MÁKHI 6
6
Nazarɛ́thi khúbhɛ́nɛ́n le bhú Jezwi mímí
(Ɔ́n wú Mat 13.53-58; Ɔ́n wú Lwik 4.16-30)
1Jezwi chan lóne lo ákhúbhɛ́ si wo gbɛ, ló mɛ́n yíchwɛmán gɛ thá ɔ́nmɔn lo. 2Saba cí, ánnie yí hɛ́nbhúrɛ si. Néphan búdúbúdú khɛ́n eyé mɛ́n bhwe, etán wo hɛ́nmɛn, ló wo étɔ sa:
– Bánne nɔn ńgɛ lóyí yábhɛ khúnbrɛn lókɔn ɛ? Bí bhweyɛ́n li lókɔn ńgɛ le hɛ́nmɛntányí khúnbrɛn lókɔn antɛ́ ɛ? 3Wú léli ńyámɛ́nanlíwo, wú léli Mari mi? Nkɛé mɛ́n hɔnsɛ́nhɔn li Jakhi, Joze, Jude le Simɔn? Ló mɛ́n hɔnmiáhɔn wú le bha lo thethé?
Lóbhwe khúnbrɛn lókɔn le dɛn wo bhú Jezwi mímí. 4Lótɛ Jezwi kranman nkɔn sa:
– Ási khúnbrɛn ápɛ ájí se bhwetɔ́tréwo, khɛ́n mɛ́n nbrɛn khúbhɛ́ si oho-e, mɛ́n mándonɛ́n le mɛ́n bháthónɛ́n ɔ́nmɔn hrómɛn nɔn alepɛ jí se.
5Lóne, Jezwi le gɛ tɛ hɛ́nmɛntányí brɛ bhrɔ́ɔ́. Ńmɔ́n pán ńmo tre lɔ́phɔmán kpɛ́bɛn tho, ló ńtɛ wo phɔ jan. 6Ló wo mímíbhú wo le pɛ ɔn, lóbhwe etɛn hɛ́nmɛn.
Jezwi chɛ yíchwɛmán áwɔ́-mɔn yí mɔ́nmɔn mɛn
(Ɔ́n wú Mat 10.5-15; Ɔ́n wú Lwik 9.1-6)
Lómánji, Jezwi lo ákhúbhɛ́ chɛ́-nchɛ́ abha lóne jɛ́ njɛ khúnbrɛn hrómɛn élie yí. 7Ńche mɛ́n yíchwɛmán áwɔ́-mɔn ma, ló ńchɛ wo yí mɔ́nmɔn mɛn. Ńse wo sɛ́npɛ́ salé wo mɔ́n oká nánnánmi phromɛn phromɛnhɔn tho, 8ló ábidí ńmo se wo nɔn ali sa:
– Kasé hɔ́n eló hu, ɔ́n ne sranmán yíɛkɛ kasé áleli áyágrɛ brɛ pán. Ɔ́n ne sranmán kpánhɔn le nzrɔ, ɔ́n ne sranmán jɛtɛn bhá hɔ́n phɔ́su mɛn. 9Ɔ́n há ngbawa phɛ́kɛ́ phɛ́kɛ́ nta, khɛ́n ɔ́n ne sranmán átho ntráliɛ́ lí mɔn.
10Ló ńcu kranman nkɔn sa:
– Lóka ɔ́n di ákhúbhɛ́ bɛn, ábháthó si tɛɛ wo do hɔ́n, ɔ́n chré lóne kábrɛ kábrɛ odi lóka ɔ́n ma chán lóne lo. 11Kasé ási khúnbrɛn tɛɛ ɔ́n di khɛ́n wo le dɛn do hɔ́n, khɛ́n wo le dɛn ye hɔ́n bhwe, ɔ́n chán lóne féne, ló ɔ́n phan hɔ́n ntathé núlu khwá: átɛsa hɔ́n ékranmán wo lée wo há wo bɛn nbrɛn mwanhɛ́n.
12Ló yíchwɛmán lo étɔ Yankan bhwe kranmán néphan lée wo jrɛn wo yítɛ́. 13Wo tranman nánnánmi phromɛn phromɛnhɔn búdúbúdú, wo ha lɔ́phɔmán búdúbúdú nɔ́n phɔ, ló wo phɔ jan.
Jan-Nduhɛ́nháwo khú akhu
(Ɔ́n wú Mat 14.1-12; Ɔ́n wú Lwik 9.7-9)
14Wo tɔ Jezwi phɔ bhwe se Erɔde ye, átɛsalé ńnehɛ́n pi si khúnbrɛn, ló néphan fe étɔlé:
– Jan-Nduhɛ́nháwo nɔn achan khúnɔn mɛn fe! Lóhɛ́nthé nɔn achɛ ńpɛ sɛ́npɛ́ antɛ́ hɛ́nmɛntányí khúnbrɛn lókɔn.
15Lókhɛ́n fe étɔlé:
– Nkɛé Eli nɔn.
Dɔnbɛn cu étɔ sa:
– Ńni bhwetɔ́tréwo, sa godo bhwetɔ́trémán hrómɛn lephan bɛn a.
16Erɔde ka aye lóbhwe lókɔn, ló ántɔ sa:
– Jan-Nduhɛ́nháwo tɛɛ nɔn ali lókɔn! Mɛn chɛ ojan mɛ́n hɛ́nphe, lókhɛ́n ńchan khúnɔn mɛn fe!
17Khankhan mímí, Erɔde chɛ wo hɔn Jan-Nduhɛ́nháwo, wo gɛ nkɛ mɛ́, ló wo hɔn nkɛ ka khúthé. Erɔde yí lókɔn atɛ ɔn, Herodiade ali mɛ́n hɔnsɛ́n Filíphu mia khɛ́n ńmo phɛn hɛ́nthé. 18Ló Jan kranman Erɔde lée: “Ɛle gɛ mɔ́nsi ɛbhó hɛ hɔnsɛ́n mia phɛ́n!” 19Lótɛ Jan phɔ etɛ́ Herodiade thɛ́nyan kpɛ́ɛ́n. Ánnɛn anchɛ́ owɛ́n nkɛ, khɛ́n Erɔde hɛ́nthé, ánnɛn wú lósi ankhɔ́ tɛ́. 20Erɔde esó Jan. Ńyɛn salé nkɛ li lephan bhwá, nkɛ tɛ créncré, lóhɛ́nthé ánbo nkɛ mwámwá. Lóka anyé nkɛ bhwe nkɛ tɔ, álri mɛ́n thɛ́n gbre, lótɛ khɛ́n nkɛ bhwetɔ́ limɛn yé.
21 Ńmwafɛ cí bɛn, Erɔde cí wo ho pá mɛ́n ka asi, Erɔde hɛn nɛn khóo bɛn se mɛ́n khúbhɛ́límán le ngbumán-óthemánhɔn le Galile néphan khónkhó ɔ́nmɔn. 22Herodiade mi bhie thandi ágbanmɛn, ńgbe bhi, ápɔ Erɔde le néphan khɛ́n ńdo ma nɛn mɛ́n ɔ́nmɔn mɛ, ló bhringbi kranman bhiebhri lée:
– Hɛ yí tɛɛ ɛ́nɛn, ɛbhi mɛn, ló man sé hɛ.
23Ló ńmɔ́li mɛ́n phɔ tɔ sa:
– Mɛn mɔ́ hɛ phɔ, kasé hɛ yí tɛɛ ɛpɔ khɛ́n ɛbhi mɛn, man sé hɛ, kasé mɛn bhringbi khúbhɛ́ phɛ́nta bhwá nbrɛn lɔ, man sé hɛ.
24Lótɛ bhiebhri thándi, ló ńmi mɛ́n man sa:
– Ébí nɔn ɛ́nɛn salé mɛn mi ɛ?
Ló mɛ́n man krɛnmɛn sa:
– Ɛbhi Jan-Nduhɛ́nháwo hɛ́nphe.
25Bhiebhri saji gbragbra lo bhringbi yé, ló ńtɔ sa:
– Mɛɛ́n nɛn sa ɛhɔ́n Jan-Nduhɛ́nháwo hɛ́nphe ká agbán phrá mɛn bha sé mɛn thénthé tɛɛ!
26Lópán bhringbi phɔ gbɔn. Khɛ́n mɛ́n phɔ ńmɔ́li néphan ńdo ma nɛnlí hɛ́nmɛn hɛ́nthé, ánnɛn gɛ samɛ́n. 27Ló lóyámɛ́n, ngbumán khɛ́n ébo-e, ńchɛ wo hromɛn lephan bɛn olo hɔ́n Jan-Nduhɛ́nháwo hɛ́nphe bhá. Ngbuwo thandi, ńno khúthékámán-nkhú hrómɛn, ló ńjan Jan hɛ́nphe. 28Ńhɔn hɛ́nphe ka agbán phrá mɛn ma, ńhɔn se bhiebhri, ló bhiebhri hɔn lo se mɛ́n man. 29Ló Jan yíchwɛmán ka aye lóbhwe, wo bha hɔn nkɛ nánmí lo bho.
Jezwi se néphan akpɛn mwannán nɛn li.
(Ɔ́n wú Mat 14.13-21; Ɔ́n wú Lwik 9.10-17; Ɔ́n wú Jan 6.1-14)
30 Krisi-mranchɛ́mán sáji bha Jezwi yé, ló áyí khúnbrɛn khɛ́n wo tɛ le áyí khɛ́n wo lie néphan, wo kan nkɛ lóphɔ hwan. 31Néphan khɛ́n ebhá khɛ́n élo ɔn, wo thubhɔ kpɛ́ɛ́n, áchɛ́se Jezwi le mɛ́n yíchwɛmán ɔ́nmɔn lé gɛ mɔ́nsi khɛ́n álí nɛn lɔ. Lóhɛ́nthé Jezwi kranman yíchwɛmán sa:
– Ɔ́n ma hɛ́n oló ásibɛn ajanbu ká njɛ, ló ɔ́n fikhwá kpɛ́bɛn.
32Ló Jezwi le mɛ́n yíchwɛmán ɔ́nmɔn nchán hɛn ahran mɛn, ló wo lo ásibɛn ajanbu ká njɛ. 33Khɛ́n wo ka wo élo, néphan búdúbúdú wu wo, nkɔn yɛn wo, lótɛ wo chan ákhúbhɛ́ khúnbrɛn hrómɛn thandi wa khɔ thé wo élo lóne, ló wo di lóne khɛ́n áse Jezwi le mɛ́n yíchwɛmán ɔ́nmɔn.
34Lóka Jezwi chan hran mɛn dithé, ńwu ápasá bhróbhrobhé lókɔn, nkɔn phɔ etɛ nfɛkhu, nkɔn tɛ́ nkɔn tɛsa ńgbankhran alepɛ nkɔn bówo hɛ́nthé, ló ńnie wo yí búdúbúdú. 35Ácí lɔ gu phu, khɛ́n yíchwɛmán tigbali Jezwi, ló wo étɔ sa:
– Ácí phɔ lɔ phu, saji krɛn lɔ li ásibɛn ajanbu ká njɛ. 36Lóhɛ́nthé tɛmɛ ɛsé néphan lókɔn mɔ́nsi oló nanmwe le ákhúbhɛ́ agbali phɔ ɔ́nmɔn hrómɛn lo nɛn nɛn phɛ́ lí.
37Ló Jezwi kranman nkɔn sa:
– Hɔ́n nbrɛn ɔ́n sé wo nɛn wo lí!
Khɛ́n wo bhi nkɛ sa:
– Wú ɛ́nɛn sa lo lo phɛ́ nɛn olí fránkhi ya-mɔn bha sé wo lí?
38Lótɛ Jezwi kranman nkɔn sa:
– Kpánhɔn bhɔbhé nɔn abháne ɛ? Ɔ́n no wú a.
Lóka wo bhi lómánji ye, ló wo tɔ sa:
– Kpánhɔn mwannán le ácɔn mɔn tɛɛ nɔn abháne o.
39Lómánji, Jezwi chɛ mɛ́n yíchwɛmán sa wo tɛ́ néphan khúnbrɛn okhwá thé ńbie pɔ́ tho, ágbemɛn gbemɛn. 40Ló wo khwa thé ńmɔ-mwannán le ágrebhɛ-áwɔ́ ɔ́nmɔn gbemɛn gbemɛn. 41Lótɛ Jezwi khwɛn kpánhɔn mwannán le ácɔn mɔn lókɔn, ńgbɛnɛn wu tho, ló ńna Yankan nansi. Ńthwɛ kpánhɔn, ńkhwɛn se yíchwɛmán sa wo lwa sé néphan, ló ńnwa ácɔn mɔn lɔ se wo khúnbrɛn. 42Wo khúnbrɛn wo tha, ló ási wo mɛn. 43Yíchwɛmán khwɛn kpánhɔn le ácɔn tháthá akha, ási ńkrwɛbhɛ́ áwɔ́-mɔn. 44Néphan khɛ́n atha kpánhɔn lókɔn, wo li ńsɛ akpɛn-mwannán.
Jezwi énɛnsi duphé tho
(Ɔ́n wú Mat 14.22-33; Ɔ́n wú Jan 6.15-21)
45Lóyámɛ́n, Jezwi si mɛ́n yíchwɛmán hɛn hran mɛn salé nkɔn bhuriká dúji, Bɛsayida khúbhɛ́ njɛ khɛ́n ose. Lóka lókɔn nɔn mɛ́n nbrɛn ansé ápasá mɔ́nsi olo. 46Mɛ́n ka ńyɔ nkɔn khwa, ńno ábhóbhó bɛn tho ánna Yankan. 47Lóka ácí gu, ahran di duphé thethé, ló Jezwi míbrɛ ya dumɛ́n. 48Anwú sa áyí ekhú mɛ́n yíchwɛmán phɔ ábɛlwa mɛn, átɛsalé wo sa hɛ́nmɛn nrwɛn áphɛ́phrɛ mɛ si. Lóka ácí gu mɔn, ńnɛ́nsi nkhɔ ndu tho ánno gɛ mɛ́n yíchwɛmán, ló ánnɛn anbɛn nkɔn hɛ́n. 49Lóka wo wu nkɛ ndu tho, wo bhu salé nɔ́nkrwan bɛn, ló wo élu nkhwɛ́, 50átɛsa wo khúnbrɛn wo ewú nkɛ, ló ákhwíthá ka wo hromɛn. Khɛ́n lóyámɛ́n, ńkránman nkɔn sa:
– Mɛɛ́n nbrɛn nɔn, ɔ́n khɔnmán phɔ, ɔ́n ne sókhú!
51Lótɛ ńpha ka hran mɛn, ńchre wo njɛ, ló áphɛ́phrɛ dɔnya. Lóbhwe etán yíchwɛmán hɛ́nmɛn kpɛ́ɛ́n, 52átɛsalé wo le ye kpánhɔn phɔ hɛ́nmɛntányí. Wo bhweyɛ́n lé gɛ chɛ́ wo khɛ́n wo yɛ́n lóthé.
Jezwi tɛ lɔ́phɔmán phɔ jan Jenezarɛ́thi gotho
(Ɔ́n wú Mat 14.34-36)
53Wo bhurika dúji, wo sɛlé Jenezarɛ́thi gotho, ló wo hɔn wo hran mwɛnli dumɛ́n. 54Wo ka wo chan ahran mɛn thandi, néphan yɛn Jezwi. 55Wo chan ágotho jɛ́ njɛ khúnbrɛn wá bha. Ási tɛɛ néphan ye Jezwi tɔ́, wo chán lóne khwɛ́n lɔ́phɔmán lá ntɛ́trɛ tho bhá Jezwi yé. 56Ló ási khúnbrɛn tɛɛ Jezwi élo, ákhúbhɛ́ chɛ́-nchɛ́ hrómɛn o, ákhúbhɛ́ khónkhó hrómɛn o, nanmwe mɛn o, néphan khwɛ́n lɔ́phɔmán bha lá bhácathé, ló wo la Jezwi sa nkɛ sé nkɔn mɔ́nsi nkɔn pá nkɛ ntráliɛ́ mɛ́n nwɛ́ pɛ. Ló néphan tɛɛ apa pɛ, wo phɔ jan.
Ebrié New Testament © Bible Society of Côte D'Ivoire, 1996.
MÁKHI 6
6
Nazarɛ́thi khúbhɛ́nɛ́n le bhú Jezwi mímí
(Ɔ́n wú Mat 13.53-58; Ɔ́n wú Lwik 4.16-30)
1Jezwi chan lóne lo ákhúbhɛ́ si wo gbɛ, ló mɛ́n yíchwɛmán gɛ thá ɔ́nmɔn lo. 2Saba cí, ánnie yí hɛ́nbhúrɛ si. Néphan búdúbúdú khɛ́n eyé mɛ́n bhwe, etán wo hɛ́nmɛn, ló wo étɔ sa:
– Bánne nɔn ńgɛ lóyí yábhɛ khúnbrɛn lókɔn ɛ? Bí bhweyɛ́n li lókɔn ńgɛ le hɛ́nmɛntányí khúnbrɛn lókɔn antɛ́ ɛ? 3Wú léli ńyámɛ́nanlíwo, wú léli Mari mi? Nkɛé mɛ́n hɔnsɛ́nhɔn li Jakhi, Joze, Jude le Simɔn? Ló mɛ́n hɔnmiáhɔn wú le bha lo thethé?
Lóbhwe khúnbrɛn lókɔn le dɛn wo bhú Jezwi mímí. 4Lótɛ Jezwi kranman nkɔn sa:
– Ási khúnbrɛn ápɛ ájí se bhwetɔ́tréwo, khɛ́n mɛ́n nbrɛn khúbhɛ́ si oho-e, mɛ́n mándonɛ́n le mɛ́n bháthónɛ́n ɔ́nmɔn hrómɛn nɔn alepɛ jí se.
5Lóne, Jezwi le gɛ tɛ hɛ́nmɛntányí brɛ bhrɔ́ɔ́. Ńmɔ́n pán ńmo tre lɔ́phɔmán kpɛ́bɛn tho, ló ńtɛ wo phɔ jan. 6Ló wo mímíbhú wo le pɛ ɔn, lóbhwe etɛn hɛ́nmɛn.
Jezwi chɛ yíchwɛmán áwɔ́-mɔn yí mɔ́nmɔn mɛn
(Ɔ́n wú Mat 10.5-15; Ɔ́n wú Lwik 9.1-6)
Lómánji, Jezwi lo ákhúbhɛ́ chɛ́-nchɛ́ abha lóne jɛ́ njɛ khúnbrɛn hrómɛn élie yí. 7Ńche mɛ́n yíchwɛmán áwɔ́-mɔn ma, ló ńchɛ wo yí mɔ́nmɔn mɛn. Ńse wo sɛ́npɛ́ salé wo mɔ́n oká nánnánmi phromɛn phromɛnhɔn tho, 8ló ábidí ńmo se wo nɔn ali sa:
– Kasé hɔ́n eló hu, ɔ́n ne sranmán yíɛkɛ kasé áleli áyágrɛ brɛ pán. Ɔ́n ne sranmán kpánhɔn le nzrɔ, ɔ́n ne sranmán jɛtɛn bhá hɔ́n phɔ́su mɛn. 9Ɔ́n há ngbawa phɛ́kɛ́ phɛ́kɛ́ nta, khɛ́n ɔ́n ne sranmán átho ntráliɛ́ lí mɔn.
10Ló ńcu kranman nkɔn sa:
– Lóka ɔ́n di ákhúbhɛ́ bɛn, ábháthó si tɛɛ wo do hɔ́n, ɔ́n chré lóne kábrɛ kábrɛ odi lóka ɔ́n ma chán lóne lo. 11Kasé ási khúnbrɛn tɛɛ ɔ́n di khɛ́n wo le dɛn do hɔ́n, khɛ́n wo le dɛn ye hɔ́n bhwe, ɔ́n chán lóne féne, ló ɔ́n phan hɔ́n ntathé núlu khwá: átɛsa hɔ́n ékranmán wo lée wo há wo bɛn nbrɛn mwanhɛ́n.
12Ló yíchwɛmán lo étɔ Yankan bhwe kranmán néphan lée wo jrɛn wo yítɛ́. 13Wo tranman nánnánmi phromɛn phromɛnhɔn búdúbúdú, wo ha lɔ́phɔmán búdúbúdú nɔ́n phɔ, ló wo phɔ jan.
Jan-Nduhɛ́nháwo khú akhu
(Ɔ́n wú Mat 14.1-12; Ɔ́n wú Lwik 9.7-9)
14Wo tɔ Jezwi phɔ bhwe se Erɔde ye, átɛsalé ńnehɛ́n pi si khúnbrɛn, ló néphan fe étɔlé:
– Jan-Nduhɛ́nháwo nɔn achan khúnɔn mɛn fe! Lóhɛ́nthé nɔn achɛ ńpɛ sɛ́npɛ́ antɛ́ hɛ́nmɛntányí khúnbrɛn lókɔn.
15Lókhɛ́n fe étɔlé:
– Nkɛé Eli nɔn.
Dɔnbɛn cu étɔ sa:
– Ńni bhwetɔ́tréwo, sa godo bhwetɔ́trémán hrómɛn lephan bɛn a.
16Erɔde ka aye lóbhwe lókɔn, ló ántɔ sa:
– Jan-Nduhɛ́nháwo tɛɛ nɔn ali lókɔn! Mɛn chɛ ojan mɛ́n hɛ́nphe, lókhɛ́n ńchan khúnɔn mɛn fe!
17Khankhan mímí, Erɔde chɛ wo hɔn Jan-Nduhɛ́nháwo, wo gɛ nkɛ mɛ́, ló wo hɔn nkɛ ka khúthé. Erɔde yí lókɔn atɛ ɔn, Herodiade ali mɛ́n hɔnsɛ́n Filíphu mia khɛ́n ńmo phɛn hɛ́nthé. 18Ló Jan kranman Erɔde lée: “Ɛle gɛ mɔ́nsi ɛbhó hɛ hɔnsɛ́n mia phɛ́n!” 19Lótɛ Jan phɔ etɛ́ Herodiade thɛ́nyan kpɛ́ɛ́n. Ánnɛn anchɛ́ owɛ́n nkɛ, khɛ́n Erɔde hɛ́nthé, ánnɛn wú lósi ankhɔ́ tɛ́. 20Erɔde esó Jan. Ńyɛn salé nkɛ li lephan bhwá, nkɛ tɛ créncré, lóhɛ́nthé ánbo nkɛ mwámwá. Lóka anyé nkɛ bhwe nkɛ tɔ, álri mɛ́n thɛ́n gbre, lótɛ khɛ́n nkɛ bhwetɔ́ limɛn yé.
21 Ńmwafɛ cí bɛn, Erɔde cí wo ho pá mɛ́n ka asi, Erɔde hɛn nɛn khóo bɛn se mɛ́n khúbhɛ́límán le ngbumán-óthemánhɔn le Galile néphan khónkhó ɔ́nmɔn. 22Herodiade mi bhie thandi ágbanmɛn, ńgbe bhi, ápɔ Erɔde le néphan khɛ́n ńdo ma nɛn mɛ́n ɔ́nmɔn mɛ, ló bhringbi kranman bhiebhri lée:
– Hɛ yí tɛɛ ɛ́nɛn, ɛbhi mɛn, ló man sé hɛ.
23Ló ńmɔ́li mɛ́n phɔ tɔ sa:
– Mɛn mɔ́ hɛ phɔ, kasé hɛ yí tɛɛ ɛpɔ khɛ́n ɛbhi mɛn, man sé hɛ, kasé mɛn bhringbi khúbhɛ́ phɛ́nta bhwá nbrɛn lɔ, man sé hɛ.
24Lótɛ bhiebhri thándi, ló ńmi mɛ́n man sa:
– Ébí nɔn ɛ́nɛn salé mɛn mi ɛ?
Ló mɛ́n man krɛnmɛn sa:
– Ɛbhi Jan-Nduhɛ́nháwo hɛ́nphe.
25Bhiebhri saji gbragbra lo bhringbi yé, ló ńtɔ sa:
– Mɛɛ́n nɛn sa ɛhɔ́n Jan-Nduhɛ́nháwo hɛ́nphe ká agbán phrá mɛn bha sé mɛn thénthé tɛɛ!
26Lópán bhringbi phɔ gbɔn. Khɛ́n mɛ́n phɔ ńmɔ́li néphan ńdo ma nɛnlí hɛ́nmɛn hɛ́nthé, ánnɛn gɛ samɛ́n. 27Ló lóyámɛ́n, ngbumán khɛ́n ébo-e, ńchɛ wo hromɛn lephan bɛn olo hɔ́n Jan-Nduhɛ́nháwo hɛ́nphe bhá. Ngbuwo thandi, ńno khúthékámán-nkhú hrómɛn, ló ńjan Jan hɛ́nphe. 28Ńhɔn hɛ́nphe ka agbán phrá mɛn ma, ńhɔn se bhiebhri, ló bhiebhri hɔn lo se mɛ́n man. 29Ló Jan yíchwɛmán ka aye lóbhwe, wo bha hɔn nkɛ nánmí lo bho.
Jezwi se néphan akpɛn mwannán nɛn li.
(Ɔ́n wú Mat 14.13-21; Ɔ́n wú Lwik 9.10-17; Ɔ́n wú Jan 6.1-14)
30 Krisi-mranchɛ́mán sáji bha Jezwi yé, ló áyí khúnbrɛn khɛ́n wo tɛ le áyí khɛ́n wo lie néphan, wo kan nkɛ lóphɔ hwan. 31Néphan khɛ́n ebhá khɛ́n élo ɔn, wo thubhɔ kpɛ́ɛ́n, áchɛ́se Jezwi le mɛ́n yíchwɛmán ɔ́nmɔn lé gɛ mɔ́nsi khɛ́n álí nɛn lɔ. Lóhɛ́nthé Jezwi kranman yíchwɛmán sa:
– Ɔ́n ma hɛ́n oló ásibɛn ajanbu ká njɛ, ló ɔ́n fikhwá kpɛ́bɛn.
32Ló Jezwi le mɛ́n yíchwɛmán ɔ́nmɔn nchán hɛn ahran mɛn, ló wo lo ásibɛn ajanbu ká njɛ. 33Khɛ́n wo ka wo élo, néphan búdúbúdú wu wo, nkɔn yɛn wo, lótɛ wo chan ákhúbhɛ́ khúnbrɛn hrómɛn thandi wa khɔ thé wo élo lóne, ló wo di lóne khɛ́n áse Jezwi le mɛ́n yíchwɛmán ɔ́nmɔn.
34Lóka Jezwi chan hran mɛn dithé, ńwu ápasá bhróbhrobhé lókɔn, nkɔn phɔ etɛ nfɛkhu, nkɔn tɛ́ nkɔn tɛsa ńgbankhran alepɛ nkɔn bówo hɛ́nthé, ló ńnie wo yí búdúbúdú. 35Ácí lɔ gu phu, khɛ́n yíchwɛmán tigbali Jezwi, ló wo étɔ sa:
– Ácí phɔ lɔ phu, saji krɛn lɔ li ásibɛn ajanbu ká njɛ. 36Lóhɛ́nthé tɛmɛ ɛsé néphan lókɔn mɔ́nsi oló nanmwe le ákhúbhɛ́ agbali phɔ ɔ́nmɔn hrómɛn lo nɛn nɛn phɛ́ lí.
37Ló Jezwi kranman nkɔn sa:
– Hɔ́n nbrɛn ɔ́n sé wo nɛn wo lí!
Khɛ́n wo bhi nkɛ sa:
– Wú ɛ́nɛn sa lo lo phɛ́ nɛn olí fránkhi ya-mɔn bha sé wo lí?
38Lótɛ Jezwi kranman nkɔn sa:
– Kpánhɔn bhɔbhé nɔn abháne ɛ? Ɔ́n no wú a.
Lóka wo bhi lómánji ye, ló wo tɔ sa:
– Kpánhɔn mwannán le ácɔn mɔn tɛɛ nɔn abháne o.
39Lómánji, Jezwi chɛ mɛ́n yíchwɛmán sa wo tɛ́ néphan khúnbrɛn okhwá thé ńbie pɔ́ tho, ágbemɛn gbemɛn. 40Ló wo khwa thé ńmɔ-mwannán le ágrebhɛ-áwɔ́ ɔ́nmɔn gbemɛn gbemɛn. 41Lótɛ Jezwi khwɛn kpánhɔn mwannán le ácɔn mɔn lókɔn, ńgbɛnɛn wu tho, ló ńna Yankan nansi. Ńthwɛ kpánhɔn, ńkhwɛn se yíchwɛmán sa wo lwa sé néphan, ló ńnwa ácɔn mɔn lɔ se wo khúnbrɛn. 42Wo khúnbrɛn wo tha, ló ási wo mɛn. 43Yíchwɛmán khwɛn kpánhɔn le ácɔn tháthá akha, ási ńkrwɛbhɛ́ áwɔ́-mɔn. 44Néphan khɛ́n atha kpánhɔn lókɔn, wo li ńsɛ akpɛn-mwannán.
Jezwi énɛnsi duphé tho
(Ɔ́n wú Mat 14.22-33; Ɔ́n wú Jan 6.15-21)
45Lóyámɛ́n, Jezwi si mɛ́n yíchwɛmán hɛn hran mɛn salé nkɔn bhuriká dúji, Bɛsayida khúbhɛ́ njɛ khɛ́n ose. Lóka lókɔn nɔn mɛ́n nbrɛn ansé ápasá mɔ́nsi olo. 46Mɛ́n ka ńyɔ nkɔn khwa, ńno ábhóbhó bɛn tho ánna Yankan. 47Lóka ácí gu, ahran di duphé thethé, ló Jezwi míbrɛ ya dumɛ́n. 48Anwú sa áyí ekhú mɛ́n yíchwɛmán phɔ ábɛlwa mɛn, átɛsalé wo sa hɛ́nmɛn nrwɛn áphɛ́phrɛ mɛ si. Lóka ácí gu mɔn, ńnɛ́nsi nkhɔ ndu tho ánno gɛ mɛ́n yíchwɛmán, ló ánnɛn anbɛn nkɔn hɛ́n. 49Lóka wo wu nkɛ ndu tho, wo bhu salé nɔ́nkrwan bɛn, ló wo élu nkhwɛ́, 50átɛsa wo khúnbrɛn wo ewú nkɛ, ló ákhwíthá ka wo hromɛn. Khɛ́n lóyámɛ́n, ńkránman nkɔn sa:
– Mɛɛ́n nbrɛn nɔn, ɔ́n khɔnmán phɔ, ɔ́n ne sókhú!
51Lótɛ ńpha ka hran mɛn, ńchre wo njɛ, ló áphɛ́phrɛ dɔnya. Lóbhwe etán yíchwɛmán hɛ́nmɛn kpɛ́ɛ́n, 52átɛsalé wo le ye kpánhɔn phɔ hɛ́nmɛntányí. Wo bhweyɛ́n lé gɛ chɛ́ wo khɛ́n wo yɛ́n lóthé.
Jezwi tɛ lɔ́phɔmán phɔ jan Jenezarɛ́thi gotho
(Ɔ́n wú Mat 14.34-36)
53Wo bhurika dúji, wo sɛlé Jenezarɛ́thi gotho, ló wo hɔn wo hran mwɛnli dumɛ́n. 54Wo ka wo chan ahran mɛn thandi, néphan yɛn Jezwi. 55Wo chan ágotho jɛ́ njɛ khúnbrɛn wá bha. Ási tɛɛ néphan ye Jezwi tɔ́, wo chán lóne khwɛ́n lɔ́phɔmán lá ntɛ́trɛ tho bhá Jezwi yé. 56Ló ási khúnbrɛn tɛɛ Jezwi élo, ákhúbhɛ́ chɛ́-nchɛ́ hrómɛn o, ákhúbhɛ́ khónkhó hrómɛn o, nanmwe mɛn o, néphan khwɛ́n lɔ́phɔmán bha lá bhácathé, ló wo la Jezwi sa nkɛ sé nkɔn mɔ́nsi nkɔn pá nkɛ ntráliɛ́ mɛ́n nwɛ́ pɛ. Ló néphan tɛɛ apa pɛ, wo phɔ jan.
Ebrié New Testament © Bible Society of Côte D'Ivoire, 1996.