LWIKHI 5
5
Jezwi che mɛ́n yíchwɛmán athwasi
(Ɔ́n wú Mat 4.18-22; Ɔ́n wú Mák 1.16-20)
1Cíbɛn Jezwi ya Jenezarɛ́thi duphé mɛ́n, ápasá énɛn ayé Yankan bhwe, ló wo ephísi jékhalí nkɛ. 2Ńwu ahran mɔn khwa dumɛ́n, ló dukúmán chan lóhrómɛn thandi ya echó wo fɛ́n. 3Jezwi ka ló ali Simɔn ékɛ hromɛn, ńchɛ nkɛ fi lo tho kpɛɛ́, ńchethé ló ánnie ápasá yí.
4Lóka mɛ́n mɛ́n ka, ló ńkránman Simɔn sa:
– Tɛmɛ ɛfi hran ló tho ńdu jwan mɛn, ló ɔ́n ka fɛ́n.
5Lókhɛ́n Simɔn kranman nkɛ sa:
– Hwánthe, ńmréci-áan nɔn lo chan ka fɛ́n kábrɛ kábrɛ ádi kanɛn, khɛ́n lo le hɔn yíɛkɛ bhrɔ́ɔ́. Lókhɛ́n hɛ bhwe ɛtɔ hɛ́nthé, mán ka fɛ́n.
6Wo ka fɛ́n, wo hɔn ncɔn búdúbúdú, ló ńfɛ́n éthwɛ. 7Wo le wo jɔn abha ahran lójɔ mɛn mɔ́n, sa nkɔn bha dɔnmán wo mɔ́n. Wo bha, wo ha ncɔn si ahran mɔ́nmɔn, lótɛ ahran énɛn asɔ́n. 8Simɔn Piɛ ka awu lóyí lókɔn, ńmɔ ntráhɛ́nlé Jezwi hɛ́nmɛn, ló ántɔ sa:
– Hwánthe, chan mɛn phɔ féne, lée mɛn ni newo!
9Ńcɔn búdúbúdú wo hɔn hɛ́nthé, Simɔn esókhú, ló néphan abha mɛ́n phɔ lɔ esókhú. 10Lóyí yábhɛ brɛ atɛ Simɔn mɛ́n jɔn, Jakhi le Jan ali Zebede miɔn abha Simɔn phɔ e. Khɛ́n Jezwi kranman Simɔn sa:
– Simɔn ɛle sókhú, khɛ́n achan ncɛ́n élo ɔn, néphan du nɔn ɛ́bha kú sé mɛn.
11Wo hɔn ahran lo dilé, wo yɔ yí khúnbrɛn khwa, ló wo gɛ Jezwi thá.
Jezwi tɛ khokhóbhé-phɔ́wo bɛn phɔ jan
(Ɔ́n wú Mat 8.1-4; Ɔ́n wú Mák 1.40-45)
12Lóka Jezwi bha ákhúbhɛ́ bɛn, lótɛ lephan bɛn khɛ́n khokhóbhé do mɛ́n phɔ khúnbrɛn lɔ bha lóne. Mɛ́n ka ńwu Jezwi, ńhalé nkɛ hɛ́nmɛn, ńhɔn mɛ́n hɛ́nmɛn dɔlé ánna nkɛ, ló ántɔ sa:
– Hwánthe, kasé ɛpɔ, ɛgɛ tɛ́ mɛn phɔ chán.
13Jezwi tia mɔ́n pa nkɛ pɛ, ló ńtɔ sa:
– Mɛn pɔ, tɛmɛ hɛ phɔ ochán!
Lóyámɛ́n, khokhóbhé ya sɛ lókɔn phɔ lia.
14Ló Jezwi di nkɛ bi sa:
– Ɛlé tɔ lóbhwe sé lephan brɛ oyé bhrɔ́ɔ́. Khɛ́n ɛhɔ́n hɛ nbrɛn lo lie nphaháwo owú hɛ phɔ si akhɔ chan. Lómánji ɛha ńpha khɛ́n Moyízi tɔ lóbhwe, ló ochɛ́sé néphan khúnbrɛn oyɛ́n salé hɛ phɔ jan.
15Lótɛ khɛ́n Jezwi lehɛ́n pi si khúnbrɛn, ápasá bhróbhrobhé gba bhurɛhɛ́n sa nkɛ tɔ bhwe sé wo yé, ló nkɛ tɛ́ wo phɔ jan. 16Khɛ́n Jezwi lo ásibɛn ajanbu ká njɛ, ló ánna Yankan.
Jezwi tɛ lephan bɛn abhu kathé phɔ jan
(Ɔ́n wú Mat 9.1-8; Ɔ́n wú Mák 2.1-12)
17Cíbɛn Jezwi bháne élie yí. Fariziɛnnɛ́n le bidíyɛ́nmán ɔ́nmɔn bhá chre nkɛ njɛ. Wo chan Galile le Jude gotho khúbhɛ́ chɛ́-nchɛ́hɔn khúnbrɛn hrómɛn bha, ló wo chan Jeruzalɛ́mɛn khúbhɛ́ lɔ bha. Yankan sɛ́npɛ́ bha Jezwi phɔ, áchɛ antɛ́ lɔ́phɔmán phɔ jan. 18Néphan dɔnbɛn hɔn lephan bɛn abhu kathé khɛ́n ala ntɛ́trɛ tho ɔ́nmɔn bha. Wo énɛn lósi wo khɔ́ hɔ́n nkɛ ká khúthé, ló wo hɔ́n nkɛ lá Jezwi hɛ́nmɛn. 19Khɛ́n néphan búdúbúdú aya hɛ́nthé, wo lé wúsi khɔ́ hɔ́n nkɛ káne. Lóhɛ́nthé wo pha lo nkhú tho, wo dɔn nkhú tho thwa, ló wo hɔn lephan abhu kathé le mɛ́n ntɛ́trɛ ɔ́nmɔn khɔ lósi wo dɔn thwa dithé Jezwi hɛ́nmɛn ápasá thethé. 20Jezwi ka awu wo mímíbhú wo pɛ, ló ńtɔ se lɔ́phɔ́wo sa:
– Mɛn jɔ, oyɔ hɛ ne phɔ́ hɛ.
21Bidíyɛ́nmán le Fariziɛnnɛ́n ɔ́nmɔn ebhú hɛ́nphe, ló wo étɔ sa:
– Lólephan bɛn li lókɔn étɔ bhwe nkpakprá mɛn há Yankan tho yábhɛ nɛn ɛ? Abɛn gɛ yɔ́ ne phɔ́ lephan ɛ? Nkɛé Yankan míbrɛ pán gɛ tɛ́!
22Lónian mɛn khɛ́n Jezwi yɛn wo hɛ́nphe wo ebhú, ló ńtɔ sa:
– Bítɛ khɛ́n hɔ́n ebhú hɛ́nphe yábhɛ nɛn ɛ? 23Ló óbha tɔ sé lephan lée: “Oyɔ hɛ ne phɔ́ hɛ”, le ló óbha kranmán hɛ lée: “Chanfe tho, ló ɛnɛnsi ɔn” lóbɛn nɔn akhɔnman ɛ? 24Khɛ́n mɛɛ́n nɛn mɛn chɛ́ hɔ́n yɛ́n salé, Lephan Mi pɛ mɔ́nsi áyíta lókɔn tho áyɔ́ ne phɔ́ lephan.
Ló ńkránman lephan abhu kathé lée:
– Ɛchánfe hɔ́n hɛ ntɛ́trɛ, ló ɛló hɛ hwan!
25Lóyámɛ́n, lephan lókɔn chanthé fe ápasá khúnbrɛn hɛ́nmɛn, ńhɔn mɛ́n ntɛ́trɛ khɛ́n ńna lótho, ńmósi annó mɛ́n hwan, ló ánnri Yankan hwa ɔ́nmɔn no. 26Lóbhwe etán néphan khúnbrɛn hɛ́nmɛn, wo élri Yankan hwa ákhúsó mɛn, ló wo étɔ sa:
– Ncɛ́n lo wu áyí mwámwá khónkhó!
Jezwi che Levi
(Ɔ́n wú Mat 9.9-13; Ɔ́n wú Mák 2.13-17)
27Lómánji, Jezwi thandi, ló ńwu la-nphodówo bɛn óche Levi achre mɛ́n júmán mɛ́n, ló Jezwi kranman nkɛ sa:
– Gɛ mɛn thá!
28Levi chanfe, ńyɔ mɛ́n yí khúnbrɛn khwa, ló ńgɛ nkɛ thá.
29Levi hɛn nɛn khóo bɛn se Jezwi mɛ́n hwan bháthó, ló la-nphodómán búdúbúdú le néphan nankhɛ ɔ́nmɔn bha gɛ wo ɔ́nmɔn khwa tábrɛ mɛ́n. 30Fariziɛnnɛ́n le bidíyɛ́nmán ɔ́nmɔn khɛ́n aya lómɛ́n édo thɛ́nyan, ló wo ébhi Jezwi yíchwɛmán lée:
– Bítɛ khɛ́n ɔ́n gɛ la-nphodómán le néphan phromɛn phromɛn ɔ́nmɔn khwa hɔ́n elí, khɛ́n hɔ́n enán ɛ?
31Ló Jezwi kranman nkɔn sa:
– Néphan áphɔ hɔn khrákhrá ɔn, wo-ɛ wo lé nɛn phɔtɛ́wo, lókhɛ́n lɔ́phɔmán nɔn ánɛn phɔtɛ́wo. 32Léli néphan apriman nɔn mɛn ma mɛɛ́n che, lókhɛ́n néphan phromɛn phromɛn, ochɛ́sé wo jrɛn wo yítɛ́.
Jezwi le ńmɛ́nji bhwetɔ́
(Ɔ́n wú Mat 9.14-17; Ɔ́n wú Mák 2.18-22)
33Lótɛ néphan ékranmán Jezwi sa:
– Jan yíchwɛmán jimɛ́n khúnkhu, ló wo la Yankan. Fariziɛnnɛ́n yíchwɛmán lɔ tɛ́ lóyábhɛ brɛ, khɛ́n hɛ yíchwɛmán-ɛ lí, ló wo nán.
34Ló Jezwi bhi nkɔn sa:
– Néphan odo bha ákhúchre mɛ́n, kasé bhiepɔ nca bha wo phɔ ntɔ́nyán ɔn, wú hɔ́n ebhú salé lóka lókɔn hromɛn ɔn, ógɛ di wo bi lée wo le lí nɛn? Chɛchɛ! 35Khɛ́n ácí ebhá, lóka lókɔn óbha hɔ́n bhiepɔ nca yɛn wo thethé, lóka lókɔn nɔn wo bhá jimɛ́n.
36Jezwi cu bhu yandran lókɔn lɔ se wo, ló ńtɔ sa:
– Álepɛ lephan ábha jan ádɛgɔn pɔ́pɔ́ phɛ́n lá ádɛgɔn lɔ́lɔ́. Kasé ɛle hamwanhɛ́n, ádɛgɔn pɔ́pɔ́ thwɛ́ yɛn, lósi akhɔ tɛ ɔn, ádɛgɔn pɔ́pɔ́ phɛ́n le ádɛgɔn lɔ́lɔ́ ɔ́nmɔn lé gɛ bhá sibrɛ. 37Lóyábhɛ brɛ, álepɛ lephan ábha hɔ́n divɛn pɔ́pɔ́ há ńpɛ́ nɔ́nɔ́ hrómɛn. Kasé ɛle hamwanhɛ́n, divɛn pɔ́pɔ́ bha chɛ́ ńpɛ́ nran, divɛn sakhwálé, ló ńpɛ́ nɔ́nɔ́ lɔ bhɔ́. 38Óle tɛ́ nɛn a! Divɛn pɔ́pɔ́, ohɔ́n há ńpɛ́ pɔ́-npɔ́ hrómɛn! 39Kasé lephan nan divɛn lɔ́lɔ́, ánnɛn pɔ salé annán divɛn pɔ́pɔ́. Mímí, obháne ótɔlé: “Lólɔ́lɔ́ nɔn ayɔn banban.”
Ebrié New Testament © Bible Society of Côte D'Ivoire, 1996.
LWIKHI 5
5
Jezwi che mɛ́n yíchwɛmán athwasi
(Ɔ́n wú Mat 4.18-22; Ɔ́n wú Mák 1.16-20)
1Cíbɛn Jezwi ya Jenezarɛ́thi duphé mɛ́n, ápasá énɛn ayé Yankan bhwe, ló wo ephísi jékhalí nkɛ. 2Ńwu ahran mɔn khwa dumɛ́n, ló dukúmán chan lóhrómɛn thandi ya echó wo fɛ́n. 3Jezwi ka ló ali Simɔn ékɛ hromɛn, ńchɛ nkɛ fi lo tho kpɛɛ́, ńchethé ló ánnie ápasá yí.
4Lóka mɛ́n mɛ́n ka, ló ńkránman Simɔn sa:
– Tɛmɛ ɛfi hran ló tho ńdu jwan mɛn, ló ɔ́n ka fɛ́n.
5Lókhɛ́n Simɔn kranman nkɛ sa:
– Hwánthe, ńmréci-áan nɔn lo chan ka fɛ́n kábrɛ kábrɛ ádi kanɛn, khɛ́n lo le hɔn yíɛkɛ bhrɔ́ɔ́. Lókhɛ́n hɛ bhwe ɛtɔ hɛ́nthé, mán ka fɛ́n.
6Wo ka fɛ́n, wo hɔn ncɔn búdúbúdú, ló ńfɛ́n éthwɛ. 7Wo le wo jɔn abha ahran lójɔ mɛn mɔ́n, sa nkɔn bha dɔnmán wo mɔ́n. Wo bha, wo ha ncɔn si ahran mɔ́nmɔn, lótɛ ahran énɛn asɔ́n. 8Simɔn Piɛ ka awu lóyí lókɔn, ńmɔ ntráhɛ́nlé Jezwi hɛ́nmɛn, ló ántɔ sa:
– Hwánthe, chan mɛn phɔ féne, lée mɛn ni newo!
9Ńcɔn búdúbúdú wo hɔn hɛ́nthé, Simɔn esókhú, ló néphan abha mɛ́n phɔ lɔ esókhú. 10Lóyí yábhɛ brɛ atɛ Simɔn mɛ́n jɔn, Jakhi le Jan ali Zebede miɔn abha Simɔn phɔ e. Khɛ́n Jezwi kranman Simɔn sa:
– Simɔn ɛle sókhú, khɛ́n achan ncɛ́n élo ɔn, néphan du nɔn ɛ́bha kú sé mɛn.
11Wo hɔn ahran lo dilé, wo yɔ yí khúnbrɛn khwa, ló wo gɛ Jezwi thá.
Jezwi tɛ khokhóbhé-phɔ́wo bɛn phɔ jan
(Ɔ́n wú Mat 8.1-4; Ɔ́n wú Mák 1.40-45)
12Lóka Jezwi bha ákhúbhɛ́ bɛn, lótɛ lephan bɛn khɛ́n khokhóbhé do mɛ́n phɔ khúnbrɛn lɔ bha lóne. Mɛ́n ka ńwu Jezwi, ńhalé nkɛ hɛ́nmɛn, ńhɔn mɛ́n hɛ́nmɛn dɔlé ánna nkɛ, ló ántɔ sa:
– Hwánthe, kasé ɛpɔ, ɛgɛ tɛ́ mɛn phɔ chán.
13Jezwi tia mɔ́n pa nkɛ pɛ, ló ńtɔ sa:
– Mɛn pɔ, tɛmɛ hɛ phɔ ochán!
Lóyámɛ́n, khokhóbhé ya sɛ lókɔn phɔ lia.
14Ló Jezwi di nkɛ bi sa:
– Ɛlé tɔ lóbhwe sé lephan brɛ oyé bhrɔ́ɔ́. Khɛ́n ɛhɔ́n hɛ nbrɛn lo lie nphaháwo owú hɛ phɔ si akhɔ chan. Lómánji ɛha ńpha khɛ́n Moyízi tɔ lóbhwe, ló ochɛ́sé néphan khúnbrɛn oyɛ́n salé hɛ phɔ jan.
15Lótɛ khɛ́n Jezwi lehɛ́n pi si khúnbrɛn, ápasá bhróbhrobhé gba bhurɛhɛ́n sa nkɛ tɔ bhwe sé wo yé, ló nkɛ tɛ́ wo phɔ jan. 16Khɛ́n Jezwi lo ásibɛn ajanbu ká njɛ, ló ánna Yankan.
Jezwi tɛ lephan bɛn abhu kathé phɔ jan
(Ɔ́n wú Mat 9.1-8; Ɔ́n wú Mák 2.1-12)
17Cíbɛn Jezwi bháne élie yí. Fariziɛnnɛ́n le bidíyɛ́nmán ɔ́nmɔn bhá chre nkɛ njɛ. Wo chan Galile le Jude gotho khúbhɛ́ chɛ́-nchɛ́hɔn khúnbrɛn hrómɛn bha, ló wo chan Jeruzalɛ́mɛn khúbhɛ́ lɔ bha. Yankan sɛ́npɛ́ bha Jezwi phɔ, áchɛ antɛ́ lɔ́phɔmán phɔ jan. 18Néphan dɔnbɛn hɔn lephan bɛn abhu kathé khɛ́n ala ntɛ́trɛ tho ɔ́nmɔn bha. Wo énɛn lósi wo khɔ́ hɔ́n nkɛ ká khúthé, ló wo hɔ́n nkɛ lá Jezwi hɛ́nmɛn. 19Khɛ́n néphan búdúbúdú aya hɛ́nthé, wo lé wúsi khɔ́ hɔ́n nkɛ káne. Lóhɛ́nthé wo pha lo nkhú tho, wo dɔn nkhú tho thwa, ló wo hɔn lephan abhu kathé le mɛ́n ntɛ́trɛ ɔ́nmɔn khɔ lósi wo dɔn thwa dithé Jezwi hɛ́nmɛn ápasá thethé. 20Jezwi ka awu wo mímíbhú wo pɛ, ló ńtɔ se lɔ́phɔ́wo sa:
– Mɛn jɔ, oyɔ hɛ ne phɔ́ hɛ.
21Bidíyɛ́nmán le Fariziɛnnɛ́n ɔ́nmɔn ebhú hɛ́nphe, ló wo étɔ sa:
– Lólephan bɛn li lókɔn étɔ bhwe nkpakprá mɛn há Yankan tho yábhɛ nɛn ɛ? Abɛn gɛ yɔ́ ne phɔ́ lephan ɛ? Nkɛé Yankan míbrɛ pán gɛ tɛ́!
22Lónian mɛn khɛ́n Jezwi yɛn wo hɛ́nphe wo ebhú, ló ńtɔ sa:
– Bítɛ khɛ́n hɔ́n ebhú hɛ́nphe yábhɛ nɛn ɛ? 23Ló óbha tɔ sé lephan lée: “Oyɔ hɛ ne phɔ́ hɛ”, le ló óbha kranmán hɛ lée: “Chanfe tho, ló ɛnɛnsi ɔn” lóbɛn nɔn akhɔnman ɛ? 24Khɛ́n mɛɛ́n nɛn mɛn chɛ́ hɔ́n yɛ́n salé, Lephan Mi pɛ mɔ́nsi áyíta lókɔn tho áyɔ́ ne phɔ́ lephan.
Ló ńkránman lephan abhu kathé lée:
– Ɛchánfe hɔ́n hɛ ntɛ́trɛ, ló ɛló hɛ hwan!
25Lóyámɛ́n, lephan lókɔn chanthé fe ápasá khúnbrɛn hɛ́nmɛn, ńhɔn mɛ́n ntɛ́trɛ khɛ́n ńna lótho, ńmósi annó mɛ́n hwan, ló ánnri Yankan hwa ɔ́nmɔn no. 26Lóbhwe etán néphan khúnbrɛn hɛ́nmɛn, wo élri Yankan hwa ákhúsó mɛn, ló wo étɔ sa:
– Ncɛ́n lo wu áyí mwámwá khónkhó!
Jezwi che Levi
(Ɔ́n wú Mat 9.9-13; Ɔ́n wú Mák 2.13-17)
27Lómánji, Jezwi thandi, ló ńwu la-nphodówo bɛn óche Levi achre mɛ́n júmán mɛ́n, ló Jezwi kranman nkɛ sa:
– Gɛ mɛn thá!
28Levi chanfe, ńyɔ mɛ́n yí khúnbrɛn khwa, ló ńgɛ nkɛ thá.
29Levi hɛn nɛn khóo bɛn se Jezwi mɛ́n hwan bháthó, ló la-nphodómán búdúbúdú le néphan nankhɛ ɔ́nmɔn bha gɛ wo ɔ́nmɔn khwa tábrɛ mɛ́n. 30Fariziɛnnɛ́n le bidíyɛ́nmán ɔ́nmɔn khɛ́n aya lómɛ́n édo thɛ́nyan, ló wo ébhi Jezwi yíchwɛmán lée:
– Bítɛ khɛ́n ɔ́n gɛ la-nphodómán le néphan phromɛn phromɛn ɔ́nmɔn khwa hɔ́n elí, khɛ́n hɔ́n enán ɛ?
31Ló Jezwi kranman nkɔn sa:
– Néphan áphɔ hɔn khrákhrá ɔn, wo-ɛ wo lé nɛn phɔtɛ́wo, lókhɛ́n lɔ́phɔmán nɔn ánɛn phɔtɛ́wo. 32Léli néphan apriman nɔn mɛn ma mɛɛ́n che, lókhɛ́n néphan phromɛn phromɛn, ochɛ́sé wo jrɛn wo yítɛ́.
Jezwi le ńmɛ́nji bhwetɔ́
(Ɔ́n wú Mat 9.14-17; Ɔ́n wú Mák 2.18-22)
33Lótɛ néphan ékranmán Jezwi sa:
– Jan yíchwɛmán jimɛ́n khúnkhu, ló wo la Yankan. Fariziɛnnɛ́n yíchwɛmán lɔ tɛ́ lóyábhɛ brɛ, khɛ́n hɛ yíchwɛmán-ɛ lí, ló wo nán.
34Ló Jezwi bhi nkɔn sa:
– Néphan odo bha ákhúchre mɛ́n, kasé bhiepɔ nca bha wo phɔ ntɔ́nyán ɔn, wú hɔ́n ebhú salé lóka lókɔn hromɛn ɔn, ógɛ di wo bi lée wo le lí nɛn? Chɛchɛ! 35Khɛ́n ácí ebhá, lóka lókɔn óbha hɔ́n bhiepɔ nca yɛn wo thethé, lóka lókɔn nɔn wo bhá jimɛ́n.
36Jezwi cu bhu yandran lókɔn lɔ se wo, ló ńtɔ sa:
– Álepɛ lephan ábha jan ádɛgɔn pɔ́pɔ́ phɛ́n lá ádɛgɔn lɔ́lɔ́. Kasé ɛle hamwanhɛ́n, ádɛgɔn pɔ́pɔ́ thwɛ́ yɛn, lósi akhɔ tɛ ɔn, ádɛgɔn pɔ́pɔ́ phɛ́n le ádɛgɔn lɔ́lɔ́ ɔ́nmɔn lé gɛ bhá sibrɛ. 37Lóyábhɛ brɛ, álepɛ lephan ábha hɔ́n divɛn pɔ́pɔ́ há ńpɛ́ nɔ́nɔ́ hrómɛn. Kasé ɛle hamwanhɛ́n, divɛn pɔ́pɔ́ bha chɛ́ ńpɛ́ nran, divɛn sakhwálé, ló ńpɛ́ nɔ́nɔ́ lɔ bhɔ́. 38Óle tɛ́ nɛn a! Divɛn pɔ́pɔ́, ohɔ́n há ńpɛ́ pɔ́-npɔ́ hrómɛn! 39Kasé lephan nan divɛn lɔ́lɔ́, ánnɛn pɔ salé annán divɛn pɔ́pɔ́. Mímí, obháne ótɔlé: “Lólɔ́lɔ́ nɔn ayɔn banban.”
Ebrié New Testament © Bible Society of Côte D'Ivoire, 1996.