MÁKHI 8
8
Jezwi se néphan akpɛn bhwelí nɛn li
(Ɔ́n wú Mat 15.32-39)
1Lóka lókɔn nɔn ápasá bhróbhrobhé cu bhurɛhɛ́n. Lónian mɛn khɛ́n wo le wú yí lí, lótɛ Jezwi che mɛ́n yíchwɛmán bha, ló ńkránman nkɔn sa:
2– Néphan lókɔn phɔ etɛ́ mɛn nfɛkhu, átɛsalé ńcíbhí bhwaliá nbrɛn-áan nɔn wo chan bha mɛn phɔ, khɛ́n álepɛ yíɛkɛ bhrií wo lí. 3Khɛ́n mɛn nɛn pɔ salé mɛn yɔ́ wo khwalé lo áko mɛn, lósi akhɔ tɛ ɔn, wo sájí hrómɛn áphɔ bha bhé wo ásitó, ló wo bhá hálé. Átɛsalé wo hromɛn, néphan búdúbúdú chan si khɔn bha.
4Lótɛ mɛ́n yíchwɛmán krɛnmɛn sa:
– Ánánkhuthé wrɛ́ khrákhrá lókɔn lo bha ɔn, bánne nɔn óbha gɛ nɛn khɛ́n ábha pí wo khúnbrɛn lókɔn ɛ?
5Ló Jezwi bhi wo sa:
– Kpánhɔn bhɔbhé nɔn ɔ́n pɛ ɛ?
Ló wo nkɛé:
– Lo pɛ kpánhɔn khwache.
6Ló Jezwi chɛ ápasá lée wo chethé yítathé. Lómánji ńkhwɛn kpánhɔn khwache lókɔn, ńna Yankan nansi, ńthwɛ se mɛ́n yíchwɛmán sa wo khwɛ́n lwa ápasá, ló yíchwɛmán khwɛn lwa wo. 7Wo pɛ ácɔn chɛ́-nchɛ́ kpɛ́bɛn lɔ bháne. Jezwi khwɛn, ńna Yankan nansi, ló ńkránman mɛ́n yíchwɛmán lée wo lwa ló lɔ. 8Wo khúnbrɛn wo tha ási wo mɛn. Yíchwɛmán khwɛn lókhúnkhu akha si ńkrwɛbhɛ́ ákhwache, ló wo khwɛn ɔ́nmɔn lo. 9Néphan abha lóne, wo li néphan akpɛn bhwelí nbrɛn-áan. Lómánji Jezwi se wo mɔ́nsi, ló wo lo. 10Lóyámɛ́n, mɛ́n le mɛ́n yíchwɛmán ɔ́nmɔn wo hɛn hran mɛn, ló wo lo Damanutha gotho.
Fariziɛnnɛ́n énɛn hɛ́nmɛntányí bɛn awú
(Ɔ́n wú Mat 16.1-4)
11 Fariziɛnnɛ́n bha, ló wo lo gɛ Jezwi ɔ́nmɔn chre wo étalí bhwe. Wo énɛn wo tɔ bhwe bɛn tú nkɛ, lóhɛ́nthé wo ébhi nkɛ salé nkɛ tɛ́ hɛ́nmɛntányí bɛn khɛ́n ábha chɛ́ wo khɔ́ lóphɔ yɛ́n salé nkɛ sɛ́npɛ́ chan Yankan yé. 12Jezwi fi guphrɛ khrákhrá bɛn, ló ńtɔ sa:
– Bítɛ khɛ́n thénthé khúbhɛ́nɛ́n énɛn salé otɛ́ hɛ́nmɛntányí bɛn sé wo wú ɛ? Mímí mɛɛ́n kranman hɔ́n: obha le tɛ́ hɛ́nmɛntányí brɛ sé wo wú!
13Lómánji ńyɔ wo khwalé no ka hran mɛn, ló ńmúrika dúji.
Fariziɛnnɛ́n le Erɔde ɔ́nmɔn mányan phɔ bhwe
(Ɔ́n wú Mat 16.5-12)
14 Yíchwɛmán lé gɛ sranman nɛnlí, áliali wo, sa kpánhɔn brɛ tɛɛ nɔn wo sranman abha wo hran mɛn. 15Jezwi éha wo, ló mɛ́n nkɛé:
– Tɛmɛ ɔ́n bo hɔ́n bɛn nbrɛn ló ɔ́n há Fariziɛnnɛ́n le Erɔde ɔ́nmɔn mányan phɔ mwanhɛ́n.
16Ló yíchwɛmán ya wo hromɛn étɔ sa:
– Kpánhɔn khɛ́n lo le pɛ nɔn achɛ ánnɛ ncan yábhɛ lókɔn.
17Jezwi yɛn wo bhwe wo étɔ, ló ánmi nkɔn sa:
– Bítɛ hɔ́n étɔlé: nkɛé kpánhɔn khɛ́n lo le pɛ hɛ́nthé ɛ? Wú ɔ́n ne pɛ bhweyɛ́n? Wú ɔ́n ne yé bhwethé? Wú hɔ́n bhweyɛ́n phu? 18Khɔ́ ɔ́n pɛ mɛbhí, wú ɔ́n ne wú yí? Khɔ́ ɔ́n pɛ njɛ, wú ɔ́n ne yé bhwe? 19Lóka mɛn muri kpánhɔn mwannán se néphan akpɛn mwannán tha, lókhúnkhu akha, ńkrwɛbhɛ́ mɛ́n khɛ́n ɔ́n khwɛn ɔ́nmɔn lo ɔn, wú lóbhwe lé di hɔ́n mwanhɛ́n?
– Ló wo nkɛé áwɔ́-mɔn!
20– Ńthé Lóka mɛn muri kpánhɔn ákhwache se néphan akpɛn bhwelí tha, lókhúnkhu akha, ńkrwɛbhɛ́ mɛ́n khɛ́n ɔ́n khwɛn ɔ́nmɔn lo ɔn, wú lóbhwe lé di hɔ́n mwanhɛ́n?
– Ló wo nkɛé ákhwache.
21Ló Jezwi kranman wo sa:
– Lótɛ khɛ́n ɔ́n ne yé lóthé bhrɔ́ɔ́?
Jezwi tɛ Bɛsayida khúbhɛ́ mɛphuwo bɛn phɔ jan
22Wo di Bɛsayida khúbhɛ́, lóne nɔn wo do mɛphuwo bɛn bha se Jezwi, ló wo éla nkɛ sa anpá nkɛ pɛ. 23Jezwi hɔn mɛphuwo mɔ́n pɛ, ńdo nkɛ chan khúbhɛ́ hrómɛn thandi, ló ńtɛ mísɛ́-ndu na nkɛ mɛ tho, lómánji ńkhwɛn mɛ́n mɔ́n tre nkɛ tho, ló ńmi nkɛ sa:
– Wú ɛwú yí bhri bɛn?
24Mɛphuwo je mɛ tho, ló mɛ́n nkɛé:
– Mɛɛ́n fre néphan, mɛn wú wo wo tɛsa ńyá a, khɛ́n wo énɛnsi.
25Jezwi cu khwɛn mɔ́n tre sɛ lókɔn mɛbhí tho npɔ. Ló sɛ lókɔn enɛ́n hɛ́nmɛn-áan, mɛ́n phɔ jan, ló anwú yí khúnbrɛn gbéé. 26Jezwi chɛ nkɛ saji lo nkɛ hwan, ló ńkránman nkɛ sa:
– Ɛle ló ákhúbhɛ́ hrómɛn.
Piɛ étɔ gbée salé Jezwi li Mesi
(Ɔ́n wú Mat 16.13-20; Ɔ́n wú Lwik 9.18-21)
27Lómánji Jezwi le mɛ́n yíchwɛmán ɔ́nmɔn lo ákhúbhɛ́hɔn agbali Sezare Filíphu gotho. Ló ásitó hrómɛn ánmi nkɔn sa:
– Ébí lephan yábhɛ nɔn néphan ebhú salé mɛn ni ɛ?
28Ló wo krɛnmɛn sa:
– Fe nkɛé ɛli Jan-Nduhɛ́nháwo, fe nkɛé ɛli Eli, dɔnbɛn nkɛé bhwetɔ́trémán hrómɛn lephan bɛn nɔn ali hɛ.
29– Ló Jezwi bhi wo sa, ńthé hɔ́n-ɛ, ébí lephan nɔn hɔ́n ebhú salé mɛn ni ɛ?
Ló Piɛ tɔ sa:
– Hɛ nɔn ɛli Mesi.
30Ló Jezwi kranman nkɔn lée nkɔn lé tɔ lóbhwe sé lephan brɛ oyé.
Jezwi étɔ mɛ́n khú le mɛ́n khúnɔn mɛn chánfe ɔ́nmɔn bhwe
(Ɔ́n wú Mat 16.21-28; Ɔ́n wú Lwik 9.22-27)
31Lómánji, Jezwi élie mɛ́n yíchwɛmán yí, ló ántɔ sa:
– Áyɔn sa Lephan Mi olí gbre nkhóo, ló mrɔ́khómán, nphahamán-óthemánhɔn le bidíyɛ́nmán ɔ́nmɔn otɔlé, wo le yɛn. Óbha wɛn, ló ńcíbhí bhwaliá, anchán khúnɔn mɛn fe.
32Ńphwan lóbhwe gbée sé wo. Piɛ do Jezwi ɔ́nmɔn saya njɛ, ló ánpɛgbo sé nkɛ. 33Khɛ́n Jezwi saya, annɛ́n mɛ́n yíchwɛmán, ló ńtɔ bhwe mɛ́n khrákhrá mɛn se Piɛ sa:
– Abhɔsɛ́mɔ́n, chan mɛn phɔ féne! Hɛ hɛ́nphebhú le Yankan ékɛ ɔ́nmɔn le li brɛ, ɛbhú hɛ́nphe sa néphanmiɔn.
34Lótɛ Jezwi che mɛ́n yíchwɛmán le ápasá ɔ́nmɔn bha, ló ńkránman nkɔn sa:
– Lephan kasé ɛ́nɛn ɛbha gɛ mɛn ɔn, áleyɔn sa ɛthɔ́n hɛ bɛn nbrɛn, khɛ́n tɛmɛ ɛhɔ́n hɛ yábhletre, ló ɛgɛ mɛn thá. 35Átɛsalé lephan khɛ́n énɛn abo mɛ́n mɛpɔ́bhá, lephan lókɔn ɔn, mɛ́n mɛpɔ́bhá bha liá. Ló lephan khɛ́n ábha yɔ́ mɛ́n mɛpɔ́bhá ká oliá mɛn le Ábhwe Bhwábhwá ɔ́nmɔn hɛ́nthé, lephan lókɔn ánman do mɛ́n mɛpɔ́bhá nká. 36Ló lephan kasé ɛgɛ áthéji yí khúnbrɛn phu, lókhɛ́n hɛ mɛpɔ́bhá lia ɔn, ébí nɔn ɛ́bha gɛ lóhrómɛn ɛ? 37Wú ápɛ yíbɛn bháne, lephan gɛ bhó swa mɛ́n mɛpɔ́bhá? 38Ló lephan, kasé mɛn le mɛn bhwetɔ́ ɔ́nmɔn phɔ hɛ́ndɛ ehɔ́n hɛ thénthé khúbhɛ́nɛ́n thethé, thénthé khúbhɛ́nɛ́n yíléletɛ́mán lókɔn khɛ́n ále lí mɛ́nbrɛ Yankan phɔ, lóyábhɛ brɛ Lephan Mi lɔ, hɛ phɔ hɛ́ndɛ bha hɔ́n-ɛn, lóka ánman khɔ́ mɛ́n The nguhá hrómɛn má, mɛ́n le mɛ́n Yankan-mranchɛ́mán créncré ɔ́nmɔn.
Ebrié New Testament © Bible Society of Côte D'Ivoire, 1996.
MÁKHI 8
8
Jezwi se néphan akpɛn bhwelí nɛn li
(Ɔ́n wú Mat 15.32-39)
1Lóka lókɔn nɔn ápasá bhróbhrobhé cu bhurɛhɛ́n. Lónian mɛn khɛ́n wo le wú yí lí, lótɛ Jezwi che mɛ́n yíchwɛmán bha, ló ńkránman nkɔn sa:
2– Néphan lókɔn phɔ etɛ́ mɛn nfɛkhu, átɛsalé ńcíbhí bhwaliá nbrɛn-áan nɔn wo chan bha mɛn phɔ, khɛ́n álepɛ yíɛkɛ bhrií wo lí. 3Khɛ́n mɛn nɛn pɔ salé mɛn yɔ́ wo khwalé lo áko mɛn, lósi akhɔ tɛ ɔn, wo sájí hrómɛn áphɔ bha bhé wo ásitó, ló wo bhá hálé. Átɛsalé wo hromɛn, néphan búdúbúdú chan si khɔn bha.
4Lótɛ mɛ́n yíchwɛmán krɛnmɛn sa:
– Ánánkhuthé wrɛ́ khrákhrá lókɔn lo bha ɔn, bánne nɔn óbha gɛ nɛn khɛ́n ábha pí wo khúnbrɛn lókɔn ɛ?
5Ló Jezwi bhi wo sa:
– Kpánhɔn bhɔbhé nɔn ɔ́n pɛ ɛ?
Ló wo nkɛé:
– Lo pɛ kpánhɔn khwache.
6Ló Jezwi chɛ ápasá lée wo chethé yítathé. Lómánji ńkhwɛn kpánhɔn khwache lókɔn, ńna Yankan nansi, ńthwɛ se mɛ́n yíchwɛmán sa wo khwɛ́n lwa ápasá, ló yíchwɛmán khwɛn lwa wo. 7Wo pɛ ácɔn chɛ́-nchɛ́ kpɛ́bɛn lɔ bháne. Jezwi khwɛn, ńna Yankan nansi, ló ńkránman mɛ́n yíchwɛmán lée wo lwa ló lɔ. 8Wo khúnbrɛn wo tha ási wo mɛn. Yíchwɛmán khwɛn lókhúnkhu akha si ńkrwɛbhɛ́ ákhwache, ló wo khwɛn ɔ́nmɔn lo. 9Néphan abha lóne, wo li néphan akpɛn bhwelí nbrɛn-áan. Lómánji Jezwi se wo mɔ́nsi, ló wo lo. 10Lóyámɛ́n, mɛ́n le mɛ́n yíchwɛmán ɔ́nmɔn wo hɛn hran mɛn, ló wo lo Damanutha gotho.
Fariziɛnnɛ́n énɛn hɛ́nmɛntányí bɛn awú
(Ɔ́n wú Mat 16.1-4)
11 Fariziɛnnɛ́n bha, ló wo lo gɛ Jezwi ɔ́nmɔn chre wo étalí bhwe. Wo énɛn wo tɔ bhwe bɛn tú nkɛ, lóhɛ́nthé wo ébhi nkɛ salé nkɛ tɛ́ hɛ́nmɛntányí bɛn khɛ́n ábha chɛ́ wo khɔ́ lóphɔ yɛ́n salé nkɛ sɛ́npɛ́ chan Yankan yé. 12Jezwi fi guphrɛ khrákhrá bɛn, ló ńtɔ sa:
– Bítɛ khɛ́n thénthé khúbhɛ́nɛ́n énɛn salé otɛ́ hɛ́nmɛntányí bɛn sé wo wú ɛ? Mímí mɛɛ́n kranman hɔ́n: obha le tɛ́ hɛ́nmɛntányí brɛ sé wo wú!
13Lómánji ńyɔ wo khwalé no ka hran mɛn, ló ńmúrika dúji.
Fariziɛnnɛ́n le Erɔde ɔ́nmɔn mányan phɔ bhwe
(Ɔ́n wú Mat 16.5-12)
14 Yíchwɛmán lé gɛ sranman nɛnlí, áliali wo, sa kpánhɔn brɛ tɛɛ nɔn wo sranman abha wo hran mɛn. 15Jezwi éha wo, ló mɛ́n nkɛé:
– Tɛmɛ ɔ́n bo hɔ́n bɛn nbrɛn ló ɔ́n há Fariziɛnnɛ́n le Erɔde ɔ́nmɔn mányan phɔ mwanhɛ́n.
16Ló yíchwɛmán ya wo hromɛn étɔ sa:
– Kpánhɔn khɛ́n lo le pɛ nɔn achɛ ánnɛ ncan yábhɛ lókɔn.
17Jezwi yɛn wo bhwe wo étɔ, ló ánmi nkɔn sa:
– Bítɛ hɔ́n étɔlé: nkɛé kpánhɔn khɛ́n lo le pɛ hɛ́nthé ɛ? Wú ɔ́n ne pɛ bhweyɛ́n? Wú ɔ́n ne yé bhwethé? Wú hɔ́n bhweyɛ́n phu? 18Khɔ́ ɔ́n pɛ mɛbhí, wú ɔ́n ne wú yí? Khɔ́ ɔ́n pɛ njɛ, wú ɔ́n ne yé bhwe? 19Lóka mɛn muri kpánhɔn mwannán se néphan akpɛn mwannán tha, lókhúnkhu akha, ńkrwɛbhɛ́ mɛ́n khɛ́n ɔ́n khwɛn ɔ́nmɔn lo ɔn, wú lóbhwe lé di hɔ́n mwanhɛ́n?
– Ló wo nkɛé áwɔ́-mɔn!
20– Ńthé Lóka mɛn muri kpánhɔn ákhwache se néphan akpɛn bhwelí tha, lókhúnkhu akha, ńkrwɛbhɛ́ mɛ́n khɛ́n ɔ́n khwɛn ɔ́nmɔn lo ɔn, wú lóbhwe lé di hɔ́n mwanhɛ́n?
– Ló wo nkɛé ákhwache.
21Ló Jezwi kranman wo sa:
– Lótɛ khɛ́n ɔ́n ne yé lóthé bhrɔ́ɔ́?
Jezwi tɛ Bɛsayida khúbhɛ́ mɛphuwo bɛn phɔ jan
22Wo di Bɛsayida khúbhɛ́, lóne nɔn wo do mɛphuwo bɛn bha se Jezwi, ló wo éla nkɛ sa anpá nkɛ pɛ. 23Jezwi hɔn mɛphuwo mɔ́n pɛ, ńdo nkɛ chan khúbhɛ́ hrómɛn thandi, ló ńtɛ mísɛ́-ndu na nkɛ mɛ tho, lómánji ńkhwɛn mɛ́n mɔ́n tre nkɛ tho, ló ńmi nkɛ sa:
– Wú ɛwú yí bhri bɛn?
24Mɛphuwo je mɛ tho, ló mɛ́n nkɛé:
– Mɛɛ́n fre néphan, mɛn wú wo wo tɛsa ńyá a, khɛ́n wo énɛnsi.
25Jezwi cu khwɛn mɔ́n tre sɛ lókɔn mɛbhí tho npɔ. Ló sɛ lókɔn enɛ́n hɛ́nmɛn-áan, mɛ́n phɔ jan, ló anwú yí khúnbrɛn gbéé. 26Jezwi chɛ nkɛ saji lo nkɛ hwan, ló ńkránman nkɛ sa:
– Ɛle ló ákhúbhɛ́ hrómɛn.
Piɛ étɔ gbée salé Jezwi li Mesi
(Ɔ́n wú Mat 16.13-20; Ɔ́n wú Lwik 9.18-21)
27Lómánji Jezwi le mɛ́n yíchwɛmán ɔ́nmɔn lo ákhúbhɛ́hɔn agbali Sezare Filíphu gotho. Ló ásitó hrómɛn ánmi nkɔn sa:
– Ébí lephan yábhɛ nɔn néphan ebhú salé mɛn ni ɛ?
28Ló wo krɛnmɛn sa:
– Fe nkɛé ɛli Jan-Nduhɛ́nháwo, fe nkɛé ɛli Eli, dɔnbɛn nkɛé bhwetɔ́trémán hrómɛn lephan bɛn nɔn ali hɛ.
29– Ló Jezwi bhi wo sa, ńthé hɔ́n-ɛ, ébí lephan nɔn hɔ́n ebhú salé mɛn ni ɛ?
Ló Piɛ tɔ sa:
– Hɛ nɔn ɛli Mesi.
30Ló Jezwi kranman nkɔn lée nkɔn lé tɔ lóbhwe sé lephan brɛ oyé.
Jezwi étɔ mɛ́n khú le mɛ́n khúnɔn mɛn chánfe ɔ́nmɔn bhwe
(Ɔ́n wú Mat 16.21-28; Ɔ́n wú Lwik 9.22-27)
31Lómánji, Jezwi élie mɛ́n yíchwɛmán yí, ló ántɔ sa:
– Áyɔn sa Lephan Mi olí gbre nkhóo, ló mrɔ́khómán, nphahamán-óthemánhɔn le bidíyɛ́nmán ɔ́nmɔn otɔlé, wo le yɛn. Óbha wɛn, ló ńcíbhí bhwaliá, anchán khúnɔn mɛn fe.
32Ńphwan lóbhwe gbée sé wo. Piɛ do Jezwi ɔ́nmɔn saya njɛ, ló ánpɛgbo sé nkɛ. 33Khɛ́n Jezwi saya, annɛ́n mɛ́n yíchwɛmán, ló ńtɔ bhwe mɛ́n khrákhrá mɛn se Piɛ sa:
– Abhɔsɛ́mɔ́n, chan mɛn phɔ féne! Hɛ hɛ́nphebhú le Yankan ékɛ ɔ́nmɔn le li brɛ, ɛbhú hɛ́nphe sa néphanmiɔn.
34Lótɛ Jezwi che mɛ́n yíchwɛmán le ápasá ɔ́nmɔn bha, ló ńkránman nkɔn sa:
– Lephan kasé ɛ́nɛn ɛbha gɛ mɛn ɔn, áleyɔn sa ɛthɔ́n hɛ bɛn nbrɛn, khɛ́n tɛmɛ ɛhɔ́n hɛ yábhletre, ló ɛgɛ mɛn thá. 35Átɛsalé lephan khɛ́n énɛn abo mɛ́n mɛpɔ́bhá, lephan lókɔn ɔn, mɛ́n mɛpɔ́bhá bha liá. Ló lephan khɛ́n ábha yɔ́ mɛ́n mɛpɔ́bhá ká oliá mɛn le Ábhwe Bhwábhwá ɔ́nmɔn hɛ́nthé, lephan lókɔn ánman do mɛ́n mɛpɔ́bhá nká. 36Ló lephan kasé ɛgɛ áthéji yí khúnbrɛn phu, lókhɛ́n hɛ mɛpɔ́bhá lia ɔn, ébí nɔn ɛ́bha gɛ lóhrómɛn ɛ? 37Wú ápɛ yíbɛn bháne, lephan gɛ bhó swa mɛ́n mɛpɔ́bhá? 38Ló lephan, kasé mɛn le mɛn bhwetɔ́ ɔ́nmɔn phɔ hɛ́ndɛ ehɔ́n hɛ thénthé khúbhɛ́nɛ́n thethé, thénthé khúbhɛ́nɛ́n yíléletɛ́mán lókɔn khɛ́n ále lí mɛ́nbrɛ Yankan phɔ, lóyábhɛ brɛ Lephan Mi lɔ, hɛ phɔ hɛ́ndɛ bha hɔ́n-ɛn, lóka ánman khɔ́ mɛ́n The nguhá hrómɛn má, mɛ́n le mɛ́n Yankan-mranchɛ́mán créncré ɔ́nmɔn.
Ebrié New Testament © Bible Society of Côte D'Ivoire, 1996.