MÁKHI 9
9
1Ló Jezwi cu kranman nkɔn sa:
– Mímí mɛɛ́n kranmán hɔ́n: néphan lókɔn khɛ́n aya krɛn, wo hromɛn fe bha le khú, lókhɛ́n wo bhá wú Yankan Bhringbi khúbhɛ́ bha bhá sɛ́npɛ́ mɛn.
Jezwi hɛ́nmɛn jrɛn
(Ɔ́n wú Mat 17.1-13; Ɔ́n wú Lwik 9.28-36)
2Ńcíbhí khwá mánji, Jezwi do Piɛ, Jakhi le Jan ɔ́nmɔn tɛɛ ha phɔ lo ábhóbhó piénpié bɛn tho, ló ńya nkɔn hɛ́nmɛn jrɛn. 3Mɛ́n ntráliɛ́ phwa phúnphú, ló mɛ́n ntráliɛ́ si akhɔ phwa, áthéji álepɛ yí khɛ́n ábha gɛ phwa priman. 4Lótɛ yíchwɛmán bhwaliá lókɔn wu Eli le Moyízi nɔn agɛ Jezwi ɔ́nmɔn ya étɔ bhwe. 5Ló Piɛ kranman Jezwi sa:
– Yíliéwo, ńmwá obha krɛn. Lo bhá bhú ádɛgɔn-nkhú bhwaliá, hɛ kɛ bɛn, Moyízi kɛ bɛn le Eli kɛ bɛn.
6Piɛ le wú lóbhwe brɛ ángɛ tɔ. Lósi akhɔ tɛ ɔn, ákhwíthá ka mɛ́n le kwannɛ́n yíchwɛmán ɔ́nmɔn hrómɛn. 7Lótɛ mɔngú mɔngú bɛn di nanphɔ mrwɛn wo, ló átɔ́ bɛn édɛn mɔngú mɔngú hrómɛn sa:
– Mɛ́n lókɔn nɔn ńni mɛn Mi mɛn pɔ, tɛmɛ ɔ́n yé mɛ́n bhwe!
8Lóyámɛ́n, yíchwɛmán éha mɛ jékhali wo, khɛ́n wo le wu lephan nankhɛ, kasé áleli Jezwi brɛ pán ya wo njɛ.
9Lóka wo chan ábhóbhó tho wo édiathé, lótɛ Jezwi di wo bi sa:
– Áyí ɔ́n wu ɔn, ɔ́n ne tɔ lóbhwe sé lephan nankhɛ brɛ oyé, kábrɛ kábrɛ odi lóka Lephan Mi ochán khúnɔn mɛn fe.
10Wo ji lóbi lókɔn, khɛ́n wo ya wo thethé wo ébhi wo bɛn nbrɛn sa:
– “Ákhúnɔn mɛn chánfe lókɔn ɔn”, lóthé li ébí?
11Lómánji wo ébhi Jezwi lée:
– Bítɛ khɛ́n bidíyɛ́nmán étɔlé ayɔn sa Eli ophrɛ thwási bhá khɛ́n ɛ?
12Ló ńkránman nkɔn sa:
– Khankhan mímí, áyɔn salé Eli ophrɛ thwási bhá, ló ancɔ áyí khúnbrɛn tɛ́tré. Ló bítɛ khɛ́n Yankan hrɔ́ lɔ étɔlé Lephan Mi bha lí gbre nkhóo, ló wo bhá hɛ nchɔ́chɔ ɛ? 13Lótɛ khɛ́n mɛɛ́n kranmán hɔ́n gbée salé Eli phrɛ bha, khɛ́n néphan tɛ nkɛ wo yí akhu wo mwa, sa lósi Yankan hrɔ́ khɔ tɔ mɛ́n phɔ bhwe tre.
Jezwi tɛ yípɔ bhri bɛn khɛ́n nánnánmi phromɛn bha phɔ phɔ jan
(Ɔ́n wú Mat 17.14-21; Ɔ́n wú Lwik 9.37-43a)
14Lóka wo di yíchwɛmán krɛnnɛ́n njɛ, wo wu ápasá bhróbhrobhé khɛ́n ajekhali wo le bidíyɛ́nmán khɛ́n agɛ wo ɔ́nmɔn ya étalí bhwe. 15Néphan ka awu Jezwi, wo khúnbrɛn wo fe nta, ló wo wa wo élo bhɔ́ nkɛ yí. 16Ló Jezwi bhi mɛ́n yíchwɛmán sa:
– Bí bhwe nɔn ɔ́n gɛ wo ɔ́nmɔn ya hɔ́n étali ɛ?
17Lótɛ ápasá hrómɛn, lephan bɛn ékrɛnmɛn sa:
– Yíliéwo, mɛn do mɛn bhi ma hɛ yé, nánnánmi phromɛn bɛn bha mɛ́n phɔ, lóhɛ́nthé ánnɛn gɛ tɔ bhwe. 18Ási khúnbrɛn tɛɛ nánnánmi hɔn-ɛn, nkɛ dɛ hálé yítathé, mísɛ́-ndu dɔn mɛ́n mɛ́n, ánchrui nɔ́thá, ló ánya nɛn saan. Mɛn kranman hɛ yíchwɛmán salé wo tranmán nánnánmi phromɛn lókɔn, khɛ́n wo le gɛ tɛ.
19Ló Jezwi kranman nkɔn sa:
– Ákhúbhɛ́nɛ́n alepɛ mímíbhú e! Man má hɔ́n phɔ kábrɛ kábrɛ, ábha di cíbɛn-áan khɛ́n ɛ? Mán cu do hɔ́n pɛ kábrɛ kábrɛ, ábha di cíbɛn-áan npɔ khɛ́n ɛ? Ɔ́n do yípɔ bha sé mɛn.
20Wo do yípɔ bha se. Yípɔ ka awu Jezwi, nánnánmi hɔn nkɛ jika kranmɛn, ńhalé yítathé ánbwalé, mísɛ́-ndu édɔn mɛ́n mɛ́n, 21ló Jezwi bhi nkɛ the sa:
– Cíbɛn-áan nɔn lóyí chan etɛ́ nkɛ ɛ?
Ló mɛ́n the nkɛé:
– Áchan mɛ́n mri mɛn-áan. 22Ló áka fe, nánnánmi dɛ ká átɛn le ńdu ɔ́nmɔn hrómɛn sa nkɛ khú. Khɛ́n kasé ɛ́gɛ tɛ́ yíbɛn o, tɛmɛ ɛwú lo phɔ nfɛkhu, ló ɛdɔnmán lo mɔ́n kpɛ!
23Ló Jezwi kranman nkɛ sa:
– Kasé ɛ́bha gɛ tɛ́ yíbɛn, nkɛé hɛ bhwe ɛtɔ é. Lephan tɛɛ ebhú mímí, mɛ́n, áyí khúnbrɛn lɛ se phú.
24Lóyámɛ́n, yípɔ nthe lukhwɛ́ sa:
– Mɛn mú mímí, dɔnman mɛn mɔ́n kpɛ, lée mɛn mímíbhú cha!
25Jezwi ka awu ápasá wá awa ebhá wo phɔ, lótɛ ńtɔ bhwe mɛ́n khrákhrá mɛn se nánnánmi phromɛn lókɔn sa:
– Nánnánmi phromɛn khɛ́n ále gɛ chɛ́ lephan tɔ bhwe, khɛ́n ayé bhwe, mɛɛ́n kranmán hɛ lée: ɛchán yípɔ lókɔn phɔ thándi, ló ɛlé cu sáji bha ká mɛ́n phɔ npɔhɔ́n!
26Nánnánmi phromɛn lukhwɛ́, ńhɔn yípɔ jika kranmɛn, ló ńchan nkɛ phɔ thandi. Sɛbhri lalé sa lephan akhu, áchɛ́se néphan búdúbúdú abha lóne ɔn, wo hromɛn fe étɔlé: “Ńkhu.” 27Jezwi hɔn nkɛ mɔ́n, ńti nkɛ chanfe, ló yípɔ ya tho.
28Jezwi ka alo bháthó, khɛ́n ákha mɛ́n yíchwɛmán nchán bha mɛ́n phɔ, lótɛ wo ébhi nkɛ sa:
– Ńthé lo-ɛ, bítɛ khɛ́n lo le gɛ chɛ nánnánmi lókɔn chan yípɔ phɔ thandi ɛ?
29Ló Jezwi kranman nkɔn sa:
– Nánnánmi yábhɛ lókɔn ɔn, yankanla míbrɛ khókhó mɛn nɔn ógɛ khɔ́ chɛ anchán lephan phɔ thándi.
Jezwi cu étɔ mɛ́n khú le mɛ́n khúnɔn mɛn chánfe ɔ́nmɔn bhwe
(Ɔ́n wú Mat 17.22-23; Ɔ́n wú Lwik 9.43b-45)
30Jezwi le mɛ́n yíchwɛmán ɔ́nmɔn chan lóne lo, ló wo bhurikhɔ Galile gotho. Jezwi le pɔ salé néphan oyɛ́n mɛ́n si mɛ́n ma, 31átɛsalé ánnie mɛ́n yíchwɛmán yí hɛ́nthé, ló ánkranmán nkɔn sa:
– Wo bhá hɔ́n Lephan Mi phɛ́lí néphanmiɔn mɔ́n mɛn, ló wo bhá wɛn. Lókhɛ́n ńcíbhí bhwaliá, ánman chán khúnɔn mɛn fe.
32Mɛ́n yíchwɛmán le yé ábhwe lókɔn thé, khɛ́n ákhú wo esó hɛ́nthé, wo lé wúsi khɔ́ bhi nkɛ bhwe.
Abɛn li lephan khó?
(Ɔ́n wú Mat 18.1-5; Ɔ́n wú Lwik 9.46-48)
33Wo di Kapɛnaúmɛn. Lóka Jezwi di bháthó, ló ánmi mɛ́n yíchwɛmán sa:
– Bí bhwe hɔ́n étali ásitó hrómɛn ɔ́nmɔn bhá ɛ?
34Khɛ́n wo lethíí, átɛsalé ásitó hrómɛn, wo tali bhwe, wo énɛn wo yɛ́n lephan ali lephan khó wo hromɛn. 35Lótɛ Jezwi chethé, ńche áwɔ́-mɔnmán bha mɛ́n phɔ, ló ánkranmán nkɔn sa:
– Néphan hromɛn, lephan kasé ɛ́nɛn ɛthwási, áyɔn salé ɛphúji, ló ɛkhwɛn wo khúnbrɛn hɛ́nmɛn nɛn.
36Lómánji Jezwi hɔn yípɔ bhri bɛn bha, ńhɔn nkɛ ya wo thethé, ńdɔn nkɛ mɛ́n, ló ánkranmán nkɔn sa:
37– Lephan khɛ́n ábha khɔ́ mɛn hɛ́n hrómɛn do yípɔ bhri brɛ, átɛsalé mɛɛ́n bɛn nbrɛn nɔn ńdo mɛn. Ló lephan khɛ́n ado mɛn, léli mɛɛ́n bɛn nbrɛn nɔn ńdo mɛn, lókhɛ́n ńdo lephan achɛ mɛn ma.
Lephan khɛ́n aleli lo mɛsawo, lephan lókɔn ńni lo jɔ
(Ɔ́n wú Lwik 9.49-50)
38Lótɛ Jan kranman Jezwi sa:
– Yíliéwo, lo wu lephan bɛn bho hɛ hɛ́n pɛ étranmán nánnánmi phromɛn phromɛnhɔn. Lónian mɛn khɛ́n ńnɛn ma lo hromɛn ɔn, lo bha lo thuithá.
39Ló Jezwi tɔ sa:
– Ɔ́n ne thuithá a! Lósi akhɔ tɛ ɔn, álepɛ lephan ábha bhó mɛn hɛ́n pɛ tɛ́ hɛ́nmɛntányí bɛn, lókhɛ́n lóyámɛ́n ábha cu tɔ mɛn bhwele. 40Átɛsalé lephan khɛ́n ale gɛ lo ɔ́nmɔn éswan ɔn, lephan lókɔn ńni lo lephan. 41Mímí mɛɛ́n kranmán hɔ́n: lephan khɛ́n ábha khɔ́ ndu yábhɔ́ brɛ sé hɔ́n nán mɛn néphan ɔ́n ni hɛ́nthé, lephan lókɔn ɔn, ánman gɛ mɛ́n pɛnsɔ́n.
Ńne li yíléle khrákhrá
(Ɔ́n wú Mat 18.6-9; Ɔ́n wú Lwik 17.1-2)
42– Ńmiɔ́ chɛ́-nchɛ́ lókɔn ebhú mɛn mímí, lephan khɛ́n ábha khrɛ brɛ hálé ńne hrómɛn, lephan lókɔn ɔn, áyɔn salé ohɔ́n ábhú khóo bɛn di mɛ́n bhwá, ló ohɔ́n-ɛn fɔ́nká gwe hromɛn. 43Kasé hɛ mɔ́n ékhrɛ hɛ hálé ńne hrómɛn, ɛjan yɛn. Áyɔn salé ɛbhó hɛ mɔ́n brɛ ɔ́nmɔn ká mɛpɔ́bhá álephú hrómɛn, brɛn ló a, ɛ́bha khwɛ́n hɛ mɔ́n mɔ́nmɔn ló áyíkhúphɔ si, ali ási khɛ́n átɛn le nɔ́n. [ 44“Ńdrwan ále khú bha lóne átha néphan nánmí, ló átɛn lɔ le nɔ́n lóne bhrɔ́ɔ́.”] 45Kasé hɛ nta ékhrɛ hɛ hálé ńne hrómɛn, ɛjan yɛn. Áyɔn salé ɛbhó hɛ nta brɛ ɔ́nmɔn ká mɛpɔ́bhá álephú hrómɛn brɛn ló a, hɛ nta mɔ́nmɔn bha tré, lókhɛ́n óbha hɔ́n hɛ fɔ́nká áyíkhúphɔ si. [ 46“Ńdrwan ále khú bha lóne átha néphan nánmí, ló átɛn lɔ le nɔ́n lóne bhrɔ́ɔ́.”] 47Ló kasé hɛ mɛbhí echɛ́ hɛ hálé ńne hrómɛn, ɛfi yɛn. Áyɔn salé ɛbhó hɛ mɛbhí brɛ ɔ́nmɔn ká Yankan Bhringbi khúbhɛ́, brɛn ló a, hɛ mɛbhí mɔ́nmɔn bha tré, lókhɛ́n óbha hɔ́n hɛ fɔ́nká áyíkhúphɔ si. 48“Ńdrwan ále khú bha lóne átha néphan nánmí, ló átɛn lɔ le nɔ́n lóne bhrɔ́ɔ́.” 49Átɛsalé óbha sa lephan khúnbrɛn tɛn phɔ sa ńniɛ a.
50Ńniɛ li yíbhwá bɛn. Khɛ́n kasé áyí ániman abha lóhrómɛn ásɛ khwa ɔn, kalósi óbha khɔ́ chɛ́ khɛ́n ábha cu niman npɔ e? Ɔ́n pɛ ńniɛ bhá hɔ́n bɛn nbrɛn hrómɛn, ló ɔ́n pɛ thɛ́nkhwálé bhá hɔ́n le hɔ́n jɔn ɔ́nmɔn thethé.
Ebrié New Testament © Bible Society of Côte D'Ivoire, 1996.
MÁKHI 9
9
1Ló Jezwi cu kranman nkɔn sa:
– Mímí mɛɛ́n kranmán hɔ́n: néphan lókɔn khɛ́n aya krɛn, wo hromɛn fe bha le khú, lókhɛ́n wo bhá wú Yankan Bhringbi khúbhɛ́ bha bhá sɛ́npɛ́ mɛn.
Jezwi hɛ́nmɛn jrɛn
(Ɔ́n wú Mat 17.1-13; Ɔ́n wú Lwik 9.28-36)
2Ńcíbhí khwá mánji, Jezwi do Piɛ, Jakhi le Jan ɔ́nmɔn tɛɛ ha phɔ lo ábhóbhó piénpié bɛn tho, ló ńya nkɔn hɛ́nmɛn jrɛn. 3Mɛ́n ntráliɛ́ phwa phúnphú, ló mɛ́n ntráliɛ́ si akhɔ phwa, áthéji álepɛ yí khɛ́n ábha gɛ phwa priman. 4Lótɛ yíchwɛmán bhwaliá lókɔn wu Eli le Moyízi nɔn agɛ Jezwi ɔ́nmɔn ya étɔ bhwe. 5Ló Piɛ kranman Jezwi sa:
– Yíliéwo, ńmwá obha krɛn. Lo bhá bhú ádɛgɔn-nkhú bhwaliá, hɛ kɛ bɛn, Moyízi kɛ bɛn le Eli kɛ bɛn.
6Piɛ le wú lóbhwe brɛ ángɛ tɔ. Lósi akhɔ tɛ ɔn, ákhwíthá ka mɛ́n le kwannɛ́n yíchwɛmán ɔ́nmɔn hrómɛn. 7Lótɛ mɔngú mɔngú bɛn di nanphɔ mrwɛn wo, ló átɔ́ bɛn édɛn mɔngú mɔngú hrómɛn sa:
– Mɛ́n lókɔn nɔn ńni mɛn Mi mɛn pɔ, tɛmɛ ɔ́n yé mɛ́n bhwe!
8Lóyámɛ́n, yíchwɛmán éha mɛ jékhali wo, khɛ́n wo le wu lephan nankhɛ, kasé áleli Jezwi brɛ pán ya wo njɛ.
9Lóka wo chan ábhóbhó tho wo édiathé, lótɛ Jezwi di wo bi sa:
– Áyí ɔ́n wu ɔn, ɔ́n ne tɔ lóbhwe sé lephan nankhɛ brɛ oyé, kábrɛ kábrɛ odi lóka Lephan Mi ochán khúnɔn mɛn fe.
10Wo ji lóbi lókɔn, khɛ́n wo ya wo thethé wo ébhi wo bɛn nbrɛn sa:
– “Ákhúnɔn mɛn chánfe lókɔn ɔn”, lóthé li ébí?
11Lómánji wo ébhi Jezwi lée:
– Bítɛ khɛ́n bidíyɛ́nmán étɔlé ayɔn sa Eli ophrɛ thwási bhá khɛ́n ɛ?
12Ló ńkránman nkɔn sa:
– Khankhan mímí, áyɔn salé Eli ophrɛ thwási bhá, ló ancɔ áyí khúnbrɛn tɛ́tré. Ló bítɛ khɛ́n Yankan hrɔ́ lɔ étɔlé Lephan Mi bha lí gbre nkhóo, ló wo bhá hɛ nchɔ́chɔ ɛ? 13Lótɛ khɛ́n mɛɛ́n kranmán hɔ́n gbée salé Eli phrɛ bha, khɛ́n néphan tɛ nkɛ wo yí akhu wo mwa, sa lósi Yankan hrɔ́ khɔ tɔ mɛ́n phɔ bhwe tre.
Jezwi tɛ yípɔ bhri bɛn khɛ́n nánnánmi phromɛn bha phɔ phɔ jan
(Ɔ́n wú Mat 17.14-21; Ɔ́n wú Lwik 9.37-43a)
14Lóka wo di yíchwɛmán krɛnnɛ́n njɛ, wo wu ápasá bhróbhrobhé khɛ́n ajekhali wo le bidíyɛ́nmán khɛ́n agɛ wo ɔ́nmɔn ya étalí bhwe. 15Néphan ka awu Jezwi, wo khúnbrɛn wo fe nta, ló wo wa wo élo bhɔ́ nkɛ yí. 16Ló Jezwi bhi mɛ́n yíchwɛmán sa:
– Bí bhwe nɔn ɔ́n gɛ wo ɔ́nmɔn ya hɔ́n étali ɛ?
17Lótɛ ápasá hrómɛn, lephan bɛn ékrɛnmɛn sa:
– Yíliéwo, mɛn do mɛn bhi ma hɛ yé, nánnánmi phromɛn bɛn bha mɛ́n phɔ, lóhɛ́nthé ánnɛn gɛ tɔ bhwe. 18Ási khúnbrɛn tɛɛ nánnánmi hɔn-ɛn, nkɛ dɛ hálé yítathé, mísɛ́-ndu dɔn mɛ́n mɛ́n, ánchrui nɔ́thá, ló ánya nɛn saan. Mɛn kranman hɛ yíchwɛmán salé wo tranmán nánnánmi phromɛn lókɔn, khɛ́n wo le gɛ tɛ.
19Ló Jezwi kranman nkɔn sa:
– Ákhúbhɛ́nɛ́n alepɛ mímíbhú e! Man má hɔ́n phɔ kábrɛ kábrɛ, ábha di cíbɛn-áan khɛ́n ɛ? Mán cu do hɔ́n pɛ kábrɛ kábrɛ, ábha di cíbɛn-áan npɔ khɛ́n ɛ? Ɔ́n do yípɔ bha sé mɛn.
20Wo do yípɔ bha se. Yípɔ ka awu Jezwi, nánnánmi hɔn nkɛ jika kranmɛn, ńhalé yítathé ánbwalé, mísɛ́-ndu édɔn mɛ́n mɛ́n, 21ló Jezwi bhi nkɛ the sa:
– Cíbɛn-áan nɔn lóyí chan etɛ́ nkɛ ɛ?
Ló mɛ́n the nkɛé:
– Áchan mɛ́n mri mɛn-áan. 22Ló áka fe, nánnánmi dɛ ká átɛn le ńdu ɔ́nmɔn hrómɛn sa nkɛ khú. Khɛ́n kasé ɛ́gɛ tɛ́ yíbɛn o, tɛmɛ ɛwú lo phɔ nfɛkhu, ló ɛdɔnmán lo mɔ́n kpɛ!
23Ló Jezwi kranman nkɛ sa:
– Kasé ɛ́bha gɛ tɛ́ yíbɛn, nkɛé hɛ bhwe ɛtɔ é. Lephan tɛɛ ebhú mímí, mɛ́n, áyí khúnbrɛn lɛ se phú.
24Lóyámɛ́n, yípɔ nthe lukhwɛ́ sa:
– Mɛn mú mímí, dɔnman mɛn mɔ́n kpɛ, lée mɛn mímíbhú cha!
25Jezwi ka awu ápasá wá awa ebhá wo phɔ, lótɛ ńtɔ bhwe mɛ́n khrákhrá mɛn se nánnánmi phromɛn lókɔn sa:
– Nánnánmi phromɛn khɛ́n ále gɛ chɛ́ lephan tɔ bhwe, khɛ́n ayé bhwe, mɛɛ́n kranmán hɛ lée: ɛchán yípɔ lókɔn phɔ thándi, ló ɛlé cu sáji bha ká mɛ́n phɔ npɔhɔ́n!
26Nánnánmi phromɛn lukhwɛ́, ńhɔn yípɔ jika kranmɛn, ló ńchan nkɛ phɔ thandi. Sɛbhri lalé sa lephan akhu, áchɛ́se néphan búdúbúdú abha lóne ɔn, wo hromɛn fe étɔlé: “Ńkhu.” 27Jezwi hɔn nkɛ mɔ́n, ńti nkɛ chanfe, ló yípɔ ya tho.
28Jezwi ka alo bháthó, khɛ́n ákha mɛ́n yíchwɛmán nchán bha mɛ́n phɔ, lótɛ wo ébhi nkɛ sa:
– Ńthé lo-ɛ, bítɛ khɛ́n lo le gɛ chɛ nánnánmi lókɔn chan yípɔ phɔ thandi ɛ?
29Ló Jezwi kranman nkɔn sa:
– Nánnánmi yábhɛ lókɔn ɔn, yankanla míbrɛ khókhó mɛn nɔn ógɛ khɔ́ chɛ anchán lephan phɔ thándi.
Jezwi cu étɔ mɛ́n khú le mɛ́n khúnɔn mɛn chánfe ɔ́nmɔn bhwe
(Ɔ́n wú Mat 17.22-23; Ɔ́n wú Lwik 9.43b-45)
30Jezwi le mɛ́n yíchwɛmán ɔ́nmɔn chan lóne lo, ló wo bhurikhɔ Galile gotho. Jezwi le pɔ salé néphan oyɛ́n mɛ́n si mɛ́n ma, 31átɛsalé ánnie mɛ́n yíchwɛmán yí hɛ́nthé, ló ánkranmán nkɔn sa:
– Wo bhá hɔ́n Lephan Mi phɛ́lí néphanmiɔn mɔ́n mɛn, ló wo bhá wɛn. Lókhɛ́n ńcíbhí bhwaliá, ánman chán khúnɔn mɛn fe.
32Mɛ́n yíchwɛmán le yé ábhwe lókɔn thé, khɛ́n ákhú wo esó hɛ́nthé, wo lé wúsi khɔ́ bhi nkɛ bhwe.
Abɛn li lephan khó?
(Ɔ́n wú Mat 18.1-5; Ɔ́n wú Lwik 9.46-48)
33Wo di Kapɛnaúmɛn. Lóka Jezwi di bháthó, ló ánmi mɛ́n yíchwɛmán sa:
– Bí bhwe hɔ́n étali ásitó hrómɛn ɔ́nmɔn bhá ɛ?
34Khɛ́n wo lethíí, átɛsalé ásitó hrómɛn, wo tali bhwe, wo énɛn wo yɛ́n lephan ali lephan khó wo hromɛn. 35Lótɛ Jezwi chethé, ńche áwɔ́-mɔnmán bha mɛ́n phɔ, ló ánkranmán nkɔn sa:
– Néphan hromɛn, lephan kasé ɛ́nɛn ɛthwási, áyɔn salé ɛphúji, ló ɛkhwɛn wo khúnbrɛn hɛ́nmɛn nɛn.
36Lómánji Jezwi hɔn yípɔ bhri bɛn bha, ńhɔn nkɛ ya wo thethé, ńdɔn nkɛ mɛ́n, ló ánkranmán nkɔn sa:
37– Lephan khɛ́n ábha khɔ́ mɛn hɛ́n hrómɛn do yípɔ bhri brɛ, átɛsalé mɛɛ́n bɛn nbrɛn nɔn ńdo mɛn. Ló lephan khɛ́n ado mɛn, léli mɛɛ́n bɛn nbrɛn nɔn ńdo mɛn, lókhɛ́n ńdo lephan achɛ mɛn ma.
Lephan khɛ́n aleli lo mɛsawo, lephan lókɔn ńni lo jɔ
(Ɔ́n wú Lwik 9.49-50)
38Lótɛ Jan kranman Jezwi sa:
– Yíliéwo, lo wu lephan bɛn bho hɛ hɛ́n pɛ étranmán nánnánmi phromɛn phromɛnhɔn. Lónian mɛn khɛ́n ńnɛn ma lo hromɛn ɔn, lo bha lo thuithá.
39Ló Jezwi tɔ sa:
– Ɔ́n ne thuithá a! Lósi akhɔ tɛ ɔn, álepɛ lephan ábha bhó mɛn hɛ́n pɛ tɛ́ hɛ́nmɛntányí bɛn, lókhɛ́n lóyámɛ́n ábha cu tɔ mɛn bhwele. 40Átɛsalé lephan khɛ́n ale gɛ lo ɔ́nmɔn éswan ɔn, lephan lókɔn ńni lo lephan. 41Mímí mɛɛ́n kranmán hɔ́n: lephan khɛ́n ábha khɔ́ ndu yábhɔ́ brɛ sé hɔ́n nán mɛn néphan ɔ́n ni hɛ́nthé, lephan lókɔn ɔn, ánman gɛ mɛ́n pɛnsɔ́n.
Ńne li yíléle khrákhrá
(Ɔ́n wú Mat 18.6-9; Ɔ́n wú Lwik 17.1-2)
42– Ńmiɔ́ chɛ́-nchɛ́ lókɔn ebhú mɛn mímí, lephan khɛ́n ábha khrɛ brɛ hálé ńne hrómɛn, lephan lókɔn ɔn, áyɔn salé ohɔ́n ábhú khóo bɛn di mɛ́n bhwá, ló ohɔ́n-ɛn fɔ́nká gwe hromɛn. 43Kasé hɛ mɔ́n ékhrɛ hɛ hálé ńne hrómɛn, ɛjan yɛn. Áyɔn salé ɛbhó hɛ mɔ́n brɛ ɔ́nmɔn ká mɛpɔ́bhá álephú hrómɛn, brɛn ló a, ɛ́bha khwɛ́n hɛ mɔ́n mɔ́nmɔn ló áyíkhúphɔ si, ali ási khɛ́n átɛn le nɔ́n. [ 44“Ńdrwan ále khú bha lóne átha néphan nánmí, ló átɛn lɔ le nɔ́n lóne bhrɔ́ɔ́.”] 45Kasé hɛ nta ékhrɛ hɛ hálé ńne hrómɛn, ɛjan yɛn. Áyɔn salé ɛbhó hɛ nta brɛ ɔ́nmɔn ká mɛpɔ́bhá álephú hrómɛn brɛn ló a, hɛ nta mɔ́nmɔn bha tré, lókhɛ́n óbha hɔ́n hɛ fɔ́nká áyíkhúphɔ si. [ 46“Ńdrwan ále khú bha lóne átha néphan nánmí, ló átɛn lɔ le nɔ́n lóne bhrɔ́ɔ́.”] 47Ló kasé hɛ mɛbhí echɛ́ hɛ hálé ńne hrómɛn, ɛfi yɛn. Áyɔn salé ɛbhó hɛ mɛbhí brɛ ɔ́nmɔn ká Yankan Bhringbi khúbhɛ́, brɛn ló a, hɛ mɛbhí mɔ́nmɔn bha tré, lókhɛ́n óbha hɔ́n hɛ fɔ́nká áyíkhúphɔ si. 48“Ńdrwan ále khú bha lóne átha néphan nánmí, ló átɛn lɔ le nɔ́n lóne bhrɔ́ɔ́.” 49Átɛsalé óbha sa lephan khúnbrɛn tɛn phɔ sa ńniɛ a.
50Ńniɛ li yíbhwá bɛn. Khɛ́n kasé áyí ániman abha lóhrómɛn ásɛ khwa ɔn, kalósi óbha khɔ́ chɛ́ khɛ́n ábha cu niman npɔ e? Ɔ́n pɛ ńniɛ bhá hɔ́n bɛn nbrɛn hrómɛn, ló ɔ́n pɛ thɛ́nkhwálé bhá hɔ́n le hɔ́n jɔn ɔ́nmɔn thethé.
Ebrié New Testament © Bible Society of Côte D'Ivoire, 1996.