MÁKHI 14
14
Athemánhɔn énɛn Jezwi wɛ́n si
(Ɔ́n wú Mat 26.1-5; Ɔ́n wú Lwik 22.1-2; Ɔ́n wú Jan 11.45-53)
1Ákha ńcíbhí mɔn khɛ́n olí Phákhe fɛ́thi le fɛ́thi khɛ́n óle há mányan kpánhɔn hromɛn. Nphahamán-óthemánhɔn le bidíyɛ́nmán ɔ́nmɔn énɛn lósi akhɔ́ hrɔman hɔ́n Jezwi lo wɛ́n. 2Khankhan mímí, wo tɔ sa:
– Lo bha lé gɛ hɔ́n-ɛn fɛ́thi hromɛn. Kasé ole ha mwanhɛ́n, ábha jrɛn ápasá di.
Bhie bɛn hɔn nɔ́ndu saha Jezwi hɛ́nthé
(Ɔ́n wú Mat 26.6-13; Ɔ́n wú Jan 12.1-8)
3Jezwi bha Betani khúbhɛ́, ńnɛ Simɔn khokhóbhé-phɔ́wo hwan. Lóka ńchre nɛn mɛ́n, lótɛ bhie bɛn lɛ ka bháthó. Bhie lókɔn, ńsránman akran kprankpran bɛn ńnɔ́ndu asɔ́n yɔ́n jɛ khóo obho nari bhwá nbrɛn tɛ bha lóhrómɛn. Ńha akran mɛ́n mɔ, ló ńhɔn nɔ́ndu saha Jezwi hɛ́nthé. 4Lópán ńthɛ́nyan ka néphan fe abha lóne hrómɛn, ló wo ya wo thethé wo étɔ sa:
– Bí hɛ́nthé khɛ́n ńhɔn nɔ́ndu lókɔn sakhwa phɛ́phrɛ mɛn nɔ nɛn? 5Ógɛ hɔ́n phɛ́lí do fránkhi ya-bhwaliá, ló okhwɛ́n lwa gbremán!
Ló wo élrɛ bhie lókɔn bhwe mɛ́n khrákhrá mɛn! 6Lókhɛ́n Jezwi tɔ sa:
– Ɔ́n yɔ́ bhie lókɔn kálé jɛɛn. Bítɛ khɛ́n hɔ́n élri nkɛ gbre yábhɛ nɛn? Áyíbhwá khóo nɔn ńtɛ se mɛn. 7Gbremán bha hɔ́n thethé ácí khúnbrɛn. Ákakhúnbrɛn tɛɛ ɔ́n pɔ, ɔ́n gɛ tɛ́ wo mwá, khɛ́n mɛn-ɛ, mɛn man nɛ́n má hɔ́n thethé ácí khúnbrɛn. 8Bhie lókɔn tɛ mɛ́n yí ángɛ tɛ́: ńhɔn nɔ́ndu ha mɛn nánmí phɔ kábrɛ tre se lócí wo bhá bhó mɛn. 9Mímí mɛɛ́n kranmán hɔ́n: áthéji krɛn, ási khúnbrɛn tɛɛ wo bhá tɔ Ábhwe Bhwábhwá lókɔn phɔ bhwe ɔn, bhie lókɔn yí atɛ, lólɔ wo bhá tɔ lóbhwe, ló mɛ́n bhwe bha di néphan khúnbrɛn mwanhɛ́n.
Judasi énɛn ahɔ́n Jezwi sé nphahamán-óthemánhɔn
(Ɔ́n wú Mat 26.14-16; Ɔ́n wú Lwik 22.3-6)
10Lótɛ Judasi ali yíchwɛmán áwɔ́-mɔn hrómɛn lephan lo nphahamán-óthemánhɔn yé salé anhɔ́n Jezwi sé nkɔn wɛ́n. 11Mɛ́n bhwe ńtɔ ɔn, ákhwa wo khúnbrɛn hɛ́nmɛnlé, ló wo tɔtre salé wo bhá sé nkɛ jɛtɛn. Ló Judasi énɛn ási oká khɛ́n anhɔ́n Jezwi sé nkɔn.
Jezwi le mɛ́n yíchwɛmán ɔ́nmɔn elí Phákhe nɛn
(Ɔ́n wú Mat 26.17-25; Ɔ́n wú Lwik 22.7-14,21-23; Ɔ́n wú Jan 13.21-30)
12Fɛ́thi cí brɛ athwasi khɛ́n óle há mányan kpánhɔn hromɛn, ali ácí owɛ́n ngbankhran miɔn ha npha lí Phákhe nɛn, lócí lókɔn nɔn yíchwɛmán ébhi Jezwi sa:
– Bánne nɔn ɛpɔ salé olo cɔ Phákhe nɛn tɛ́tré hɛ lé ɛ?
13Lótɛ Jezwi chɛ mɛ́n yíchwɛmán hrómɛn lephan mɔn yí, ló ńtɔ sa:
– Ɔ́n nó ákhúbhɛ́ hrómɛn, ɔ́n ma ywɛnlí sɛ bɛn athe ńdu bhwe, ló ɔ́n gɛ thá ɔ́nmɔn lo. 14Ábháthó si khɛ́n ńnɛ, ɔ́n kranmán ábháthó-óthe lée: “Yíliéwo ébhi lée: Ka mɛ́n khúthé si mɛ́n le mɛ́n yíchwɛmán ɔ́nmɔn wo bhá lí Phákhe nɛn e?” 15Ló ánman nie hɔ́n khúthé khóo bɛn abha nkhú tho. Otɛtre phu, ńyákhru khúnbrɛn bháne, lóne nɔn ɔ́n ma cɔ nɛn tɛ́tré.
16Yíchwɛmán thándi, ló wo lo ákhúbhɛ́ hrómɛn. Jezwi bhwe tɛɛ atɔ ɔn, wo priman gɛ lóyí khúnbrɛn simɛ́n, ló wo cɔ Phákhe nɛn tɛtre.
17Lóka ácí hɛn njuka, Jezwi le mɛ́n yíchwɛmán áwɔ́-mɔn bha. 18Wo ka wo khwa tábrɛ mɛ́n wo elí nɛn, lótɛ Jezwi tɔ sa:
– Mímí mɛɛ́n kranmán hɔ́n: hɔ́n hrómɛn lephan bɛn khɛ́n agɛ mɛn ɔ́nmɔn elí nɛn, ebhá hɔ́n mɛn phɛ́ lí.
19Áphɔ gbɔn yíchwɛmán khúnbrɛn ló wo ébhi Jezwi brɛ brɛ mɛn sa:
– Wú mɛn?
20Ló Jezwi kranman nkɔn sa:
– Hɔ́n áwɔ́-mɔnmán hrómɛn lephan bɛn, lephan khɛ́n agɛ mɛn ɔ́nmɔn bho kpánhɔn esɔ́ nɛn mɛn. 21Khankhan mímí Lephan Mi bha khú, sa lósi Yankan hrɔ́ khɔ tɔ mɛ́n phɔ bhwe tre. Khɛ́n muswe bhwá agɛ lephan khɛ́n ahɔn Lephan Mi phɛli e! Mɛ́n lókɔn, anyɛ́n nɛn ka wo bha lé ho-e!
Ńnɛn Créncré
(Ɔ́n wú Mat 26.26-30; Ɔ́n wú Lwik 22.15-20; 1Khor 11.23-25)
22Lóka wo elí nɛn, Jezwi bho kpánhɔn, mɛ́n ka ńna Yankan nansi, ńthwɛ, ńmo se mɛ́n yíchwɛmán, ló ńkránman nkɔn sa:
– Ɔ́n mó kpánhɔn lókɔn, lónɔn ali mɛn nánmí.
23Lómánji, ńhɔn áyábhɔ́ khɛ́n divɛn bha lóhrómɛn. Lóka ńna Yankan nansi phu, ńhɔn se nkɔn, ló wo khúnbrɛn wo nan pi wo nbrɛn, 24ló ńkránman nkɔn sa:
– Lókɔn nɔn ali mɛn nká, ńká ali akprɔbha khɛ́n wo si Yankan hromɛn, ali ńká akhwalé se néphan búdúbúdú. 25Mímí mɛɛ́n kranmán hɔ́n: mɛn man nɛ́n cu nán divɛn npɔhɔ́n, kábrɛ kábrɛ ábha di ácí khɛ́n mán cu nán divɛn pɔ́pɔ́ Yankan Bhringbi khúbhɛ́.
26Lómánji wo kho fɛ́thi nanmɛ, ló wo lo Olive-nyá bhóbhó tho.
Jezwi étɔlé, Piɛ bha samɛ́n lée nkɛ le yɛn
(Ɔ́n wú Mat 26.31-35; Ɔ́n wú Lwik 22.31-34; Ɔ́n wú Jan 13.36-38)
27Ló Jezwi cu kranman mɛ́n yíchwɛmán sa:
– Hɔ́n khúnbrɛn ɔ́n ma chán mɛn phɔ wá féne, átɛsalé Yankan hrɔ́ hrómɛn, wo lrɛ tre salé: “Man wɛ́n gbankhran-bówo, ló ńgbankhran khúnbrɛn bha chranmanlé.” 28Khɛ́n Jezwi cu tɔ sa, mɛn ka mán chán khúnɔn mɛn fe ɔn, mán no bo hɔ́n Galile.
29Ló Piɛ kranman nkɛ sa:
– Kasé krɛnnɛ́nhɔn khúnbrɛn eyɔ́ hɛ ká wá féne lɔ, mɛn-ɛ mɛn man nɛ́n yɔ́ hɛ ká bhrɔ́ɔ́.
30Ló Jezwi krɛnmɛn sa:
– Mímí mɛɛ́n kranmán hɛ: ncɛ́n mréci tɛɛ, chán ɔɔ kɔsɔ thɔ́n lí ndɔn mɔn, ɛ́bhá tɔ ńmɛ́n khrákhrá mɛn ńdɔn bhwaliá lée ɛle yɛn mɛn.
31Khɛ́n Piɛ cu tɔ mɛ́n khrákhrá mɛn npɔ sa:
– Kasé wɛ́n nbrɛn wo ewɛ́n mɛn lɔ, mɛn man nɛ́n tɔ mɛ́n khrákhrá mɛn salé mɛn nɛn yɛn hɛ.
Ló yíchwɛmán krɛnnɛ́n khúnbrɛn tɔ lóbhwe lókɔn brɛ.
Jezwi éla Yankan Jɛsemane
(Ɔ́n wú Mat 26.36-46; Ɔ́n wú Lwik 22.39-46)
32Wo lo wo di ásibɛn óche Jɛsemane, lótɛ Jezwi kranman mɛ́n yíchwɛmán sa:
– Tɛmɛ ɔ́n chré krɛn, mɛɛ́n no na Yankan.
33Ló ńdo Piɛ, Jakhi le Jan ɔ́nmɔn ha phɔ ɔ́nmɔn no. Ákhwíthá kɛ hromɛn, ńthɛ́n eli, 34ló ńkránman nkɔn sa:
– Ábhwephé si mɛn thɛ́n hrómɛn khúnbrɛn, tɛmɛ ɔ́n chré krɛn, ló ɔ́n kámɛlé.
35Ńti no hɛ́nmɛn kpɛɛ́, ló ńjran mɔlé ánna Yankan salé kasé ápɛ mɔ́nsi o, annɛn wú ágbrelí yábhɛ lókɔn mɛbhí, 36ló ántɔ sa:
– O, mɛn Nthe, hɛ ɔn, ɛ́gɛ tɛ́ áyí khúnbrɛn phú, lóhɛ́nthé tɛmɛ ɛhɔ́n áyíkhúphɔ yábhɔ́ lókɔn yɛn mɛn tho. Léli salé mɛn thɛ́n yí apɔ nɔn sáán ɛtɛ́, lókhɛ́n tɛmɛ ɛtɛ́ hɛ nbrɛn thɛ́n yí apɔ.
37Ńsáji ma mɛ́n yíchwɛmán bhwaliá phɔ, khɛ́n ńná khwá wo, ló ánkranmán Piɛ sa:
– Simɔn, wú ńná ka hɛ? Ɛle gɛ kamɛlé li wáchɛn brɛ nwɛ́ lɔ? 38Ɔ́n ká mɛlé chré, ló ɔ́n na Yankan, ochɛ́sé ɔ́n ne hálé ásúwú hrómɛn. Lephan nánnánmi dɛn ya énɛn yíbhwá atɛ, khɛ́n mɛ́n nánmí nɔn enán.
39Ńcu saji no hɛ́nmɛn kpɛ́bɛn ánna Yankan, ló ńcu ántɔ lóbhwe brɛ khɛ́n ásithwá ńphrɛ tɔ. 40Lómánji, ńsáji ma mɛ́n yíchwɛmán phɔ, khɛ́n ńná khwá wo, wo lé gɛ phwan mɛ, saji wo lé wú lóbhwe khɛ́n wo gɛ tɔ sé nkɛ.
41Lóka ńsáji ma ńdɔn bhwaliá hrómɛn, ló ńkránman nkɔn sa:
– Hɔ́n eláná ntɔ́nyán tɛɛ, ló hɔ́n éfikhwá? Átre yɔn! Ácí si, ɔ́n wu a, wo ebhá hɔ́n Lephan Mi há nemán mɔ́n mɛn. 42Ɔ́n chánfe olo! Lephan khɛ́n ebhá hɔ́n mɛn phɛ́lí bha krɛn!
Wo hɔn Jezwi
(Ɔ́n wú Mat 26.47-56; Ɔ́n wú Lwik 22.47-53; Ɔ́n wú Jan 18.3-12)
43Ábhwetɔ́ bha Jezwi míthé ntɔ́nyán tɛɛ, lókhɛ́n Judasi ali yíchwɛmán áwɔ́-mɔn hrómɛn lephan bɛn thandi. Ápasá bhróbhrobhé khwɛn khókhríyan le ńyá ha mɔ́n mɛn gɛ thá ɔ́nmɔn bha. Ló ápasá lókɔn, nphahamán-óthemánhɔn, bidíyɛ́nmán le mrɔ́khómán ɔ́nmɔn nɔn achɛ wo bha. 44Judasi khɛ́n ehɔ́n Jezwi phɛ́lí, lie wo lóyí ánman tɛ́ khɛ́n ábha lie wo lephan ali Jezwi: “Ló mɛ́n nkɛé lephan khɛ́n mɛn mán dɔn mɛ́n ɔn, mɛ́n nɔn ńni lephan hɔ́n énɛn. Ɔ́n khwɛ tho, ló ɔ́n hɔ́n-ɛn kpɛ́ɛ́n ɔ́nmɔn lo.” 45Lóka Judasi di lóne, ńti gbali Jezwi, ló ńche nkɛ:
– Yíliéwo!
Lótɛ ńdɔn nkɛ mɛ́n. 46Krɛnnɛ́n khwa Jezwi tho ló wo hɔn nkɛ. 47Khɛ́n néphan aya lóne, wo hromɛn lephan bɛn ti mɛ́n khókhríyan san, ló ńjan nphaháwo bhrɔ́khó hwan nɛnkhwɛ́nwo njɛ. 48Ló Jezwi bhi nkɔn sa:
– Wú áyɔn se salé ɔ́n khwɛ́n khókhríyan le ńyá ɔ́nmɔn há mɔ́n mɛn bha hɔ́n mɛn, sa mɛn ni khokhroháwo a? 49Mɛn ma hɔ́n thethé ákakhúnbrɛn, mɛn nie yí Yankan-khúthé, khɛ́n ɔ́n ne hɔn mɛn. Áyí ábha chɛ́sé ábhwe khúnbrɛn khɛ́n otɔ abha Yankan hrɔ́ hrómɛn osímɛ́n ɔn, lóyí nɔn etɛ́.
50Lótɛ yíchwɛmán khúnbrɛn yɔ́-ɛ kalé wa féne.
51Sɛbhri bɛn bho Jezwi mánji pɛ élo, ńkhwa kedé. Wo khwɛ tho, 52khɛ́n ńphia mɛ́n kedé nkalé, ló ńwa ndígban mɛn mosi no.
Wo hɔn Jezwi lo Kwabhɔ́mán khónkhó hɛ́nmɛn
(Ɔ́n wú Mat 26.57-68; Ɔ́n wú Lwik 22.54-55,63-71; Ɔ́n wú Jan 18.13-14,19-24)
53Wo hɔn Jezwi ɔ́nmɔn lo nphaháwo bhrɔ́khó hwan, lóne nɔn nphahamán-óthemánhɔn, mrɔ́khómán le bidíyɛ́nmán ɔ́nmɔn bhurɛhɛ́n. 54Piɛ gɛ Jezwi thá, khɛ́n ńma mánji-áan, ńnɛ ka nphaháwo bhrɔ́khó hwan ngbophro, ló ńgɛ sibómán ɔ́nmɔn chre lóne ánkhrwe tɛn.
55Nphahamán-óthemánhɔn le Kwabhɔ́mán khónkhó khúnbrɛn ɔ́nmɔn énɛn ábhwe bɛn wo bhá phɛ́ há Jezwi tho, ló wo wúsi khɔ́ bhɔ́-ɛ pɔn, ló wo wɛn, khɛ́n wo le gɛ. 56Mímí néphan búdúbúdú elí ndalefɛ phɛ́ bhwe há Jezwi tho, khɛ́n wo mɛ́n le sí wo ndalefɛlí hrómɛn. 57Néphan dɔnbɛn lɔ cu fe lo ephɛ́ bhwe há nkɛ tho, ló wo étɔ sa:
58– Lo phrɛ ye mɛ́n nkɛé: “Mɛ́n man ca Yankan-nkhú lókɔn khɛ́n néphan bho mɔ́n than khwálé, ló ńcíbhí bhwaliá tɛɛ, mɛ́n man thán nánkhɛ, ale li néphanmiɔn mɔ́n mɛn ékɛ athan.”
59Lóbhwetɔ́ lókɔn brɛ tho lɔ, wo mɛ́n le sí.
60Lótɛ nphaháwo bhrɔ́khó chánfe ya néphan khúnbrɛn hɛ́nmɛn, ló ánmi Jezwi sa:
– Ábhwe khúnbrɛn lókɔn néphan étɔ há hɛ tho ɔn, wú álepɛ bhwe ɛkɛ ɛ́tɔ?
61Khɛ́n Jezwi lethíí, ńnɛn tɔ bhwe brɛ ka. Lótɛ nphaháwo bhrɔ́khó cu bhi nkɛ sa:
– Wú ɛli Mesi, Yankan khɛ́n ali lephan wo ebhó nguhá se mɛ́n Bhi?
62Ló Jezwi dɛn lée:
– Mɛn tɛɛ é, ló hɔ́n khúnbrɛn ɔ́n ma wú Lephan Mi chré Yankan sɛ́npɛ́wo liémɔn si; ló ɔ́n ma wui ánman khɔ́ mɔngú mɔngú hrómɛn lɔ chántho má.
63Lótɛ nphaháwo bhrɔ́khó ti mɛ́n ntráliɛ́ thwɛ, ló ńtɔ sa:
– Ébí ndalefɛ nankhɛ lo cu lo énɛn npɔ ɛ? 64Khɔ́ ɔ́n ye mɛ́n bhwe ántɔ há Yankan tho. Bí hɛ́nphe hɔ́n ebhú lóphɔ ɛ?
Ló wo khúnbrɛn wo tɔ gbée salé Jezwi li pɔn, ló áyɔn salé owɛ́n.
65Néphan fe abha wo hromɛn ya lóne éphu nkɛ mísɛ́-ndu hɛ́nmɛn, wo bho yí mrwɛn nkɛ hɛ́nmɛn khúnbrɛn, wo édwan nkɛ nyokho, ló wo ébhi nkɛ sa:
– Lephan adi hɛ yí ɛtɔ obhá!
Ló ngbumán lɔ hɔn Jezwi pɛ ébhra ngbaphrá.
Piɛ ésamɛ́n lée mɛ́n nɛ́n yɛn Jezwi
(Ɔ́n wú Mat 26.69-75; Ɔ́n wú Lwik 22.56-62; Ɔ́n wú Jan 18.15-18,25-27)
66Lóka Piɛ bha ngbophro ntɔ́nyán, lóka nɔn nphaháwo bhrɔ́khó hwan nɛnkhwɛ́nya bɛn bha lóne. 67Ńwu Piɛ chre ékhrwe tɛn, ńnɛn nkɛ kɔ́nkɔ́nkɔ́n, ló ńtɔ sa:
– Hɛ lɔ ɛbha Jezwi Nazarɛ́thi sɛ lókɔn phɔ.
68Khɛ́n Piɛ nkɛé chɛchɛ, ló ńtɔ sa:
– Mɛn nɛn wu a, saji mɛn nɛ́n yɛ́n lóbhwe yábhɛ brɛ ɛ́nɛn ɛtɔ.
Ló ńsákhɔ khúmɛ́n thándi ngbophro. Lótɛ kɔsɔ bɛn thɔn. 69Khɛ́n nɛnkhwɛ́nya wui, ló ńcu ánkranmán néphan akhwa lóne lée:
– Sɛ lókɔn lɔ li Jezwi yíchwɛmán hrómɛn lephan bɛn.
70Khɛ́n Piɛ cu tɔ npɔ sa chɛchɛ. Ámɔn kpɛ́bɛn, lótɛ néphan akhwa lóne lɔ cu kranman Piɛ sa:
– Mímí nbrɛn, ɛbha wo hromɛn, átɛsalé hɛ lɔ ɛchan Galile.
71Lótɛ Piɛ nkɛé:
– Kasé mɛn nítan, tɛmɛ Yankan owɛ́n mɛn! Mɛɛ́n mɔlí phɔ tɔ salé mɛn nɛn yɛn lephan lókɔn khɛ́n hɔ́n étɔ mɛ́n bhwe.
72Lóka lókɔn hromɛn brɛ nɔn kɔsɔ bɛn thɔn si ńdɔn mɔn, ló Jezwi bhwe aphrɛ krɛnmɛn ɔn, ádi mwanhɛ́n, lónɔn ali salé: “Kɔsɔ bha lé thɔ́n lí ndɔn mɔn, lókhɛ́n ɛ́bhá tɔ ńmɛ́n khrákhrá mɛn ndɔn bhwaliá salé ɛle yɛn mɛn.” Lótɛ anthɔ́n hɛ́ndu.
Ebrié New Testament © Bible Society of Côte D'Ivoire, 1996.
MÁKHI 14
14
Athemánhɔn énɛn Jezwi wɛ́n si
(Ɔ́n wú Mat 26.1-5; Ɔ́n wú Lwik 22.1-2; Ɔ́n wú Jan 11.45-53)
1Ákha ńcíbhí mɔn khɛ́n olí Phákhe fɛ́thi le fɛ́thi khɛ́n óle há mányan kpánhɔn hromɛn. Nphahamán-óthemánhɔn le bidíyɛ́nmán ɔ́nmɔn énɛn lósi akhɔ́ hrɔman hɔ́n Jezwi lo wɛ́n. 2Khankhan mímí, wo tɔ sa:
– Lo bha lé gɛ hɔ́n-ɛn fɛ́thi hromɛn. Kasé ole ha mwanhɛ́n, ábha jrɛn ápasá di.
Bhie bɛn hɔn nɔ́ndu saha Jezwi hɛ́nthé
(Ɔ́n wú Mat 26.6-13; Ɔ́n wú Jan 12.1-8)
3Jezwi bha Betani khúbhɛ́, ńnɛ Simɔn khokhóbhé-phɔ́wo hwan. Lóka ńchre nɛn mɛ́n, lótɛ bhie bɛn lɛ ka bháthó. Bhie lókɔn, ńsránman akran kprankpran bɛn ńnɔ́ndu asɔ́n yɔ́n jɛ khóo obho nari bhwá nbrɛn tɛ bha lóhrómɛn. Ńha akran mɛ́n mɔ, ló ńhɔn nɔ́ndu saha Jezwi hɛ́nthé. 4Lópán ńthɛ́nyan ka néphan fe abha lóne hrómɛn, ló wo ya wo thethé wo étɔ sa:
– Bí hɛ́nthé khɛ́n ńhɔn nɔ́ndu lókɔn sakhwa phɛ́phrɛ mɛn nɔ nɛn? 5Ógɛ hɔ́n phɛ́lí do fránkhi ya-bhwaliá, ló okhwɛ́n lwa gbremán!
Ló wo élrɛ bhie lókɔn bhwe mɛ́n khrákhrá mɛn! 6Lókhɛ́n Jezwi tɔ sa:
– Ɔ́n yɔ́ bhie lókɔn kálé jɛɛn. Bítɛ khɛ́n hɔ́n élri nkɛ gbre yábhɛ nɛn? Áyíbhwá khóo nɔn ńtɛ se mɛn. 7Gbremán bha hɔ́n thethé ácí khúnbrɛn. Ákakhúnbrɛn tɛɛ ɔ́n pɔ, ɔ́n gɛ tɛ́ wo mwá, khɛ́n mɛn-ɛ, mɛn man nɛ́n má hɔ́n thethé ácí khúnbrɛn. 8Bhie lókɔn tɛ mɛ́n yí ángɛ tɛ́: ńhɔn nɔ́ndu ha mɛn nánmí phɔ kábrɛ tre se lócí wo bhá bhó mɛn. 9Mímí mɛɛ́n kranmán hɔ́n: áthéji krɛn, ási khúnbrɛn tɛɛ wo bhá tɔ Ábhwe Bhwábhwá lókɔn phɔ bhwe ɔn, bhie lókɔn yí atɛ, lólɔ wo bhá tɔ lóbhwe, ló mɛ́n bhwe bha di néphan khúnbrɛn mwanhɛ́n.
Judasi énɛn ahɔ́n Jezwi sé nphahamán-óthemánhɔn
(Ɔ́n wú Mat 26.14-16; Ɔ́n wú Lwik 22.3-6)
10Lótɛ Judasi ali yíchwɛmán áwɔ́-mɔn hrómɛn lephan lo nphahamán-óthemánhɔn yé salé anhɔ́n Jezwi sé nkɔn wɛ́n. 11Mɛ́n bhwe ńtɔ ɔn, ákhwa wo khúnbrɛn hɛ́nmɛnlé, ló wo tɔtre salé wo bhá sé nkɛ jɛtɛn. Ló Judasi énɛn ási oká khɛ́n anhɔ́n Jezwi sé nkɔn.
Jezwi le mɛ́n yíchwɛmán ɔ́nmɔn elí Phákhe nɛn
(Ɔ́n wú Mat 26.17-25; Ɔ́n wú Lwik 22.7-14,21-23; Ɔ́n wú Jan 13.21-30)
12Fɛ́thi cí brɛ athwasi khɛ́n óle há mányan kpánhɔn hromɛn, ali ácí owɛ́n ngbankhran miɔn ha npha lí Phákhe nɛn, lócí lókɔn nɔn yíchwɛmán ébhi Jezwi sa:
– Bánne nɔn ɛpɔ salé olo cɔ Phákhe nɛn tɛ́tré hɛ lé ɛ?
13Lótɛ Jezwi chɛ mɛ́n yíchwɛmán hrómɛn lephan mɔn yí, ló ńtɔ sa:
– Ɔ́n nó ákhúbhɛ́ hrómɛn, ɔ́n ma ywɛnlí sɛ bɛn athe ńdu bhwe, ló ɔ́n gɛ thá ɔ́nmɔn lo. 14Ábháthó si khɛ́n ńnɛ, ɔ́n kranmán ábháthó-óthe lée: “Yíliéwo ébhi lée: Ka mɛ́n khúthé si mɛ́n le mɛ́n yíchwɛmán ɔ́nmɔn wo bhá lí Phákhe nɛn e?” 15Ló ánman nie hɔ́n khúthé khóo bɛn abha nkhú tho. Otɛtre phu, ńyákhru khúnbrɛn bháne, lóne nɔn ɔ́n ma cɔ nɛn tɛ́tré.
16Yíchwɛmán thándi, ló wo lo ákhúbhɛ́ hrómɛn. Jezwi bhwe tɛɛ atɔ ɔn, wo priman gɛ lóyí khúnbrɛn simɛ́n, ló wo cɔ Phákhe nɛn tɛtre.
17Lóka ácí hɛn njuka, Jezwi le mɛ́n yíchwɛmán áwɔ́-mɔn bha. 18Wo ka wo khwa tábrɛ mɛ́n wo elí nɛn, lótɛ Jezwi tɔ sa:
– Mímí mɛɛ́n kranmán hɔ́n: hɔ́n hrómɛn lephan bɛn khɛ́n agɛ mɛn ɔ́nmɔn elí nɛn, ebhá hɔ́n mɛn phɛ́ lí.
19Áphɔ gbɔn yíchwɛmán khúnbrɛn ló wo ébhi Jezwi brɛ brɛ mɛn sa:
– Wú mɛn?
20Ló Jezwi kranman nkɔn sa:
– Hɔ́n áwɔ́-mɔnmán hrómɛn lephan bɛn, lephan khɛ́n agɛ mɛn ɔ́nmɔn bho kpánhɔn esɔ́ nɛn mɛn. 21Khankhan mímí Lephan Mi bha khú, sa lósi Yankan hrɔ́ khɔ tɔ mɛ́n phɔ bhwe tre. Khɛ́n muswe bhwá agɛ lephan khɛ́n ahɔn Lephan Mi phɛli e! Mɛ́n lókɔn, anyɛ́n nɛn ka wo bha lé ho-e!
Ńnɛn Créncré
(Ɔ́n wú Mat 26.26-30; Ɔ́n wú Lwik 22.15-20; 1Khor 11.23-25)
22Lóka wo elí nɛn, Jezwi bho kpánhɔn, mɛ́n ka ńna Yankan nansi, ńthwɛ, ńmo se mɛ́n yíchwɛmán, ló ńkránman nkɔn sa:
– Ɔ́n mó kpánhɔn lókɔn, lónɔn ali mɛn nánmí.
23Lómánji, ńhɔn áyábhɔ́ khɛ́n divɛn bha lóhrómɛn. Lóka ńna Yankan nansi phu, ńhɔn se nkɔn, ló wo khúnbrɛn wo nan pi wo nbrɛn, 24ló ńkránman nkɔn sa:
– Lókɔn nɔn ali mɛn nká, ńká ali akprɔbha khɛ́n wo si Yankan hromɛn, ali ńká akhwalé se néphan búdúbúdú. 25Mímí mɛɛ́n kranmán hɔ́n: mɛn man nɛ́n cu nán divɛn npɔhɔ́n, kábrɛ kábrɛ ábha di ácí khɛ́n mán cu nán divɛn pɔ́pɔ́ Yankan Bhringbi khúbhɛ́.
26Lómánji wo kho fɛ́thi nanmɛ, ló wo lo Olive-nyá bhóbhó tho.
Jezwi étɔlé, Piɛ bha samɛ́n lée nkɛ le yɛn
(Ɔ́n wú Mat 26.31-35; Ɔ́n wú Lwik 22.31-34; Ɔ́n wú Jan 13.36-38)
27Ló Jezwi cu kranman mɛ́n yíchwɛmán sa:
– Hɔ́n khúnbrɛn ɔ́n ma chán mɛn phɔ wá féne, átɛsalé Yankan hrɔ́ hrómɛn, wo lrɛ tre salé: “Man wɛ́n gbankhran-bówo, ló ńgbankhran khúnbrɛn bha chranmanlé.” 28Khɛ́n Jezwi cu tɔ sa, mɛn ka mán chán khúnɔn mɛn fe ɔn, mán no bo hɔ́n Galile.
29Ló Piɛ kranman nkɛ sa:
– Kasé krɛnnɛ́nhɔn khúnbrɛn eyɔ́ hɛ ká wá féne lɔ, mɛn-ɛ mɛn man nɛ́n yɔ́ hɛ ká bhrɔ́ɔ́.
30Ló Jezwi krɛnmɛn sa:
– Mímí mɛɛ́n kranmán hɛ: ncɛ́n mréci tɛɛ, chán ɔɔ kɔsɔ thɔ́n lí ndɔn mɔn, ɛ́bhá tɔ ńmɛ́n khrákhrá mɛn ńdɔn bhwaliá lée ɛle yɛn mɛn.
31Khɛ́n Piɛ cu tɔ mɛ́n khrákhrá mɛn npɔ sa:
– Kasé wɛ́n nbrɛn wo ewɛ́n mɛn lɔ, mɛn man nɛ́n tɔ mɛ́n khrákhrá mɛn salé mɛn nɛn yɛn hɛ.
Ló yíchwɛmán krɛnnɛ́n khúnbrɛn tɔ lóbhwe lókɔn brɛ.
Jezwi éla Yankan Jɛsemane
(Ɔ́n wú Mat 26.36-46; Ɔ́n wú Lwik 22.39-46)
32Wo lo wo di ásibɛn óche Jɛsemane, lótɛ Jezwi kranman mɛ́n yíchwɛmán sa:
– Tɛmɛ ɔ́n chré krɛn, mɛɛ́n no na Yankan.
33Ló ńdo Piɛ, Jakhi le Jan ɔ́nmɔn ha phɔ ɔ́nmɔn no. Ákhwíthá kɛ hromɛn, ńthɛ́n eli, 34ló ńkránman nkɔn sa:
– Ábhwephé si mɛn thɛ́n hrómɛn khúnbrɛn, tɛmɛ ɔ́n chré krɛn, ló ɔ́n kámɛlé.
35Ńti no hɛ́nmɛn kpɛɛ́, ló ńjran mɔlé ánna Yankan salé kasé ápɛ mɔ́nsi o, annɛn wú ágbrelí yábhɛ lókɔn mɛbhí, 36ló ántɔ sa:
– O, mɛn Nthe, hɛ ɔn, ɛ́gɛ tɛ́ áyí khúnbrɛn phú, lóhɛ́nthé tɛmɛ ɛhɔ́n áyíkhúphɔ yábhɔ́ lókɔn yɛn mɛn tho. Léli salé mɛn thɛ́n yí apɔ nɔn sáán ɛtɛ́, lókhɛ́n tɛmɛ ɛtɛ́ hɛ nbrɛn thɛ́n yí apɔ.
37Ńsáji ma mɛ́n yíchwɛmán bhwaliá phɔ, khɛ́n ńná khwá wo, ló ánkranmán Piɛ sa:
– Simɔn, wú ńná ka hɛ? Ɛle gɛ kamɛlé li wáchɛn brɛ nwɛ́ lɔ? 38Ɔ́n ká mɛlé chré, ló ɔ́n na Yankan, ochɛ́sé ɔ́n ne hálé ásúwú hrómɛn. Lephan nánnánmi dɛn ya énɛn yíbhwá atɛ, khɛ́n mɛ́n nánmí nɔn enán.
39Ńcu saji no hɛ́nmɛn kpɛ́bɛn ánna Yankan, ló ńcu ántɔ lóbhwe brɛ khɛ́n ásithwá ńphrɛ tɔ. 40Lómánji, ńsáji ma mɛ́n yíchwɛmán phɔ, khɛ́n ńná khwá wo, wo lé gɛ phwan mɛ, saji wo lé wú lóbhwe khɛ́n wo gɛ tɔ sé nkɛ.
41Lóka ńsáji ma ńdɔn bhwaliá hrómɛn, ló ńkránman nkɔn sa:
– Hɔ́n eláná ntɔ́nyán tɛɛ, ló hɔ́n éfikhwá? Átre yɔn! Ácí si, ɔ́n wu a, wo ebhá hɔ́n Lephan Mi há nemán mɔ́n mɛn. 42Ɔ́n chánfe olo! Lephan khɛ́n ebhá hɔ́n mɛn phɛ́lí bha krɛn!
Wo hɔn Jezwi
(Ɔ́n wú Mat 26.47-56; Ɔ́n wú Lwik 22.47-53; Ɔ́n wú Jan 18.3-12)
43Ábhwetɔ́ bha Jezwi míthé ntɔ́nyán tɛɛ, lókhɛ́n Judasi ali yíchwɛmán áwɔ́-mɔn hrómɛn lephan bɛn thandi. Ápasá bhróbhrobhé khwɛn khókhríyan le ńyá ha mɔ́n mɛn gɛ thá ɔ́nmɔn bha. Ló ápasá lókɔn, nphahamán-óthemánhɔn, bidíyɛ́nmán le mrɔ́khómán ɔ́nmɔn nɔn achɛ wo bha. 44Judasi khɛ́n ehɔ́n Jezwi phɛ́lí, lie wo lóyí ánman tɛ́ khɛ́n ábha lie wo lephan ali Jezwi: “Ló mɛ́n nkɛé lephan khɛ́n mɛn mán dɔn mɛ́n ɔn, mɛ́n nɔn ńni lephan hɔ́n énɛn. Ɔ́n khwɛ tho, ló ɔ́n hɔ́n-ɛn kpɛ́ɛ́n ɔ́nmɔn lo.” 45Lóka Judasi di lóne, ńti gbali Jezwi, ló ńche nkɛ:
– Yíliéwo!
Lótɛ ńdɔn nkɛ mɛ́n. 46Krɛnnɛ́n khwa Jezwi tho ló wo hɔn nkɛ. 47Khɛ́n néphan aya lóne, wo hromɛn lephan bɛn ti mɛ́n khókhríyan san, ló ńjan nphaháwo bhrɔ́khó hwan nɛnkhwɛ́nwo njɛ. 48Ló Jezwi bhi nkɔn sa:
– Wú áyɔn se salé ɔ́n khwɛ́n khókhríyan le ńyá ɔ́nmɔn há mɔ́n mɛn bha hɔ́n mɛn, sa mɛn ni khokhroháwo a? 49Mɛn ma hɔ́n thethé ákakhúnbrɛn, mɛn nie yí Yankan-khúthé, khɛ́n ɔ́n ne hɔn mɛn. Áyí ábha chɛ́sé ábhwe khúnbrɛn khɛ́n otɔ abha Yankan hrɔ́ hrómɛn osímɛ́n ɔn, lóyí nɔn etɛ́.
50Lótɛ yíchwɛmán khúnbrɛn yɔ́-ɛ kalé wa féne.
51Sɛbhri bɛn bho Jezwi mánji pɛ élo, ńkhwa kedé. Wo khwɛ tho, 52khɛ́n ńphia mɛ́n kedé nkalé, ló ńwa ndígban mɛn mosi no.
Wo hɔn Jezwi lo Kwabhɔ́mán khónkhó hɛ́nmɛn
(Ɔ́n wú Mat 26.57-68; Ɔ́n wú Lwik 22.54-55,63-71; Ɔ́n wú Jan 18.13-14,19-24)
53Wo hɔn Jezwi ɔ́nmɔn lo nphaháwo bhrɔ́khó hwan, lóne nɔn nphahamán-óthemánhɔn, mrɔ́khómán le bidíyɛ́nmán ɔ́nmɔn bhurɛhɛ́n. 54Piɛ gɛ Jezwi thá, khɛ́n ńma mánji-áan, ńnɛ ka nphaháwo bhrɔ́khó hwan ngbophro, ló ńgɛ sibómán ɔ́nmɔn chre lóne ánkhrwe tɛn.
55Nphahamán-óthemánhɔn le Kwabhɔ́mán khónkhó khúnbrɛn ɔ́nmɔn énɛn ábhwe bɛn wo bhá phɛ́ há Jezwi tho, ló wo wúsi khɔ́ bhɔ́-ɛ pɔn, ló wo wɛn, khɛ́n wo le gɛ. 56Mímí néphan búdúbúdú elí ndalefɛ phɛ́ bhwe há Jezwi tho, khɛ́n wo mɛ́n le sí wo ndalefɛlí hrómɛn. 57Néphan dɔnbɛn lɔ cu fe lo ephɛ́ bhwe há nkɛ tho, ló wo étɔ sa:
58– Lo phrɛ ye mɛ́n nkɛé: “Mɛ́n man ca Yankan-nkhú lókɔn khɛ́n néphan bho mɔ́n than khwálé, ló ńcíbhí bhwaliá tɛɛ, mɛ́n man thán nánkhɛ, ale li néphanmiɔn mɔ́n mɛn ékɛ athan.”
59Lóbhwetɔ́ lókɔn brɛ tho lɔ, wo mɛ́n le sí.
60Lótɛ nphaháwo bhrɔ́khó chánfe ya néphan khúnbrɛn hɛ́nmɛn, ló ánmi Jezwi sa:
– Ábhwe khúnbrɛn lókɔn néphan étɔ há hɛ tho ɔn, wú álepɛ bhwe ɛkɛ ɛ́tɔ?
61Khɛ́n Jezwi lethíí, ńnɛn tɔ bhwe brɛ ka. Lótɛ nphaháwo bhrɔ́khó cu bhi nkɛ sa:
– Wú ɛli Mesi, Yankan khɛ́n ali lephan wo ebhó nguhá se mɛ́n Bhi?
62Ló Jezwi dɛn lée:
– Mɛn tɛɛ é, ló hɔ́n khúnbrɛn ɔ́n ma wú Lephan Mi chré Yankan sɛ́npɛ́wo liémɔn si; ló ɔ́n ma wui ánman khɔ́ mɔngú mɔngú hrómɛn lɔ chántho má.
63Lótɛ nphaháwo bhrɔ́khó ti mɛ́n ntráliɛ́ thwɛ, ló ńtɔ sa:
– Ébí ndalefɛ nankhɛ lo cu lo énɛn npɔ ɛ? 64Khɔ́ ɔ́n ye mɛ́n bhwe ántɔ há Yankan tho. Bí hɛ́nphe hɔ́n ebhú lóphɔ ɛ?
Ló wo khúnbrɛn wo tɔ gbée salé Jezwi li pɔn, ló áyɔn salé owɛ́n.
65Néphan fe abha wo hromɛn ya lóne éphu nkɛ mísɛ́-ndu hɛ́nmɛn, wo bho yí mrwɛn nkɛ hɛ́nmɛn khúnbrɛn, wo édwan nkɛ nyokho, ló wo ébhi nkɛ sa:
– Lephan adi hɛ yí ɛtɔ obhá!
Ló ngbumán lɔ hɔn Jezwi pɛ ébhra ngbaphrá.
Piɛ ésamɛ́n lée mɛ́n nɛ́n yɛn Jezwi
(Ɔ́n wú Mat 26.69-75; Ɔ́n wú Lwik 22.56-62; Ɔ́n wú Jan 18.15-18,25-27)
66Lóka Piɛ bha ngbophro ntɔ́nyán, lóka nɔn nphaháwo bhrɔ́khó hwan nɛnkhwɛ́nya bɛn bha lóne. 67Ńwu Piɛ chre ékhrwe tɛn, ńnɛn nkɛ kɔ́nkɔ́nkɔ́n, ló ńtɔ sa:
– Hɛ lɔ ɛbha Jezwi Nazarɛ́thi sɛ lókɔn phɔ.
68Khɛ́n Piɛ nkɛé chɛchɛ, ló ńtɔ sa:
– Mɛn nɛn wu a, saji mɛn nɛ́n yɛ́n lóbhwe yábhɛ brɛ ɛ́nɛn ɛtɔ.
Ló ńsákhɔ khúmɛ́n thándi ngbophro. Lótɛ kɔsɔ bɛn thɔn. 69Khɛ́n nɛnkhwɛ́nya wui, ló ńcu ánkranmán néphan akhwa lóne lée:
– Sɛ lókɔn lɔ li Jezwi yíchwɛmán hrómɛn lephan bɛn.
70Khɛ́n Piɛ cu tɔ npɔ sa chɛchɛ. Ámɔn kpɛ́bɛn, lótɛ néphan akhwa lóne lɔ cu kranman Piɛ sa:
– Mímí nbrɛn, ɛbha wo hromɛn, átɛsalé hɛ lɔ ɛchan Galile.
71Lótɛ Piɛ nkɛé:
– Kasé mɛn nítan, tɛmɛ Yankan owɛ́n mɛn! Mɛɛ́n mɔlí phɔ tɔ salé mɛn nɛn yɛn lephan lókɔn khɛ́n hɔ́n étɔ mɛ́n bhwe.
72Lóka lókɔn hromɛn brɛ nɔn kɔsɔ bɛn thɔn si ńdɔn mɔn, ló Jezwi bhwe aphrɛ krɛnmɛn ɔn, ádi mwanhɛ́n, lónɔn ali salé: “Kɔsɔ bha lé thɔ́n lí ndɔn mɔn, lókhɛ́n ɛ́bhá tɔ ńmɛ́n khrákhrá mɛn ndɔn bhwaliá salé ɛle yɛn mɛn.” Lótɛ anthɔ́n hɛ́ndu.
Ebrié New Testament © Bible Society of Côte D'Ivoire, 1996.