Luk 10
10
Fo Yensa abúuñne ñantaalibeŋo jamaŋilallo ingi haalaŋo ingi inako
1Afúrumi na, Umuyhintor Yensa atot ñantaalibeŋ índukoŋ imbi m'aŋŋane butifilinkinem. Ñantaalibeŋ jamaŋilall ingi haala ingi inak (72 - soixante douze) gatotne.#10.1 A kayereŋo kanduko aññaaññaañ immereŋ jamaŋilall ingi haala. Bafúnneeniŋ mees ayéjeeniŋ:
- Angu inini, me ba bukawandinku jamaŋo a saariyeŋo gídekehne. Inini, ísiibáásiib ki ninkinan unohumoŋ k'údekeŋ inak inak ba a saari saari jandiŋ kireŋ me bíputumor.
Angu, ababahineeniŋbabahin inak inak k'abúuñeeniŋ. 2Kanda jandiŋ ñantaalibeŋo bankengumne, anéereeniŋ funaare a nintiku hadéko ba búteekinku jamaŋo gúloku Díino ayéjeeniŋ:
- Ingah! M'andékehne ba búteekinku jamaŋo gúloku Díino ammírmiir iniman jamaŋo m'andékehne ba jafaco. Kanda ingah! Katamaŋo awayway deh. Maanoŋo inno na jup. Úpájuleŋ, jamaŋo m'anhaajane buyennehinku gúloku Díino anrumunrumun tip, kanda ñandóolo mingu, immereŋ rumundoŋoŋ.
Ayéjeeniŋ:
- Inini, kiinaareŋ Umuyhintor ulaameku jafaco ki k'afak abocin ñandóol índukoŋ k'anfaŋunum n'anrumun ba jafaco. Nim ungu jamaŋo jup anyennehinkineh gúloku Díino.
Yensa balóbi nim mees ayéjeeniŋ:
3- Inini, dékereŋ! Me mo bim n'íbuuñohoonuŋ iniman ñomemilen a bájegenenku mudumoŋ. 4Ninkinan nip nahamuŋ baŋ, k'íteekinoonuŋ. Inini, fo údekeŋ maŋ ni uwonneŋne inini. Buku udoohoŋ bakodi. Buku udoohoŋ boore. Buku udoohoŋ sapataŋ adúk. Te gúdekeŋ, dahu uduuhahaŋ buwooño ingi jamaŋo a binaalo. Wúuhoreŋ ba a saariyeŋo.
5Ayéjeeniŋ:
- Inini, moŋon moŋon a dígo n'aññantane ankucuno, gúputi unohum uduwar jamanku dígo, úyejeeniŋ, «Díin akaan básuum ayik a dígo!» 6Angu aji uduwareeniŋ nim, aji ininkaman a dígo nómár ayiki m'atíbeh básunku Díino, duwaŋo nómár ajaabihineh a binaanam. Kanda, aji yikireŋ m'atíbeh básuumo bámár, duwaŋo nómár aŋoolinekineh ba imbi maŋ fi fi m'uduwareeniŋne.
7Abocin ayéjeeniŋ:
- Inini, aji údekeŋ, moŋon moŋon k'okucunaane unooh maŋ na baman da jankengihen a saariŋo nómár apúthunehne. Ingi faka, aji annéeren guyahaahála, udooh k'uyaahála. Aji anéeren baaru, ujah k'uruuh. Ingah! Hómár agune bacankan, te fi údoolo úbábár k'ucaamaa.
8Afak abocin ayéjeeniŋ:
- Angu, a saari saari n'ódekihineŋne k'ankucunoonuŋ, hoŋon hoŋon gannéeroonuŋne, ufoolahaŋ.
Ayéjeeniŋ:
9- Inini, aji údekeŋ ulahunaŋ ñanjébireŋo, újebineeniŋ. Téekinteŋ jamaŋo mara Umaasaŋo mu Díino Acaabenne ba bupahunkánan, búputhunom adasáridasa! May ki Maasayahu Díino apútor a binanin. Téekinteeniŋ hómár. 10Inini, aji údekeŋ ki ñammi saariŋo anfoy bukucunkánan, údekeŋ ba a bantabaŋo. Gúputeŋ utengahaŋ jamaŋo úyejeeniŋ: 11«Ninkinan! Ingah! Ídekrimiŋdek a saarihinan ba búteekinkinan Kúmbuuñaamo Kúnsuuminno, ufoyoŋ bukucunkint. Inini, didiirahánan d'akotne a sapatankint, ba bufaah arenn fet. Nim úpájuláŋ mara ídekrimiŋdek ba búteekinkinan Kúmbuuñaamo Kúnsuuminno, kanda ufoyeŋfoy kúmbuuñaamo kúmár. Angu na úyuuleneŋyuulen. Angu aji úfegeŋ ifaahmiŋ sapatankint, nim úpájáláŋ mara kayúuleno kámár, ninkinan umuyeŋne. Mint mingu paraarimiŋ a kayúuleno kámár. Kanda ninkinan, ingah, ku k'úpájuláŋ mara Umaasaŋo mu Díino Acaabenne ba bupahunkánan, búputhunom adasáridasa! May ki maasayahu Díino apútor a binanan deh.» Nim guñantaheŋne úyejeeniŋ.
12Afak aŋoolin ayéjeeniŋ:
- Ingah! K'afeeroonuŋ, alikiyaama, immereŋ m'anfoyne bujantenku gúloku Díino, Díino ayehenkineeniŋ afaŋ n'ayehenerne ñanlápurinno m'angune a saariŋo n'ayéjuhne Sodom.#10.12 A jamaanihu Ibrahiima, Díino akoomunkoomun jamanku saariŋo nómár maro júnubonkinin afufuuh dáde. Ninger Jenes 19.
13Ayéj:
- Ingah! Jamanku Korasin ingi jamanku Betsayida, ankáánum deh! Anfékineh baléer deh, mara maŋ ni ikanne tamaseereŋo k'anfég ámáráŋ nip, immereŋ kúbiireŋeŋ jamméejenkinin imbi Díino. Bénnireŋeŋ bukanku hójondoŋo h'ankaanahne.
Abocin ayéj:
- Ingah! Aji m'angune a saarihu Tir ingi a saariŋo n'ayéjuhne Sidon anféfeger tamaseereŋo n'ekanne a saarihu Korasin ingi a saarihu Betsayida, immereŋ angumb ankúbuler jamméejenkinin imbi Díino maŋ fam. Kanda immereŋ fégireŋeŋ tamaseereŋo nómáráŋ. Ingah! Aji immereŋ angune jamaŋku Korasin ingi jamanku Betsayida, immereŋ angumb andék antíbilayer booreŋeŋ ki moŋon moŋon adooh k'akaanum gusol k'akaana. Ingi mees, moŋon moŋon agumb afak aparayer didoor a bigokunom. Te hómáráŋ nip ba bujellihinku Díino maro antiftif mahar a gubaarhu hójondoŋo h'ankanne. Kanda ingah! Immereŋ guyroŋoŋ Ñanyahud, angu pájiireŋeŋ Hañaañeno.
14Yensa abocin ayéjeeniŋ:
- Ingah! Jamanku Korasin ingi jamanku Betsayida ancucuncucun Umaasaŋo mu Díino Acaabenne. Gúmár gíyejoonuŋne, alikiyaama immereŋ anfékineh baléer b'afaŋ ba jamanku Tir ingi Sidon anfékinehne.
15Ingi mees, jamanku Kapáneyum, immereŋ mees ancucuneemcucun. Inini, karo immereŋ anlahlah maro Díino ayoofunkuneeniŋ baman arjanna? Wówo! Anworhunuh a kuulo!
Nim Yensa alóbne ñantaalibehinem a gubaarhu jamaŋo m'ancucunemne.
16Balóbeeniŋ nim mees, Yensa abocin ayéjeeniŋ:
- Inini ninkinan! Aji wúur ayennehindoonuŋ kawandhánan, afeero maro me mees gayennehindne. Wola, aji ininkaman wúuro acucunoonuŋ, me mees ganik acucunne. Agida na, wúuro m'abúuñureemne mees anink acucunaacucun.
Nim Yensa adoyane ñantaalibeŋo jamaŋilallo ingi haalaŋo ingi inako jandiŋ bandekumne ba bukawandinku jamaŋo. Angu Yensa badétuni gudoyahánin, ñantaalibeŋo andék ba bukawandinku jamaŋo k'ankaan maŋ ni Yensa atéekineeniŋne.
Fo ñantaalibeŋo jamaŋilallo ingi haalaŋo ingi inako aŋŋoolintinne ingi hafit h'agilleni
17Angu, andékdek f'aŋŋooliner. Ingi hafit h'agillen yititit gannoolintumne. Anyéj Yensa:
- Arafaŋ! Ingah! Mandékahint asúsuum fanfaŋ deh! Ingah! Gíyejmiŋ fáguh añantay afúr wúur a gurethu fi, fáguho fámár afúror maŋ fam, wúuro ahar ajéb! Arafaŋ, hómár asúsuum dáde!
18Angu, hómár asúumeeniŋne. Yensa aŋoyindeeniŋ ayéjeeniŋ:
- Oo! Fo Díino atibarne Iblisa arjanna, ífeg n'anentne waas káriman a raafo, ininkaman gufalal g'anener. Nim ganenoruntne.
19Abocin ayéjeeniŋ:
- Kanda ninkinan, janteneŋ baŋ! Ingah! Marigen, íneeroonuŋneer sembe k'úduk ufaŋunahaŋ fáguhoŋo ingi urumukintor Iblisa. Maŋ ni wúuro apirenkinehne k'ajégum busumoolo ingi rankundo f'adék afiliyeeniŋ, maŋ nim gíneeroonuŋne sembeŋo k'údek újegumeŋ fáguhoŋo ingi urumukintor fo úduk ufiliyeeniŋ ingi sembehinin nip. Ingah! Hómáráŋ nip dampiren honj a binanan. 20Kanda ingah! Biki asúumoonuŋ a gubaarhu n'ufaŋunaheŋne fáguhoŋo k'upireneŋ úfunneeniŋ imbi jamaŋo. H'añañtane asúumoonuŋ kireŋ, hómár ingine ni haretánan añaañaane arjanna.
Ni Díino akimbirimehne jamméejhu jamaŋo
21Angu a waato maŋ nómár, Jamméejhu Díino Jarenninno akanne ki hafithu Yensa agillen yem. Angu Yensa asali ayéj Díino:
- Bááhum, fi Umuyhu raafo ingi réeŋo, me mo bim n'iramunko dáde. Fég baŋ, úkubunkubun honjoronkon imbi mi jamméejenkinin asúumne ingi m'anlóndane. Fi, jandiŋ bujellihinum honjoronkon m'anlóndane ingi mi jamméejenkinin asúumne, fi úduk ujellihin m'antíirilinorane ingi mi karaŋáraŋaŋne. Agida nim gúsiibane bukaano mara fi Bááhum úsuumasuuma, te bukaano nim asúumenne.
Nim Yensa ayéjne Díino a salihinem.
22Akira ayéj ñantaalibehinem ingi jamaŋo índukoŋo m'ansorne:
- Ingah! Bááhum anéereemneer k'ípájul honjoroŋo nip ingi k'ifak iyik sembehinem. Me, Úbáku Díino, yikireŋ m'apájulám arenn fet ininkaman ni Bááhum Díino apájuleemne. Bááhum mees, yikireŋ m'apájulám arenn fet ininkaman ni me Úbárám ípájulemne. Kanda ingah! Úbáku Díino, aji asíibay bujellihinku wúuro ni Báábám Díino amíirne, fo adék ajellihinem. Agida nim gakaanahne.
23Angu, Yensa balóbi nim mees, anuurula imbi ñantaalibehinem ayéjeeniŋ immereŋ bareŋ:
- Ninkinan ñantaalibehum! Honjoronku Díino h'ófegeŋne, ho índukoŋo pirendeŋeŋne k'anfég, hómár a barakehu Díino b'oyikeŋne akanne ki ninkinan úfegeŋ. 24Ingah! Famo annabiyoŋoŋo alabayeŋ ingi ñammaasaŋo mees ansíibáásiib búfeku honjoronku Díino ho ninkinan úfegeŋne, kanda pirendeŋeŋ k'anfég maŋ ni ninkinan úfegeŋne. Ansíiba mees bujanten ho Díino, kanda pirendeŋeŋ k'anjanten maŋ ni ninkinan ujanteneŋne. Gúmár gíyejoonuŋne ninkinan uyikeŋyik barakehu Díino.
Ni wúuro añantane atopotor údinhinem uraagofo
25Angu afúrumi na, bísiba, ayikyik a barumuno ukeekihu Hañaañeno. Angu ukeekihu Hañaañeno úmár, asíibáásiib burifhu Yensa a nintiku lóndhunom, k'angu akeng amiihem ayéjem:
- Arafaŋ! Neeraŋ gikankánehne k'ipiren iyik kanjébo ka bandór, arjanna?
26Yensa aŋoyindem ayéjem:
- Inini, horaŋ gaññaañne a Hañaañeno? Angu fi, eke ukaraŋkaraŋ Hañaañeno hámár? Inini angu, horaŋ gunuk uwutne na?
27Angu ukeekihu Hañaañeno ayéjem:
- Aññaaññaañ na mara Uraagofoŋo, uñantay upokun Umuyhon Díino ingi jamméejhen nip baman a hafithen, k'ukandáram ingi sembehen nip hogurumaareŋ ho ámár Díino asíibane. Faka uñantay upokun údinhen uraagof maŋ ni upokunne bigokon. Nim gaññaañne na.
28Balóbi nim Yensa aŋoyindem ayéjem:
- Iyoo! Maŋ ni úlobne, maŋ nim! Aji ukaani nim, uyikhineh kanjébo ka bandór.
29Angu Yensa balóbi nim mees, ukeekihu Hañaañeno asíiba bujellihinku Yensa nafahu h'amiihemne. Angu, abocin ayéjem:
- Inini, úyeji iñantay ipokun údinhum uraagof maŋ ni ipokunne bigokum, angu na údinhum uraagofo m'iñantane ipokun, úmár agune hantaŋ?#10.29 Akankaan iniman údiigeeno dómároŋ mara añantay apokun jamaŋo nip. Gúmár akanne amiihi nim Yensa .
30Balóbi nim Yensa anéerem funaareŋo unfu, ayéjem:
- Ingah! Ayikyik bísiba, Uyahud úduk m'afúrumor Jerusalem adékeh ba Jeriko.#10.30 Bájeginenku Jerusalem ingi Jeriko abábáár anaman kilometreŋ buruhur ingi amákilaŋ ingi anakaŋ. Agida binaalo bímár abenkinbenkin mara ñanrifaŋo na gankúbahne k'andúgiyeh m'anwusunahne. Baŋay hadéko, anrah ingi ñanrifa. Angu, anlaham, k'ammalam jimal jíde f'andújom dáde. Angu, anwat h'alaherne nip baman bayakánam na. Bambollay ambénnem na k'andék. Agida, hotir afallane k'aniiro.
31Abocin ayéjeeniŋ:
- Angu, fo immereŋ anwusunane, ayik alimaam n'aŋay guwusuna a binaalo bímár. Bapútri, alahun údiigeeno m'andújne n'awaanane na. Angu alimaamo bafégem, akila údiigeeno k'awusuna a binaahánam k'angu abénnem na.
32Angu úmár badoonay, ayik údoolhu Jaameŋo Adénno m'aŋay guwusuna mees. Úmár mees, adéker aning údiigeeno akilaham k'awusuna adak adoona.
33Angu meŋen banwusunay, ayik údiigeen úduk m'aŋay guwusuna ingi kofalihinem. Kanda úmár ii, tohuroŋ a gúbidhintor. Úmár údin didiirahu Samareya#10.33 Ñanyahudo ingi ñammi Samareya gara anyennehinayeh. Agida ñammi Samareya, immereŋ a muhenku jamaŋo m'anjahne mi guyroŋoŋne Ñanyahud ganfúruntne. Angu gara ambabayeh ingi Ñanyahudo buramunku Díino Jerusalem. Yennehinayereŋeŋ haman hotir. Angu, ummu Samaraya m'atopotorne Uyahudo dam akankaan ho índukoŋo dankanne. m'aferenne anfoyfoy mintor. Angu bapútri, afég údiigeeno m'andújne, angu arinkinem akab. 34Angu úmár ii, atákár binaalo k'atéejaram. Adooh kunnoŋo ingi dúlino ba busaajhánam. Ayicum baniyoŋo nip kunnoŋo k'aparparin dúlino. Babollay adooh búliir burenni fet k'adaabin a baniyoŋo. Babollay ayoofom k'aninkem a kofaliŋo k'andék baman a saariŋo. Bampúti a saariŋo akucunom a dígo k'ankucunohne ñandékaŋo. Angu na, jaketo nip amaja butopotoku údiigeeno m'ammalne, fo bísibaŋo adék arenn. 35Gucunkunom, bafúti, adék alahun m'amarahne dígo. Balahunem, afúnn kodiforo a kalpehinem, gukodi g'apokula k'anéerem k'ayéjem: «Ingah! Me ba hadék angu. Inini, ísiibáásiib k'utopotodom údiigeeno ummu. Inini, aji bakodiŋo b'éneerenne bádáŋ, d'eŋoolinekinehne ibecindo.» Angu, balóbi nim mees adék adoona.
36Angu, fo Yensa anéerne funaareŋo mees, amiih ukeekihu Hañaañeno, ayéjem:
- Inini, a siwosenken, imbi immi ilallo, hantaŋ akanne ni wúur añantay akaan imbi údinem uraagofo?
37Ukeekihu Hañaañeno aŋoyind Yensa ayéjem:
- Údiigeeno ulallinno, m'ayikne bankabaŋo a binaanam, úmár akanne ni wúuro añantane akaan imbi údinem uraagofo.
- Maŋ nim. Inini, déker k'ukaan maŋ ni úmár akanne.
Fo Mariyama atifilinne h'afaŋunumne n'ayik nafa
38Afúrumi na, Yensa ingi ñantaalibehinem anfak anlah binaalo k'ankokoh bi Jerusalem. Andék f'andék ampút a saari adúk. Angu bampúti a saariŋo nómár, udikaam úduk akucuneeniŋ. Udikaamo, gurethinem Maatu. 39Údoonom utinno mees ummo na. Gurethinem Mariyama. Angu f'ampútne a díkinin, Mariyama úmár, adék anooh atéeja hádiku Yensa k'aŋay bujantenku kawandhu Yensa. 40Angu, Maatu mungu, úmár ummo bim n'aŋanah, afúroh butopotoku ñandékaŋo. Bamiñaamiñ Maatu afég Mariyama n'anoone atéeja hádiku Yensa k'aŋay bujantenku kawando. Adék amiih Yensa ayéjem:
- Arafaŋ! Hóge féguro Mariyama n'adékne adék anooh a hádiken ki me idaŋádaŋá butopotoku ñandéekaŋo?! Karo hómár kando honj? Yéjerem adéker k'alahinem k'itopotormiŋ ñandéekaŋo!
41Umuyhintor aŋoyindem ayéjem:
- Maatu, ooo Maatu! Fi ummo na n'ukori holabay, k'udaŋádaŋá beŋen beŋen ba butopotoku ñandékaŋo. 42Kanda Mariyama ummu mungu, umomiye bujantenku kawando. Úmár ii, h'afaŋumune n'ayik nafa, hómár gatifilinne. Nanka wúur ñantaaraŋ ayéjem biki akaan nim.
Nim Yensa ayéjne Maatu dam.
Okuqokiwe okwamanje:
Luk 10: GD
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Copyright Vision Intégrale, Senegal
