Luk 11
11
Ho Yensa alóbne a gubaarhu saliŋo
1Angu ayikyik bísiba, Yensa n'aŋay saliŋo. Babollay ayik utaalibehinem úduk m'ayéjem:
- Arafaŋ! Ingah! Yaya M'ayicimehne ajellihinjellihin ñantaalibehinem n'aññantane ansali. Inini, fi mees, jellihint mint n'iñantaminne isalimiŋ.
2Angu ayéjeeniŋ:
- Inini, ninkinan, guŋayeŋ saliŋo, inini guñantaheŋne úloboŋ Díino úyejeŋ:
Fi Bááhint, fi ugune Díino arenninno. Ikiinahomiŋ ki jamaŋo nip anyoofun gurethen baman a raafo, ingi mees k'ambúuñaho n'uñantane úbuuñahaa.
Ikiinahomiŋ k'uguy umaasahu duniyaŋo nip k'angu jamaŋo nip antúyo.
3Ikiinahomiŋ k'úkááñinahin mint gucum gucum jafoolaŋo j'ehaajaminne.
4Maŋ ni iyaafuŋminne jamaŋo m'ankanne mint hójondoŋo, ikiinahomiŋ ki fi uyaafuŋ mint hójondoŋo h'ekaanminne.
Ikiinahomiŋ k'úkááñinahin mint ki, hójondoŋo gaguy a jannokint, ifaŋunahemiŋ.
Nim guñantaheŋne ukiinahaŋ Díino.
5-7Yensa balóbi nim mees ayéjeeniŋ:
- Inini, túyomuŋ baŋ k'ibocindoonuŋ hotir a nintiku saliŋo. Inini, aji ininkaman ayikyik jaket, fi ingi jamanku dígo nip uwaanahaŋ k'uŋayaŋ sínduufo. Búduufeŋduuf, uñankan úduk apútor n'afúrumor biŋantin. Bapúturi, alahuntoonuŋ n'uwaanahaŋ, ninkinan nip. Akoŋkoŋin. Bakoŋkoŋini, ukeng údek ukimbirem. Agida, fi yikiro haani honj h'opiren úneerem k'afoola. Angu, údek ba imbi unohayken. Búputi na, ukoŋkoŋin k'úyej údinhen, «Ísiibáásiib k'ubonker way k'unahaam ñómbuur ñolall bareŋ. Iyikyik údeka. Manini gapúturne, agida me láhári h'édekehne ba búnekinem k'afoola.» Úmár ayéjo, «Ingah! Dahu uyeheneem! Dahu uteereem! Irahunrahun gúmángááro. Mint sínduuf giŋayminne, jarakum ingi me nip.» Angu, ufak uŋoolin ukoŋkoŋin k'úyejem: «Bonkereri! Údekahum yikireŋ haani honj h'afoolahánehne.» K'umaja gukiinahánam f'adék anéero úmbuuro n'ohaajane.
8Yensa abocin ayéjeeniŋ:
- Angu, úfegeŋ?! Haani afoy jankengo ba búneken h'ohaajane, a gubaarhu bañankayhánan bámár, aji usunkurini bukoŋkoŋino, adékidiidek adék akengineh k'anaho úmbuuro, mara afeeremfeer, aji naháro, úmár adak arokuneh imbi jamaŋo.
9Abocin ayéjeeniŋ:
- Gúmár gíyejoonuŋne, moŋon moŋon uŋane gukiinahu Díino a nintiku haajankan, liŋunt h'oŋane gukiinaŋo, ki nim anéero. Ingi mees, hoŋon hoŋon h'oŋane bútibo imbi Díino, liŋunt bútibo ki nim anéero h'ótibehne. Moŋon moŋon ukoŋkoŋinne gúmángááro k'ukiina Díino ki k'akááñinahino, Díino fo akimbiro gúmángááro k'akááñinahino. 10Fégeŋ baŋ, moŋon moŋon uliŋunne gukiinahu Díino, Díino fo anéero. Moŋon moŋon uliŋunne gútibilaŋo imbi Díino, fi fo udaŋun. Moŋon moŋon uliŋunne bukonkoŋinku gúmáángááro imbi Díino, fi fo Díino akimbiiro.
11Yensa abocin alób a gubaarhu gukiinahu Díino, ayéjeeniŋ:
Inini, ninkinan bááháŋo, aji úbákán akiinahen kokat, hóge únekinem kúñala k'akáb. Wówo! Dúneerem hómár! Únekinem maŋ kokato k'akiinahenne!
12Aŋoolin ayéjeeniŋ:
- Wola hóge, aji ayéji unaham buninku bákár, hóge únekinem rankund k'akáb? Wówo! Únekinem maŋ buniino b'akiinahenne! 13Eke ninkinan ingi bajóndihinan nip, kanda gukankankaan hójooninno bareŋ imbi imberenkinan! Angu kireŋ, Bááhánan m’agune arjanna, m'úpájulne ajónjoon dáde, angu ninkinan, dulahaŋ maro ámár anékineh jarakánam hójooninno h'ankiinahemne? Afeero maro anékineeniŋ! Gúmár gíyejoonuŋne, moŋon moŋon ukiinane Díino k'abocinduto Jamméejhinem Jarenninno, afeero fañ mara akucundutokuno Jamméejhinem Jarenninno maŋ jámár j'okiinahemne.
Ka Yensa alóbne a gubaarhu Iblisa
14Angu afúrumi na, ayikyik bísiba bi jamaŋo andék anjóg imbi Yensa anrumun na tip. Agida na ayikyik údiigeen mu fáguh aruur, te fáguho, buruhu údiigeeno galahne k'aguy umumune. Gara alóboh fereŋ. Angu, Yensa adék afúndárom fáguho. Bafúndurem, údiigeeno atoŋ balóbo. Fo údiigeeno atoŋne balóbo angu, jamaŋo nip alaaleeniŋ dáde.
15Kanda na índukoŋo anyéjeh a gubaarhu Yensa:
- Jeh! Ummu! Ikaanumi ulaameku fáguhoŋo, úmár akááñinahinemne k'afúnn fáguho imbi údiigeeno. Ingah! Maŋ Iblisa, m'ayéjuhne Belsebul anéeremne sembeŋo nómár.
16Índukoŋo mingu anyéjeh Yensa:
- Inini, ísiibáámiŋsiib k'ujellihin mint tamaseer adúk, k'ípájulmiŋ karo sembeŋo no úfunnumne fáguho, kari imbi Umuyhintor gafúruntne, kari fúrunturoŋ bim.
Nim gankiinane Yensa, agida na buninkikinem káb gaŋŋane.
17Agida, f'anlóbne nim Yensa, Yensa apájul h'anwosenehne nip. Angu aŋoyindeeniŋ ayéjeeniŋ:
- Inini túyomuŋ baŋ k'íneeroonuŋ funaare fúduk. Ingah! Jamaŋo m'angune a maasayaŋo amánduko, aji yennehinayreŋeŋ k'ankaan habíd hanak, k'aŋŋay biñaamo, maasayaŋo nómár adék akoomhuneh. Maŋ nim ganik agune a bádimo. Aji bádimo yennehinayreŋeŋ, k'akaan habíd hanak, bádimo bámár adékidirdek abicaháneh.
18Angu, maŋ nim ganik agune imbi Iblisa ingi fáguhoŋo f'antohne a maasayahánam. Ingah! Aji Iblisa ingi fáguhoŋo yennehinayreŋeŋ, k'ankaan habíd hanak k'aŋŋay biñaamo, andék ambicayhineh. Nim maasayahu Iblisa dapiren k'awonn. Angu aji úfegeŋ íteekinoonuŋ hómár, maro ninkinan úyejeŋyej gífunnofunn fáguhoŋo a sembehu Iblisa. Ingah! Hómár dapiren k'aguy. Hóge Iblisa adék afúnnhuneh fáguhonkánom imbi uraagofoŋo? Wówo! Iblisa ingi fáguhoŋo gankokayekokay. Bicayreŋeŋ. Gúmár akanne maasayhu Iblisa gawonnowonn baman bísibaŋo bi gub.
19Yensa aŋoolin ayéjeeniŋ:
- Inini, eke ayikyik m'anfúnnohne fáguhoŋo a dayrahánan? Angu, aji me ífunnfunner fáguhoŋo a sembehu Iblisa, maŋ ni ninkinan úyejeŋne, karo úsiibááheŋsiib búyejo mara m'antohne a dayrahánan, immereŋ mees a sembehu Iblisa ganfúnnumohne fáguhoŋo? Ingah! Agida immereŋ faŋo ingi sembehu Díino ganfúnnumohne fáguhoŋo. Gara anfúnnumoh a sembehu Iblisa.
20Yensa afak aŋoolin ayéj jamaŋo immereŋ:
- Ingah! Me mees, gífunni fáguhoŋo imbi wúur, aféeroonuŋ mara a sabaabhu sembehu Díino gífunnumohne fáguhoŋo. Ingah! Aji ífunni fáguho, na bujellihinkinan honj giŋane. Hómár ingine horaŋ? Na bujellihinkinan mara maasayahu Díino inno na a binanan.
21Na Yensa abocin ayéjeeniŋ:
- Ingah! Iblisa akankaan maŋ ni wúur m'ayik sembe k'amarah díkinem. Úpájuli, aji wúur aŋay bumarahu dígo, ayikhineh jooraŋaŋo nip, no biñaamo. Nim ungu, aji wúur apútri k'afég jooraŋanku biñaamo nómár, dabollen k'adúgiyem honj. 22Kanda ingah, aji m'afaŋundem sembe apútri, k'aññaamálinem k'afaŋuna ummu dígo, wúuro úmár adokuneh honjuronkunom nip ho biñaamo ho ummu dígo ajíkiyumne ba bukooñhu bigokunom. Angu, aji wúuro úmár adoohi honjuronku biñaamo ho ummu dígo alaherne, wúuro úmár apiren angu adék adooh nip kunyikhu ummu dígo. Angu, aji adoohi kunyiko, neeraŋ gadékehne bukaano? Eke adék akibhineh jamankánam? Nim gakankánehne.
23Yensa balóbi nim mees atengaheeniŋ ayéji:
- Ingah! Ninkinan faŋo, karo ingi me guguyeŋne, karo guyroŋ ingi me? Ingah! Aji fi guyro ingi me, na fi buñaamálinkum guŋane. Aji mees guyro ingi me a búkááñinahinkum búbááhukum jamaŋo, na fi gufisfisinku jamaŋo guŋane.
24Yensa balóbi nim mees ayéjeeniŋ:
- Túyoreŋ baŋ k'itengahoonuŋ. Aji anfúnni fáguho imbi uraagofoŋo, fáguho fámár adékhineh ba a kantígo k'ayererne ba gútibilahu kanguyo. Gapúti bim, adékinkineh adékinkineh, dayik k'aguyhunehne k'ayéj: «Hey! Túyor k'iŋoolin ba imbi wúuro k'eguyerne!» Nim gayéjhinehne. 25Angu, aŋooliner alahun uraagofoŋo n'aguy angu iniman díg n'anjóonin nip k'ambuf arenn fet. 26Angu, aji afégi hómár, adék ahúyor índinenkinem fáguhoŋo, karo fámáráŋ fámákiláŋ ingi fánakaŋ k'ayéjeeniŋ, «Índek índokoŋ imbi kaari k'immarahamoŋ!» Agida fámáráŋ anfaŋunumne n' anlápur. K'angu andék fámáráŋ nip ba imbi wúuro mu fáguho faliiho aguyerne fam, k'aŋŋan a arinkinem, ammaraham. Ingah! Wúuro úmár afaŋununkuneh n'ayoh afaŋ ni fam f'ayikne fáguh ínfánduk bareŋ.
Nim Yensa alóbne.
27Angu, fo Yensa aŋane kawando ayik udikaam m'aguy a bájegenenku barumuno. Bajanteniijanten kawandhu Yensa, alób wolaŋ ayéj Yensa:
Ingah! Nunkon ayikyik barake n'abosenne!
28Yensa aŋoyindem ayéjem:
- Ingah! Wúuro m'ajantenne Gúloku Díino k'atif maŋ ni gúlobo alóbne, úmár agune m'ayikhinehne barakeŋo.
Fo Yensa asekurne jamaŋo m'ankiinahemne k'akandáreeniŋ tamaseer adúk
29Angu dam, fo jamaŋo andékirehne anjógoh na imbi Yensa f'anrumun tip, Yensa ayéjeeniŋ:
- Ingah! Jamaŋo mi waato inno jóndoŋoŋ mara gara anfiyunkum k'ammihuleh tamaseer, tamaseer, tamaaser. Kanda Díino akandukunoonuŋ tamaseer amánduk bareŋ ki nim úpájuláŋ maro ámár Díino abúuñureemne. Angu, tamaseero nómár amíirhineh ingi tamaseero no Díino akandurne Anabila Yunus fam.
30Eke úpájuleŋpájul maro fam Díino abúuñbuuñ Anabila Yunus ba bukawandinku jamaŋo mi guyroŋoŋne Ñanyahud m'angune a bukooro b'aretuhne Niniwa? Angu, eke faliiho Yunus afoyfoy hadéko, ki adékiidek alóki k'angu adék ba Niniwa? Angu, h'ayikne Anabila Yunus, ingi ni Díino apahunorumemne a bísibaŋo bilallinno a búyeku dakato,#11.30 Ninger Líibáro n'ayéjuhne Yunus, Sapitáro 2. hómár agune tamaseer imbi jamanku Niniwa k'ampájul mara Yunus, Díino abúuñuremne ba bukawandinkinin.#11.30 Ninger Injil no Matiya 12:40
Abocin ayéjeeniŋ:
- Ingah! H'adékehne buyikhu Údiigeeno M'acaabenaane, hómár aguyhuneh tamaseer imbi ninkinan, jamanku waato inno, ki nim úpájuláŋ maro Díino fankánam abúuñureemne. Tamaseero inno bareŋ gídekehne ba bujellihinkinan.
31-32Yensa afak aŋoolin ayéjeeniŋ:
- Túyomuŋ baŋ k'ifak ibocin a gubaarhu mi guyroŋoŋ Ñanyahud m'angune Niniwa. Angu Anabila Yunus adékdek ba a bukokánin ba butengahánin a gubaarhu hójondoŋo h'ankaanahne. Angu, immereŋ ii, Yunus bakawandineeniŋ, ankúbul jamméejenkinin imbi Díino k'ambénn hójondoŋo h'ankaanahne. Nim gankanne f'anyennehinne kawandhu Yunus bareŋ ni yennehindeŋeŋ kawandhu me me, ingi ni fégireŋeŋ tamaseereŋo n'ekanne. Angu, túyomuŋ baŋ k'íteekinoonuŋ, bísibahu alikiyaama, immereŋ jamanku Niniwa, ankenghineh k'anyéjoonuŋ maro ninkinan m'uyennehineŋne kawandhum, úyuuleneŋyuulen, mara ninkinan lókiiroŋ búkubihu jamméejenkinan imbi Díino. Nim jamanku Niniwa gandékehne ba gúseediyaŋo. Agida ayikyik m'afaŋ Yunus maŋ nanka, kanda haman maŋ nim, ninkinan kúbiiroŋ jamméejenkinan imbi Díino. Jahárindumuŋ.
Abocin ayéjeeniŋ:
- Ingah! Fam a jamaanihu umaasaŋo Suleymani, ayikyik umaasa udikaam m'amarah didiira d'aretuhne Seeba.#11.31,32 Agida, aji immereŋ anningi bi bísibaŋo afúruntohne didiiraŋo dímár agune a jiyaaho. Apirenpiren aguy mara udikaamo úmár Eciyopi gafúruntne a didiirahu Afárik. Angu, eke f'ayennehinne mara umaasaŋo Suleymani ayikyik jamméej fanfaŋ k'akawandah gu Díino Amánduko, udikaamo úmár, asíibáásiib bujanten gu Díino? Angu afúrumor a didiirahánam dímár d'aŋantinne ba bujantenku gu Díino imbi umaasaŋo Sulemaani. Angu bajanteni mees, adóm h'ayennehinne k'aŋoolin ba a didiiraŋo d'afúruntne. Angu, adékiidek aniiro.
Inini túyomuŋ baŋ k'íteekinoonuŋ honj a gubaarhu udikaamo úmár: Ingah! Alikiyaama, udikaamo úmár, úmár mees ba jankeng gadékehne k'atéekin ninkinan m'ujanteneŋne kawandhum ki kandoŋ ho kawando ayéjne, maro na úyuuleneŋyuulen. Nim gadékehne gúseediyaŋo ayéj. Agida ayikyik wúur m'afaŋ umaasaŋo Sulemaani, maŋ nanka, kanda ninkinan lókiiroŋ hómár.
Ka Yensa afúnnáne funaare a nintiku jiyaaŋo ingi bumurulo
33Yensa abocin anéereeniŋ funaare, ayéj:
- Hóge wúuro ajakálinkineh lampo k'anink kantíg k'ópájul ka dayaaŋárin gufaco? Wówo! Wúur dakaan nim. Wola, hóge wúuro ajakálinkineh lampo k’adooh gubeñuwar k'ahuuburin? Wówo! Aji ujakálini lampo, uninkhineh k'ópájulne moŋon moŋon aŋantne afég jiyankánam.
34Yensa afak ayéjeeniŋ:
- Ingah! Maŋ nim gamíirne a nintiku ígihu uraagofoŋo. Fégeŋ baŋ, ígilo amímiir ininkaman lampo imbi uraagofoŋo k'apiren afég. Ingah! Aji ígihen ayaaŋi, fi úfekineh arenn fet. Maŋ nim ganik agune a nintiku jamméejhu wúuro. Ingah! Aji ígihen alóki honjoronku Díino, ígilo ímár ayaaŋárindukuno baman a jamméejo nip, maŋ ni lampo apirenne ayaaŋárin gufaco nip. Kanda ingah! Aji fi lókiiro kawandhum ki dómáro h'élobne, na ígihu jamméejhen amurulmurul. Ingah! Aji, guyennehini kawando, dukaan h'élobne, dufiyumem, afeero mara fi ba buguyo a bumurul. Jiyaaŋo j'agune na dapiren k'ayaaŋárin duniyahan.
35Yensa abocin ayéjeeniŋ:
- Gúmár gitengahoonuŋne moŋon moŋon fo úkáánum. Dahu úduk úlimor a gubaarhu h'agune jiyaaŋo j'afúruntne imbi Díino. Dahu úduk ucucun jiyaaŋo jímár k'ufant unooh a bumurulo.#11.35 Na Yensa atengatenga jamaŋo mara ampiren anlimor nintiku ka marigeno agune. Angu, h'oyennehinne a nintiku Díino, uñantay úyeera hóbun, umiihoora: «Hóge hómár agune marigeno?» Fégeŋ baŋ, aji uyennehini m'alóboh gu Díino, te hómár marigen gireŋ, k'údom ho wúuro alóbne, na uguyhuneh a bumurulo. Upiren uniim. Moŋon moŋon fo úkáánum k'ulah marigeno a nintiku Díino k'ucucun ho guyroŋne marigen. Fo intirilinoorahoŋ k'inkiinahoŋ Díino k'ajellihin mintor marigeno.
36Ingah! Aji fi úlokihi ki jiyanku Díino arumunne tip a binankan, ki lókiiro honj h'amurul a binankan haman hotir, duniyahan nip ayaaŋháneh waw! Fi uguyhuneh iniman lamp n'ayaaŋ waw k'ayaaŋárin gufaco nip.
Ka Yensa anéerne ñanlaameku Ñanyahudo kayúuleno
37Angu dam, fo Yensa adétunne kawandhánam, ayik ufarasi úduk m'ayéj asíibáásiib bukucunkunom a díkinem. Angu, Yensa ingi ñantaalibehinem andék ba a díkinem k'akucuneeniŋ. Kanda f'ampútne na, Yensa, jandiŋ banoohumne a taabálo ba guyaahálaŋo, yicireŋ halakánam iniman ni coosanku Ñanyahudo amiihulne.#11.37 Luwahu Musa ayéjyej maro Ñanyahudo banyaahálam, aññantañanta anyic halakánin. Kanda immereŋ ñanfarasiyaŋo ambocinbocin jup a buyico búmár. 38Angu ufarasiyo, ummu dígo, alaalam dáde ni Yensa afant anoone na ni yicireŋ halakánam maŋ ni ñanfarasiyaŋo anyéjne wúur añantay ayic halakánam. 39Agida Umuyhintor apájul ho údiigeeno awosenehne k'angu ayéj:
- Ingah! Ninkinan ñanfarasiyaŋo, úmiireŋmiir ingi habool h'ópájul anyicyic mángáku guboolo f'arenn fet, k'ambénn gumunkonaamo n'anoori fanfaŋ. Ingah! Ninkinan! Guyicahaŋyica fo arinenkinan arenn fet, agida hafitenkinan arahayrahay boj! Buhaamihu nááfulo ingi balápuro alabalaba a hafitenkinan. 40Hey! Ninkinan, yehundoŋ! Woseneŋ baŋ! Eke Díino ayabyab bumburunku arino? Kanda mukuroŋ na. Afak ayab jamméejhu wúuro ingi hafithinem. Angu, gúmár akanne íyejoonuŋ, dahu uyiciheŋ mángáku guboolo bareŋ k'umukoŋ na! Díino asíibáásiib k'urenneŋ baman a hafitenkinan.
41Yensa abocin ayéjeeniŋ:
- Inini ninkinan, jandiŋ buduuhaamaŋ buyichu halakánan, bénteŋ hódugo ingi balápuro b'okankaŋne! Ingah! H'oyikeŋne, néteŋ ñanyikireŋo. Nim akohne. Aji ukaaneŋ nim, urennihineŋ baman a gumunkonaamo.
42Ingah! Ninkinan ñanfarasiyaŋo! Káánunteŋ! Úfekineŋ baléer. Ingah! Marigenkinan, uñantaheŋ úfunnoŋ gukibhu Díino, kanda ingah! Ninkinan uduhaheŋduha gúfunduku Díino gukibhinem#11.42 Imbi Ñanyahudo jako agune gukibhu Díino. Angu, aji iniman anfaci maanoŋo k'anyik booreŋ haala, anfúnnhuneh amánduk anéer Díino. Angu, booreŋo nómár ampiren annéer m'andígorne, wola annéer ñandóolhu Díino. ininkaman gúfundukunom hokepineŋo h'orugeŋne, karo naanaŋo, karo baseto. Agida h'afaŋunumne n'ayik nafa imbi Díino, hómár gukur úbenneŋne, ininkaman bupokunku Díino baman a hafithen, ingi buguyhu uraagof m'awúuh. Hómáráŋ afaŋumune n'ayik nafa imbi Díino. Kanda háh! Hómáráŋ gúbenneŋne k'ufaŋunumaŋ n'ulahaŋ honjoŋo hotiirineŋo. Agida uñantaheŋñantayer ukaanaŋ h'awúuhne, upokunoŋ Díino ingi faka mees úfunduroŋ Díino gukibhinem. Inhoŋ nip guñantaheŋne ulentálahaŋ k'ukaanaŋ, te ni bénnuroŋ luwaŋaŋo adúkoŋo.
43Yensa abocin atenga ñanfarasiyaŋo ayéjeeniŋ:
- Ingah! Ninkinan ñanfarasiyaŋo! Káánunteŋ! Úfekineŋ baléer. Ingah! Ninkinan, gúputeŋ a jaameŋo gútibeheŋtib kunooŋo a banoohumo ba índenno annoohumohne. Hómár gupokuneŋne. Ki guŋayeŋ hadéko a marseŋo, gúsiibááhaŋsiib ki jamaŋo anramuhoonuŋ guramun gúde maŋ ni anramahne jamaŋo índenno. 44Ninkinan ñanfarasiyaŋo káánunteŋ! Úfekineŋ baléer! Ninkinan úmiireŋmiir iniman búyind b'ópájul wúur kandaŋ na kayitaam mara nanka búyind. Angu, moŋon moŋon ajegunne búyindo búmár anik ajegunjegun mees honoorihinno h'agune na.#11.44 Uyahud, aji amapuni búyindo, wúuro úmár buruhu lókum amánduk darenn imbi Díino. Ninkinan, maŋ nim gúmiireŋne maro gupasunkaŋpasun hójondoŋo h'agune a hafitenkánan imbi jamaŋo mi pájiireŋeŋne honj a gubaarhu Díino. Hafitenkinan arayhayrahay boj, agida jamaŋo fégireŋeŋ hómár.
45Angu, fo Yensa aŋane balóbo, angu ayik údiigeen úduk ukeekihu Hañaañeno. Aták Yensa a balóbo ayéjem:
- Kanda, Arafaŋ! Ingah! Fi na ŋayro busutunku ñanfarasiyaŋo bareŋ!
Ayéjem:
- Usutunsutun mint mees ñankeekihu Hañaañeno!
46Arafaŋo aŋoyindem ayéjem:
- Oo! Maŋ nim gagune. Ninkinan ñankeekihu Hañaañeno mees, káánunteŋ! Úfekineŋ baléer! Ingah! Ganlunkolunk luwaŋaŋ alabayeŋ#11.46 Fégeŋ baŋ, Díino awonnundwonnund mintor luwaŋankánam, kanda ñankeekihu Hañaañeno ingi ñanfarasiyaŋo ambocinbocin na luwaŋaŋ adúkoŋ juphunom, te luwaŋaŋo amáráŋ súumuroŋ búbuuna. n'amenuh k'udoohálinkeŋ jamaŋo a kabandankinin. Agida, ninkinan faŋo kááñinahindoŋ jamaŋo immereŋ haman hotir a búbuuñahu luwaŋaŋo nómáráŋ. Badooŋo b'andoohunane a gubaarhu luwaŋaŋo nómáráŋ, ninkinan taahiirideeniŋ haman hotir.
47Inini ninkinan! Káánunteŋ! Úfekineŋ baléer! Ingah! Úñantaheŋ úpájuláŋ mara maamaamankánan, immereŋ ambujne fam anabiyoŋoŋo. Inini ninkinan immeŋe kafurhu bayindenku anabiyoŋoŋo. Angu na ukaaneŋkaan iniman ninkinan mingu gúbuuñahánin guŋayeŋne, ki tohuroŋ a júnubo nómár no maamaamankánan andoohunane f'ambujne anabiyoŋoŋo. Kanda ingah! Ninkinan mees búuñaaroŋ kawandhu anabiyoŋoŋo nómáráŋ. Inini ninkinan, a gubaarhu kafurhu bayindenkinin b'oŋayeŋne, 48na ujellihineŋjellihin jamaŋo maro ninkinan úlokiyeŋloki ki maamaamankánan ambújeeniŋ. Horaŋ akanne k'íyeji nim? Maro ninkinan ŋayroŋ bukanku ho immereŋ anabiyoŋoŋo ankaraŋne. Maŋ bufoyhu gúloku Díino guŋayeŋne, maŋ ni immereŋ maamaamankánan anfoyerne fam. Angu na uparaheŋpara ho immereŋ ankaanerne.
49Yensa abocin ayéjeeniŋ:
Agida, Díino, bafégi hójondoŋo h'okankaŋne ayéj: «Me Díino íbuuñurokuneeniŋ anabiyoŋoŋo ingi ñambúuñuraaŋo ki nim itengaheeniŋ. Agida n'ípájul mara anabiyoŋoŋo ingi ñambúuñuraaŋo índukoŋo ambujuhunuh, ki índukoŋo mingu anyehenkunuh. Kanda haman maŋ nim me íbuuñurokuneeniŋ k'antengaheeniŋ.»
Nim Díino n'apájulne honjoŋo nip alóbne, k'añaañaa a Hañaañeno.
50Ayéjeeniŋ:
- Gúmár gíyejoonuŋne, jamanku waato inno mees ankiitihineh ingi Díino a gubaarhu anabiyoŋoŋo nip n'ambújaane biriman kánkirunku duniyaŋo. Ingah! Jamanku waato inno mees amparapara júnubo nómár no mamaamankánin amparane f'ambujne anabiyoŋoŋo. 51Ingah! Immereŋ annohumnohum ambuj Tala Abel, angu ankitihineh ingi Díino a gubaarhu hómár. Ankitihineh ingi Díino mees a gubaarhu anabiyoŋoŋo adúkoŋo nip n'ambujaane. Adékhineh baman ubiyaamo m'aretuhne Sakariya m'abujaane a bájegenenku jaameŋo adénno ingi kánginku leeyaŋo. Ingah! Afeeroonuŋ mara kunyoku júnubo nómár anenunkunoonuŋ, ninkinan m'ugidaheŋne a waato inno.#11.51 Fégeŋ baŋ, bucucunku Yensa mu Díino abúuñurne, hómár júnub amánduko ingi ho maamaamankánin ankanne f'ancucunne kawandhu anabiyoŋoŋo ingi índukoŋo mi Díino abúuñurne ba butengahánin. Faka andékidirdek, ambujhuneh Yensa. Gúmár akanne Yensa ayéjne maro kunyoku júnubo nómár anenunkuneeniŋ. 52Hey, ninkinan, ñankeekihu Hañaañeno, káánunteŋ! Úfekineŋ baléer!
Yensa abocin ayéjeeniŋ:
- Ingah! Ninkinan gulakaŋne caabeŋo no búpájihu gu Díino. Kanda ninkinan ukimbeneŋkimben gúmángááro gúmár k'ulahaŋ caabihinem. Ninkinan faŋo duŋanaŋ a burukumbaano búmár, te faka, a gubaarhu h'okaaneŋne, wúur m'asíiba guŋano na gara apireneh. Angu, a gubaarhu h'okankaŋne, jamaŋo pirendeŋeŋ k'ampájul gu Díino hóbun.
53Iyoo! Nim Yensa atengane ñankeekihu Hañaañeno ingi ñanfarasiyaŋo dam. Babollay mees akir afúr na a díku ufarasiyo adék. Angu afúrumi dam, ñankeekihu Hañaañeno ingi ñanfarasiyaŋo aññumulñumul fanfaŋ ingi Yensa. Angu, gúduk ankontkontinem a gubaarhu holabahi, 54k'antibeh k'anenunkunemne ki nim ampiren andékirem a binaal. Hómár gantíbehne. Anrifrif neŋen neŋen ba bunenenkinem, kanda haani. Pirendom.
Okuqokiwe okwamanje:
Luk 11: GD
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Copyright Vision Intégrale, Senegal
