Afúrumi waato inno hádigeŋo aficilayhineh a gubaarhu me. A dígo amánduko ñanraagof inak aññopunayhuneh ingi ñanraagof ilall a gubaarhu me. Angu immereŋ na danyennehinay a gubaarhu me. 53Nim gamíirhinehne ki hambaaneŋo danyennehinay ingi báábenenkinin, bágideŋo danyennehinay ingi nuunenenkinin, ki indikaamo danyennehinay ingi asomonkánin. Gúmár gíyejne búputhum adoohokuneh sinficilay a duniyaŋo inno.
Moŋon moŋon dahu uduulumbin bújooninku bájegenenken ingi Díino
54Yensa bayéji nim ñantaalibehinem, akir ayéj barumuno:
- Eke ninkinan, aji díino amuruli bi bísibaŋo añunumohne, úyejhineŋ «Ba kalub gadékehne.» Agida maŋ nim gagune. 55Maŋ nim mees gagune, aji úfuti tápáro k'ukoros mara bawuco gafúruntofurunt bi silakan jigondiŋo aji uningi bi bísibaŋo añunumohne. Na úyejhineh, «Gub aduhunkuneh wat!» Agida maŋ nim gamíirhinehne dam. 56Ingah!, ninkinan uhateŋhat buningo a raafo ki nim úpájáláŋ hómáráŋ. Hómár uhateŋhat. Kanda ayikyik ho ninkinan határoŋne. Eke ninkinan úfegeŋfeg tamaseereŋo n'ekanne ásibaŋo innoŋ? Agida na Díino asíibáásiib bujellihinkinan me ingine hantaŋ. Kanda ingah! Ninkinan wuturoŋ ho Díino asíibane bujellihinkinan. Wuturoŋ ho Díino aŋane bukaano ásibaŋo innoŋ. Huh Ninkinan! Ulaheŋlah kari uyikeŋyik jamméej, agida nim gireŋ! Ninkinan ñoperej way!
57Ingah! Ninkinan, moŋon moŋon uñantay uwosen a gubaarhu ka marigeno agune, ki gúfegi, údekum a marigeno nómár. Dahu útuyoŋ, deh! 58Ingah! Aji iniman uyikayeŋ ingi wúur, ki wúuro úmár aŋay búdekiken a tilibinaalo, majaareŋ k'újoonineŋ jégenenkinan jandiŋ búputumoŋ na. Ingah! Aji kando nim, ambááhákuno ba imbi ulekhu balóbo, k'ayéjo «Fi úyuulenne!» Angu, anlakuno k'ankimbeno a kasoŋo. 59K'íteekinoonuŋ marigeno inno: Uguyhuneh na damanta gucaami nip, ankir ambénno k'úfur. Gúmár akanne íyejoonuŋ, aji gúlobo ayiki, újoonineŋ jandiŋ búdekumeŋ ba a tilibinaalo.
Nim Yensa atengane jamaŋo a gubaarhu kunyoho k'adékekinehne, aji jóonindeŋeŋ jégenenkinin ingi Díino.
Okuqokiwe okwamanje:
Luk 12: GD
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Copyright Vision Intégrale, Senegal
