MÁKHI 10
10
Áyí Jezwi lie ájánli phɔ
(Ɔ́n wú Mat 19.1-12; Ɔ́n wú Lwik 16.18)
1Jezwi chan lóne lo Jude gotho, lómánji ńno Judɛn dubhɛ dúji: Ápasá dɔndɔn cu bhurɛhɛ́n mɛ́n phɔ, ló ńnie wo yí, sa ló ńmáne antɛ́ wɔ́wɔ a.
2 Fariziɛnnɛ́n mɔ́nbɛn énɛn atɔ bhwe tú nkɛ, lóhɛ́nthé wo tigbɛli ló wo ébhi nkɛ sa:
– Wú lo bidí se mɔ́nsi salé sɛ owrɔ mɛ́n bhia?
3Ló Jezwi lɔ phaya lótho bhi wo sa:
– Lóbidí bɛn nɔn Moyízi ha se hɔ́n ɛ?
4Ló wo nkɛé:
– Moyízi se sɛ mɔ́nsi salé antɛ́ ájánli hrɔ́, ló anwrɔ mɛ́n bhia.
5Lótɛ Jezwi kranman nkɔn sa:
– Hɔ́n thɛ́n ákhɔnmán hɛ́nthé nɔn achɛ Moyízi ha ábidí lókɔn tre hɔ́n lé. 6Áyí khúnbrɛn ka abhɔhɛ́n, khɛ́n Yankan tɛ yí khúnbrɛn phu ɔn, “ńtɛ sɛ le bhie ɔ́nmɔn.” Ló abha hrɔ́ mɛn nɔn ali salé: 7“Lóhɛ́nthé nɔn sɛ bha chán mɛ́n the le mɛ́n man ɔ́nmɔn hwan lo gɛ mɛ́n bhia ɔ́nmɔn bhá sibrɛ, 8ló wo mɔ́nmɔn wo bhá tɛ́sa lephan brɛ a.” Wo bha lé cu lí néphan mɔn npɔhɔ́n, lókhɛ́n wo bhá lí lephan brɛ. 9Lóhɛ́nthé lephan, ɛlé bhuri áyí Yankan bhɔha sibrɛ.
10Lóka wo lo bháthó, yíchwɛmán cu ya ábhwe lókɔn tho ébhi Jezwi bhwe búdúbúdú npɔ, 11ló ńkránman nkɔn sa:
– Kasé sɛ wrɔ mɛ́n bhia, khɛ́n ńphɛn bhie nankhɛ, átɛsalé bhie nɔn ánche mɛ́n bhia sithwáya mánji. 12Lóyábhɛ brɛ, kasé bhie yɔ mɛ́n ca ka, lókhɛ́n ńphɛn sɛ nankhɛ, mɛ́n lɔ, átɛsalé sɛ nɔn ánche.
Jezwi ebhɔ́ ńmiɔ́ chɛ́-nchɛ́ ndu
(Ɔ́n wú Mat 19.13-15; Ɔ́n wú Lwik 18.15-17)
13Néphan do miɔ́ chɛ́-nchɛ́ bha esé Jezwi, sa anmó mɔ́n tré nkɔn tho, lókhɛ́n yíchwɛmán ethú wo thá. 14Lóka Jezwi wu lóyí, ńthɛ́nyan kɛ hromɛn, ló ńkránman mɛ́n yíchwɛmán sa:
– Ɔ́n yɔ́ miɔ́ chɛ́-nchɛ́ khwá obhá mɛn yé, ló ɔ́n ne phrui wo si, átɛsalé Yankan Bhringbi khúbhɛ́ li néphan khɛ́n atɛsa ńmiɔ́ lókɔn. 15Mímí mɛɛ́n kranmán hɔ́n: lephan khɛ́n abha lé dɛn do Yankan Bhringbi khúbhɛ́ sa yípɔ bhri ɔn, lephan lókɔn anman nɛ́n ká lóne.
16Lómánji, ńkhwɛn miɔ́ chɛ́-nchɛ́ ha mɔ́n mɛn, ńmo mɔ́n tre wo brɛ brɛ khúnbrɛn tho, ló ńmɔ wo ndu.
Lephan khɛ́n ali bhringbi
(Ɔ́n wú Mat 19.16-30; Ɔ́n wú Lwik 18.18-30)
17Lóka Jezwi bha sitó élo, lótɛ sɛ bɛn wa bha bhɔ ntráhɛ́nlé nkɛ hɛ́nmɛn, ló ánmi nkɛ sa:
– Yíliéwo bhwá, ébí nɔn ayɔn se mɛn tɛ́, khɛ́n mɛn gɛ mɛpɔ́bhá álephú ɛ?
18Ló Jezwi krɛnmɛn sa:
– Bítɛ khɛ́n ɛ́che mɛn lephan bhwá ɛ? Álepɛ lephan ali lephan bhwá, kasé áleli Yankan míbrɛ. 19Wú ɛyɛn ábidi? Ábidí étɔlé: “Ɛle wɛ́n lephan, ɛle bhɔ́ phɛ́n, ɛlé si sído, ɛle lí abhla ndalefɛ sé lephan, ɛlé khrɛ lephan khwɛ́n mɛ́n yí, ɛji hɛ the le hɛ man ɔ́nmɔn.”
20Ló lephan lókɔn tɔ sa:
– Yíliéwo, mɛn mri mɛn-áan mɛn chan ji ábidí khúnbrɛn lókɔn phu.
21Jezwi nɛn nkɛ ɔɔ, nkɛ bhwe khwɛ hɛ́nmɛnlé, ló ánkranmán nkɛ sa:
– Ákha yíbɛn ɛka tɛ: tɛmɛ ɛlo, ɛkhwɛ́n hɛ yí khúnbrɛn ɛpɛ phɛ́lí, ɛkhwɛ́n lójɛtɛn pɔ́ gbremán, lótɛ ɛ́bha gɛ ajayí búdúbúdú tré átho, lómánji ɛbhá, ló ɛgɛ mɛn thá.
22Sɛ lókɔn ka aye ábhwe Jezwi tɔ, mɛ́n phɔ khu, ló áphɔgbɔ́n mɛn, ńmósi ánno, lósi akhɔ tɛ ɔn, ńni bhringbi banban.
23Lótɛ Jezwi gbɛnɛn wu mɛ́n yíchwɛmán ajekhɛli, ló ánkranmán nkɔn sa:
– Ábha khɔnman sé néphan ali bhringbi khɛ́n wo bhá ká Yankan Bhringbi khúbhɛ́!
24Ábhwe lókɔn etán yíchwɛmán hɛ́nmɛn kpɛ́ɛ́n, lókhɛ́n Jezwi cu kranman nkɔn sa:
– Mɛn miɔn, Yankan Bhringbi khúbhɛ́ hrómɛn ká bha khɔnman! 25Frímú khókho-ngbɔwo khɔ́ ábha khɔ́ ákwɛ́ nɔn mɛn thándi lɔ khɔnman. Lókhɛ́n lephan ali bhringbi ká ábha ká Yankan Bhringbi khúbhɛ́ ɔn, ló-ɛ nɔn akhɔnman banban.
26Lóbhwe cu etán yíchwɛmán hɛ́nmɛn, ló wo ya wo thethé wo ébhi wo bɛn nbrɛn sa:
– Ló kasé áli nɛn ɔn, abɛn nɔn óbha swa ɛ?
27Jezwi gbɛnɛn wu wo, ló ánkranmán nkɔn sa:
– Áyí lókɔn, ákhɔ́nman se néphanmiɔn, lókhɛ́n Yankan yé áleli yíɛkɛ, átɛsalé Yankan li lephan ágɛ tɛ́ yí khúnbrɛn.
28Ló Piɛ kranman nkɛ sa:
– Wu a, lo-ɛ, lo yɔ lo yí khúnbrɛn khwa bha lo égɛ hɛ thá.
29Ló Jezwi krɛnmɛn sa:
– Mímí mɛɛ́n kranmán hɔ́n: lephan kasé mɛn le Ábhwe Bhwábhwá ɔ́nmɔn hɛ́nthé khɛ́n ɛyɔ hɛ nkhú, hɛ hɔnsɛ́nhɔn, hɛ hɔnmiáhɔn, hɛ man, hɛ the, hɛ miɔn le hɛ bithe ɔ́nmɔn khwa, 30hɛ lephan lókɔn, thénthé ka lókɔn khɛ́n lo bha lóhrómɛn ɔn, ɛ́bha gɛ: ńkhú, hɔnsɛ́nhɔn, hɔnmiáhɔn, manhɔn, ńmiɔ́ le ábithe ɔ́nmɔn bhɔ́tho cu lí ńmɔ-mwannán le ágbrelí abha lóhrómɛn. Khɛ́n ácí abha hɛ́nmɛn ebhá, ɛ́bhá gɛ mɛpɔ́bhá álephú. 31Thénthé, néphan búdúbúdú khɛ́n athwasi, wo bhá sa phúji, lóyábhɛ brɛ, néphan búdúbúdú khɛ́n thénthé aphuji ɔn, wo bhá sa thwási.
Ńdɔn bhwaliá hrómɛn, Jezwi étɔ mɛ́n khú le mɛ́n khúnɔn mɛn chánfe ɔ́nmɔn bhwe
(Ɔ́n wú Mat 20.17-19; Ɔ́n wú Lwik 18.31-34)
32Ńthé wo hɛn sitó wo eló Jeruzalɛ́mɛn. Jezwi bha mɛ́n yíchwɛmán hɛ́nmɛn élo. Ńthɛ́n elí yíchwɛmán, ló néphan agɛ wo thá lɔ esókhú. Jezwi cu khwɛn yíchwɛmán áwɔ́-mɔn ánchán ha phɔ, ló áyí khɛ́n akha kpɛɛ́ ebhá tɛ, ńchan thé ánkan nkɔn lóphɔ hwan, 33ló ánkranmán nkɔn sa:
– Ɔ́n wu a, lo eló Jeruzalɛ́mɛn, lóne nɔn wo bhá hɔ́n Lephan Mi sé nphahamán-óthemánhɔn le bidíyɛ́nmán ɔ́nmɔn. Wo bhá bhɔ́ nkɛ pɔn sa wo wɛ́n nkɛ, ló wo bhá phɛ́ nkɛ lí néphan ale yɛn Yankan yé. 34Wo lókɔn, wo bhá ha nkɛ lia, wo bhá phu mísɛ́-ndu há nkɛ hɛ́nmɛn. Wo bhá bhra nkɛ mɛ́, wo bhá wɛ́n nkɛ, ló ńcíbhí bhwaliá, ánman chán khúnɔn mɛn fe.
Jakhi le Jan ɔ́nmɔn, wo man yí ébhi
(Ɔ́n wú Mat 20.20-28)
35Lómánji, Zebede miɔn, Jakhi le Jan ɔ́nmɔn bha gɛ Jezwi, ló wo ékranmán nkɛ sa:
– Lo ébhi hɛ yíbɛn, ló lo énɛn salé ɛtɛ́ lóyí sé lo.
36– Ló Jezwi ébhi wo lée: ébí hɔ́n énɛn salé mɛn tɛ́ sé hɔ́n ɛ?
37Ló wo kranman nkɛ sa:
– Lóka ɛ́bha bhá hɛ bhringbilí hrómɛn ɔn, tɛmɛ ɛsé mɔ́nsi lo chré hɛ njɛ, bɛn ochré hɛ liémɔn si, ló lójɔ ochré hɛ mránkhu si.
38Khɛ́n Jezwi kranman nkɔn sa:
– Ɔ́n ne yɛ́n lóyí khɛ́n hɔ́n énɛn. Ágbrelí lókɔn abha áyábhɔ́ hrómɛn khɛ́n mɛn man nán, wú ɔ́n ma gɛ khɔnmán phɔ nán? Áyíkhúphɔ ndu lókɔn khɛ́n wo ebhá há mɛn hɛ́n ɔn, wú ɔ́n ma gɛ khɔnmán phɔ sé ohá hɔ́n lɔ hɛ́n?
39Ló wo nkɛé:
– Lo gɛ tɛ́.
Ló Jezwi kranman nkɔn sa:
– Mímí, ɔ́n ma nán ágbrelí yábhɔ́ lókɔn khɛ́n mɛn man nán, ɔ́n ma gɛ há áyíkhúphɔ ndu khɛ́n wo ebhá há mɛn hɛ́n. 40Khɛ́n léli mɛn nɔn mɛɛ́n nwa mɛn liémɔn njɛ chré, le mɛn mránkhu njɛ chré ɔ́nmɔn si sé néphan. Lósi lókɔnhɔn, néphan khɛ́n Yankan tɛtre wo lé, wo nɔn ali wo ékɛ.
41 Yíchwɛmán hɛ́n áwɔ́ ka aye lóbhwe, wo édo thɛ́nyan sé Jakhi le Jan ɔ́nmɔn. 42Lótɛ Jezwi che wo khúnbrɛn bha, ló ánkranmán nkɔn sa:
– Tɛmɛ ɔ́n yɛ́n salé néphan khɛ́n ali aféchwe-óthemánhɔn ɔn, wo mɔ́n tré nkɔn khúnbrɛn tho, ló wo khɛ́n wo li néphan khónkhó, wo lɔ wo tɛ́ yí dri aféchwe lókɔn phɔ. 43Khɛ́n hɔ́n thethé, áleli nɛn. Ló ábha tɛ́ nɔn ali salé hɔ́n thethé, lephan khɛ́n énɛn alí lephan khó, áyɔn se salé ankhwɛn hɔ́n hɛ́nmɛn nɛn, 44ló hɔ́n hrómɛn, kasé lephan bɛn énɛn athwási, áyɔn se salé anní hɔ́n khúnbrɛn gangánwo. 45Átɛsalé Lephan Mi bhwá nbrɛn lɔ le bha salé okhwɛn mɛ́n hɛ́nmɛn nɛn, lókhɛ́n ńma salé ankhwɛn néphan hɛ́nmɛn nɛn, ló anmó mɛ́n mɛpɔ́bhá sɔ́n pɛn swa néphan búdúbúdú.
Jezwi tɛ Bathime, mɛphuwo phɔ jan
(Ɔ́n wú Mat 20.29-34; Ɔ́n wú Lwik 18.35-43)
46Jezwi le mɛ́n yíchwɛmán le ápasá bhróbhrobhé ɔ́nmɔn di Jerikho. Wo ka wo chan ákhúbhɛ́ hrómɛn wo ethándi, mɛphuwo bɛn óche Bathime, ali Thime mi, chre ásitó njɛ esá yí. 47Lóka ńye sa Jezwi achan Nazarɛ́thi nɔn ehɛ́n, lótɛ annúkhwɛ́ ntɔ sa:
– Jezwi, Davi Mi, wu mɛn nfɛkhu kpɛ!
48Néphan búdúbúdú égbrɛ, wo etɛ́ antémélé, khɛ́n annúkhwɛ́ kránmɛn, ló ántɔ sa:
– Davi Mi, wu mɛn nfɛkhu kpɛ!
49Jezwi dɔnya, ló ńtɔ sa:
– Ɔ́n che se mɛn.
Wo che mɛphuwo, ló wo ékranman nkɛ sa:
– Ánche hɛ, chanfe, tɛmɛ ɛkhɔnmán phɔ.
50Ló ńhɔn mɛ́n khókhóthu ka thé, ńyo ya tho, ló ńno Jezwi njɛ. 51Jezwi bho bhwetɔ́, ló ánmi nkɛ sa:
– Ébí nɔn ɛ́nɛn salé mɛn tɛ́ sé hɛ ɛ?
Ló mɛphuwo tɔ sa:
– Yíliéwo, tɛmɛ ɛtɛ́ mɛn cu wú yí npɔ.
52Ló Jezwi krɛnmɛn sa
– Tɛmɛ ɛlo, hɛ mímíbhú tɛ hɛ phɔ jan.
Lóyámɛ́n, anwú yí, ló ńgɛ Jezwi thá ásitó hrómɛn ɔ́nmɔn ánno.
Ebrié New Testament © Bible Society of Côte D'Ivoire, 1996.
MÁKHI 10
10
Áyí Jezwi lie ájánli phɔ
(Ɔ́n wú Mat 19.1-12; Ɔ́n wú Lwik 16.18)
1Jezwi chan lóne lo Jude gotho, lómánji ńno Judɛn dubhɛ dúji: Ápasá dɔndɔn cu bhurɛhɛ́n mɛ́n phɔ, ló ńnie wo yí, sa ló ńmáne antɛ́ wɔ́wɔ a.
2 Fariziɛnnɛ́n mɔ́nbɛn énɛn atɔ bhwe tú nkɛ, lóhɛ́nthé wo tigbɛli ló wo ébhi nkɛ sa:
– Wú lo bidí se mɔ́nsi salé sɛ owrɔ mɛ́n bhia?
3Ló Jezwi lɔ phaya lótho bhi wo sa:
– Lóbidí bɛn nɔn Moyízi ha se hɔ́n ɛ?
4Ló wo nkɛé:
– Moyízi se sɛ mɔ́nsi salé antɛ́ ájánli hrɔ́, ló anwrɔ mɛ́n bhia.
5Lótɛ Jezwi kranman nkɔn sa:
– Hɔ́n thɛ́n ákhɔnmán hɛ́nthé nɔn achɛ Moyízi ha ábidí lókɔn tre hɔ́n lé. 6Áyí khúnbrɛn ka abhɔhɛ́n, khɛ́n Yankan tɛ yí khúnbrɛn phu ɔn, “ńtɛ sɛ le bhie ɔ́nmɔn.” Ló abha hrɔ́ mɛn nɔn ali salé: 7“Lóhɛ́nthé nɔn sɛ bha chán mɛ́n the le mɛ́n man ɔ́nmɔn hwan lo gɛ mɛ́n bhia ɔ́nmɔn bhá sibrɛ, 8ló wo mɔ́nmɔn wo bhá tɛ́sa lephan brɛ a.” Wo bha lé cu lí néphan mɔn npɔhɔ́n, lókhɛ́n wo bhá lí lephan brɛ. 9Lóhɛ́nthé lephan, ɛlé bhuri áyí Yankan bhɔha sibrɛ.
10Lóka wo lo bháthó, yíchwɛmán cu ya ábhwe lókɔn tho ébhi Jezwi bhwe búdúbúdú npɔ, 11ló ńkránman nkɔn sa:
– Kasé sɛ wrɔ mɛ́n bhia, khɛ́n ńphɛn bhie nankhɛ, átɛsalé bhie nɔn ánche mɛ́n bhia sithwáya mánji. 12Lóyábhɛ brɛ, kasé bhie yɔ mɛ́n ca ka, lókhɛ́n ńphɛn sɛ nankhɛ, mɛ́n lɔ, átɛsalé sɛ nɔn ánche.
Jezwi ebhɔ́ ńmiɔ́ chɛ́-nchɛ́ ndu
(Ɔ́n wú Mat 19.13-15; Ɔ́n wú Lwik 18.15-17)
13Néphan do miɔ́ chɛ́-nchɛ́ bha esé Jezwi, sa anmó mɔ́n tré nkɔn tho, lókhɛ́n yíchwɛmán ethú wo thá. 14Lóka Jezwi wu lóyí, ńthɛ́nyan kɛ hromɛn, ló ńkránman mɛ́n yíchwɛmán sa:
– Ɔ́n yɔ́ miɔ́ chɛ́-nchɛ́ khwá obhá mɛn yé, ló ɔ́n ne phrui wo si, átɛsalé Yankan Bhringbi khúbhɛ́ li néphan khɛ́n atɛsa ńmiɔ́ lókɔn. 15Mímí mɛɛ́n kranmán hɔ́n: lephan khɛ́n abha lé dɛn do Yankan Bhringbi khúbhɛ́ sa yípɔ bhri ɔn, lephan lókɔn anman nɛ́n ká lóne.
16Lómánji, ńkhwɛn miɔ́ chɛ́-nchɛ́ ha mɔ́n mɛn, ńmo mɔ́n tre wo brɛ brɛ khúnbrɛn tho, ló ńmɔ wo ndu.
Lephan khɛ́n ali bhringbi
(Ɔ́n wú Mat 19.16-30; Ɔ́n wú Lwik 18.18-30)
17Lóka Jezwi bha sitó élo, lótɛ sɛ bɛn wa bha bhɔ ntráhɛ́nlé nkɛ hɛ́nmɛn, ló ánmi nkɛ sa:
– Yíliéwo bhwá, ébí nɔn ayɔn se mɛn tɛ́, khɛ́n mɛn gɛ mɛpɔ́bhá álephú ɛ?
18Ló Jezwi krɛnmɛn sa:
– Bítɛ khɛ́n ɛ́che mɛn lephan bhwá ɛ? Álepɛ lephan ali lephan bhwá, kasé áleli Yankan míbrɛ. 19Wú ɛyɛn ábidi? Ábidí étɔlé: “Ɛle wɛ́n lephan, ɛle bhɔ́ phɛ́n, ɛlé si sído, ɛle lí abhla ndalefɛ sé lephan, ɛlé khrɛ lephan khwɛ́n mɛ́n yí, ɛji hɛ the le hɛ man ɔ́nmɔn.”
20Ló lephan lókɔn tɔ sa:
– Yíliéwo, mɛn mri mɛn-áan mɛn chan ji ábidí khúnbrɛn lókɔn phu.
21Jezwi nɛn nkɛ ɔɔ, nkɛ bhwe khwɛ hɛ́nmɛnlé, ló ánkranmán nkɛ sa:
– Ákha yíbɛn ɛka tɛ: tɛmɛ ɛlo, ɛkhwɛ́n hɛ yí khúnbrɛn ɛpɛ phɛ́lí, ɛkhwɛ́n lójɛtɛn pɔ́ gbremán, lótɛ ɛ́bha gɛ ajayí búdúbúdú tré átho, lómánji ɛbhá, ló ɛgɛ mɛn thá.
22Sɛ lókɔn ka aye ábhwe Jezwi tɔ, mɛ́n phɔ khu, ló áphɔgbɔ́n mɛn, ńmósi ánno, lósi akhɔ tɛ ɔn, ńni bhringbi banban.
23Lótɛ Jezwi gbɛnɛn wu mɛ́n yíchwɛmán ajekhɛli, ló ánkranmán nkɔn sa:
– Ábha khɔnman sé néphan ali bhringbi khɛ́n wo bhá ká Yankan Bhringbi khúbhɛ́!
24Ábhwe lókɔn etán yíchwɛmán hɛ́nmɛn kpɛ́ɛ́n, lókhɛ́n Jezwi cu kranman nkɔn sa:
– Mɛn miɔn, Yankan Bhringbi khúbhɛ́ hrómɛn ká bha khɔnman! 25Frímú khókho-ngbɔwo khɔ́ ábha khɔ́ ákwɛ́ nɔn mɛn thándi lɔ khɔnman. Lókhɛ́n lephan ali bhringbi ká ábha ká Yankan Bhringbi khúbhɛ́ ɔn, ló-ɛ nɔn akhɔnman banban.
26Lóbhwe cu etán yíchwɛmán hɛ́nmɛn, ló wo ya wo thethé wo ébhi wo bɛn nbrɛn sa:
– Ló kasé áli nɛn ɔn, abɛn nɔn óbha swa ɛ?
27Jezwi gbɛnɛn wu wo, ló ánkranmán nkɔn sa:
– Áyí lókɔn, ákhɔ́nman se néphanmiɔn, lókhɛ́n Yankan yé áleli yíɛkɛ, átɛsalé Yankan li lephan ágɛ tɛ́ yí khúnbrɛn.
28Ló Piɛ kranman nkɛ sa:
– Wu a, lo-ɛ, lo yɔ lo yí khúnbrɛn khwa bha lo égɛ hɛ thá.
29Ló Jezwi krɛnmɛn sa:
– Mímí mɛɛ́n kranmán hɔ́n: lephan kasé mɛn le Ábhwe Bhwábhwá ɔ́nmɔn hɛ́nthé khɛ́n ɛyɔ hɛ nkhú, hɛ hɔnsɛ́nhɔn, hɛ hɔnmiáhɔn, hɛ man, hɛ the, hɛ miɔn le hɛ bithe ɔ́nmɔn khwa, 30hɛ lephan lókɔn, thénthé ka lókɔn khɛ́n lo bha lóhrómɛn ɔn, ɛ́bha gɛ: ńkhú, hɔnsɛ́nhɔn, hɔnmiáhɔn, manhɔn, ńmiɔ́ le ábithe ɔ́nmɔn bhɔ́tho cu lí ńmɔ-mwannán le ágbrelí abha lóhrómɛn. Khɛ́n ácí abha hɛ́nmɛn ebhá, ɛ́bhá gɛ mɛpɔ́bhá álephú. 31Thénthé, néphan búdúbúdú khɛ́n athwasi, wo bhá sa phúji, lóyábhɛ brɛ, néphan búdúbúdú khɛ́n thénthé aphuji ɔn, wo bhá sa thwási.
Ńdɔn bhwaliá hrómɛn, Jezwi étɔ mɛ́n khú le mɛ́n khúnɔn mɛn chánfe ɔ́nmɔn bhwe
(Ɔ́n wú Mat 20.17-19; Ɔ́n wú Lwik 18.31-34)
32Ńthé wo hɛn sitó wo eló Jeruzalɛ́mɛn. Jezwi bha mɛ́n yíchwɛmán hɛ́nmɛn élo. Ńthɛ́n elí yíchwɛmán, ló néphan agɛ wo thá lɔ esókhú. Jezwi cu khwɛn yíchwɛmán áwɔ́-mɔn ánchán ha phɔ, ló áyí khɛ́n akha kpɛɛ́ ebhá tɛ, ńchan thé ánkan nkɔn lóphɔ hwan, 33ló ánkranmán nkɔn sa:
– Ɔ́n wu a, lo eló Jeruzalɛ́mɛn, lóne nɔn wo bhá hɔ́n Lephan Mi sé nphahamán-óthemánhɔn le bidíyɛ́nmán ɔ́nmɔn. Wo bhá bhɔ́ nkɛ pɔn sa wo wɛ́n nkɛ, ló wo bhá phɛ́ nkɛ lí néphan ale yɛn Yankan yé. 34Wo lókɔn, wo bhá ha nkɛ lia, wo bhá phu mísɛ́-ndu há nkɛ hɛ́nmɛn. Wo bhá bhra nkɛ mɛ́, wo bhá wɛ́n nkɛ, ló ńcíbhí bhwaliá, ánman chán khúnɔn mɛn fe.
Jakhi le Jan ɔ́nmɔn, wo man yí ébhi
(Ɔ́n wú Mat 20.20-28)
35Lómánji, Zebede miɔn, Jakhi le Jan ɔ́nmɔn bha gɛ Jezwi, ló wo ékranmán nkɛ sa:
– Lo ébhi hɛ yíbɛn, ló lo énɛn salé ɛtɛ́ lóyí sé lo.
36– Ló Jezwi ébhi wo lée: ébí hɔ́n énɛn salé mɛn tɛ́ sé hɔ́n ɛ?
37Ló wo kranman nkɛ sa:
– Lóka ɛ́bha bhá hɛ bhringbilí hrómɛn ɔn, tɛmɛ ɛsé mɔ́nsi lo chré hɛ njɛ, bɛn ochré hɛ liémɔn si, ló lójɔ ochré hɛ mránkhu si.
38Khɛ́n Jezwi kranman nkɔn sa:
– Ɔ́n ne yɛ́n lóyí khɛ́n hɔ́n énɛn. Ágbrelí lókɔn abha áyábhɔ́ hrómɛn khɛ́n mɛn man nán, wú ɔ́n ma gɛ khɔnmán phɔ nán? Áyíkhúphɔ ndu lókɔn khɛ́n wo ebhá há mɛn hɛ́n ɔn, wú ɔ́n ma gɛ khɔnmán phɔ sé ohá hɔ́n lɔ hɛ́n?
39Ló wo nkɛé:
– Lo gɛ tɛ́.
Ló Jezwi kranman nkɔn sa:
– Mímí, ɔ́n ma nán ágbrelí yábhɔ́ lókɔn khɛ́n mɛn man nán, ɔ́n ma gɛ há áyíkhúphɔ ndu khɛ́n wo ebhá há mɛn hɛ́n. 40Khɛ́n léli mɛn nɔn mɛɛ́n nwa mɛn liémɔn njɛ chré, le mɛn mránkhu njɛ chré ɔ́nmɔn si sé néphan. Lósi lókɔnhɔn, néphan khɛ́n Yankan tɛtre wo lé, wo nɔn ali wo ékɛ.
41 Yíchwɛmán hɛ́n áwɔ́ ka aye lóbhwe, wo édo thɛ́nyan sé Jakhi le Jan ɔ́nmɔn. 42Lótɛ Jezwi che wo khúnbrɛn bha, ló ánkranmán nkɔn sa:
– Tɛmɛ ɔ́n yɛ́n salé néphan khɛ́n ali aféchwe-óthemánhɔn ɔn, wo mɔ́n tré nkɔn khúnbrɛn tho, ló wo khɛ́n wo li néphan khónkhó, wo lɔ wo tɛ́ yí dri aféchwe lókɔn phɔ. 43Khɛ́n hɔ́n thethé, áleli nɛn. Ló ábha tɛ́ nɔn ali salé hɔ́n thethé, lephan khɛ́n énɛn alí lephan khó, áyɔn se salé ankhwɛn hɔ́n hɛ́nmɛn nɛn, 44ló hɔ́n hrómɛn, kasé lephan bɛn énɛn athwási, áyɔn se salé anní hɔ́n khúnbrɛn gangánwo. 45Átɛsalé Lephan Mi bhwá nbrɛn lɔ le bha salé okhwɛn mɛ́n hɛ́nmɛn nɛn, lókhɛ́n ńma salé ankhwɛn néphan hɛ́nmɛn nɛn, ló anmó mɛ́n mɛpɔ́bhá sɔ́n pɛn swa néphan búdúbúdú.
Jezwi tɛ Bathime, mɛphuwo phɔ jan
(Ɔ́n wú Mat 20.29-34; Ɔ́n wú Lwik 18.35-43)
46Jezwi le mɛ́n yíchwɛmán le ápasá bhróbhrobhé ɔ́nmɔn di Jerikho. Wo ka wo chan ákhúbhɛ́ hrómɛn wo ethándi, mɛphuwo bɛn óche Bathime, ali Thime mi, chre ásitó njɛ esá yí. 47Lóka ńye sa Jezwi achan Nazarɛ́thi nɔn ehɛ́n, lótɛ annúkhwɛ́ ntɔ sa:
– Jezwi, Davi Mi, wu mɛn nfɛkhu kpɛ!
48Néphan búdúbúdú égbrɛ, wo etɛ́ antémélé, khɛ́n annúkhwɛ́ kránmɛn, ló ántɔ sa:
– Davi Mi, wu mɛn nfɛkhu kpɛ!
49Jezwi dɔnya, ló ńtɔ sa:
– Ɔ́n che se mɛn.
Wo che mɛphuwo, ló wo ékranman nkɛ sa:
– Ánche hɛ, chanfe, tɛmɛ ɛkhɔnmán phɔ.
50Ló ńhɔn mɛ́n khókhóthu ka thé, ńyo ya tho, ló ńno Jezwi njɛ. 51Jezwi bho bhwetɔ́, ló ánmi nkɛ sa:
– Ébí nɔn ɛ́nɛn salé mɛn tɛ́ sé hɛ ɛ?
Ló mɛphuwo tɔ sa:
– Yíliéwo, tɛmɛ ɛtɛ́ mɛn cu wú yí npɔ.
52Ló Jezwi krɛnmɛn sa
– Tɛmɛ ɛlo, hɛ mímíbhú tɛ hɛ phɔ jan.
Lóyámɛ́n, anwú yí, ló ńgɛ Jezwi thá ásitó hrómɛn ɔ́nmɔn ánno.
Ebrié New Testament © Bible Society of Côte D'Ivoire, 1996.